Yeremia
41 Yɛ nyɔɔŋ ni ji kpawo lɛ mli lɛ, Ishmael,+ Elishama binuu Netania binuu lɛ ni jɛ maŋtsɛmɛi aweku lɛ mli lɛ, ni eji maŋtsɛ lɛ hii onukpai lɛ ateŋ mɔ kome lɛ, kɛ hii nyɔŋma fata ehe kɛba Gedalia, Ahikam binuu lɛ ŋɔɔ yɛ Mizpa.+ Be ni amɛfee ekome kɛmiiye nii yɛ Mizpa lɛ, 2 Ishmael, Netania binuu lɛ kɛ hii nyɔŋma ni fata ehe lɛ te shi ni amɛkɛ klante gbe Gedalia, Shafan binuu Ahikam binuu lɛ. No hewɔ lɛ, egbe mɔ ni Babilon maŋtsɛ lɛ ewó lɛ lumɔ yɛ shikpɔŋ lɛ nɔ lɛ. 3 Ishmael gbe Yudafoi fɛɛ ni kɛ Gedalia yɔɔ Mizpa lɛ kɛ Kaldeabii asraafoi ni yɔɔ jɛmɛ lɛ hu.
4 Be ni agbe Gedalia lɛ sɛɛ gbi ni ji enyɔ lɛ nɔ, ni mɔ ko mɔ ko leko lɛ, 5 hii 80 jɛ Shekem,+ kɛ Shilo,+ kɛ Samaria+ ba. Amɛshɛshɛɛ amɛtsɛŋi, ni amɛgbalagbalai amɛtadei lɛ, ni amɛfolɔfolɔɔ amɛhe,+ ni amɛhiɛ ŋmaa* afɔlei kɛ frankinsɛnsi+ yɛ amɛdɛŋ koni amɛkɛba Yehowa shĩa lɛ. 6 No hewɔ lɛ, Ishmael, Netania binuu lɛ shi Mizpa koni ekɛ amɛ ayakpe, ni be ni enyiɛ kɛyaa lɛ eefó. Be ni ekɛ amɛ kpe lɛ, ekɛɛ amɛ akɛ: “Nyɛbaa Gedalia, Ahikam binuu lɛ ŋɔɔ.” 7 Shi be ni amɛbote maŋ lɛ mli lɛ, Ishmael, Netania binuu lɛ kɛ ehii lɛ gbe amɛ, ni amɛshɛrɛ amɛ amɛshwie bu ni akɛtoɔ nu lɛ mli.
8 Shi amɛteŋ hii nyɔŋma komɛi kɛɛ Ishmael akɛ: “Kaagbe wɔ, ejaakɛ wɔkɛ wiiti, kɛ barle,* kɛ mu, kɛ wo babaoo eto yɛ ŋa lɛ nɔ.” No hewɔ lɛ, egbeee amɛ efataaa amɛnyɛmimɛi lɛ ahe. 9 Ishmael shɛrɛ hii ni egbe lɛ fɛɛ agbohii ewo bu agbo ni akɛtoɔ nu ni Maŋtsɛ Asa fee yɛ Israel maŋtsɛ Baasha hewɔ lɛ mli.+ Bu ni akɛtoɔ nu nɛɛ mli Ishmael, Netania binuu lɛ kɛ hii ni egbe lɛ wo obɔ.
10 Ishmael ŋɔ mɛi ni eshwɛ yɛ Mizpa lɛ fɛɛ,+ maŋtsɛ lɛ biyei lɛ kɛ maŋbii fɛɛ ni shwɛ yɛ Mizpa lɛ nom, mɛi ni Nebuzaradan, bulɔi lɛ anɔkwɛlɔ lɛ kɛ amɛ wo Gedalia,+ Ahikam binuu lɛ dɛŋ lɛ. Ishmael, Netania binuu lɛ ŋɔ amɛ nom, ni ekɛ amɛ tee koni ekɛ amɛ ayafo mli kɛya Amonbii lɛ aŋɔɔ.+
11 Be ni Yohanan,+ Karea binuu lɛ kɛ tatsɛmɛi lɛ fɛɛ ni kɛ lɛ yɔɔ lɛ nu efɔŋ fɛɛ ni Ishmael, Netania binuu lɛ efee lɛ, 12 amɛŋɔ hii lɛ fɛɛ ni amɛtee koni amɛkɛ Ishmael, Netania binuu lɛ ayawu, ni amɛyana lɛ yɛ nui babaoo* ni yɔɔ Gibeon lɛ he.
13 Be ni mɛi fɛɛ ni yɔɔ Ishmael ŋɔɔ lɛ na Yohanan, Karea binuu lɛ kɛ tatsɛmɛi lɛ fɛɛ ni fata ehe lɛ, amɛná miishɛɛ babaoo. 14 Kɛkɛ ni mɛi fɛɛ ni Ishmael ŋɔ amɛ nom kɛjɛ Mizpa+ lɛ tsɔ amɛhe ni amɛkɛ Yohanan, Karea binuu lɛ ku amɛsɛɛ kɛtee. 15 Shi Ishmael, Netania binuu lɛ, kɛ ehii lɛ ateŋ mɛi kpaanyɔ je Yohanan dɛŋ, ni amɛtee Amonbii lɛ aŋɔɔ.
16 Yohanan, Karea binuu lɛ, kɛ tatsɛmɛi lɛ fɛɛ ni fata ehe lɛ ŋɔ maŋbii ni yɔɔ Mizpa lɛ ateŋ mɛi ni eshwɛ lɛ, ni ji mɛi ni amɛkpɔ̃ amɛ kɛje Ishmael, Netania binuu lɛ dɛŋ be ni etswa Gedalia, Ahikam binuu lɛ nɔ ni egbe lɛ sɛɛ lɛ.+ Amɛkɛ hii lɛ, kɛ asraafoi lɛ, kɛ yei lɛ, kɛ gbekɛbii lɛ, kɛ maŋtsɛ shĩa onukpai lɛ ku amɛsɛɛ kɛjɛ Gibeon. 17 No hewɔ lɛ, amɛtee ni amɛyahi Kimham gbɔiatoohe ni bɛŋkɛ Betlehem+ lɛ, amɛyiŋtoo ji amɛbaatsa nɔ kɛya Ejipt+ 18 yɛ Kaldeabii lɛ ahewɔ. Ejaakɛ amɛmiishe amɛ gbeyei, akɛni Ishmael, Netania binuu lɛ etswa Gedalia, Ahikam binuu lɛ nɔ ni egbe lɛ lɛ hewɔ, mɔ ni Babilon maŋtsɛ lɛ wó lɛ lumɔ yɛ shikpɔŋ lɛ nɔ lɛ.+