Yeremia
8 “Nakai be lɛ mli lɛ,” Yehowa kɛɛ, “abaaloo Yuda maŋtsɛmɛi lɛ awui, kɛ elumɛi lɛ awui, kɛ osɔfoi lɛ awui, kɛ gbalɔi lɛ awui, kɛ mɛi ni yɔɔ Yerusalem lɛ awui kɛje amɛgbohii abui lɛ amli. 2 Abaagbɛ mli atsɔɔ hulu lɛ kɛ nyɔɔŋtsere lɛ, kɛ ŋwɛi asraafoi lɛ fɛɛ ni amɛsumɔ amɛ ni amɛsɔmɔ amɛ, ni amɛnyiɛ amɛsɛɛ, ni amɛtao amɛsɛɛ gbɛ, ni amɛkoto amɛ lɛ.+ Abuaŋ amɛnaa, ni afuŋ amɛ hu. Amɛbaatsɔmɔ tamɔ kooloi afei yɛ shikpɔŋ lɛ nɔ.”+
3 “Ni nɛkɛ weku fɔŋ nɛɛ ateŋ mɛi ni baashwɛ lɛ baashwe gbele moŋ fe wala yɛ hei fɛɛ ni mashwie amɛ kɛya lɛ,” Yehowa, taiatsɛ lɛ kɛɛ.
4 “Ni kɛɛmɔ amɛ akɛ, ‘Nɔ ni Yehowa kɛɛ nɛ:
“Ani amɛbaagbee shi ni amɛteŋ shi dɔŋŋ?
Kɛ́ mɔ ko ku esɛɛ kɛje egbɛ nɔ lɛ, ani mɔ kroko lɛ hu ekuŋ esɛɛ kɛjeŋ egbɛ nɔ?
5 Mɛni hewɔ, maŋ nɛɛ, Yerusalem, fiɔ shi yɛ anɔkwa ni eyeee lɛ mli lɛ?
Amɛhiɛ amale mli kpɛŋŋ;
Amɛsumɔɔɔ ni amɛkuɔ amɛsɛɛ kɛjeɔ amɛgbɛ lɛ nɔ.+
6 Mika mitoi jogbaŋŋ ni mitee nɔ mibo toi, shi bɔ ni amɛwie lɛ ejaaa.
Amɛteŋ mɔ kome folo tsakeee etsui yɛ enɔfɔŋfeemɔ lɛ he, ni ebiii po akɛ, ‘Mɛni mifee nɛɛ?’+
Amɛteŋ mɔ fɛɛ mɔ kuɔ esɛɛ kɛyaa gbɛ ni mɛi pii nyiɛ nɔ lɛ nɔŋŋ nɔ tamɔ bɔ ni okpɔŋɔ shaa foi kɛboteɔ ta mli lɛ.
7 Klitso* po ni yɔɔ ŋwɛi lɛ le ebe;*
Ŋa mli okpo, kɛ nyɔŋmɔbitɛte, kɛ afilimata* ahiɛ ejeee be ni esa akɛ amɛku amɛsɛɛ lɛ nɔ.*
Shi mi diɛŋtsɛ mimaŋ lɛ nuuu Yehowa yiŋkpɛi* lɛ ashishi.”’+
8 ‘Te tɛŋŋ ni nyɛkɛɔ akɛ: “Wɔhiɛ kã shi, ni Yehowa mla* lɛ yɛ wɔdɛŋ” lɛ?
Ejaakɛ woloŋmalɔi lɛ amale stailo*+ lɛ, amale pɛ akɛŋmaa lɛɛlɛŋ.
Amɛtsui efã ni abaamɔmɔ amɛ.
Naa! Amɛkɛ Yehowa wiemɔ lɛ tsuuu nii,
Ni no hewɔ lɛ, mɛɛ hiɛshikamɔ amɛyɔɔ?
