“Amɛmiikɛɛ Akɛ Hejɔlɛ Yɛ”
1. Mɛni ji Yeremia kuu lɛ shidaamɔ ŋmɛnɛ kɛ̃ akɛ amɛ to mɛi ni shiɛɔ akɛ “Hejɔlɛ Yɛ” yɛ be mli eko be lɛ ahe lɛ?
1 GBALƆ Yeremia fataaa egbii lɛ anɔ bii ni kɛɔ akɛ “Hejɔlɛ Yɛ!” yɛ be mli ni eko bɛ lɛ ahe. Nakai nɔŋŋ ŋmɛnɛbeaŋ Yeremia kuu lɛ hu fataaa Kristendom naawielɔi ni kaseɔ Yeremia gbii lɛ anɔ mɛi ni kɛɔ akɛ “Hejɔlɛ Yɛ!” Iɛ ahe. Naagbee mli aahu lɛ, namɛi aaaje kpo akɛ mɛi ni wie anɔkwale lɛ—mɛi ni kɛɔ akɛ “Hejɔlɛ Yɛ!” lɛ, aloo mɛi ni mɛikomɛi tsɛɔ amɛ “oshra shiɛlɔi” lɛ moŋ?
2, 3. (a) Nɛgbɛ efĩ aku gbɔmɛi akwɛ hejɔlɛ ni ma shi shiŋŋ ni hiɔ shi daa lɛ gbɛ kɛjɛ? (b) Mɛni aha Yeremia kɛɛ agbɛnɛ ni ekɛtsɔɔ bɔni nakai hejɔlɛ jɛɛhe lɛ nyɛŋ nɔkohɔko afee lɛ?
2 Beni afee ni je lɛ mli saji anaa ayakpa yɛ hejɔlɛ mli hewɔ lɛ, gbɔmɛi abii susuɔ akɛ esani amɛtao yelikɛbuamɔ ni nɔ kwɔ fe adesai anɔ̃ lɛ kɛjɛ ŋwɛi. Shi jeee blema gbalɔ Yeremia Nyɔŋmɔ lɛ ŋɔɔ amɛkwɛɔ hejɔlɛ ni yɔɔ shweshweeshwe ni hiɔ shi daa lɛ gbɛ kɛjɛɔ. Hewalɛi ni nɔ kwɔlɔ fe adesai ni amɛkwɛɔ yelikɛbuamɔ gbɛ kɛjɛɔ amɛŋɔɔ lɛ aaafee apasa nyɔŋmɔ ni nyɛɛɛ amɛkɛ yelikɛbuamɔ ko kwraa aha! Beni gbalɔ Yeremia bɔɔ wɔ fɛɛ kɔkɔ eshiɔ maŋtsɛmɛi, lumɛi, osɔfoi, gbalɔi kɛ maŋbii ni yeɔ amɛtsui yɛ nɔni yaa nɔ lɛ he lɛ alamɔi ni amɛlaa yɛ hejɔlɛ he ni bɛ shishitoo kpakpa lɛ afitemɔ he lɛ, ajɛ Nyɔŋmɔ mumɔ mli afalɛ akɛ ekɛɛ yɛ nakai be lɛ he akɛ:
3 “No be lɛ mli [taakɛ agba ato yɛ Yeremia 7:32-34] lɛ, Yehowa kɛɛ, ni [Babilon kunimyelɔi] lɛ aaaloo Yuda maŋtsɛmɛi lɛ awui kɛ elumɛi lɛ awui kɛ osɔfoi lɛ awui kɛ gbalɔi lɛ awui kɛ Yerusalembii lɛ awui kɛaajɛ amɛgbohiiabui lɛ amli, ni aaagbɛ mli aka hulu kɛ nyɔɔŋtsere kɛ ŋwɛi [ŋulamii] asafo lɛ fɛɛ, nii ni amɛsumɔ [akɛ nibii ni amɛkɛ jamɔ haa] ni amɛsɔmɔ hu, ni amɛnyiɛ amɛsɛɛ ni amɛtao amɛsɛɛgbɛ, ni amɛjá amɛ Iɛ: [wui lɛ,] abuaŋ amɛnaa, asaŋ afuŋ amɛ; ni amɛ aaatsɔ tumu yɛ shikpɔŋ lɛ nɔ.”—Yer. 8:1, 2.a
