Ezekiel
41 Kɛkɛ ni ekɛ mi tee jamɔhe lɛ mli hiɛtsu* lɛ mli, ni esusu ehe akulashiŋi lɛ; yɛ afã kome lɛ, amɛlɛɛmɔ ji ninetalɔi* ekpaa, ni yɛ afã kroko lɛ, amɛlɛɛmɔ ji ninetalɔi ekpaa. 2 He ni atsɔɔ kɛboteɔ mli lɛ lɛɛmɔ ji ninetalɔi nyɔŋma, ni gbogboi ni yɔɔ he ni atsɔɔ kɛboteɔ mli lɛ he* lɛ feɔ ninetalɔi enumɔ yɛ afã kome kɛ ninetalɔi enumɔ yɛ afã kroko lɛ. Esusu ekɛlɛ, ni ená ninetalɔi 40, ni elɛɛmɔ hu, ninetalɔi 20.
3 Ebote mli,* ni esusu he ni atsɔɔ kɛboteɔ mli lɛ he akulashiŋ lɛ, ni etilɛ ji ninetalɔi enyɔ, ni he ni atsɔɔ kɛboteɔ mli lɛ lɛɛmɔ ji ninetalɔi ekpaa. Gbogboi ni yɔɔ he ni atsɔɔ kɛboteɔ mli lɛ he lɛ feɔ* ninetalɔi kpawo. 4 No sɛɛ lɛ, esusu tsũ ni hiɛ kwɛɔ jamɔhe lɛ mli hiɛtsu lɛ, ni ekɛlɛ ji ninetalɔi 20, ni elɛɛmɔ ji ninetalɔi 20.+ Ni ekɛɛ mi akɛ: “He Krɔŋkrɔŋ Fe Fɛɛ+ lɛ nɛ.”
5 Kɛkɛ ni esusu sɔlemɔ shĩa lɛ gbogbo lɛ, ni etilɛ ji ninetalɔi ekpaa. Tsũi ni kpɛtɛ sɔlemɔ shĩa lɛ he lɛ alɛɛmɔ ji ninetalɔi ejwɛ.+ 6 Tsũi ni kpɛtɛ sɔlemɔ shĩa lɛ he lɛ, nsɔɔdoi etɛ ni, eko ma eko nɔ, ni tsũi 30 yɔɔ nsɔɔdo fɛɛ nsɔɔdo nɔ. Atswa kpokui yɛ sɔlemɔ shĩa lɛ gbogbo lɛ he, ni nomɛi anɔ tsũi ni kpɛtɛ sɔlemɔ shĩa lɛ he lɛ mamɔ, no hewɔ lɛ, nibii ni hiɛ tsũi lɛ amli lɛ boteee sɔlemɔ shĩa lɛ gbogbo lɛ diɛŋtsɛ mli.+ 7 Yɛ sɔlemɔ shĩa lɛ koŋ biɛ kɛ biɛ lɛ, afee gbɛ ko ni lɔgɔɔ shi,* ni kɛ́ aakwɔ kɛmiiya ŋwɛigbɛ tsũi lɛ amli lɛ, belɛ eelɛɛ.+ Kɛ́ mɔ ko jɛ nsɔɔdo ni yɔɔ shishigbɛ kwraa lɛ nɔ kɛtsɔ nsɔɔdo ni yɔɔ teŋgbɛ lɛ nɔ kɛmiiya nsɔɔdo ni yɔɔ ŋwɛigbɛ lɛ nɔ lɛ, be ni eeya lɛ, belɛ gbɛ ni lɔgɔɔ shi nɛɛ miilɛɛ kɛmiijɛ nsɔɔdo kome nɔ kɛmiiya ekroko nɔ.
8 Mina akɛ atswa kpoku ko awo sɔlemɔ shĩa lɛ he kɛkpe, ni kɛ́ asusu tsũi ni kpɛtɛ sɔlemɔ shĩa lɛ he lɛ afaneshii lɛ kɛmiiya koŋ nɔ gbɛ lɛ, efeɔ gãlã tso kome ni kɛlɛ ji ninetalɔi ekpaa. 9 Tsũi ni kpɛtɛ sɔlemɔ shĩa lɛ he gbogbo ni yɔɔ kponɔgbɛ lɛ alɛɛmɔ ji ninetalɔi enumɔ. Gbɛ ko* kã tsũi ni kpɛtɛ sɔlemɔ shĩa lɛ he lɛ akoŋ nɔ yɛ kpoku ni atswa awo sɔlemɔ shĩa lɛ he kɛbɔle lɛ nɔ.
10 Gbɛ ko kã sɔlemɔ shĩa lɛ kɛ niyelihei+ lɛ ateŋ, ni elɛɛmɔ ji ninetalɔi 20 yɛ sɔlemɔ shĩa lɛ koŋ fɛɛ koŋ. 11 Yɛ tsũi ni kpɛtɛ sɔlemɔ shĩa lɛ he lɛ kɛ gbɛ ni kã amɛkoŋ nɔ yɛ kpoku ni atswa awo sɔlemɔ shĩa lɛ he lɛ nɔ lɛ teŋgbɛ yɛ kooyigbɛ lɛ, he ko yɛ ni atsɔɔ kɛboteɔ mli, ni eko hu yɛ wuoyigbɛ. Gbɛ ni kã kpoku ni atswa awo sɔlemɔ shĩa lɛ he kɛbɔle lɛ nɔ lɛ lɛɛmɔ ji ninetalɔi enumɔ.
