Bɔfoi Lɛ Anitsumɔi
12 Nakai be lɛ mli nɔŋŋ lɛ, Maŋtsɛ Herode bɔi asafo lɛ mli bii lɛ ateŋ mɛi komɛi ayiwaa.+ 2 Ekɛ klante gbe Yohane nyɛmi Yakobo.+ 3 Be ni ena akɛ enɛ ŋɔɔ Yudafoi lɛ anaa lɛ, etee nɔ emɔ Petro hu. (Enɛ tee nɔ yɛ Blodo Ni Ashikishaŋ-sha* Bɛ Mli Gbi Jurɔ lɛ gbii lɛ amli.)+ 4 Emɔ lɛ, ni ewo lɛ tsuŋ,+ ni etu lɛ ewo asraafoi akui ejwɛ ni mɛi ejwɛ yɔɔ eko fɛɛ eko mli lɛ adɛŋ koni amɛto naa kɛbu ehe, ni ekpɛ eyiŋ akɛ Hehoo lɛ sɛɛ lɛ, ebaajie lɛ kɛba* maŋbii lɛ ahiɛ. 5 No hewɔ lɛ, eyɛ mli akɛ atsĩ Petro naa yɛ tsuŋwoohe lɛ moŋ nɛ, shi asafo lɛ tee nɔ esɔle waa diɛŋtsɛ ehã Nyɔŋmɔ yɛ ehewɔ.+
6 Yɛ nyɔɔŋ ni enɔ jetsɛremɔ lɛ Herode baajie Petro ehã maŋbii lɛ mli lɛ, no mli lɛ Petro kã asraafoi enyɔ teŋ eewɔ ni awo lɛ tsein* enyɔ, ni bulɔi hu damɔ shinaa lɛ naa amɛmiibu tsuŋwoohe lɛ he. 7 Shi naa! Yehowa* bɔfo ko badamɔ jɛmɛ,+ ni la kpɛ yɛ tsuŋwoohe lɛ. Ni eta Petro ŋmawu he, ni etsĩɛ lɛ ekɛɛ: “Tee shi mramra!” Ni tsein* lɛ kpɔlɔ yɛ eniji ahe.+ 8 Ŋwɛibɔfo lɛ kɛɛ lɛ akɛ: “Saamɔ ohe* ni owo otokotai lɛ.” Ni efee nakai. Agbɛnɛ, ekɛɛ lɛ akɛ: “Wo otade nɔhaanɔ lɛ ni onyiɛ misɛɛ.” 9 Ni eje kpo ni enyiɛ esɛɛ, shi eleee akɛ nɔ ni ŋwɛibɔfo lɛ feɔ lɛ ji nɔ ko ni miiya nɔ diɛŋtsɛ. Anɔkwa, esusu akɛ ninaa ko enaa lɛ. 10 Be ni amɛho he ni klɛŋklɛŋ bulɔi lɛ damɔ lɛ kɛ he ni bulɔi ni ji enyɔ lɛ damɔ lɛ ahe lɛ, amɛyashɛ dade agbó ni kã kɛyaa maŋ lɛ mli lɛ he, ni agbó lɛ diɛŋtsɛ gbele ehã amɛ. Be ni amɛje kpo lɛ, amɛyi gbɛjegbɛ ko nɔ, ni amrɔ lɛ ŋwɛibɔfo lɛ shi lɛ. 11 Ni be ni Petro yɔse nɔ ni yaa nɔ lɛ, ekɛɛ: “Kpaako mina lɛɛlɛŋ akɛ, Yehowa* tsu ebɔfo kɛba ni ebajie mi yɛ Herode dɛŋ kɛ agbɛnɛ hu, kɛjɛ nɔ fɛɛ nɔ ni Yudafoi lɛ kpaa gbɛ akɛ ebaaba lɛ mli.”+