4. Nohewɔ lɛ gbohiiabui abulemɔ lɛ tsɔɔ mɛni ehaa apasa nyɔŋmɔi ajálɔi lɛ; ni mɛni esaaa akɛ amɛnaà?
4 Yɛɛ, ŋwɛibii ni kulɛ efee tamɔ nɔni amɛjɛɔ ŋwɛi amɛkwɛɔ Yerusalembii kɛ Yuda shikpɔŋ lɛ kɛ duromɔ lɛ baadamɔ shi kɛkɛ ni amɛnyɛɛɛ nɔko kwraa amɛfee yɛ be mli ni aaana sane ni ji Namɔ ji anɔkwale Nyɔŋmɔ? lɛ naa lɛ. Nyɔŋmɔjamɔŋ kɛ maŋkwramɔŋ ogai lɛ agbohiiabui abulemɔ baatsɔɔ bɔni anyageɔ mɛi ni kuɔ Yehowa Kitãi Nyɔŋma lɛ amli ni amɛjaã apasa nyɔŋmɔi, lɛ ahaa. Abaafite hejɔlɛ mli ni amɛwɔ yɛ, yɛ gbele mli lɛ po. (Hiob 3:13-19) Yɛ Yehowa hiɛ lɛ, nɛkɛ apasa nyɔŋmɔi ajalɔi ni kɛ amɛhe fɛɛ eha nakai jamɔ lɛ naŋ hetsemɔ loo krɔŋkrɔŋfeemɔ ko ni buɔ mɔ he, titri akɛni amɛkɛɔ akɛ Kristofoi awekukpaa ko yɛ amɛkɛ Biblia Nyɔŋmɔ lɛ teŋ, shi kɛlɛ amɛkuɔ ekitãi ni yɔɔ faŋŋ lɛ amli lɛ. (2 Mose 20:1-6; 1 Yoh. 5:21; 2. Kor. 6:16) Bulɛ ni akɛhaa gbohii lɛ esaaa mɛnɛɛmɛi! *
5. Te mɛi ni waa Yehowa Odasefoi ayi lɛ aaana akɛ Yehowa he fɛo ni amɛyeɔ lɛ kɔɔ amɛdiɛŋtsɛ amɛnyɔŋmɔi lɛ ahe ehaa tɛɛŋ?
5 Nohewɔ lɛ gbi ko baaba, nɔ̃ nɔ ni akɛ mɛi ni ewa Yehowa Odasefoi Kristofoi lɛ ayi ni amɛye amɛhe fɛo akɛ ‘Nɛgbɛ nyɛ-Nyɔŋmɔ Yehowa lɛ yɔɔ? Nyɛhaa ebaherea nyɛ mɔ!’ lɛ baabu akɔntaa (Lala. 22:8, 9) Yɛ “amanehulu kpeteŋkpele” ni baa, nɔ̃ mli ni Kristendom baanyɔ yɛ lɛ mli lɛ, yiwalɔi ni fee nibii ni sa Kristendom hiɛ lɛ baana kɛji amɛ apasa nyɔŋmɔi lɛ baanyɛ aye abuu amɛ loo amɛnyɛŋ. No mli ni amɛ aaale akɛ amɛnyɔŋmɔi lɛ nyɛŋ ahere amɛ kɛjɛ Nyɔŋmɔ ni amɛye ehe fɛo lɛ kojomɔ mli.
6, 7. (a) Mɛni kulɛ mɛi ni atswa amɛnane shi tu kɛtee Babilon lɛ aaasumɔ akɛ eba amɛnɔ moŋ; ni mɛni hewɔ? (b) Yɛ fai ni Yehowa kpaà akɛ aku sɛɛ aba eŋɔɔ fɛɛ sɛɛ lɛ, te enɔheremɔ Iɛ efee tamɔ Yeremia gbii lɛ anɔ nɔ̃ lɛ eha tɛɛŋ?
6 Yɛ Yeremia gbii lɛ anɔ lɛ, ato akɛ mɛikomɛi ayi baana wala yɛ Yerusalem hiɛkpatamɔ lɛ mli. Ni amɛ hu? Abaatswa amɛnane shi tu kɛya Babilon shikpɔŋ lɛ nɔ. Yɛ amɛgbɛfaŋ lɛ, amɛ “aaasumɔ gbele moŋ fe wala” yɛ jɛi. (Yer. 8:3) Eyɛ mli akɛ Yehowa kɛ nakai Israelbii kpaŋmɔmlikulɔi lɛ wie akɛ amɛku amɛsɛɛ kɛba ekɛ amɛ teŋ hejɔlɛ wekukpaa mli ekoŋŋ moŋ, shi amɛfooo mli, ni amɛkɔ́ je nɛɛ ‘gbɛ ni mɛi pii nyaà he lɛ,’ ni amɛkã no he aahu kɛyashi afi 607 D.Ŋ.B, mli tɔ̃ɔ. Nohewɔ lɛ amɛnaaa shishitoo kpakpa kɛhaaa wɔsɛɛbe ko ni hejɔlɛ yɔɔ mli yɛ Yehowa jɔɔmɔ shishi amɛhaaa amɛhe. Yɛ ŋmɛnɛbeaŋ hu Kristendom ekɔ gbɛ ni mɛi pii nyaa he lɛ. Afii nyɔŋmai abɔ nɛ kɛjɛ afi 1919 Ŋ.B. nɔ kɛbaa nɛɛ, Yeremia kuu ni emlibii ji Yehowa Odasefoi ni afɔ amɛ mu lɛ eha ale gbɛ ni aaanyɛ atsɔ nɔ beni afee ni hejɔlɛ wekukpaa aba mɛi kɛ Biblia Nyɔŋmɔ lɛ teŋ lɛ. Shi Kristendombii lɛ babaoo efooo mli. Ébalɛ taakɛ Yeremia kɛɛ lɛ nɔŋŋ, akɛ:
7 “Mɛɛhewɔ mɔ ni nɛkɛ maŋ Yerusalem nɛɛ ekpale ni amɛka mli kwraa nɛɛ? Amɛhiɛ shishiumɔ mli gbãgbãagbã, amɛkpɛlɛɛɛ sɛɛkuu. . . . Mɔkomɔko be ni shwaa ehe yɛ enifɔjianifeemɔ lɛ he akɛ: Mɛni miifee nɛɛ? Mɔfɛɛmɔ ewo ŋmɔi.”—Yer. 8:4-6.
