2 Samuel
21 Hɔmɔ+ ko ba yɛ David gbii lɛ amli kɛtsara nɔ afii etɛ, no hewɔ lɛ, David yabi Yehowa nii, ni Yehowa kɛɛ akɛ: “Saul kɛ eshĩa lɛ eye lá yi sɔ̃, ejaakɛ egbe Gibeonbii lɛ.”+ 2 No hewɔ lɛ, maŋtsɛ lɛ tsɛ Gibeonbii+ lɛ ni ekɛ amɛ wie. (Gibeonbii lɛ jeee Israelbii, shi moŋ, amɛji Amorbii+ lɛ ateŋ mɛi ni shwɛ, ni Israelbii lɛ ekã kitã akɛ amɛkpãtãŋ amɛhiɛ,+ shi Saul kpɛ eyiŋ akɛ ebaakpãtã amɛhiɛ yɛ awuŋa ni eyeɔ ehãa Israelbii lɛ kɛ Yudabii lɛ hewɔ.) 3 David bi Gibeonbii lɛ akɛ: “Mɛni mifee mihã nyɛ, ni mɛni mikɛkpãtã nyɛ koni nyɛjɔɔ Yehowa gboshinii lɛ?” 4 Gibeonbii lɛ kɛɛ lɛ akɛ: “Sane ni kã wɔ kɛ Saul kɛ eshĩa lɛ teŋ lɛ, jeee jwiɛtɛi loo shika tsuru sane;+ ni wɔbɛ hegbɛ hu akɛ wɔgbeɔ mɔ ko yɛ Israel.” Kɛkɛ ni ekɛɛ akɛ: “Nɔ fɛɛ nɔ ni nyɛbaakɛɛ lɛ, mafee mahã nyɛ.” 5 Amɛkɛɛ maŋtsɛ lɛ akɛ: “Nuu ni kpãtã wɔhiɛ ni tsɔ ŋaa koni ebule wɔshishi kɛje Israel shikpɔŋ lɛ nɔ lɛ+— 6 jiemɔ eshwiei lɛ amli hii* kpawo ohã wɔ. Wɔkɛ amɛgbohii baatsotsoro+ shi yɛ* Yehowa hiɛ yɛ Gibea,+ ni ji Saul, mɔ ni Yehowa hala lɛ+ lɛ maŋ lɛ mli.” Kɛkɛ ni maŋtsɛ lɛ kɛɛ akɛ: “Majie amɛ mahã nyɛ.”
7 Shi maŋtsɛ lɛ musuŋ tsɔ lɛ yɛ Mefiboshet,+ Saul binuu Yonatan binuu lɛ he, yɛ kitã ni David kɛ Saul binuu Yonatan kã yɛ Yehowa hiɛ lɛ hewɔ.+ 8 No hewɔ lɛ, maŋtsɛ lɛ ŋɔ Armoni kɛ Mefiboshet, ni ji Aiya biyoo Rizpa+ bihii enyɔ ni efɔ ehã Saul lɛ, kɛ Saul biyoo Mikal*+ bihii enumɔ ni efɔ ehã Adriel,+ Meholatnyo Barzilai binuu lɛ. 9 Kɛkɛ ni ekɛ amɛ hã Gibeonbii lɛ, ni amɛkɛ amɛgbohii lɛ tsotsoro shi yɛ gɔŋ lɛ nɔ yɛ Yehowa hiɛ.+ Amɛyi kpawo lɛ fɛɛ gboi shi kome; agbe amɛ yɛ nikpamɔ be lɛ klɛŋklɛŋ gbi lɛ nɔ, yɛ barle* kpamɔ lɛ shishijee mli. 10 Kɛkɛ ni Rizpa,+ Aiya biyoo lɛ, ŋɔ kpekpe ni ekɛha tɛsaa lɛ nɔ, kɛjɛ nikpamɔ lɛ shishijee kɛyashi nugbɔ nɛ kɛjɛ ŋwɛi eshwie gbohii lɛ anɔ; eŋmɛɛɛ gbɛ ni ŋwɛi loofɔji abasɔmɔ amɛnɔ kɛ́ je tsɛre loo ni jwɛiiaŋ kooloi awuiyelɔi hu aba amɛhe nyɔɔŋ.
