2 Mose

28 “Tsɛ onyɛmi nuu Aaron kɛ ebihii lɛ yɛ Israelbii lɛ ateŋ, koni esɔmɔ akɛ osɔfo ehã mi+—Aaron,+ kɛ ebihii+ Nadab kɛ Abihu,+ Eleazar kɛ Itamar.+ 2 Feemɔ atadei krɔŋkrɔŋi ni yɔɔ nyam kɛ fɛo ohã onyɛmi nuu Aaron.+ 3 Okɛ mɛi fɛɛ ni le ŋaa nitsumɔ jogbaŋŋ,* mɛi ni mikɛ hiɛshikamɔ mumɔ ewo amɛmli obɔ lɛ awie,+ ní amɛfee Aaron atadei ni baahã ana akɛ eyɛ krɔŋkrɔŋ lɛ, koni esɔmɔ akɛ osɔfo ehã mi.

4 “Atadei ni amɛbaafee lɛ nɛ: tsitsinɔnii+ kɛ efɔd+ kɛ atade ni nine bɛ he+ kɛ atade kakadaŋŋ tsɛɛkitsɛɛki kɛ yitsofiinɔ*+ kɛ mliteŋfiinɔ;+ amɛbaafee atadei krɔŋkrɔŋi nɛɛ amɛhã onyɛmi nuu Aaron kɛ ebihii lɛ, koni esɔmɔ akɛ osɔfo ehã mi. 5 Mɛi ni le ŋaa nitsumɔ jogbaŋŋ nɛɛ kɛ shika tsuru kɛ kpãa bluu kɛ kooloo hetsɔi afaseo* kɛ kpãa ni tsuɔ waa kɛ klala kpakpa afee.

6 “Amɛkɛ shika tsuru kɛ kpãa bluu kɛ kooloo hetsɔi afaseo* kɛ kpãa ni tsuɔ waa kɛ klala ni alo lɛ jogbaŋŋ afee efɔd lɛ, ni alo nii awo efɔd lɛ mli.+ 7 Akɛ efɔd lɛ kɔɔji enyɔ lɛ naabui enyɔ lɛ atsa. 8 Mlifiinɔ ni alo+ ni yɔɔ efɔd lɛ he, ni akɛfiɔ efɔd lɛ mli koni emɔ mɔ jogbaŋŋ lɛ, akɛ nibii nɛɛ nɔŋŋ afee, ni nomɛi ji: shika tsuru kɛ kpãa bluu kɛ kooloo hetsɔi afaseo* kɛ kpãa ni tsuɔ waa kɛ klala ni alo lɛ jogbaŋŋ.

9 “Ŋɔɔ onike tɛi enyɔ,+ ni okpɛ́ Israel bihii lɛ agbɛ́ii yɛ nɔ,+ 10 kpɛ́ gbɛ́ii ekpaa yɛ tɛi lɛ ekome nɔ, ni okpɛ́ gbɛ́ii ekpaa ni eshwɛ lɛ yɛ tɛ kroko lɛ nɔ, yɛ amɛfɔmɔ naa. 11 Tɛ ŋaalɔ akpɛ́ Israel bihii lɛ agbɛ́ii yɛ tɛi enyɔ lɛ anɔ tamɔ bɔ ni ekpɛ́ɔ nii yɛ niianaasɔomɔnɔ nɔ lɛ.+ No sɛɛ lɛ, okɛ tɛi lɛ atara shika tsuru nii amli. 12 Okɛ tɛi enyɔ lɛ atara efɔd lɛ kɔɔji lɛ anɔ akɛ kaimɔ tɛi kɛhã Israelbii lɛ,+ ni Aaron kɛ amɛgbɛ́ii ni yɔɔ ekɔɔji enyɔ lɛ anɔ lɛ aba Yehowa hiɛ akɛ kaimɔ nɔ. 13 Okɛ shika tsuru afee nibii ní okɛ tɛi lɛ baatara mli lɛ, 14 ni okɛ shika tsuru krɔŋŋ afee tsein* enyɔ ni agbɔ lɛ tamɔ kpãa,+ ni okɛ tsein ni agbɔ lɛ tamɔ kpãa lɛ alalaa nibii ni akɛ tɛi lɛ baatara mli lɛ.+