8. Naagba ni ba yɛ nakai be lɛ mli lɛ je mɛni ni ayɔseee, taakɛ eji amrɔ nɛɛ hu lɛ?
8 Mɛni ji naagbai ni yɔɔ yɛ Yeremia gbii lɛ anɔ yɛ be mli ni Yehowa saraa ekpaŋmɔbii lɛ? Agbɛnɛ hu, mɛni ji Kristendombii lɛ anaagba ŋmɛnɛ? No be lɛ mli kɛ amrɔ nɛɛ fɛɛ lɛ, no ji sane yɔsemɔ hewalɛi ni amɛyɔɔ tamɔ bɔni loofɔji ni fãa gbɛ kakadaŋŋ daa afi kɛyaa hei krokomɛi lɛ hu yɔɔ eko ni amɛkɛnaa be mli ni nyɔŋmɔnɛmɔbe baaba lɛ, ni Kristendombii nɛɛ kɛtsuuu nii. Loofɔji ni jɛ kooyigbɛ ni efã kɛtee wuoyigbɛ maji anɔ hei ni yɔɔ kulɔɔ yɛ kooyigbɛ fɛ̃i ni tamɔ nɔni yɔɔ Palestina shikpɔŋ lɛ nɔ nɛkɛ hewɔ lɛ, kuɔ amɛsɛɛ kɛyaa amɛshihilɛhei kɛ hei ni amɛfɔɔ yɛ, yɛ kooyigbɛ maji amli lɛ ekoŋŋ. Shi yɛ sɔrɔtotsɔɔmɔ mli lɛ, Yehowa kɛɛ: “Shi mimaŋ lɛ leee Yehowa gbɛnaanii lɛ.” (Yer. 8:7) Nakai nɔŋŋ ebalɛ yɛ Yesu kɛ ebɔfoi lɛ agbii anɔ dani Romabii lɛ kpata Yerusalem hiɛ yɛ afi 70 Ŋ.B. mli lɛ. (Mat. 16:2-4; Luka 19: 4.4) Nakai nɔŋŋ ebalɛ yɛ Kristendom gbɛfaŋ yɛ Yeremia kuu lɛ gbii nɛɛ amli.
ANYƐƐƐ ATSA PILAMƆ NI EBA LƐ
9, 10. (a) Mɛni nɔ Kristendom osɔfoi lɛ damɔɔ ni amɛshiɔ amɛtsitsi akɛ amɛle nii ni amɛle mla mli jogbaŋŋ lɛ? (b) Mɛni Yehowa haa wɔtsɔɔ hiɛ wɔnaa akɛ ebaajɛ amɛnifeemɔi amli aba ni ekɛtsɔɔ akɛ nɔni amɛkɛɔ lɛ bɛ mli lɛ?
9 Kristendom osɔfoi lɛ kɛɔ akɛ amɛle nii, titri yɛ tsɔsemɔ ni amɛna yɛ Nyɔŋmɔ he nikasemɔ skul hewɔ, shi jeee yɛ Biblia ni amɛhiɛ lɛ hewɔ. Amɛkɛɔ kɛ hewalɛ akɛ amɛle Biblia Nyɔŋmɔ lɛ mla lɛ mli jogbaŋŋ ni amɛle bɔni atsɔɔ shishi ni akɛtsuɔ nii ahaa hu. Shi esoro bɔni Biblia Nyɔŋmɔ lɛ le akɛ sane lɛ ji eha. Eekwɛ wɔsɛɛ be mli ni bɔni amɛtsu Kristendom teŋ saji ahe nii amɛha lɛ kɛ amɛ baakpe tɛtrɛɛ lɛ. Yehowa jɛ nii ni ekwɛɔ kɛyaa shɔŋŋ nɛɛ mli ekɛɛ:
10 “Te tɛɛŋ ni nyɛkɛɔ akɛ: Nilelɔi ji wɔ, ni Yehowa mla lɛ yɛ wɔdɛŋ lɛ? Shi naa, [agbɛnɛ ni naagbee haomɔ eba nɛɛ,] woloŋmalɔi lɛ amale-pɛŋ lɛ etsɔlɛ amale! Nilelɔi lɛ ahiɛ egboi, amɛjijaa, ni amɔmɔ amɛ; naa, Yehowa wiemɔ lɛ amɛkwa nɛɛ: ni mɛɛ nilee sɔrɔto yɔɔ amɛmli? Nohewɔ lɛ [be mli m henyɛlɔi atabilɔi aaabatua amɛ lɛ,] mikɛ amɛŋamɛi aaaha mɛikrokomɛi, ni amɛŋmɔji lɛ mikɛ aaaha mɛi ni baaye amɛnɔ lɛ; ejaakɛ kɛjɛ gbalɔ nɔ kɛyashi osɔfo nɔ amɛ fɛɛ kwa amɛyeɔ kutumpɔo.”—Yer. 8:8-10.