12 Be ni eyɔse enɛ lɛ, etee Yohane ni atsɛɔ lɛ Marko+ lɛ mami Maria shĩa lɛ, he ni mɛi pii ebua amɛhe naa yɛ ni amɛmiisɔle lɛ. 13 Be ni eshi agbó lɛ shinaa lɛ, tsulɔ yoo ko ni atsɛɔ lɛ Roda lɛ ba koni ebakwɛ mɔ ni ji. 14 Be ni eyoo Petro gbee lɛ, ená miishɛɛ aahu akɛ egbeleee shinaa lɛ, moŋ lɛ, ejo foi kɛtee mli ni eyabɔ amaniɛ akɛ Petro damɔ shinaa lɛ sɛɛ. 15 Amɛkɛɛ lɛ akɛ: “Ojwɛŋmɔ tsuuu nii.” Shi etee nɔ ema nɔ mi veveeve akɛ nakai ni. Amɛbɔi kɛɛmɔ akɛ: “Eŋwɛibɔfo ni mɔ.” 16 Shi Petro tee nɔ edamɔ jɛmɛ eeshi shinaa lɛ. Be ni amɛgbele shinaa lɛ, amɛna lɛ, ni amɛnaa kpɛ amɛhe. 17 Shi ekɛ enine fee okadi etsɔɔ amɛ akɛ amɛfee diŋŋ, ni egba amɛ fitsofitso bɔ ni fee ni Yehowa* jie lɛ kɛjɛ tsuŋwoohe lɛ, ni ekɛɛ: “Nyɛbɔa Yakobo+ kɛ nyɛmimɛi lɛ nibii nɛɛ ahe amaniɛ.” Kɛkɛ ni eje kpo ni etee he kroko.
18 Agbɛnɛ, be ni je tsɛre lɛ, asraafoi lɛ hao waa yɛ nɔ ni eba Petro nɔ lɛ hewɔ. 19 Herode tao lɛ fitsofitso, ni be ni enaaa lɛ lɛ, ebibii bulɔi lɛ saji ni efã koni akɛ amɛ aya ni ayagbala amɛtoi;+ ni ekpeleke shi kɛjɛ Yudea kɛtee Kaisarea, ni eye be ko yɛ jɛmɛ.
20 Agbɛnɛ, Herode mli efu Tirobii kɛ Sidonbii lɛ waa. No hewɔ lɛ, amɛkɛ jwɛŋmɔ kome ba eŋɔɔ, ni be ni amɛtsɔ Blasto, ni ji mɔ ni kwɛɔ maŋtsɛ lɛ shĩa* lɛ saji anɔ lɛ yiŋ lɛ, amɛkpa fai kɛhã toiŋjɔlɛ, ejaakɛ maŋtsɛ lɛ shikpɔŋ lɛ nɔ amɛmaŋ lɛ náa niyenii kɛjɛɔ. 21 Yɛ gbi ni ato lɛ nɔ lɛ, Herode wo emaŋtsɛ atade lɛ ni eyata kojomɔ sɛi lɛ nɔ, ni ebɔi wiemɔ yɛ maŋ lɛ hiɛ. 22 Kɛkɛ ni mɛi ni ebabua amɛhe naa lɛ bɔi bolɔmɔ akɛ: “Enɛ lɛ, nyɔŋmɔ ko gbee ni, shi jeee gbɔmɔ gbee ni!” 23 Amrɔ lɛ, Yehowa* bɔfo tswa lɛ nɔ, ejaakɛ ekɛ anunyam lɛ hãaa Nyɔŋmɔ, ni gɔgɔmii ye lɛ ni egbo.
24 Shi Yehowa* wiemɔ lɛ tee nɔ eshwere ni etee nɔ egbɛ eshwã.+
25 Shi Barnaba+ kɛ Saul lɛ, be ni amɛkɛ yelikɛbuamɔ nibii lɛ eyahã yɛ Yerusalem lɛ,+ amɛku amɛsɛɛ ni amɛŋɔ Yohane, mɔ ni atsɛɔ lɛ Marko hu lɛ amɛfata amɛhe.+