3 Mose
16 Be ni Aaron bihii enyɔ lɛ gboi akɛni amɛyabɛŋkɛ Yehowa hewɔ lɛ sɛɛ lɛ,+ Yehowa kɛ Mose wie. 2 Yehowa kɛɛ Mose akɛ: “Kɛɛmɔ onyɛmi nuu Aaron akɛ ekabote he ni yɔɔ krɔŋkrɔŋ lɛ be fɛɛ be kɛkɛ+ ní etee pateeshɛŋ lɛ sɛɛ,+ yɛ naanɔ ni bu Adeka lɛ nɔ lɛ hiɛ, koni ekagbo,+ ejaakɛ mapue yɛ atatu+ mli yɛ naanɔ+ lɛ nɔ.
3 “Kɛ́ Aaron miiba he ni yɔɔ krɔŋkrɔŋ lɛ, nii ni ekɛba nɛ: tsinanuu* ní akɛbaashã esha afɔle+ kɛ gwantɛŋnuu ní akɛbaashã shãa afɔle.+ 4 Ewo klala atade kakadaŋŋ krɔŋkrɔŋ+ lɛ, ewo klala nika+ lɛ kɛtsĩ eyayaiaŋ,* ekɛ klala mliteŋfiinɔ+ lɛ afi emli, ní ekɛ klala yitsofiinɔ+ lɛ hu afi eyitso. Atadei krɔŋkrɔŋi ni.+ Ekɛ nu aju ehe,+ ní ewo nibii nɛɛ.
5 “Eŋɔ abotiahii* enyɔ ní akɛbaashã esha afɔle kɛ gwantɛŋnuu kome ní akɛbaashã shãa afɔle kɛjɛ Israel maŋ muu lɛ fɛɛ dɛŋ.+
6 “No sɛɛ lɛ, Aaron kɛ esha afɔle tsinanuu ni ekɛbaashã afɔle ehã lɛ diɛŋtsɛ ehe lɛ aba, ni ekpãtã ehã lɛ diɛŋtsɛ ehe+ kɛ eshĩa lɛ.
7 “No sɛɛ lɛ, emɔmɔ abotiai enyɔ lɛ ni ekɛ amɛ abadamɔ Yehowa hiɛ yɛ kpee buu lɛ shinaa lɛ naa. 8 Aaron afɔ̃ abotiai enyɔ lɛ anɔ oshiki, oshiki kome kɛhã Yehowa, ni oshiki kroko lɛ hu kɛhã Azazel.* 9 Aaron kɛ abotia ni oshiki ni afɔ̃+ ahã Yehowa lɛ yagbee enɔ lɛ aba, ní ekɛbashã esha afɔle. 10 Shi abotia ni oshiki ni afɔ̃ kɛhã Azazel lɛ yagbee enɔ lɛ, akɛ lɛ aba hiɛkãalɔ, ni akɛ lɛ abadamɔ Yehowa hiɛ, bɔ ni afee ni afee kpatamɔ kusum lɛ yɛ enɔ, koni ayaŋmɛɛ ehe kɛhã Azazel ní eya ŋa lɛ nɔ.+
11 “Aaron kɛ esha afɔle tsinanuu ni ekɛbaashã afɔle ehã ehe lɛ aba, ni ekpãtã ehã lɛ diɛŋtsɛ ehe kɛ eshĩa lɛ; no sɛɛ lɛ, egbe esha afɔle tsinanuu ni ekɛbaashã afɔle ehã ehe lɛ.+
12 “No sɛɛ lɛ, eŋɔ lajeenii+ lɛ ni eje ŋai kɛ la yɛ afɔleshaa latɛ+ ni ma Yehowa hiɛ lɛ nɔ ewo mli obɔ, kɛ tsofa-kɛ-ŋma munyɔmunyɔ+ ekɔkɔi obɔbɔ enyɔ, ni ekɛba pateeshɛŋ lɛ sɛɛ.+ 13 Agbɛnɛ hu, ekɛ tsofa-kɛ-ŋma lɛ ashwie la lɛ nɔ yɛ Yehowa hiɛ,+ ni tsofa-kɛ-ŋma lɛ lasu lɛ baaha naanɔ+ ni bu Odaseyeli+ Adeka lɛ nɔ lɛ nɔ, koni ekagbo.
14 “Eŋɔ tsinanuu lɛ lá+ lɛ eko ni ekɛ ewao atsɔ kɛshwã naanɔ lɛ hiɛgbɛ, he ni ye bokãgbɛ lɛ, ekɛ ewao atsɔ lá lɛ eko kɛshwã naanɔ lɛ hiɛgbɛ shii kpawo.+
15 “No sɛɛ lɛ, egbe esha afɔle abotia ni akɛbaashã afɔle ahã maŋ lɛ,+ ni ekɛ elá lɛ aba pateeshɛŋ lɛ sɛɛ,+ ni ekɛ elá+ lɛ afee tamɔ bɔ ni ekɛ tsinanuu lɛ lá lɛ fee lɛ nɔŋŋ; ekɛshwã naanɔ lɛ hiɛgbɛ.
16 “Ekpãtã ehã he ni yɔɔ krɔŋkrɔŋ lɛ yɛ Israelbii lɛ amuji nitsumɔi kɛ amɛmlatɔmɔi kɛ amɛhe eshai lɛ ahewɔ,+ ni nakai efee ehã kpee buu ni yɔɔ amɛteŋ, yɛ amɛmuji nitsumɔi lɛ amli lɛ.
