2 Kronika

6 Kɛkɛ ni Solomon wie akɛ: “Yehowa kɛɛ ebaahi duŋ kpii lɛ mli.+ 2 Agbɛnɛ, mima shĩa grɔŋŋ* mihã bo, he ko ni ma shi shiŋŋ koni ohi jɛmɛ kɛya naanɔ.”+

3 Kɛkɛ ni maŋtsɛ lɛ tsɔ ehe ni ejɔɔ Israel asafo lɛ fɛɛ be ni Israel asafo lɛ fɛɛ damɔ shi lɛ.+ 4 Ekɛɛ akɛ: “Ajie Yehowa, Israel Nyɔŋmɔ lɛ, mɔ ni kɛ lɛ diɛŋtsɛ enaabu wo mitsɛ David shi, ni etsɔ lɛ diɛŋtsɛ enine nɔ ehã eba mli lɛ yi, mɔ ni kɛɛ akɛ, 5 ‘Kɛjɛ gbi nɔ ni mijie miwebii lɛ kɛje Ejipt shikpɔŋ lɛ nɔ lɛ, mihalako maŋ ko yɛ Israel wekui lɛ fɛɛ amli koni ama shĩa ahã mi yɛ jɛmɛ koni migbɛ́i lɛ akã nɔ,+ ni mihalako nuu ko akɛ etsɔ mimaŋ Israel hiɛnyiɛlɔ. 6 Shi mihala Yerusalem+ akɛ maŋ ni migbɛ́i kã nɔ, ni mihala David koni eye mimaŋ Israel nɔ.’+ 7 No mli lɛ, ekã mitsɛ David tsui nɔ akɛ ema shĩa ehã Yehowa, Israel Nyɔŋmɔ lɛ gbɛ́i lɛ.+ 8 Shi Yehowa kɛɛ mitsɛ David akɛ, ‘Ekã otsui nɔ akɛ oma shĩa ohã migbɛ́i lɛ, ni ehi jogbaŋŋ akɛ nɔ ko nakai kã otsui nɔ. 9 Shi jeee bo ji mɔ ni baama shĩa lɛ, shi moŋ, bo diɛŋtsɛ obinuu ni abaafɔ ahã bo lɛ,* lɛ ji mɔ ni baama shĩa lɛ ehã migbɛ́i lɛ.’+ 10 Yehowa eye shi ni ewo lɛ nɔ, ejaakɛ miye mitsɛ David sɛɛ, ni mita Israel maŋtsɛ sɛi lɛ nɔ+ tamɔ bɔ ni Yehowa wo shi lɛ pɛpɛɛpɛ.+ Mima shĩa lɛ hu mihã Yehowa, Israel Nyɔŋmɔ lɛ gbɛ́i lɛ, 11 ni mikɛ Adeka lɛ ni kpaŋmɔ+ ni Yehowa kɛ emaŋ Israel kpaŋ lɛ yɔɔ mli lɛ ebama jɛmɛ.”