11, 12. (a) Mɛɛ gbɛ nɔ Kristendom ‘woloŋmalɔi lɛ apɛŋ’ lɛ etsɔ “amale pɛŋ” yɛ? (b) Taakɛ Yeremia 8:9 tsɔɔ lɛ, mɛɛ yiŋtoo hewɔ Kristendom woloŋmalɔi lɛ apɛŋ ŋmaa amɛle sɔŋŋ lɛ?
11 Yɛ nibii ni kɛ nɔni Yehowa egba eto lɛ kpaaa gbee ni ŋmɛnɛbeaŋ Kristendom “woloŋmalɔi amale-pɛŋ” lɛ ŋmaa hewɔ lɛ, etsɛŋ ni abaayoo akɛ “amale-pɛŋ” ji no lɛɛlɛŋ. Nakai pɛŋ lɛ eŋmako anɔkwale lɛ. Nohewɔ lɛ yɛ nɛkɛ “naagbee be” nɔ̃ mli ni aŋmala saji saŋŋ yɛ Kristendom he nɛɛ mli lɛ, nakai Nyɔŋmɔjamɔŋ niŋmaa tso aloo “pɛŋ” lɛ eŋma “amale” sɔŋŋ. (Dan. 12:9) Mɛni hewɔ ebalɛ nakai?
12 Yehowa kɛɛ yɛ Yeremia 8:9 akɛ: “Yehowa wiemɔ lɛ [amɛ ni akɛɛ nilelɔi ni ehe gbɛi ji amɛ lɛ,] amɛkwa nɛɛ: ni mɛɛ nilee sɔrɔto yɔɔ amɛmli?” Hɛɛ, Kristendom osɔfoi lɛ aaatsɛ saneyitso ko kɛaajɛ Biblia lɛ mli, shi yɛ no he shiɛmɔ ni baanyiɛ sɛɛ lɛ mli lɛ, amɛbaagba afã kɛjɛ nɔni Biblia kɛɔ lɛ he. Amɛbaatsɔɔ gbɔmɛi ablemasaji ni haa Nyɔŋmɔ Wiemɔ ni aŋma lɛ feɔ yaka. Abaawie maŋkwramɔŋ saji aloo maŋ shihilɛ hiɛtsakemɔ gbɛjianɔtoo ko ni mɛi pii nyaa he lɛ moŋ he. Amɛtsɛɔ amɛhe mɛi ni yɔɔ Nyɔŋmɔjeŋ ‘nilee’ shi amɛbuɔ Helabii ajeŋnilee kɛ “je nɛŋ nilee” fe nɔni Biblia lɛ kɛɔ yɛ adesa susuma, shihilɛ mli ni gbohii yɔɔ, bɔni Nyɔŋmɔ su yɔɔ eha, kɛ saji krokomɛi ahe lɛ. (1 Kor. 3:19) Shi amɛnyiɛ kɛmiiya tsɔne ko mli. Naagbee lɛ je lɛ mli jwɛŋmɔi ni amɛhiɛ lɛ baafee efolo, ni no baadũ amɛ. Amɛhiɛ aaagboi ni saji ni yɔɔ tsuifaa baaba amɛnɔ.
13. Ŋamɛi titri eha Kristendombii lɛ ateaŋ mɛi bibii kɛ mɛi wuji fɛɛ taoɔ “sɛɛnamɔ ni yɔɔ hiɛgbele” lɛ? Ni te feɔ tɛɛŋ ebaalɛ nakai?
13 Osɔfoi lɛ ewo ‘amɛsafokui’ lɛ ahewalɛ akɛ amɛdi jeŋnibii ni haa hiɛnɔkamɔ akɛ amɛbaaha mɔ ana gbɛi aloo heloonaa nibii, lɛ asɛɛ. Amɛ́kwɛ niiatsɛmɛi ahiɛaŋ ni enɛ eye ohiafoi awui. Amɛ́he shika yɛ Nyɔŋmɔjamɔŋ sɔɔmɔi ni amɛsɔmɔɔ lɛ ahewɔ. Yɛ nɔkwɛmɔnɔ ni tamɔ enɛ ni amɛfee hewɔ lɛ, amɛtereɔ sɔ̃ waa yɛ anɔkwale ni eji akɛ amɛsɔlemɔi amlibii lɛ amli mɛi bibii kɛ mɛi wuji fɛɛ diɔ “sɛɛnamɔ ni yɔɔ hiɛgbele” sɛɛ tsutsu, yɛ mumɔŋ nibii anajiaŋ, lɛ gbɛfaŋ (1 Pet. 5:1, 2) Belɛ kwɛ bɔni esa jogbaŋŋ mɔ akɛ Yehowa etsiii gbɛ koni mɛi ni tsɛɔ amɛhe Kristofoi nɛɛ ‘asɛɛnamɔ ni yɔɔ hiɛgbele’ lɛ akaje amɛdɛŋ yɛ “amanehulu kpeteŋkpele” ni baa Kristendom nɔ lɛ mli! Yɛ nakai gbɛ nɔ lɛ, Yehowa gbalɛ Wiemɔ lɛ baaba mli anɔkwale yɛ amɛnɔ.
