Yeremia

44 Wiemɔ ni ba Yeremia ŋɔɔ kɛhã Yudafoi fɛɛ ni yɔɔ Ejipt shikpɔŋ lɛ nɔ,+ mɛi ni yɔɔ Migdol,+ kɛ Tapanes,+ kɛ Nof,*+ kɛ Patros+ shikpɔŋ lɛ nɔ lɛ nɛ: 2 “Nɔ ni Yehowa, taiatsɛ lɛ, Israel Nyɔŋmɔ lɛ kɛɛ nɛ, ‘Nyɛna saji fɔji fɛɛ ni mikɛba Yerusalem+ kɛ Yuda maji lɛ fɛɛ anɔ lɛ, ni ŋmɛnɛ lɛ, amɛkamɔ shi koikoi, ni mɔ ko mɔ ko ehiii amɛmli.+ 3 Mifee amɛ nakai yɛ nifɔjianii ni amɛfee kɛwo mimli la lɛ ahewɔ, ejaakɛ amɛyaa ni amɛyashãa afɔlei,+ ni amɛsɔmɔɔ nyɔŋmɔi krokomɛi ni amɛ, kɛ nyɛ kɛ nyɛtsɛmɛi lɛ leee.+ 4 Mitsuɔ mitsuji gbalɔi lɛ fɛɛ kɛbaa nyɛŋɔɔ, mitsuɔ amɛ daa kɛ daa,* ni amɛkɛɔ akɛ, “Nyɛfainɛ nyɛkafea nyaŋemɔ nii ni minyɛɔ nɛɛ.”+ 5 Shi amɛbooo toi ni amɛbaaa amɛtoi shi koni amɛku amɛsɛɛ kɛje amɛnifɔjianii lɛ ahe koni amɛkashã afɔlei amɛhã nyɔŋmɔi krokomɛi.+ 6 No hewɔ lɛ, afɔse mimlila kɛ mimlifu lɛ ashwie shi ni etso yɛ Yuda maji lɛ amli kɛ Yerusalem gbɛjegbɛi lɛ anɔ, ni amɛtsɔmɔ koikoi kɛ shikpɔŋ ni akɛfeee nɔ ko, tamɔ bɔ ni amɛji ŋmɛnɛ gbi nɛɛ.’+

7 “No hewɔ lɛ, agbɛnɛ nɔ ni Yehowa, Nyɔŋmɔ taiatsɛ lɛ, Israel Nyɔŋmɔ lɛ kɛɛ nɛ, ‘Mɛni hewɔ nyɛkɛ sane fɔŋ kpele baa nyɛ diɛŋtsɛ nyɛnɔ,* koni nuu kɛ yoo, kɛ gbekɛ kɛ abifao fɛɛ hiɛ akpãtã kɛje Yuda, koni ekashwɛ mɔ ko kwraa ehã nyɛ lɛ? 8 Mɛni hewɔ nyɛkɛ nyɛninenaa nitsumɔi lɛ woɔ mimli la ni nyɛshãa afɔlei nyɛhãa nyɔŋmɔi krokomɛi yɛ Ejipt shikpɔŋ ni nyɛtee nyɛyahi nɔ lɛ nɔ? Nyɛhiɛ baakpãtã ni nyɛbaatsɔ nii ni akɛlomɔɔ kɛ ahorabɔɔ nɔ yɛ shikpɔŋ lɛ nɔ jeŋmaji lɛ fɛɛ ateŋ.+ 9 Ani nyɛhiɛ ekpa nyɛtsɛmɛi lɛ anɔfɔŋfeemɔi lɛ, kɛ Yuda maŋtsɛmɛi lɛ anɔfɔŋfeemɔi lɛ,+ kɛ amɛŋamɛi lɛ anɔfɔŋfeemɔi lɛ,+ kɛ nyɛ diɛŋtsɛ nyɛnɔfɔŋfeemɔi lɛ, kɛ nyɛŋamɛi lɛ anɔfɔŋfeemɔi lɛ+ ni nyɛfee yɛ Yuda shikpɔŋ lɛ nɔ kɛ Yerusalem gbɛjegbɛi lɛ anɔ lɛ anɔ? 10 Amɛbako amɛhe shi* kɛbashi ŋmɛnɛ gbi nɛɛ, ni amɛsheko gbeyei hu,+ ni amɛnyiɛko yɛ mimla lɛ kɛ mikitãi ni mikɛshwie nyɛ kɛ nyɛtsɛmɛi lɛ ahiɛ lɛ amli.’+