12 Kɛkɛ ni Solomon damɔ Yehowa afɔleshaa latɛ lɛ hiɛ yɛ Israel asafo lɛ fɛɛ hiɛ, ni egbɛ enijiaŋ.+ 13 (No mli lɛ, Solomon kɛ akɔɔble etswa kpoku ko yɛ kpo lɛ teŋ.+ Ekɛlɛ ji ninetalɔi* enumɔ, ni elɛɛmɔ ji ninetalɔi enumɔ, ni ekwɔlɛ ji ninetalɔi etɛ; ni edamɔ nɔ.) Kɛkɛ ni ekula shi yɛ Israel asafo lɛ fɛɛ hiɛ, ni egbɛ enijiaŋ kɛtee ŋwɛi,+ 14 ni ekɛɛ akɛ: “Yehowa, Israel Nyɔŋmɔ, nyɔŋmɔ ko nyɔŋmɔ ko bɛ ŋwɛi loo shikpɔŋ lɛ nɔ ni tamɔ bo, ejaakɛ oyeɔ kpaŋmɔ nɔ ni ojieɔ suɔmɔ ni tsakeee kpo otsɔɔ otsuji ni nyiɛɔ yɛ ohiɛ kɛ amɛtsui fɛɛ lɛ.+ 15 Oye shi ni owo otsulɔ, ni ji mitsɛ David lɛ nɔ.+ Bo diɛŋtsɛ okɛ onaabu wo shi, ni ŋmɛnɛ gbi nɛɛ otsɔ bo diɛŋtsɛ onine nɔ ohã eba mli.+ 16 Ni agbɛnɛ, Yehowa, Israel Nyɔŋmɔ, ye shi ni owo otsulɔ, ni ji mitsɛ David lɛ nɔ be ni okɛɛ akɛ: ‘Kɛ́ obihii lɛ ahiɛ hi amɛhe nɔ jogbaŋŋ ni amɛye mimla lɛ nɔ+ tamɔ bɔ ni ofee* lɛ, no lɛ ebaŋ kɔkɔɔkɔ akɛ be ko baashɛ ni anáŋ oseshinyo ko ni baata Israel maŋtsɛ sɛi lɛ nɔ.’+ 17 Ni agbɛnɛ, Yehowa, Israel Nyɔŋmɔ, hã shi ni owo otsulɔ David lɛ aba mli.

18 “Shi ani Nyɔŋmɔ baaba ni ekɛ adesai abahi shikpɔŋ lɛ nɔ lɛɛlɛŋ?+ Naa! Ŋwɛii, ŋwɛii amli ŋwɛi po edaaa hãaa bo;+ enyiɛ nɔŋŋ shĩa ni mima nɛɛ!+ 19 No hewɔ lɛ, Yehowa, mi-Nyɔŋmɔ, bo otsulɔ sɔlemɔ kɛ faikpamɔ kɛhã mɔbɔnalɛ lɛ toi, ni obo sɔlemɔ ni otsulɔ sɔleɔ kɛhã yelikɛbuamɔ lɛ, kɛ sɔlemɔ ni esɔleɔ yɛ ohiɛ nɛɛ toi. 20 Hã ohiŋmɛii akã shĩa nɛɛ he jetsɛremɔ kɛ jenamɔ, shĩa ni owie yɛ he akɛ, okɛ ogbɛ́i baafɔ̃ nɔ lɛ,+ ni obo sɔlemɔ ni otsulɔ ewó ehiɛ etsɔɔ biɛ ni esɔleɔ lɛ toi. 21 Ni obo otsulɔ faikpamɔ kɛhã yelikɛbuamɔ kɛ fai ni omaŋ Israel kpaa be ni amɛtsɔ amɛhiɛ amɛhã biɛ ni amɛsɔleɔ lɛ toi,+ ni onu yɛ he ni oyɔɔ lɛ, he ni oyɔɔ yɛ ŋwɛii lɛ;+ ni onu ni okɛke.+

22 “Kɛ́ mɔ ko fee enyɛmi gbɔmɔ esha ni ahã ekã kitã,* ni kitakamɔ lɛ he loomɔ bakã enɔ, ni be ni kitã lɛ he loomɔ kã enɔ lolo lɛ eba ofɔleshaa latɛ lɛ hiɛ yɛ oshĩa nɛɛ,+ 23 no lɛ, jɛɛ ŋwɛi onu ni otsu he nii, ni okojo otsuji, ni oto mɔ fɔŋ lɛ najiaŋ, ni ohã nɔ ni efee lɛ ababua eyiteŋ,+ ni obu jalɔ lɛ bem* ni ojɔɔ lɛ yɛ lɛ diɛŋtsɛ ejalɛ lɛ naa.+