14. Te osɔfoi lɛ eka akɛ amɛ aaatsa Kristendom pilamɔ lɛ amɛha tɛɛŋ?
14 Abuɔ Kristendom osɔfoi lɛ lolo akɛ mumɔŋ helatsalɔi. Shi kɛjɛ Jeŋ Ta I naagbee yɛ afi 1918 mli kɛbaa nɛɛ, ani amɛnyɛ mumɔŋ “pilamɔ [Hebri wiemɔ: shéber]” ni Kristendom epila lɛ amɛtsa? Afii 60 ni eho kɛjɛ nakai be lɛ mli kɛbashi amrɔ nɛɛ amli sane haa anaa anɔkwalei ni kɔɔ osɔfoi akuu kɛ amɛhefatalɔi Nyɔŋmɔjamɔŋ hiɛnyiɛlɔi ahe lɛ. Etsɔɔ akɛ amɛtsuko nɔ̃ krɛdɛɛ ni gbaà enaa kɛ nɔhewɔ ni eyi naŋ wala yɛ “amanehulu kpeteŋkpele” lɛ mli shi moŋ ehiɛ baakpata yɛ Nyɔŋmɔ Kojomɔ ni naa wa hewɔ lɛ, he nii. Kristendom naagba lɛ kponɔgbɛ okadii lɛ pɛ ahe amɛkɛ amɛniji shwɛɔ, shi amɛkwɛɛɛ ni amɛtsu Kristendom shidaamɔ ni yɔɔ oshra mli yɛ Nyɔŋmɔ hiɛ lɛ he nii. Amɛtsaaa epilamɔ lɛ kɛwulaaa shi, shi moŋ hiɛaŋhiɛaŋ, tamɔ nɔni ejeee sane ko ni hiɛdɔɔ yɔɔ he, yɛ Yehowa Nyɔŋmɔ hiɛ.
15. Te osɔfoi lɛ susuɔ yɛ Nyɔŋmɔjamɔŋ tsofai ni amɛkɛto sane lɛ he lɛ ahe tɛɛŋ; ni mɛɛ wiemɔi amɛkɛshɛjeɔ amɛsafokui lɛ amii?
15 Kɛjɛ Jeŋ Ta I naagbee kɛbaa nɛɛ, Kristendom sɔlemɔi lɛ amlibii ayi efa waa, shi te sɔlemɔbii nɛɛ amumɔŋ shihilɛ kɛ amɛkɛ Yehowa Nyɔŋmɔ teŋ wekukpaa lɛ yɔɔ eha tɛɛŋ? Nyɔŋmɔjamɔŋ tsofai ni osɔfoi lɛ kɛto sane lɛ he lɛ tsakeko nɔko kwraa, ni no nyɛko atsĩ jeŋbii anifeemɔ diɛŋtsɛ gbɛ ni ekabote sɔlemɔi lɛ amli. Ehe ehiaaa ni wɔtsɔɔ jeŋbii anifeemɔi sɔrɔtoi fɛɛ ni amɛfeɔ lɛ fitsofitso wɔha wɔkanelɔi lɛ. Osɔfoi lɛ yɛ hekɛnɔfɔɔ waa yɛ tsofai ni amɛkɛto sane ni eba lɛ he lɛ amli. Ŋmɛnɛbeaŋ “osɔfoi” loo “gbalɔi” lɛ kɛ wiemɔi ni haa amɛsafokui ni he yeɔ lɛ ahiɛ jeɔ amɛhe nɔ lɛ kãa he amɛshɛjeɔ Kristendom mii “Omanye, Omanye!” aloo, “Sane ko kwraa bɛ, sane ko kwraa bɛ.”—Yer. 8:11; An American Translation; kwɛmɔ The New English Bible lɛ hu mli.
16. Mɛni osɔfoi lɛ kɛɔ ni esoro no kwraa yɛ nɔni Yeremia kuu lɛ keɔ lɛ he?
16 Yɛ nɛkɛ gbɛ nɔ lɛ, nɛkɛ Nyɔŋmɔjamɔŋ hiɛnyiɛlɔi nɛɛ miiye kutumpɔo. Amɛhaa amɛsafokui lɛ susuɔ akɛ nɔ̃ titri ko etɔtɔko yɛ Kristendom he. Amɛkɛɔ kɛ nɔmimaa akɛ amɛkɛ Nyɔŋmɔ teŋ yɛ jogbaŋŋ, ni nohewɔ lɛ amanehulu ko jɛŋ eŋɔɔ kɛbaŋ amɛnɔ. Enɛ hewɔ lɛ amɛkɛɔ akɛ mɔkomɔko akabo nɔni Yeremia kuu lɛ kɛɔ akɛ etsɛŋ kwraa ni abaakpata Kristendom hiɛ yɛ “amanehulu kpeteŋkpele” ko mli lɛ tói.—Yer 6:14.
