4 Mose
9 Yehowa kɛ Mose wie yɛ Sinai ŋa lɛ nɔ, be ni amɛshi Ejipt shikpɔŋ lɛ nɔ lɛ sɛɛ, yɛ afi ni ji enyɔ lɛ mli klɛŋklɛŋ nyɔɔŋ lɛ nɔ,+ ni ekɛɛ: 2 “Israelbii lɛ asaa Hehoo afɔle*+ lɛ yɛ ebe ni ato lɛ mli.+ 3 Nyɔɔŋ nɛɛ nɔ gbi ni ji 14 lɛ nɔ, yɛ hulushinyɔɔ mli* lɛ, nyɛsaa afɔle* lɛ yɛ ebe ni ato lɛ mli. Nyɛsaa lɛ yɛ ehe mlai lɛ fɛɛ kɛ ehe gbɛjianɔi ni ato lɛ fɛɛ anaa.”+
4 No hewɔ lɛ, Mose kɛɛ Israelbii lɛ ní amɛsaa Hehoo afɔle* lɛ. 5 Kɛkɛ ni amɛsaa Hehoo afɔle* lɛ yɛ klɛŋklɛŋ nyɔɔŋ lɛ nɔ gbi ni ji 14 lɛ nɔ, yɛ hulushinyɔɔ mli,* yɛ Sinai ŋa lɛ nɔ. Nibii fɛɛ ni Yehowa fã Mose lɛ, nakai pɛpɛɛpɛ Israelbii lɛ fee.
6 Agbɛnɛ, hii komɛi yɛ ni amɛyata gbonyo ko he kɛwo amɛhe muji,*+ ni no hewɔ lɛ, amɛnyɛɛɛ amɛsaa Hehoo afɔle* lɛ yɛ nakai gbi lɛ nɔ. No hewɔ lɛ, hii nɛɛ ba Mose kɛ Aaron hiɛ yɛ nakai gbi lɛ nɔ+ 7 ni amɛkɛɛ lɛ akɛ: “Wɔhe tseee akɛni wɔyata gbonyo he lɛ hewɔ.* Mɛni hewɔ abaatsĩ wɔ gbɛ ni wɔkɛ afɔle lɛ akabahã Yehowa yɛ ebe ni ato lɛ mli yɛ Israelbii lɛ ateŋ?”+ 8 Kɛkɛ ni Mose kɛɛ amɛ akɛ: “Nyɛmɛa, ní mabo nɔ ni Yehowa baafã akɛ afee yɛ nyɛhewɔ lɛ toi.”+
9 Ni Yehowa kɛɛ Mose akɛ: 10 “Kɛɛmɔ Israelbii lɛ akɛ, ‘Kɛ́ nyɛteŋ mɔ ko loo yinɔbii ni baaba yɛ nyɛsɛɛ lɛ ateŋ mɔ ko yata gbonyo ko he kɛwo ehe muji*+ aloo etee he ko shɔŋŋ po lɛ, esaa Hehoo afɔle* lɛ ehã Yehowa kɛ̃. 11 Amɛsaa lɛ yɛ nyɔɔŋ ni ji enyɔ lɛ nɔ+ gbi ni ji 14 lɛ nɔ, yɛ hulushinyɔɔ mli.* Amɛkɛ blodo ni ashikishaŋ-sha* bɛ mli kɛ bai ni joɔ aye.+ 12 Amɛkahã eko shwɛ kɛyashi leebi,+ ni amɛkaku ewu ko hu.+ Amɛsaa lɛ yɛ mlai fɛɛ ni kɔɔ Hehoo lɛ he lɛ anaa. 13 Shi kɛ́ mɔ ko he tse aloo eyako he ko shɔŋŋ, ni esaaa Hehoo afɔle* lɛ, no lɛ, nakai mɔ* lɛ, afo lɛ ashɛ afɔ̃* kɛje emaŋbii lɛ ateŋ,+ ejaakɛ ekɛ Yehowa afɔle lɛ ebahãaa yɛ ebe ni ato lɛ mli. Nakai mɔ lɛ he esha lɛ he sɔ̃ lɛ baakã enɔ.
14 “‘Ni kɛ́ gbɔ ko ebahi nyɛteŋ lɛ, lɛ hu esaa Hehoo afɔle* lɛ ehã Yehowa.+ Efee nakai yɛ Hehoo lɛ he mla kɛ ehe gbɛjianɔ ni ato lɛ naa.+ Mla kome akã shi ahã nyɛ, gbɔ lɛ kɛ maŋnyo lɛ fɛɛ.’”+
15 Agbɛnɛ, gbi ni ashĩ sɔlemɔ buu lɛ ama shi lɛ,+ atatu lɛ baha sɔlemɔ buu lɛ, ni ji Odaseyeli mama tsũ lɛ nɔ, shi gbɛkɛ lɛ, nɔ ko ni tamɔ la hi sɔlemɔ buu lɛ nɔ kɛyashi leebi.+ 16 Nakai ji bɔ ni nibii tee nɔ: Kɛ́ je tsɛre lɛ, atatu lɛ haa nɔ, ni gbɛkɛ lɛ, nɔ ko ni tamɔ la haa nɔ.+ 17 Be fɛɛ be ni atatu lɛ baawó ehe nɔ kɛje mama tsũ lɛ nɔ lɛ, Israelbii lɛ fãa amrɔ nɔŋŋ,+ ni he ni atatu lɛ waa yɛ* lɛ, jɛmɛ Israelbii lɛ bɔɔ nsara yɛ.+ 18 Yehowa famɔ naa Israelbii lɛ fãa yɛ, ni Yehowa famɔ naa amɛbɔɔ nsara yɛ.+ Gbii abɔ ni atatu lɛ yɔɔ sɔlemɔ buu lɛ nɔ lɛ, amɛhiɔ shi yɛ nsara lɛ mli. 19 Kɛ́ atatu lɛ hi sɔlemɔ buu lɛ nɔ gbii pii lɛ, Israelbii lɛ boɔ Yehowa toi ni amɛfãaa.+ 20 Bei komɛi lɛ, atatu lɛ hiɔ sɔlemɔ buu lɛ nɔ gbii fioo. Yehowa famɔ naa amɛfãa yɛ, ni Yehowa famɔ naa amɛbɔɔ nsara yɛ. 21 Bei komɛi lɛ, atatu lɛ hiɔ shi kɛjɛ gbɛkɛ kɛyashi leebi pɛ, ni kɛ́ atatu lɛ wó ehe nɔ leebi lɛ, amɛfãa. Kɛ́ atatu lɛ wó ehe nɔ leebi jio, gbɛkɛ jio, amɛfãa.+ 22 Kɛ́ gbii enyɔ atatu lɛ ye jio, nyɔɔŋ kome jio, aloo be kakadaŋŋ jio, gbii abɔ ni eyɔɔ sɔlemɔ buu lɛ nɔ lɛ, Israelbii lɛ hiɔ shi yɛ nsara lɛ mli ni amɛfãaa. Shi kɛ́ ewó ehe nɔ lɛ, amɛfãa. 23 Yehowa famɔ naa amɛbɔɔ nsara yɛ, ni Yehowa famɔ naa amɛfãa yɛ. Amɛye Yehowa kitã lɛ nɔ yɛ famɔ ni Yehowa tsɔ Mose nɔ ekɛhã lɛ naa.