15 “Hã nilolɔ ko afee tsitsinɔnii kɛhã kojomɔ.+ Afee lɛ tamɔ efɔd lɛ, akɛ shika tsuru kɛ kpãa bluu kɛ kooloo hetsɔi afaseo* kɛ kpãa ni tsuɔ waa kɛ klala ni alo lɛ jogbaŋŋ afee.+ 16 Kɛ́ adɔ mli enyɔ lɛ, esa akɛ efee koji ejwɛ ní fɛɛ yeɔ egbɔ, ekɛlɛ afee dɛ̃ ni agbɛ mli* kome, ni elɛɛmɔ hu afee dɛ̃ ni agbɛ mli kome. 17 Okɛ tɛi atara mli, too tɛi lɛ liamɔi ejwɛ. Klɛŋklɛŋ liamɔ lɛ mli tɛi ji rubi kɛ topaz kɛ emerald. 18 Liamɔ ni ji enyɔ lɛ mli tɛi ji tɛkwais kɛ safiro kɛ yaspi. 19 Liamɔ ni ji etɛ lɛ mli tɛi ji leshʹem* kɛ agate kɛ amɛtisto. 20 Liamɔ ni ji ejwɛ lɛ mli tɛi ji krisolito kɛ onike kɛ yade. Okɛ tɛi lɛ atara shika tsuru nii amli. 21 Tɛi lɛ kɛ Israel bihii 12 lɛ agbɛ́ii lɛ anyiɛ. Akpɛ́ gbɛ́ii yɛ eko fɛɛ eko nɔ tamɔ bɔ ni akpɛ́ɔ nii yɛ niianaasɔomɔnɔ nɔ lɛ, gbɛ́ii lɛ eko fɛɛ eko adamɔ shi kɛhã wekui 12 lɛ ateŋ ekome.

22 “Okɛ shika tsuru krɔŋŋ afee tsein* ní agbɔ lɛ tamɔ kpãa yɛ tsitsinɔnii lɛ nɔ.+ 23 Okɛ shika tsuru afee gai enyɔ kɛhã tsitsinɔnii lɛ, ní okɛ gai enyɔ lɛ awo tsitsinɔnii lɛ ŋwɛigbɛ naabui enyɔ lɛ. 24 Okɛ shika tsuru kpãi enyɔ lɛ ahɔlɔ gai enyɔ lɛ amli yɛ tsitsinɔnii lɛ ŋwɛigbɛ naabui lɛ. 25 Okɛ kpãi enyɔ lɛ naabui enyɔ lɛ ahɔlɔ nibii enyɔ ní akɛ tɛi lɛ tara mli yɛ efɔd lɛ kɔɔji lɛ anɔ lɛ amli, yɛ hiɛgbɛ. 26 Okɛ shika tsuru afee gai enyɔ ni okɛwo tsitsinɔnii lɛ shishigbɛ naabui enyɔ lɛ ahe yɛ emligbɛ, koni ekwɛ efɔd lɛ hiɛ.+ 27 Okɛ shika tsuru afee gai enyɔ krokomɛi hu yɛ efɔd lɛ hiɛgbɛ, yɛ kɔɔji enyɔ lɛ shishigbɛ, ní ebɛŋkɛ he ni akɛtsa yɛ lɛ, yɛ efɔd lɛ mlifiinɔ ni alo lɛ yiteŋgbɛ.+ 28 Okɛ kpãa bluu afi tsitsinɔnii lɛ gai lɛ kɛyamɔ efɔd lɛ gai lɛ, koni emɔ tsitsinɔnii lɛ ekpɛtɛ shi. Enɛ baamɔ tsitsinɔnii lɛ ekpɛtɛ efɔd lɛ nɔ, yɛ mlifiinɔ ni alo lɛ yiteŋgbɛ.

29 “Aaron aŋɔ Israel bihii lɛ agbɛ́ii ni yɔɔ tsitsinɔnii kɛhã kojomɔ lɛ nɔ lɛ kɛkpɛtɛ etsitsi* nɔ kɛ́ eeba He Krɔŋkrɔŋ lɛ, koni etsɔ kaimɔ nɔ yɛ Yehowa hiɛ daa. 30 Okɛ Yurim kɛ Tumim*+ lɛ awo tsitsinɔnii kɛhã kojomɔ lɛ mli, ni ehi Aaron tsitsi* nɔ kɛ́ eeba Yehowa hiɛ, ni Aaron awo nɔ ni abaatsɔ nɔ akojo Israelbii lɛ yɛ etsitsi* nɔ yɛ Yehowa hiɛ daa.