24 “Kɛ́ henyɛlɔ ko ye omaŋ Israel nɔ kunim yɛ esha ni amɛtee nɔ amɛfee amɛshi bo lɛ hewɔ,+ ni amɛku amɛsɛɛ kɛba oŋɔɔ ni amɛwo ogbɛ́i+ lɛ hiɛ nyam ni amɛsɔle+ ni amɛkpa bo fai koni ona amɛ mɔbɔ yɛ oshĩa nɛɛ,+ 25 no lɛ, jɛɛ ŋwɛi onu,+ ni okɛ omaŋ Israel he esha lɛ ake amɛ, ni okɛ amɛ aku sɛɛ kɛba shikpɔŋ ni okɛhã amɛ kɛ amɛtsɛmɛi lɛ nɔ ekoŋŋ.+

26 “Kɛji aŋa ŋwɛi naa ni nugbɔ enɛɛɛ+ akɛni amɛtee nɔ amɛfee esha amɛshi bo lɛ hewɔ,+ ni amɛtsɔ amɛhiɛ amɛhã biɛ ni amɛwo ogbɛ́i lɛ hiɛ nyam ni amɛtsi amɛhe kɛje esha lɛ he akɛni oba amɛ shi lɛ hewɔ* lɛ,+ 27 no lɛ, jɛɛ ŋwɛi onu, ni okɛ otsuji, ni ji omaŋ Israel he esha lɛ ake amɛ, ejaakɛ obaatsɔɔ amɛ gbɛ kpakpa ni esa akɛ amɛnyiɛ nɔ;+ ni ohã nugbɔ anɛ+ yɛ shikpɔŋ ni okɛhã amɛ akɛ gboshinii lɛ nɔ.

28 “Kɛji hɔmɔ ba shikpɔŋ lɛ nɔ jio,+ tsɛŋemɔ hela ni gbeɔ mɔ jio,+ jeŋ dɔlɛ ni hãa ŋmɔshi nibii ŋalaa jio, hela ni hãa tsei gboiɔ jio,+ baalabii pii jio, agãi ni fiteɔ nii waa jio;+ kɛji amɛhenyɛlɔi bawo amɛhe ka yɛ shikpɔŋ lɛ nɔ maji lɛ eko mli jio,*+ haomɔ kroko fɛɛ haomɔ kroko loo hela fɛɛ hela ni baaba jio,+ 29 no lɛ, sɔlemɔ fɛɛ sɔlemɔ,+ loo fai fɛɛ fai+ ni mɔ ko loo omaŋ Israel fɛɛ baakpa kɛhã mɔbɔnalɛ (ejaakɛ mɔ fɛɛ mɔ le lɛ diɛŋtsɛ ehaomɔ kɛ lɛ diɛŋtsɛ epiŋmɔ)+ be ni amɛgbɛ amɛnijiaŋ amɛtsɔɔ shĩa nɛɛ,+ 30 jɛɛ ŋwɛi, ni ji oshihilɛhe+ lɛ onu ni okɛke;+ ni ojɔɔ mɔ fɛɛ mɔ yɛ gbɛ fɛɛ gbɛ ni ekɔ lɛ naa, ejaakɛ ole etsuiŋ (bo pɛ ji mɔ ni le adesa tsuiŋ lɛɛlɛŋ),+ 31 koni amɛshe bo gbeyei ni amɛnyiɛ yɛ ogbɛi lɛ anɔ gbii fɛɛ ni amɛkɛbaahi shikpɔŋ ni okɛhã amɛtsɛmɛi lɛ nɔ lɛ.

32 “Agbɛnɛ hu, kɛ́ gbɔ ko ni jɛɛɛ omaŋ Israel teŋ jɛ maŋsɛɛ shɔŋŋ eba yɛ ogbɛ́i kpele*+ lɛ kɛ onineshiwalɛ kɛ onine ni okpã mli lɛ hewɔ, ni eba ni ekɛ ehiɛ tsɔɔ nɛkɛ shĩa nɛɛ ni esɔle lɛ,+ 33 no lɛ, jɛɛ ŋwɛi, ni ji oshihilɛhe lɛ obo toi, ni ofee nɔ fɛɛ nɔ ni gbɔ lɛ baabi bo lɛ, koni mɛi ni yɔɔ shikpɔŋ lɛ nɔ lɛ fɛɛ ale ogbɛ́i+ lɛ ni amɛshe bo gbeyei tamɔ bɔ ni omaŋ Israel feɔ lɛ, ni amɛná amɛle akɛ ogbɛ́i kã shĩa nɛɛ ni mima lɛ nɔ.