11 “No hewɔ lɛ, nɔ ni Yehowa, taiatsɛ lɛ, Israel Nyɔŋmɔ lɛ kɛɛ nɛ, ‘Naa, mitswa mifai shi akɛ mikɛ sane fɔŋ baaba nyɛnɔ koni makpãtã Yuda fɛɛ hiɛ. 12 Ni maŋɔ Yudabii ni eshwɛ ni etswa amɛfai shi akɛ amɛbaaya Ejipt shikpɔŋ lɛ nɔ amɛyahi jɛmɛ lɛ, ni amɛ fɛɛ amɛhiɛ baakpãtã yɛ Ejipt shikpɔŋ lɛ nɔ.+ Amɛbaanyɔ yɛ klante naa, ni hɔmɔ baakpãtã amɛhiɛ; kɛjɛ mɔ bibioo fe fɛɛ nɔ kɛyashi mɔ wulu fe fɛɛ nɔ, ni klante kɛ hɔmɔ baagbe amɛ. Ni amɛbaatsɔ nii ni akɛlomɔɔ, nii ni hãa mɔ he jɔ̃ɔ ehe, kɛ loomɔ, kɛ ahorabɔɔ nɔ.+ 13 Magbala mɛi ni yɔɔ Ejipt shikpɔŋ lɛ nɔ lɛ atoi tamɔ bɔ ni mikɛ klante, kɛ hɔmɔ, kɛ tsɛŋemɔ hela ni gbeɔ mɔ lɛ gbala Yerusalem toi lɛ.+ 14 Ni Yudabii ni eshwɛ ni etee amɛyahi Ejipt shikpɔŋ lɛ nɔ lɛ ejeŋ mli ni amɛnáŋ wala hu koni amɛku amɛsɛɛ kɛba Yuda shikpɔŋ lɛ nɔ. Amɛbaashwe akɛ* amɛbaaku amɛsɛɛ ni amɛbahi jɛmɛ, shi amɛkuŋ amɛsɛɛ, ja amɛteŋ mɛi fioo ni je mli lɛ kɛkɛ.’”

15 Kɛkɛ ni hii fɛɛ ni le akɛ amɛŋamɛi eshã afɔlei amɛhã nyɔŋmɔi krokomɛi, kɛ amɛŋamɛi ni damɔ jɛmɛ lɛ fɛɛ, asafo kpele diɛŋtsɛ, kɛ maŋbii fɛɛ ni yɔɔ Ejipt shikpɔŋ lɛ nɔ+ yɛ Patros+ lɛ here Yeremia nɔ akɛ: 16 “Wɔboŋ wiemɔi ni owie otsɔɔ wɔ yɛ Yehowa gbɛ́i mli lɛ toi. 17 Moŋ lɛ, wɔbaaye wiemɔi fɛɛ ni wɔnaabui ewie lɛ anɔ, ni wɔbaashã afɔlei wɔhã Ŋwɛi Maŋnyɛ* lɛ, ni wɔbaafɔse dãa afɔlei wɔshwie shi wɔhã lɛ,+ tamɔ bɔ ni wɔ, kɛ wɔtsɛmɛi lɛ, kɛ wɔmaŋtsɛmɛi lɛ, kɛ wɔlumɛi lɛ fee yɛ Yuda maji lɛ anɔ kɛ Yerusalem gbɛjegbɛi lɛ anɔ be ni wɔtɔrɔ kɛ blodo* ni wɔná nii lɛ, be ni wɔnaaa sane fɔŋ ko kwraa lɛ. 18 Kɛjɛ be ni wɔkpa afɔlei shãa kɛ dãa afɔlei afɔsemɔ kɛshishwiemɔ kɛ Ŋwɛi Maŋnyɛ* lɛ hãmɔ nɛɛ, nɔ fɛɛ nɔ he hiaa wɔ, ni klante kɛ hɔmɔ kpãtãa wɔhiɛ.”

19 Yei lɛ hu kɛɛ akɛ: “Ni be ni wɔshãa afɔlei ni wɔfɔseɔ dãa afɔlei wɔshwieɔ shi wɔhãa Ŋwɛi Maŋnyɛ* lɛ, ani wɔwumɛi lɛ leee he eko dani wɔfee afɔleshaa keekii ni su tamɔ Ŋwɛi Maŋnyɛ* lɛ, ni wɔfɔse dãa afɔlei wɔshwie shi wɔhã lɛ lɛ?”

