1 Samuel
13 Saul eye afii . . .* be ni ebatsɔ maŋtsɛ lɛ,+ ni eye Israel nɔ afii enyɔ. 2 Kɛkɛ ni Saul hala hii 3,000 yɛ Israel; hii nɛɛ ateŋ mɛi 2,000 fata Saul he yɛ Mikmash kɛ agbɛnɛ hu yɛ Betel gɔji lɛ anɔ, ni amɛteŋ mɛi 1,000 hu fata Yonatan+ he yɛ Gibea,+ yɛ Benyamin. Ewo mɛi ni eshwɛ lɛ gbɛ, ni amɛteŋ mɔ fɛɛ mɔ tee emama tsũ mli. 3 Kɛkɛ ni Yonatan yagbe Filistibii+ lɛ asraafoi ni yɔɔ Geba+ lɛ, ni Filistibii lɛ nu he. Ni Saul hã akpã tɛtɛrɛmantɛrɛ*+ kɛfo shikpɔŋ lɛ nɔ fɛɛ akɛ: “Hebribii lɛ abo toi!” 4 Israel fɛɛ nu sane lɛ, akɛ: “Saul egbe Filistibii lɛ asraafoi komɛi, ni no hewɔ lɛ, Israel he miije fu kɛmiiwo Filistibii lɛ.” No hewɔ lɛ, abua maŋbii lɛ anaa koni amɛbanyiɛ Saul sɛɛ yɛ Gilgal.+
5 Filistibii lɛ hu bua amɛhe naa koni amɛkɛ Israel awu, amɛhiɛ ta shwiilii 30,000 kɛ okpɔŋɔnɔtaralɔi 6,000, ni amɛsraafoi lɛ ayi fa babaoo tamɔ ŋshɔnaa shia;+ ni amɛkwɔ kɛba ni amɛbabɔ nsara yɛ Mikmash yɛ Bet-aven+ bokãgbɛ. 6 Ni Israel hii lɛ na akɛ amɛhe eka mli, ejaakɛ ta lɛ naa wa hã amɛ tsɔ;* no hewɔ lɛ, maŋbii lɛ yateetee amɛhe yɛ tɛkploi amli,+ bui amli, tɛsai amli, bui ni yɔɔ shikpɔŋ lɛ shishi lɛ amli, kɛ bui ni atoɔ nu yɛ mli lɛ amli. 7 Hebribii lɛ ekomɛi po fo Yordan Faa lɛ kɛtee Gad kɛ Gilead shikpɔŋ lɛ nɔ.+ Shi be nɛɛ mli fɛɛ lɛ, Saul yɛ Gilgal lolo, ni ŋmiŋmi emɔmɔ mɛi ni nyiɛ esɛɛ lɛ fɛɛ. 8 Etee nɔ emɛ gbii kpawo kɛyashi be ni Samuel eto lɛ, shi Samuel baaa Gilgal, ni mɛi lɛ fɛɛ miije ehe kɛmiiya. 9 Naagbee lɛ Saul kɛɛ akɛ: “Nyɛkɛ shãa afɔle lɛ kɛ naanyobɔɔ afɔlei lɛ abahãa mi.” Ni eshã shãa afɔle lɛ.+
10 Shi be ni eshã shãa afɔle lɛ egbe naa nɔŋŋ ni Samuel bashɛ shi. No hewɔ lɛ, Saul tee koni ekɛ lɛ ayakpe ni eŋa* lɛ. 11 Kɛkɛ ni Samuel bi akɛ: “Mɛni ofee nɛɛ?” Saul here nɔ akɛ: “Mina akɛ maŋbii lɛ miije mihe kɛmiiya,+ ni obaaa yɛ be ni ato lɛ naa, ni Filistibii lɛ miibua amɛhe naa yɛ Mikmash.+ 12 No hewɔ lɛ, mikɛɛ mihe akɛ, ‘Filistibii lɛ baakpeleke shi kɛba ni amɛkɛ mi abawu yɛ Gilgal, ni mitaoko Yehowa hiɛ dromɔ.’ No hewɔ lɛ, minu he akɛ esa akɛ mashã shãa afɔle lɛ.”
13 Kɛkɛ ni Samuel kɛɛ Saul akɛ: “Oye kwashiai asane. Oyeko kitã ni Yehowa, o-Nyɔŋmɔ lɛ wo bo lɛ nɔ.+ Eji oye nɔ kulɛ, Yehowa baahã omaŋtsɛyeli lɛ ama shi shiŋŋ yɛ Israel kɛya naanɔ. 14 Shi amrɔ nɛɛ omaŋtsɛyeli lɛ damɔŋ shi.+ Yehowa baatao etsuinaa nuu,+ ni Yehowa baahã enyiɛ emaŋbii lɛ ahiɛ,+ ejaakɛ oyeee kitã ni Yehowa wo bo lɛ nɔ.”+
15 Kɛkɛ ni Samuel te shi ni ekwɔ kɛjɛ Gilgal kɛtee Gibea yɛ Benyamin, ni Saul kane mɛi lɛ; mɛi ni kɛ lɛ yɔɔ lolo lɛ ayibɔ aaafee hii 600.+ 16 Saul, ebinuu Yonatan, kɛ mɛi ni fata amɛhe lolo lɛ yɛ Geba+ yɛ Benyamin, ni Filistibii lɛ hu ebabɔ nsara yɛ Mikmash.+ 17 Ni asraafoi akui etɛ fãa kpo kɛjɛɔ Filistibii lɛ nsara lɛ mli koni amɛyaloo Israelbii lɛ anii. Kuu kome yiɔ gbɛ ni yaa Ofra lɛ nɔ, kɛyaa Shual shikpɔŋ lɛ nɔ; 18 kuu kroko yiɔ Bet-horon+ gbɛ lɛ nɔ; ni kuu ni ji etɛ lɛ yiɔ gbɛ ni yaa husu ni kã Zeboim jɔɔ lɛ hiɛ lɛ nɔ kɛyaa ŋa lɛ nɔ gbɛ.
19 No mli lɛ, dade sɔ̃lɔ ko kwraa bɛ Israel shikpɔŋ lɛ nɔ fɛɛ, ejaakɛ Filistibii lɛ ekɛɛ akɛ: “Kɛjeee nakai lɛ, Hebribii lɛ baafee klantei loo akpɔlɔi.” 20 No hewɔ lɛ, Israelbii lɛ fɛɛ kpelekeɔ shi kɛyaa Filistibii lɛ aŋɔɔ koni amɛyajɔɔ amɛtsina kɔii lɛ anaa dadei kɛ piŋkasei kɛ lemai kɛ nikpamɔ kaklai lɛ anaa yɛ jɛmɛ. 21 Bɔ ni aheɔ kɛ́ ajɔɔ tsina kɔii anaa dadei kɛ piŋkasei kɛ dadei ni hiɛ nyanyɔji etɛ kɛ lemai anaa ji pim,* ni nakai nɔŋŋ aheɔ kɛ́ asaa tsinakplamɔ tso.* 22 Ni gbi fɛɛ gbi ni abaawu ta lɛ, mɛi ni fata Saul kɛ Yonatan he lɛ ateŋ mɔ ko mɔ ko ehiɛɛɛ klante loo akpɔlɔ;+ Saul kɛ ebinuu Yonatan pɛ yɔɔ tawuu nibii.
23 No mli lɛ, Filistibii lɛ asraafoi komɛi eje kpo kɛtee tsɔmɔhe ni yɔɔ Mikmash jɔɔ lɛ mli lɛ.+