17. Mɛni hewɔ hejɔlɛ ko kwraa bɛ Kristendom kɛ Yehowa teŋ lɛ?
17 Kɛtsɔ nɛkɛ gbɛ nɔ lɛ, Kristendom naawielɔi ni shɛjeɔ mɛi amii akɛ hejɔlɛ yɛ, yɛ be mli ni “omanye ko bɛ” lɛ haaa ni ana bɔni sane ni ebakã shi lɛ yɔɔ eha lɛ krɛdɛɛ. Omanye shihilɛ ko bɛ Yehowa Nyɔŋmɔ kɛ Kristendom teŋ. Kristo kpatamɔ lá lɛ tsumɔɔɔ ehe eshai lɛ. Anyɛŋ akɛ ehe eshai ni fa babaoo ni naa yasaa ŋwɛi lɛ akelɛ. Nohewɔ Iɛ Nyɔŋmɔ kɛlɛ bɛ toiŋjɔlɛ shihilɛ mli. Hiɛkpatamɔ ji nii ni asaa atolɛ, shi jeee “omanye” aloo mumɔŋ shweremɔ, ejaakɛ osɔfoi kɛ esɔlemɔ lɛ mlibii efee ‘nihiinii tete po’ yɛ Yehowa hiɛ, ni efeee amɛ hiɛgbele kwraa.—Yer. 8:12.
18. Mɛɛ gbɛ nɔ hiɛkpatamɔ ni aaaba Kristendom nɔ lɛ aaaba yɛ; ni te ebaakpata nii ahiɛ eha tɛɛŋ?
18 Akɛni osɔfoi lɛ kɛ amɛsafokui lɛ ahiɛ bɛ amɛhe nɔ nɛkɛ hewɔ lɛ, hiɛkpatamɔ baaba amɛnɔ “trukaa” hɛɛ “hiŋmɛitswaa mli.” (Yer 4:20; 6:25, 26) Kɛjɛ Jeŋ Ta I naagbee yɛ afi 1918 mli kɛbaa nɛɛ, Yehowa esara Kristendom ekwɛ kɛwula shi ni etsɛŋ kwraa kɛji be ni eto lɛ shɛ lɛ, ebaatsɔ ehiɛ ekalɛ tamɔ bɔni efee blema Yerusalem lɛ. No mli lɛ Nyɔŋmɔjamɔŋ gbɔmɛi ni shwãa amɛfɔ̃ɔ amɛhe nɔ lɛ aaate kɛyagbee hiɛkpatamɔ mli. Yehowa baatsu enii kɛwula shi; eshwɛŋ nɔkonɔko ni abaanyɛ ahala tamɔ ayeɔ kpɛkpɛo lɛ. Heloonaa nibii fɛɛ ni Yehowa ŋmɛ amɛ gbɛ ni amɛná Iɛ “aaaje amɛdɛŋ” kɛya henyɛlɔi adɛŋ.—Yer. 8:12, 13.
19. (a) Mɛni Yesu kɛɛ ekaselɔi lɛ akɛ amɛfee kɛji amɛna akɛ Yerusalem hiɛkpatamɔ ebɛŋkɛ lɛ? (b) Mɛni mɛi ni yɔɔ ŋanɔ yɛ Yeremia gbii anɔ lɛ fee ni eha amɛnine nyɛ shi akɛni nɔni amɛkpa gbɛ akɛ eeeba lɛ baaa mli lɛ?
19 Afi 33 Ŋ.B. mli beni Kristo gba hiɛkpatamɔ ni baaba Yerusalem nɔ yɛ afi 70 Ŋ.B. mli eto lɛ, mɛni ekɛɛ Yudafoi lɛ akɛ amɛfee? Ekɛɛ amɛ akɛ amɛje Yerusalem kɛ Yudea kpokpai lɛ fɛɛ anɔ kɛji amɛna okadi ni tsɔɔ akɛ hiɛkpatamɔ ni baaba enɔ lɛ ebɛŋkɛ lɛ. Akɛɛ mɔni yɔɔ ŋa nɔ aloo kosɛɛ lɛ akaba Yerusalem shi moŋ eshi Yudea kpokpaa lɛ nɔ kwraa yɛ eshwesheeshwefeemɔ kɛ eyibaamɔ hewɔ. (Mat. 24:15-18; Luka 21:20, 21) Shi yɛ Yeremia gbii lɛ anɔ beni Babilonbii niiahiɛkpatalɔi lɛ baa lɛ, gbɔmɛi lɛ sumɔ moŋ akɛ amɛshi ŋa lɛ nɔ ni amɛyaba abo yɛ Yerusalem kɛ maji krokomɛi ni atswa gbogboi awo he lɛ amli. Amɛsumɔ akɛ amɛhi abobaahei nɛɛ ni kɛji ehe aaahia akɛ amɛgboi yɛ jɛi po, amɛfee nakai. Shi yelikɛbuamɔ jɛɛɛ Yehowa ni ji amɛsɔlemɔwe lɛ Nyɔŋmɔ lɛ ŋɔɔ kɛbaaa amɛgbɛfaŋ. Eha amɛnu odidoo ko ni joɔ waa, “nu ni ebɔɔ yɔɔ mli” ni gbeɔ mɔ. Yɛ apasa “gbalɔi” lɛ amiishɛjemɔ wiemɔi ahewɔ lɛ, akwɛ “hejɔlɛ gbɛ,” shi mɛni moŋ ba? “Shi nɔkpakpa ko baaa, kɛ tsamɔ-be hu, shi naa, gbeyei sɔŋŋ!” Amɛmiinu hiɛkpatamɔ tabilɔi ni baa abatua amɛ lɛ agbɛɛmɔi loo amɛhe amaniɛbɔi moŋ ahe.—Yer. 8:14-16.