10 No hewɔ lɛ, mikɛ amɛŋamɛi lɛ baahã hii krokomɛi,
Mikɛ amɛŋmɔji lɛ baake mɛi krokomɛi;+
Kɛjɛ mɔ bibioo fe fɛɛ nɔ kɛyashi mɔ wulu fe fɛɛ nɔ lɛ, amɛteŋ mɔ fɛɛ mɔ miitiu sɛɛnamɔ gbonyo sɛɛ;+
Kɛjɛ gbalɔ nɔ kɛyashi osɔfo nɔ lɛ, amɛteŋ mɔ fɛɛ mɔ miilaka* enyɛmi.+
11 Ni amɛbɔɔ mɔdɛŋ akɛ amɛbaatsa mimaŋ lɛ biyoo lɛ pilamɔ* lɛ eko kɛ eko* amɛkɛɔ akɛ,
“Toiŋjɔlɛ yɛ! Toiŋjɔlɛ yɛ!”
Be mli ni toiŋjɔlɛ ko bɛ.+
12 Ani amɛhiɛ gboɔ yɛ nyaŋemɔ nii ni amɛfee lɛ he?
Amɛhiɛ gbooo kwraa!
Amɛleee nɔ ni ji hiɛgbele po!+
No hewɔ lɛ, amɛbaanyɔ yɛ mɛi ni enyɔnyɔi lɛ ateŋ.
Kɛ́ migbala amɛtoi lɛ, amɛbaatɛrɛ,’+ Yehowa kɛɛ.
13 ‘Kɛ́ mibua amɛnaa lɛ, makpãtã amɛhiɛ,’ Yehowa kɛɛ.
‘Wain yibii ko eshwɛŋ yɛ wain tso lɛ nɔ, agbami ko eshwɛŋ yɛ agbami tso lɛ nɔ, ni bai lɛ baagbi.
Ni nɔ ni mikɛhã amɛ lɛ baaje amɛdɛŋ.’”
14 “Mɛni hewɔ wɔtara biɛ lolo?
Nyɛhãa wɔbuaa wɔhe naa ni wɔyabotea maji ni atswa gbogboi awo amɛhe lɛ amli+ ni wɔgboi yɛ jɛmɛ.
Ejaakɛ Yehowa, wɔ-Nyɔŋmɔ lɛ, baakpãtã wɔhiɛ,
Ehã wɔ nu ni pɔizin yɔɔ mli,+
Ejaakɛ wɔfee esha wɔshi Yehowa.
16 Anuɔ ekpɔŋɔi lɛ atsinemɔ lɛ kɛjɛɔ Dan.
Ekpɔŋɔhii lɛ abolɔmɔ lɛ
Hãa shikpɔŋ lɛ fɛɛ hosoɔ.
Amɛbaa ni amɛbakpãtãa shikpɔŋ lɛ kɛ nɔ fɛɛ nɔ ni yɔɔ nɔ lɛ hiɛ,
Maŋ lɛ kɛ mɛi ni yɔɔ mli lɛ fɛɛ.”
17 “Ejaakɛ naa, miitsu onufui kɛmiiba nyɛteŋ,
Onufui ni pɔizin yɔɔ amɛmli ni anyɛŋ akɛ majik ajɔɔ amɛhe,
Ni bɔ fɛɛ bɔ ni fee lɛ, amɛbaakɔ̃mɔ nyɛ,” Yehowa kɛɛ.
18 Anyɛŋ atsa miwerɛ ni eho mihe lɛ;
Hela emɔ mitsui.
19 Aabo kɛmiibi yelikɛbuamɔ kɛmiijɛ shikpɔŋ ko ni yɔɔ shɔŋŋ nɔ
Kɛmiijɛ mimaŋ lɛ biyoo lɛ ŋɔɔ akɛ:
“Ani Yehowa bɛ Zion?
Ani Zion maŋtsɛ lɛ bɛ emli?”
“Mɛni hewɔ amɛkɛ amɛmagai lɛ ewo mimli la?
Mɛni hewɔ amɛkɛ amɛmaŋsɛɛ nyɔŋmɔi ni sɛɛnamɔ bɛ amɛhe lɛ ewo mimli la nɛkɛ?”
20 “Nikpamɔ be lɛ eho, latsa be lɛ eba naagbee,
Shi ahereko wɔ lolo!”
Mihe ejɔ̃ mihe.
Mɛni hewɔ atsako mimaŋ lɛ biyoo lɛ hela lɛ?+