31 “Okɛ kpãa bluu sɔŋŋ afee efɔd lɛ shishi atade ní nine bɛ he lɛ.+ 32 Jiemɔ kuɛ owo atade lɛ ŋwɛigbɛ,* yɛ eteŋ. Nilolɔ ko kɛ mamaloo tsɔne alo nɔ ko kɛbã kuɛ ni ajie lɛ naa fɛɛ kɛkpe. Efee lɛ tamɔ gbɛ ni ajieɔ awoɔ dama he lɛ, koni ekagbá. 33 Okɛ kpãa bluu kɛ kooloo hetsɔi afaseo* kɛ kpãa ni tsuɔ waa afee pomegranet yibii* kɛbɔle atade lɛ naamuu lɛ fɛɛ kɛkpe, ni okɛ shika tsuru afee ŋmɛji ohɔlɔ pomegranet yibii lɛ ateŋ. 34 Kɛ́ okɛ shika tsuru ŋmɛlɛ kome ba lɛ, kɛkɛ lɛ okɛ pomegranet yibii kome eba, feemɔ lɛ nakai sɔŋŋ kɛbɔle atade ní nine bɛ he lɛ naamuu lɛ fɛɛ kɛkpe. 35 Aaron awo atade nɛɛ ní ekɛsɔmɔ, ní anu ŋmɛji lɛ agbɛɛmɔ kɛ́ eeya Yehowa hiɛ yɛ jamɔhe* lɛ, kɛ agbɛnɛ hu kɛ́ eeje kpo, koni ekagbo.+

36 “Okɛ shika tsuru krɔŋŋ afee dade fɛtɛfɛtɛ ni ekpɛlɛ, ni okpɛ́ yɛ nɔ, tamɔ akpɛ́ɔ nii yɛ niianaasɔomɔnɔ nɔ lɛ, akɛ: ‘Krɔŋkrɔŋ ji Yehowa.’+ 37 Okɛ kpãa bluu afi shika tsuru krɔŋŋ fɛtɛfɛtɛ ni kpɛlɛɔ lɛ okpɛtɛ yitsofiinɔ+ lɛ he; eta yitsofiinɔ lɛ hiɛ. 38 Ebaahi Aaron hiɛnaa, ni kɛ́ mɔ ko tɔ̃ tɔmɔ ko eshi krɔŋkrɔŋ nibii ní Israelbii lɛ ejɔɔ nɔ amɛhã akɛ nikeenii krɔŋkrɔŋi lɛ eko lɛ, Aaron baatere he sɔ̃ lɛ.+ Ehi Aaron hiɛnaa be fɛɛ be, koni amɛná Yehowa hiɛ dromɔ.

39 “Okɛ klala kpakpa alo atade kakadaŋŋ tsɛɛkitsɛɛki lɛ, okɛ klala kpakpa afee yitsofiinɔ, ní ofee mliteŋfiinɔ ni alo.+

40 “Agbɛnɛ hu, feemɔ atadei kakadaji, mliteŋfiinii, kɛ yitsofiinii* ni yɔɔ nyam kɛ fɛo+ ohã Aaron bihii+ lɛ. 41 Okɛ atadei lɛ awo onyɛmi nuu Aaron kɛ ebihii ni fata ehe lɛ, ni ofɔ amɛ mu,+ ni ohole amɛ osɔfoi,*+ ni ofee amɛ krɔŋkrɔŋ, ni amɛsɔmɔ akɛ osɔfoi amɛhã mi. 42 Agbɛnɛ hu, okɛ klala afee nikai ohã amɛ koni amɛkɛha amɛyayaiaŋ.+ Nikai nɛɛ akɛlɛmɔ afee kɛjɛ hɛ kɛyashi shuɔ. 43 Aaron kɛ ebihii lɛ awo nikai nɛɛ kɛ́ amɛmiiya kpee buu lɛ mli loo amɛmiiya afɔleshaa latɛ lɛ he koni amɛyasɔmɔ yɛ he krɔŋkrɔŋ lɛ, bɔ ni afee ni amɛkaye fɔ ní amɛgboi. Eji mla ni kã shi daa hã lɛ kɛ eseshibii ni baaba yɛ esɛɛ lɛ.