20. Taakɛ Yeremia 8:17 tsɔɔ lɛ, namɔ tsu tabilɔi ni kɛ gbele baa lɛ; ni mɛɛ gbɛ nɔ gbalɛ nɛɛ ba mli yɛ?
20 Yɛ Yeremia gbii lɛ anɔ lɛ, Yehowa ji mɔni tsu ehiɛkpatamɔ he nitsulɔi lɛ kɛyanina Israelbii kpaŋmɔmlikulɔi lɛ. Amɛ́fee nyaŋemɔnii yɛ ehiɛ, ni amɛbule esɔlemɔwe kɛ eshikpɔŋ lɛ. “Ejaakɛ naa, matsu onufui kɛ blesaŋai ni ŋkunyaayeli ko nyɛɛɛ amɛ kɛaaba nyɛteŋ, ni amɛbakɔmɔ nyɛ, Yehowa kɛɛ.” (Yer. 8:17) No be mli lɛ Mose ko bɛ Israel ni baawo akɔɔbele onufu ko nɔ etsotsoro tso nɔ koni Israelbii ni onufui ekɔ̃mɔ amɛ lɛ kɛ hemɔkɛyeli akwɛ nomɛi ni amɛhe awa amɛ. (4 Mose 21:4-9; Yoh. 3:14, 15) Babilonbii niiahiɛkpatalɔi kɛ amaŋfɔfeelɔi lɛ shwɛɛɛ kwraa; yɛ afi 609 D.Ŋ.B. mli lɛ nɔkonɔko kwraa bɛ ni Israelbii lɛ baanyɛ afee lɛ laka amɛ kɛjɛ nitsumɔ ni Nyɔŋmɔ kɛwo amɛdɛŋ lɛ tsumɔ he. “Maji ni atswa gbogbo awo he” ni Israelbii lɛ yaba abo yɛ mli lɛ nyɛɛɛ abu amɛhe kɛjɛ Nyɔŋmɔ kojomɔ he.
21. Yɛ Yeremia 8:18, 19 lɛ, mɛɛ gbɛ nɔ Yehowa tsɔɔ yɛ akɛ oshra ni eha eba maŋ muu fɛɛ nɔɔ lɛ eŋɔɔɔ enaa lɛ?
21 Eŋɔɔɔ Yehowa naa akɛ eeeha oshra nɛɛ aba maŋ muu fɛɛ nɔ. Nohewɔ lɛ etsɔ hiɛ ebɔ amɛ kɔkɔ bɔni sa, ni egba eto akɛ abaaha gbɔmɛi atã yɛ Yuda shikpɔŋ lɛ nɔ ni abaaloo mɛi ni yi aaana wala lɛ kpotoo kɛya shɔŋŋ yɛ Babilon. Jɛmɛ ji heni mɛi ni atswa amɛnane shi tũ kɛtee maŋsɛɛ ni amɛnaa ekpɛ amɛhe yɛ ‘naakpɛɛnii ni Yehowa etsu’ nɛɛ he lɛ baabolɔ amɛtsɛ kɛaajɛ koni abaye abua amɛ. Nohewɔ lɛ ekɛɛ: “Miná ni kulɛ manyɛ mihe mii mashɛje yɛ miwerɛhoo lɛ mli. Mitsui egbɔjɔ yɛ mimli. Naa, mimaŋ lɛ biyoo lɛ bolɔmɔ gbee lɛ jɛ maŋsɛɛ shɔŋŋ: ‘Aso Yehowa bɛ Zion? Aloo emaŋtsɛ lɛ bɛ emli dɔŋŋ?’”—Yer. 8:18, 19.