20 Kɛkɛ ni Yeremia kɛɛ maŋbii lɛ fɛɛ, hii lɛ kɛ amɛŋamɛi lɛ, kɛ maŋbii fɛɛ ni kɛ lɛ wieɔ lɛ akɛ: 21 “Afɔlei ni nyɛ, kɛ nyɛtsɛmɛi lɛ, kɛ nyɛmaŋtsɛmɛi lɛ, kɛ nyɛlumɛi lɛ, kɛ shikpɔŋ lɛ nɔ bii lɛ shã yɛ Yuda maji lɛ amli kɛ Yerusalem gbɛjegbɛi lɛ anɔ lɛ+—Yehowa kai, ni amɛba etsui mli! 22 Naagbee lɛ, Yehowa nyɛɛɛ etsui mli emɔ dɔŋŋ yɛ nyɛnifɔjianii lɛ kɛ nyaŋemɔ nii ni nyɛfee lɛ he, ni nyɛshikpɔŋ lɛ tsɔ amaŋfɔ, kɛ nii ni hãa mɔ he jɔ̃ɔ ehe, kɛ loomɔ, ni mɔ ko mɔ ko ehiii nɔ dɔŋŋ, tamɔ bɔ ni eji ŋmɛnɛ gbi nɛɛ.+ 23 Akɛni nyɛshã afɔlei nɛɛ ni nyɛfee esha nyɛshi Yehowa, ni nyɛbooo Yehowa gbee toi ni nyɛyeee emla lɛ, kɛ ekitãi lɛ, kɛ ekaimɔi lɛ anɔ hewɔ ni nɛkɛ sane fɔŋ nɛɛ eba nyɛnɔ nɛɛ, tamɔ bɔ ni eji ŋmɛnɛ gbi nɛɛ.”+

24 Yeremia tee nɔ ekɛɛ maŋbii lɛ fɛɛ kɛ yei lɛ fɛɛ akɛ: “Nyɛboa Yehowa wiemɔ lɛ toi, nyɛ Yudabii fɛɛ ni nyɛyɔɔ Ejipt shikpɔŋ lɛ nɔ. 25 Nɔ ni Yehowa, taiatsɛ lɛ, Israel Nyɔŋmɔ lɛ kɛɛ nɛ, ‘Nɔ ni nyɛ kɛ nyɛŋamɛi lɛ kɛ nyɛnaabui wie lɛ, nyɛkɛ nyɛniji ehã eba mli, ejaakɛ nyɛkɛɛ akɛ: “Bɔ fɛɛ bɔ ni fee lɛ, wɔbaaye shi ni wɔwo akɛ wɔbaashã afɔlei wɔhã Ŋwɛi Maŋnyɛ* lɛ, ni wɔfɔse dãa afɔlei wɔshwie shi wɔhã lɛ lɛ nɔ.”+ Nyɛ, ni ji yei lɛ, bɔ fɛɛ bɔ ni fee lɛ, nyɛbaaye nyɛshiwoi lɛ anɔ, ni nyɛbaafee nɔ ni nyɛwo shi yɛ he lɛ.’

26 “No hewɔ lɛ, nyɛ Yudabii fɛɛ ni nyɛyɔɔ Ejipt shikpɔŋ lɛ nɔ lɛ, nyɛboa Yehowa wiemɔ lɛ toi: ‘“Naa, mikɛ mi diɛŋtsɛ migbɛ́i kpele lɛ ekã kitã,” Yehowa kɛɛ, “akɛ Yuda nuu ko Yuda nuu ko ni kɛɔ akɛ ‘Gbii abɔ ni Nuŋtsɔ Ofe Yehowa hiɛ kã nɛɛ!’+ kɛ migbɛ́i lɛ kãŋ kitã dɔŋŋ+ yɛ Ejipt shikpɔŋ lɛ nɔ fɛɛ. 27 Naa, miishi kpe yɛ amɛhe koni mikɛ sane fɔŋ aba, shi jeee sane kpakpa;+ klante kɛ hɔmɔ baakpãtã Yuda hii fɛɛ ni yɔɔ Ejipt shikpɔŋ lɛ nɔ lɛ ahiɛ kɛyashi amɛbaatã kwraa.+ 28 Mɛi fioo pɛ baaje klante lɛ naa ni amɛku amɛsɛɛ kɛje Ejipt shikpɔŋ lɛ nɔ kɛba Yuda shikpɔŋ lɛ nɔ.+ Kɛkɛ lɛ, Yudabii fɛɛ ni eshwɛ ni ba amɛbahi Ejipt shikpɔŋ lɛ nɔ lɛ baaná ale mɔ ni wiemɔ eba mli, miwiemɔ lɛ jio, amɛnɔ lɛ jio!”’”

29 “‘Ni enɛ baafee okadi kɛhã nyɛ,’ Yehowa kɛɛ, ‘akɛ magbala nyɛtoi yɛ biɛ nɛɛ, koni nyɛná nyɛle akɛ bɔ fɛɛ bɔ ni fee lɛ wiemɔ ni miwie akɛ mikɛ sane fɔŋ baaba nyɛnɔ lɛ baaba mli. 30 Nɔ ni Yehowa kɛɛ nɛ: “Naa, mikɛ Ejipt maŋtsɛ Farao Hofra miiwo ehenyɛlɔi lɛ kɛ mɛi ni miitao ashɔ̃ ewala yɛ edɛŋ lɛ* adɛŋ, tamɔ bɔ ni mikɛ Yuda maŋtsɛ Zedekia wo Babilon maŋtsɛ Nebukadnezar,* ni ji ehenyɛlɔ ni tao ni eshɔ̃ ewala yɛ edɛŋ lɛ* dɛŋ lɛ.”’”+