17 “Kɛjɛ be ni ebaabote kpee buu lɛ mli koni eyakpãtã yɛ he ni yɔɔ krɔŋkrɔŋ lɛ aahu kɛyashi ebaaje kpo lɛ, mɔ ko mɔ ko akahi kpee buu lɛ mli. Ekpãtã ehã lɛ diɛŋtsɛ ehe kɛ eshĩa+ lɛ kɛ Israel maŋ muu lɛ fɛɛ hu.+
18 “No sɛɛ lɛ, eje kpo kɛba afɔleshaa latɛ+ ni ma Yehowa hiɛ lɛ he, ni ekpãtã ehã afɔleshaa latɛ lɛ, ni eŋɔ tsinanuu lɛ lá lɛ kɛ abotia lɛ lá lɛ eko ni ekɛkpa afɔleshaa latɛ lɛ akolontoi lɛ fɛɛ ahe kɛkpe. 19 Agbɛnɛ hu, ekɛ ewao atsɔ lá lɛ eko kɛshwã afɔleshaa latɛ lɛ nɔ shii kpawo koni ekɛtsuu he, ní ekɛfee lɛ krɔŋkrɔŋ yɛ Israelbii lɛ amuji nitsumɔi lɛ ahewɔ.
20 “Kɛ́ ekpãtã+ ehã he ni yɔɔ krɔŋkrɔŋ lɛ kɛ kpee buu lɛ kɛ afɔleshaa latɛ+ lɛ egbe naa lɛ, ekɛ abotia ni hiɛ kã lɛ hu aba.+ 21 Aaron kɛ eniji enyɔ lɛ fɛɛ ashwie abotia ni hiɛ kã lɛ yiteŋ, ni ejaje Israelbii lɛ atɔmɔi lɛ fɛɛ kɛ amɛmlatɔmɔi lɛ fɛɛ kɛ amɛhe eshai lɛ fɛɛ eshwie enɔ, ekɛ fɛɛ ashwie abotia lɛ yiteŋ,+ ni etu lɛ ewo nuu ko ni ahala lɛ* lɛ dɛŋ ni eyaŋmɛɛ ehe ni eya ŋa lɛ nɔ. 22 Abotia lɛ atere amɛtɔmɔi lɛ fɛɛ+ kɛya shia ŋa shikpɔŋ ko nɔ,+ ni eŋmɛɛ abotia lɛ he ni eya ŋa lɛ nɔ.+
23 “No sɛɛ lɛ, Aaron abote kpee buu lɛ mli, ni ejie klala atadei ni ewo be ni ebote he ni yɔɔ krɔŋkrɔŋ lɛ, ni ekɛshwie shi yɛ jɛmɛ. 24 Ekɛ nu aju ehe*+ yɛ he ko ni yɔɔ krɔŋkrɔŋ, ni ewo etadei lɛ;+ no sɛɛ lɛ, eje kpo ni ebashã eshãa afɔle+ lɛ kɛ maŋ lɛ shãa afɔle+ lɛ, ni ekpãtã ehã lɛ diɛŋtsɛ ehe kɛ maŋ lɛ hu.+ 25 Eshã esha afɔle kooloo lɛ fɔ lɛ* yɛ afɔleshaa latɛ lɛ nɔ.
26 “Nuu lɛ ni yaŋmɛɛ abotia lɛ he kɛhã Azazel+ lɛ afɔ etadei lɛ ahe ni ekɛ nu aju ehe, no sɛɛ lɛ, ebaanyɛ eba nsara lɛ mli.
27 “Ni esha afɔle tsinanuu lɛ kɛ esha afɔle abotia lɛ ni akɛ amɛlá lɛ tee he ni yɔɔ krɔŋkrɔŋ lɛ ni akɛyakpãtã lɛ, akɛ amɛ aya nsara lɛ sɛɛ, ni ayashã amɛhewolo lɛ kɛ amɛloo lɛ kɛ amɛfei lɛ yɛ la mli.+ 28 Mɔ ni baayashã amɛ lɛ afɔ etadei ahe, ni ekɛ nu aju ehe, no sɛɛ lɛ ebaanyɛ eba nsara lɛ mli.
29 “Enɛ atsɔ mla ni kã shi daa hã nyɛ: Nyɔɔŋ ni ji kpawo lɛ nɔ gbi ni ji nyɔŋma lɛ nɔ lɛ, nyɛwaa nyɛhe yi,* ni nyɛkatsua nitsumɔ ko nitsumɔ ko,+ maŋnyo jio, gbɔ ni ebahi nyɛteŋ jio. 30 Abaakpãtã+ ahã nyɛ yɛ gbi nɛɛ nɔ, koni akɛhã nyɛhe atse. Nyɛhe baatse kɛjɛ nyɛhe eshai lɛ fɛɛ amli yɛ Yehowa hiɛ.+ 31 Eji hejɔɔmɔ gbi ni nyɛkɛbaajɔɔ nyɛhe kwraa, ni nyɛwaa nyɛhe yi.*+ Eji mla ni kã shi daa hã nyɛ.
32 “Osɔfo ni afɔ lɛ mu,+ ni awó lɛ osɔfo*+ koni eye etsɛ sɛɛ+ lɛ baashã kpatamɔ afɔlei, ní ewo klala atadei,+ ni ji atadei krɔŋkrɔŋi+ lɛ. 33 Ekpãtã ehã jamɔhe krɔŋkrɔŋ+ lɛ kɛ kpee buu+ lɛ kɛ afɔleshaa latɛ+ lɛ; ni ekpãtã ehã osɔfoi lɛ kɛ maŋ muu lɛ fɛɛ.+ 34 Enɛ atsɔ mla ni kã shi daa hã nyɛ,+ koni akɛkpãtã ahã Israelbii lɛ shi kome daa afi+ yɛ amɛhe eshai lɛ fɛɛ hewɔ.”
No hewɔ lɛ, efee bɔ ni Yehowa fã Mose lɛ pɛpɛɛpɛ.