22. Mɛni hewɔ nakai nii ni Nyɔŋmɔ tsu lɛ ha mɛi ahiɛ fee amɛ yaa lɛ; ni mɛni Yehowa kɛɛ no ji yiŋtoo hewɔ ni efee nakai?
22 Yudafoi nomii lɛ nyɛɛɛ asusu akɛ Yehowa baaha Yerusalem (Zion) hiɛ ashwie shi aahu akɛ anaŋ sɔlemɔwe ko ni ji amɛ-Nyɔŋmɔ lɛ we kɛ maŋtsɛsɛi ko ni Maŋtsɛ David seshinyo ko aaata nɔ akɛ Yehowa maŋtsɛ ni efɔlɛ mu, yɛ mli. Mɛɛ heguɔgbee po enɛ aaaji kɛaaba egbɛi lɛ, shii abɔ ni shihilɛ ni tamɔ nakai aaahi shi nɛɛ! Enɛ fee nɔko ni yɔɔ naakpɛɛ, yɛ nakai blema be lɛ mli moŋ nɛ, shi Kristendom hiɛkpatamɔ ni baa lɛ baafee naakpɛɛ po fe enɛ. Nɔhewɔ ni hiɛkpatamɔ lɛ baaba lɛ ji nɔni Yehowa tsɔɔ yɛ hetoo ni eha Yudafoi nomii lɛ abolɔmɔ kɛha yelikɛbuamɔ mli lɛ; ekɛɛ: “Mɛɛba mɔ ni amɛkɛ amɛmagai kɛ maŋsɛɛ yakayakanii lɛ woɔ mimli la nɛɛ?”—Yer. 8:19b; Yes. 28:2-1.
23. Taakɛ Yeremia 8:20 tsɔɔ lɛ, mɛni baaba mɛi ni fiɔ Kristendom sɛɛ lɛ ahiɛnɔkamɔi akɛ amɛyi aaana wala yɛ amɛnitsumɔi ahewɔ lɛ anɔ?
23 Hiɛnɔkamɔi ni Kristendom hiɛ kɛha yiwalaheremɔ lɛ damɔɔɔ ŋmalɛ nɔ; esa akɛ nakai hiɛnɔkamɔi lɛ afee efolo! Be lɛ baaba kɛ̃ nɔ̃ mli ni mɛi ni fĩɔ Kristendom sɛɛ lɛ aaakɛɛ akɛ: “Nikpamɔ lɛ eho, ni yibii atsemɔbe [be mli ni aaanyɛ atsu nii ni kɛ yiwalaheremɔ baa lɛ] efo mli, shi ahereko wɔyiwala!” (Yer. 8:20) Nyɛkahaa wɔfataa mɛi ni kɛɔ nakai lɛ ahe!
24. Mɛni akɛɛ yɛ Yeremia 8:21, 22 ni tsɔɔ awerɛhoo ni mɛi aaaye yɛ oshra he shiɛmɔ ni wɔshiɛɔ lɛ he lɛ?
24 Ekolɛ mɛi ni ŋmɛnɛ amɛfiɔ Kristendom sɛɛ kpɛŋŋ lɛ aaaye awerɛhoo yɛ sane ni wɔshiɛɔ nɛɛ he. Jeeŋmɔ ko yɛ blema bei amli lɛ, edɔ Yeremia akɛ aaakpata sɔlemɔwe ni esɔmɔ yɛ mli akɛ osɔfoo lɛ hiɛ ni agbe maŋ ni eji emlinyo lɛ mlibii ni agbɛ amɛ ashwã hu. Biɛ enijiaŋ ni eje wui yɛ lɛdiɛŋtsɛ emaŋbii amumɔŋ hewalɛnamɔ he kɛ tsui krɔŋŋ ni oweletɔɔ henumɔi komɛi kwraa bɛ mli lɛ mli ebolɔ ekɛɛ: “Mimaŋ lɛ biyoo lɛ hejaramɔ [shéber, aloo kuumɔ] lɛ hewɔ lɛ mi hu mihe miijara mi [shabárj; miiye ŋkɔmɔ, mihe ejɔ̃ mihe. Ani tsofa bɛ Gilead, aloo tsofatsɛ ko bɛ jɛi? Mɛɛhewɔ mɔ ni atsako mimaŋ lɛ biyoo lɛ?”—Yer. 8:21, 22.
25. Ani tsamɔ-tsofa ko yɛ kɛha Kristendom ŋmɛnɛ; ni mɛni esa akɛ mɛi ni sumɔɔ hejɔlɛ ni hiɔ shi daa lɛ feɔ amrɔ nɛɛ?
25 Blema Yerusalem kɛ Yuda shikpɔŋ amumɔŋ shihilɛ ni ekumɔ lɛ ehiii tsamɔ. No hewɔ lɛ Babilonbii lɛ kumɔ no kɛwula shi yɛ afi 607 D.Ŋ.B. mli. Kɛbashi ŋmɛnɛ tɔ̃ɔ nɛɛ mumɔŋ ‘Gilead tsofa’ ko bɛ ni baanyɛ etsa Kristendom. Nohewɔ lɛ amrɔ nɛɛ, dani hiɛ kpatamɔ aaabaninalɛ “trukaa” lɛ, esani mɛi fɛɛ ni sumɔɔ ni hejɔlɛ krɔŋŋ ni hiɔ shi daa aba amɛkɛ Yehowa Nyɔŋmɔ teŋ lɛ ajo foi kɛjɛ emli.b
(Átsa Yeremia gbalɛ lɛ he nikasemɔ lɛ nɔ yɛ baafa 18.)
[Shishigbɛ niŋmai]
a Ajie kɛjɛ August 1, 1979 Blɔfo Buu-Mɔɔ mli.
b Kadimɔ Baruch 2:24, 25 yɛ Douay Version Biblia lɛ mli.