34 “Kɛ́ otsu omaŋbii lɛ koni amɛkɛ amɛhenyɛlɔi ayawu ta, ekɔɔɔ he eko he ni obaatsu amɛ,+ ni amɛwó amɛhiɛ amɛtsɔɔ maŋ ni ohala lɛ kɛ shĩa ni mima mihã ogbɛ́i lɛ ni amɛsɔle+ amɛhã bo lɛ,+ 35 no lɛ, jɛɛ ŋwɛi onu amɛsɔlemɔ kɛ amɛfaikpamɔ kɛhã mɔbɔnalɛ lɛ ni oye amɛsane ohã amɛ.+

36 “Kɛ́ amɛfee esha amɛshi bo (ejaakɛ mɔ ko mɔ ko bɛ ni efeee esha),+ ni omli fu amɛ, ni okɛ amɛ wo henyɛlɔ ko dɛŋ, ni amɛhenyɛlɔ lɛ ŋɔ amɛ nom kɛtee shikpɔŋ ko nɔ, he ni jekɛ jio, he ni jekɛɛɛ jio,+ 37 ni amɛhiɛ tserɛ amɛ yɛ shikpɔŋ ni aŋɔ amɛ nom kɛtee nɔ lɛ nɔ, ni amɛku amɛsɛɛ kɛba oŋɔɔ, ni amɛkpa bo fai ni ona amɛ mɔbɔ yɛ shikpɔŋ ni aŋɔ amɛ nom kɛtee nɔ lɛ nɔ amɛkɛɛ, ‘Wɔfee esha ni wɔtɔ̃; wɔfee efɔŋ,’+ 38 ni amɛku amɛsɛɛ kɛba oŋɔɔ kɛ amɛtsui fɛɛ+ kɛ amɛsusuma* fɛɛ yɛ shikpɔŋ ni aŋɔ amɛ nom+ kɛtee nɔ lɛ nɔ, ni amɛtsɔ amɛhiɛ amɛhã amɛshikpɔŋ lɛ ni okɛhã amɛtsɛmɛi lɛ kɛ maŋ ni ohala+ lɛ kɛ shĩa ni mima mihã ogbɛ́i lɛ, ni amɛsɔle amɛhã bo lɛ, 39 no lɛ, jɛɛ ŋwɛi, ni ji oshihilɛhe lɛ onu amɛsɔlemɔ kɛ amɛfaikpamɔ kɛhã mɔbɔnalɛ lɛ, ni oye amɛsane ohã amɛ,+ ni okɛ esha ni omaŋbii lɛ efee amɛshi bo lɛ ake amɛ.

40 “Agbɛnɛ, mi-Nyɔŋmɔ, ofainɛ, ohiŋmɛii akamɔ ni oka otoii ohã sɔlemɔ ni asɔleɔ yɛ biɛ lɛ.+ 41 Ni agbɛnɛ, Yehowa Nyɔŋmɔ, wó ohe nɔ, ni oya ohejɔɔmɔhe+ lɛ, bo kɛ Adeka ni tsɔɔ akɛ oyɛ hewalɛ lɛ. Yehowa Nyɔŋmɔ, okɛ yiwalaheremɔ atade awula osɔfoi ni sɔmɔɔ bo lɛ, ni onɔkwafoi lɛ anya yɛ nibii kpakpai ni ofeɔ lɛ ahewɔ.+ 42 Yehowa Nyɔŋmɔ, kaashɛ mɔ ni ofɔ lɛ mu lɛ ofɔ̃.*+ Kaimɔ osuɔmɔ ni tsakeee ni ojie lɛ kpo otsɔɔ otsulɔ David lɛ.”+