12 Tsũ ni yɔɔ anaigbɛ ni hiɛ kwɛɔ gbɛ ni kã sɔlemɔ shĩa lɛ kɛ niyelihei lɛ ateŋ lɛ lɛɛmɔ ji ninetalɔi 70 ni ekɛlɛ ji ninetalɔi 90; tsũ lɛ gbogbo lɛ tilɛ kɛbɔle ji ninetalɔi enumɔ.
13 Ni esusu sɔlemɔ shĩa lɛ, ni ekɛlɛ ji ninetalɔi 100. Gbɛ lɛ,* kɛ tsũ lɛ,* kɛ egbogboi lɛ hu kɛlɛ ji ninetalɔi 100. 14 Sɔlemɔ shĩa lɛ hiɛ, he ni kwɛɔ bokãgbɛ lɛ, kɛ gbɛ ni kã sɔlemɔ shĩa lɛ kɛ niyelihei lɛ ateŋ lɛ lɛɛmɔ ji ninetalɔi 100.
15 Esusu tsũ ni hiɛ kwɛɔ gbɛ ni kã sɔlemɔ shĩa lɛ sɛɛ lɛ kɛlɛ, kɛ ehe kpokui ni yɔɔ biɛ kɛ biɛ lɛ, ni ená ninetalɔi 100.
Agbɛnɛ hu, esusu jamɔhe lɛ mli hiɛtsu lɛ, kɛ jamɔhe lɛ mli sɛɛtsu lɛ,+ kɛ kpo lɛ nɔ ablanai lɛ, 16 kɛ shinai lɛ ashi, kɛ samfɛji ni amɛmligbɛ lɛɛ fe amɛsɛɛgbɛ lɛ,+ kɛ nakai hei etɛ lɛ ahe kpokui lɛ. Akala tsei kɛjɛ shikpɔŋ kɛtee samfɛji lɛ anaa yɛ shinaa lɛ shi;+ ni aha samfɛji lɛ ahe. 17 Asusu he ni atsɔɔ kɛboteɔ mli lɛ yiteŋ, kɛ sɔlemɔ shĩa lɛ mli sɛɛtsu lɛ mli, kɛ ekponɔgbɛ lɛ, kɛ gbogbo lɛ fɛɛ kɛbɔle. 18 Akpɛ́ kerubim+ kɛ tɛŋ tsei ahe mfonirii+ yɛ mli, ni tɛŋ tsei lɛ eko fɛɛ eko yɛ kerubim enyɔ teŋ, ni kerubim lɛ eko fɛɛ eko yɛ hiɛi enyɔ. 19 Gbɔmɔ hiɛ lɛ miikwɛ tɛŋ tso lɛ yɛ afã kome, ni jata* hiɛ lɛ miikwɛ tɛŋ tso lɛ yɛ afã kroko.+ Nɛkɛ ji bɔ ni akpɛ́ amɛ awo sɔlemɔ shĩa lɛ mli fɛɛ. 20 Akpɛ́ kerubim kɛ tɛŋ tsei ahe mfonirii yɛ jamɔhe lɛ gbogbo lɛ he kɛjɛ shikpɔŋ kɛyashi shinaa lɛ yiteŋ.
21 Jamɔhe lɛ shinaatsei* lɛ hiɛ koji ejwɛjwɛɛjwɛ.+ Yɛ he krɔŋkrɔŋ* lɛ hiɛ lɛ, nɔ ko tamɔ 22 tso afɔleshaa latɛ+ ni kwɔlɛ ji ninetalɔi etɛ ni ekɛlɛ ji ninetalɔi enyɔ ma jɛmɛ. Eyɛ koji, ni eshishi* kɛ ehewɔhewɔi lɛ fɛɛ lɛ, tso akɛfee. Kɛkɛ ni ekɛɛ mi akɛ: “Okpɔlɔ ni ma Yehowa hiɛ lɛ nɛ.”+
23 Shinai enyɔ yɛ jamɔhe lɛ mli hiɛtsu lɛ he, ni enyɔ hu yɛ he krɔŋkrɔŋ lɛ he.+ 24 Shinai lɛ hiɛ fiji enyɔ ni tsɔmɔɔ amɛhe, shinaa fɛɛ shinaa hiɛ fiji enyɔ. 25 Akpɛ́ kerubim kɛ tɛŋ tsei ahe mfonirii yɛ jamɔhe lɛ shinai lɛ ahe tamɔ nɔ ni yɔɔ gbogboi lɛ ahe lɛ.+ Akala tsei kɛfee kanopi yɛ ablanaa ni yɔɔ kponɔgbɛ lɛ yiteŋ. 26 Agbɛnɛ hu, yɛ ablanaa lɛ biɛ kɛ biɛ, kɛ tsũi ni kpɛtɛ sɔlemɔ shĩa lɛ he lɛ kɛ kanopii lɛ ahe lɛ, afee samfɛji ni amɛmligbɛ lɛɛ fe amɛsɛɛgbɛ+ yɛ eko fɛɛ eko he, ni atɛŋ tɛŋ tsei ahe mfonirii yɛ eko fɛɛ eko he.