11 Akɛɛ David nɔ ni Saul hemɔ* Rizpa, Aiya biyoo lɛ efee lɛ. 12 No hewɔ lɛ, David tee ni eyaŋɔ Saul kɛ ebinuu Yonatan wui lɛ yɛ Yabesh-gilead onukpai* lɛ adɛŋ,+ ejaakɛ gbi ni Filistibii lɛ gbe Saul yɛ Gilboa lɛ, Yabesh-gileadbii lɛ yaju amɛgbohii lɛ yɛ Bet-shan henaabuamɔhe lɛ, yɛ he ni Filistibii lɛ kɛtsotsoro lɛ.+ 13 Ekɛ Saul kɛ ebinuu Yonatan wui lɛ kwɔ kɛba, ni amɛbua hii ni agbe* lɛ awui lɛ hu anaa.+ 14 Kɛkɛ ni amɛfu Saul kɛ ebinuu Yonatan wui lɛ yɛ Zela+ yɛ Benyamin shikpɔŋ lɛ nɔ yɛ etsɛ Kish+ fuuhe lɛ. Be ni amɛfee nibii fɛɛ ni maŋtsɛ lɛ efã amɛ lɛ, Nyɔŋmɔ bo amɛfaikpamɔi yɛ shikpɔŋ lɛ he lɛ toi.+
15 Filistibii lɛ kɛ Israel wu ta ekoŋŋ.+ No hewɔ lɛ, David kɛ etsuji lɛ kpeleke shi ni amɛkɛ Filistibii lɛ yawu, shi etɔ David bliboo. 16 No hewɔ lɛ, Refaim+ shwiei lɛ eko ni atsɛɔ lɛ Ishbi-benob, ni ekɔɔble akpɔlɔ tsiimɔ ji shekeli 300*+ ni eŋmɔ klante hee lɛ, ka akɛ ebaagbe David. 17 Amrɔ nɔŋŋ ni Zeruia binuu, Abishai+ baye ebua David+ ni etswa Filistinyo lɛ nɔ ni egbe lɛ. Kɛkɛ ni David hii lɛ kã lɛ kitã yɛ nakai gbi lɛ nɔ akɛ: “Okɛ wɔ akaya ta dɔŋŋ!+ Kɛjeee nakai lɛ, obaagbe Israel kane lɛ!”+
18 Enɛ sɛɛ lɛ, ta te shi yɛ amɛ kɛ Filistibii lɛ ateŋ+ ekoŋŋ yɛ Gob. Ni yɛ nakai ta lɛ mli lɛ, Sibekai,+ Hushanyo lɛ gbe Saf, ni ji Refaim+ shwiei lɛ ateŋ mɔ kome lɛ.
19 Ni amɛ kɛ Filistibii lɛ yawu ekoŋŋ+ yɛ Gob, ni Elhanan, Yaare-oregim, Betlehemnyo lɛ binuu lɛ gbe Goliat, Gatnyo* lɛ, mɔ ni ekpɔlɔ sɛɛ tso da tamɔ tsɔne ni mamalolɔ kɛloɔ mama lɛ mli tso lɛ.+
20 Ta te shi ekoŋŋ yɛ Gat, he ni no mli lɛ, nuu ko ni kwɔ ni eti waa ni yɔɔ nine waobii ekpaa ekpaa kɛ nane waobii ekpaa ekpaa, ni fɛɛ feɔ 24 lɛ yɔɔ lɛ; lɛ hu eji Refaim shwiei lɛ ateŋ mɔ kome.+ 21 Etee nɔ ebɔ Israel ahora,+ no hewɔ lɛ Yonatan, David nyɛmi nuu Shimei+ binuu lɛ gbe lɛ.
22 Mɛi ejwɛ nɛɛ ji Refaim shwiei lɛ ateŋ mɛi komɛi yɛ Gat, ni David kɛ etsuji lɛ gbe amɛ.+