2 Mose
10 Ni Yehowa kɛɛ Mose akɛ: “Yaa Farao ŋɔɔ, ejaakɛ miŋmɛ gbɛ koni ekpiliŋ etsui, ní etsuji lɛ hu akpiliŋ amɛtsui,+ koni mafee mikadii nɛɛ yɛ ehiɛ,+ 2 agbɛnɛ hu, koni ogba obii kɛ onabii bɔ ni migbala Ejipt toi waa, kɛ okadii hu ni mifee yɛ amɛteŋ lɛ;+ ni nyɛbaaná nyɛle akɛ miji Yehowa lɛ.”
3 No hewɔ lɛ, Mose kɛ Aaron tee Farao ŋɔɔ ni amɛyakɛɛ lɛ akɛ: “Bɔ ni Yehowa, Hebribii lɛ a-Nyɔŋmɔ lɛ kɛɛ nɛ, ‘Mɛɛ be kwraa obaakpɛlɛ ní oba ohe shi ohã mi?+ Hã mimaŋ lɛ aya koni amɛyasɔmɔ mi. 4 Shi kɛ́ okpɛlɛɛɛ ní mimaŋ lɛ aya lɛ, naa, wɔ́ lɛ, mahã baalabii* aba oshikpɔji lɛ anɔ. 5 Ni amɛbaaha shikpɔŋ lɛ hiɛ, ni anyɛŋ ana shikpɔŋ. Amɛbaaye nɔ fɛɛ nɔ ní nyɔŋmɔŋtɛi lɛ kpãtãaa hiɛ ní shwɛ hã nyɛ lɛ, ni amɛbaaye nyɛtsei fɛɛ ni tsɛ̃rɛ̃ɔ yɛ ŋa mli lɛ.+ 6 Amɛbaayimɔ oshĩai, otsuji lɛ fɛɛ ashĩai, kɛ shĩai fɛɛ ni yɔɔ Ejipt lɛ amli, bɔ ni otsɛmɛi kɛ oniimɛi enako enɔ dã kɛjɛ be ni afɔ amɛ kɛbashi ŋmɛnɛ gbi nɛɛ.’”+ Kɛkɛ ni etsɔ ehe eje Farao ŋɔɔ etee.
7 Kɛkɛ ni Farao tsuji lɛ kɛɛ lɛ akɛ: “Mɛɛ beyinɔ nɔŋŋ nuu nɛɛ baahao wɔ kɛyashi?* Hã gbɔmɛi lɛ aya koni amɛyasɔmɔ Yehowa, amɛ-Nyɔŋmɔ lɛ. Ani loloolo lɛ, onaaa akɛ Ejipt hiɛ ekpãtã?” 8 No hewɔ lɛ, akɛ Mose kɛ Aaron ku sɛɛ kɛba Farao ŋɔɔ ekoŋŋ, ni ekɛɛ amɛ akɛ: “Nyɛyaa, nyɛyasɔmɔa Yehowa, nyɛ-Nyɔŋmɔ lɛ. Shi namɛi kɛ namɛi baaya lɛ?” 9 Ni Mose kɛɛ: “Wɔkɛ wɔbii bibii kɛ wɔnukpai kɛ wɔbihii kɛ wɔbiyei kɛ wɔtoi kɛ wɔtsinai lɛ baaya,+ ejaakɛ wɔbaayaye gbi jurɔ wɔhã Yehowa.”+ 10 Ekɛɛ amɛ akɛ: “Kɛ́ mihã nyɛ kɛ nyɛbii lɛ tee lɛ, no lɛ, Yehowa kɛ nyɛ yɛ lɛɛlɛŋ!+ Ekã shi faŋŋ akɛ, nyɛmiitao nyɛfee nɔ fɔŋ ko. 11 Dabi! Nyɛhii lɛ pɛ nyɛyaa nyɛyasɔmɔa Yehowa, ejaakɛ no ji nɔ ni nyɛbi.” Kɛkɛ ni ashwie amɛ kɛje Farao hiɛ.
12 Agbɛnɛ, Yehowa kɛɛ Mose akɛ: “Kpã onine mli yɛ Ejipt shikpɔŋ lɛ nɔ koni baalabii lɛ aba Ejipt shikpɔŋ lɛ nɔ, ní amɛbaye kwɛ̃ɛ nii fɛɛ ni yɔɔ shikpɔŋ lɛ nɔ lɛ, nɔ fɛɛ nɔ ni nyɔŋmɔŋtɛi lɛ shi lɛ.” 13 Amrɔ nɔŋŋ lɛ, Mose kpã etso lɛ mli yɛ Ejipt shikpɔŋ lɛ nɔ, ni Yehowa hã bokã kɔɔyɔɔ tswa yɛ shikpɔŋ lɛ nɔ nakai gbi lɛ, jetsɛremɔ kɛ jenamɔ fɛɛ. Be ni je tsɛre lɛ, bokã kɔɔyɔɔ lɛ kɛ baalabii lɛ ba. 14 Ni baalabii lɛ ba Ejipt shikpɔŋ lɛ nɔ fɛɛ, ni amɛha Ejipt kpokpaa lɛ nɔ fɛɛ.+ Ebafee naagba wulu diɛŋtsɛ;+ baalabii babaoo ni tamɔ nakai bako dã, ni baalabii babaoo ni tamɔ nakai hu baŋ dɔŋŋ. 15 Amɛha shikpɔŋ muu lɛ fɛɛ hiɛ, ni amɛhã shikpɔŋ lɛ nɔ di tuŋŋ; amɛye kwɛ̃ɛ nii fɛɛ ni yɔɔ shikpɔŋ lɛ nɔ, kɛ aduawai fɛɛ ni yɔɔ tsei ni nyɔŋmɔŋtɛi lɛ shi lɛ anɔ lɛ; eshwɛɛɛ baa ŋmɔŋ kome folo po yɛ tsei lɛ anɔ loo yɛ kwɛ̃ɛ nii lɛ anɔ yɛ Ejipt shikpɔŋ lɛ nɔ fɛɛ.
16 No hewɔ lɛ, oya nɔŋŋ lɛ Farao tsɛ Mose kɛ Aaron kɛba ni ekɛɛ: “Mifee esha mishi Yehowa, nyɛ-Nyɔŋmɔ lɛ kɛ nyɛ hu. 17 Agbɛnɛ, nyɛfainɛ, nyɛkɛ mihe esha lɛ akea mi shi kome nɛɛ kɛkɛ, ní nyɛkpaa Yehowa, nyɛ-Nyɔŋmɔ lɛ fai koni ejie haomɔ ní gbeɔ mɔ nɛɛ kɛje minɔ.” 18 No hewɔ lɛ, eje* Farao ŋɔɔ etee ni eyakpa Yehowa fai.+ 19 Kɛkɛ ni Yehowa hã kɔɔyɔɔ lɛ tsake he ni etswaa kɛjɛɔ lɛ, ni ebatsɔ kɔɔyɔɔ ni naa wa ni tswaa kɛjɛɔ anai, ni eloo baalabii lɛ kɛtee ni ekɛ amɛ yawo Ŋshɔ Tsuru lɛ mli. Eshwɛɛɛ baalabii lɛ ateŋ ekome folo po yɛ Ejipt kpokpaa lɛ nɔ fɛɛ. 20 Shi Yehowa ŋmɛ gbɛ ni Farao kpiliŋ etsui,+ ni ehãaa Israelbii lɛ aya.
21 Kɛkɛ ni Yehowa kɛɛ Mose akɛ: “Kpã onine mli kɛya ŋwɛigbɛ koni duŋ awo yɛ Ejipt shikpɔŋ lɛ nɔ, duŋ kpii diɛŋtsɛ.” 22 Amrɔ lɛ, Mose kpã enine mli kɛtee ŋwɛigbɛ, ni duŋ kpii wo yɛ Ejipt shikpɔŋ lɛ nɔ fɛɛ gbii etɛ.+ 23 Amɛteŋ mɔ ko mɔ ko enaaa enaanyo, ni mɔ ko mɔ ko eteee shi kɛjɛɛɛ he ni eyɔɔ lɛ gbii etɛ; shi jeŋ tse heŋŋ* hã Israelbii lɛ fɛɛ yɛ amɛshihilɛhei lɛ.+ 24 Kɛkɛ ni Farao tsɛ Mose ni ekɛɛ: “Nyɛyaa, nyɛyasɔmɔa Yehowa.+ Nyɛshia nyɛtoi kɛ nyɛtsinai lɛ pɛ kɛkɛ. Nyɛbii lɛ tete po baanyɛ amɛkɛ nyɛ aya.” 25 Shi Mose kɛɛ: “Bo diɛŋtsɛ hu obaahã wɔ kooloi ní wɔkɛbaayahã akɛ afɔlei kɛ nɔ ni wɔkɛbaayashã shãa afɔlei,* ni wɔkɛ enɛɛmɛi baahã Yehowa, wɔ-Nyɔŋmɔ lɛ.+ 26 Wɔkɛ kooloi ni wɔlɛɔ lɛ hu baaya. Wɔshiŋ kooloo* kome po yɛ sɛɛ, ejaakɛ wɔkɛ ekomɛi baayasɔmɔ Yehowa, wɔ-Nyɔŋmɔ lɛ, ni wɔleee amɛmli nɔ ni wɔkɛbaasɔmɔ Yehowa, ja wɔyashɛ jɛmɛ dã.” 27 No hewɔ lɛ, Yehowa ŋmɛ gbɛ ni Farao kpiliŋ etsui, ni ekpɛlɛɛɛ ní amɛya.+ 28 Farao kɛɛ lɛ akɛ: “Jee mihiɛ ni oya! Kwɛmɔ jogbaŋŋ ní okaba* mihiɛ dɔŋŋ, ejaakɛ gbi nɔ ni obaaba* mihiɛ lɛ, obaagbo.” 29 Kɛkɛ ni Mose kɛɛ: “Bɔ ni owie lɛ, minu, mikaŋ akɛ maba* ohiɛ dɔŋŋ.”