Ezekiel

37 No mli lɛ, Yehowa nine yɛ minɔ, ni Yehowa kɛ emumɔ lɛ wó mi kɛtee ni ekɛ mi yadamɔ shikpɔŋ kplanaa* lɛ teŋ;+ gbɔmɛi awui eyi nɔ obɔ. 2 Ehã minyiɛ kɛbɔle he fɛɛ, ni mina akɛ wui lɛ ni jwere shikpɔŋ kplanaa* lɛ nɔ lɛ fa waa diɛŋtsɛ, ni amɛgbi waa diɛŋtsɛ.+ 3 Ebi mi akɛ: “Gbɔmɔ bi,* ani wui nɛɛ baanyɛ aba wala mli lo?” Ni mikɛɛ lɛ akɛ: “Nuŋtsɔ Ofe Yehowa, bo ji mɔ ni le.”+ 4 No hewɔ lɛ, ekɛɛ mi akɛ: “Gbaa oshwie wui nɛɛ anɔ, ni okɛɛ amɛ akɛ, ‘Nyɛ wui ni nyɛgbigbii, nyɛboa Yehowa wiemɔ toi:

5 “‘Nɔ ni Nuŋtsɔ Ofe Yehowa kɛɔ wui nɛɛ nɛ: “Mahã mumɔ ni amuɔ abote nyɛmli, ni nyɛbaaba wala mli.+ 6 Mahã fãji kɛ loo aba nyɛhe, ni mikɛ hewolo baaha nyɛhe, ni mikɛ mumɔ ni amuɔ baawo nyɛmli, ni nyɛbaaba wala mli; ni nyɛbaaná nyɛle akɛ miji Yehowa.”’”

7 Kɛkɛ ni migba tamɔ bɔ ni afã mi lɛ. Be ni migba nɔŋŋ lɛ, minu gbɛɛmɔ ko he, tsitsɛrɛ tsitsɛrɛ gbɛɛmɔ ko, ni wui lɛ bɔi amɛhenaabuamɔ, wu bakpɛtɛ ewu he. 8 Kɛkɛ ni mina ni fãji kɛ loo eba amɛhe, ni hewolo baha amɛhe. Shi loloolo lɛ, mumɔ ni amuɔ bɛ amɛmli.

9 Kɛkɛ ni ekɛɛ mi akɛ: “Gbaa otsɔɔ kɔɔyɔɔ lɛ. Gbɔmɔ bi,* gbaa ni okɛɛ kɔɔyɔɔ lɛ akɛ, ‘Nɔ ni Nuŋtsɔ Ofe Yehowa kɛɛ nɛ: “Bo kɔɔyɔɔ,* jɛɛ kɔɔyɔi ejwɛ lɛ amli oba, ni obatswa oshwie mɛi ni agbe nɛɛ anɔ, koni amɛba wala mli.”’”

10 No hewɔ lɛ, migba tamɔ bɔ ni efã mi lɛ, ni kɔɔyɔɔ ni amuɔ* ba amɛmli, ni amɛba wala mli, ni amɛte shi amɛdamɔ amɛnaji anɔ,+ amɛyi fa diɛŋtsɛ tamɔ asraafoi babaoo.

11 Kɛkɛ ni ekɛɛ mi akɛ: “Gbɔmɔ bi,* nɛkɛ wui nɛɛ, Israel shĩa muu lɛ fɛɛ ni.+ Naa, amɛmiikɛɛ akɛ, ‘Wɔwui egbigbii, ni wɔhiɛnɔkamɔ etã.+ Afo wɔ ashɛ afɔ̃ kwraa.’ 12 No hewɔ lɛ, gbaa ni okɛɛ amɛ akɛ, ‘Nɔ ni Nuŋtsɔ Ofe Yehowa kɛɛ nɛ: “Mimaŋ, magbele nyɛgbohii abui lɛ anaa,+ ni matee nyɛ shi kɛjɛ nyɛgbohii abui lɛ amli, ni mikɛ nyɛ baaba Israel shikpɔŋ lɛ nɔ.+ 13 Ni nyɛ mimaŋ, kɛ́ migbele nyɛgbohii abui lɛ anaa, ni mitee nyɛ shi kɛjɛ nyɛgbohii abui lɛ amli lɛ, nyɛbaaná nyɛle akɛ miji Yehowa.”’+ 14 ‘Mikɛ mimumɔ lɛ baawo nyɛmli ni nyɛbaaba wala mli,+ ni mikɛ nyɛ baawo nyɛshikpɔŋ lɛ nɔ; ni nyɛbaaná nyɛle akɛ mi, Yehowa, mi diɛŋtsɛ miwie, ni mifee hu,’ Yehowa kɛɛ.”

15 Yehowa kɛɛ mi ekoŋŋ akɛ: 16 “Ni bo gbɔmɔ bi,* kɔ tso ko ni oŋma yɛ nɔ akɛ, ‘Yuda kɛ Israelbii ni fata ehe lɛ nɔ.’+ No sɛɛ lɛ, kɔ tso kroko, ni oŋma yɛ nɔ akɛ, ‘Yosef, Efraim tso lɛ, kɛ Israel shĩa lɛ fɛɛ ni fata ehe lɛ nɔ.’+ 17 No sɛɛ lɛ, okɛ ekome akpɛtɛ ekome he koni amɛtsɔ tso kome yɛ odɛŋ.+ 18 Kɛ́ omaŋbii* lɛ bi bo akɛ, ‘Ani okɛŋ wɔ nɔ ni nibii nɛɛ tsɔɔ lo?’ lɛ, 19 kɛɛmɔ amɛ akɛ, ‘Nɔ ni Nuŋtsɔ Ofe Yehowa kɛɛ nɛ: “Makɔ Yosef tso lɛ ni yɔɔ Efraim dɛŋ lɛ kɛ Israel wekui ni fata ehe lɛ, ni mikɛ amɛ baakpɛtɛ Yuda tso lɛ he; ni mafee amɛ tso kome,+ ni amɛbaatsɔ tso kome yɛ midɛŋ.”’ 20 Hiɛmɔ tsei lɛ ni oŋma nɔ nii lɛ yɛ odɛŋ koni amɛna.

21 “No sɛɛ lɛ, kɛɛmɔ amɛ akɛ, ‘Nɔ ni Nuŋtsɔ Ofe Yehowa kɛɛ nɛ: “Majie Israelbii lɛ kɛje jeŋmaji fɛɛ ni amɛtee mli lɛ amli, ni mabua amɛnaa kɛjɛ he fɛɛ he, ni mikɛ amɛ baaba amɛshikpɔŋ lɛ nɔ.+ 22 Mafee amɛ jeŋmaŋ kome yɛ shikpɔŋ lɛ nɔ,+ yɛ Israel gɔji lɛ anɔ, ni maŋtsɛ kome baaye amɛ fɛɛ amɛnɔ,+ amɛfeŋ jeŋmaji enyɔ dɔŋŋ; ni agbalaŋ amɛmli dɔŋŋ akɛ maŋtsɛyelii enyɔ.+ 23 Amɛkɛ amɛmagai ni yɔɔ nyaŋemɔ* kɛ amɛnifeemɔi ni yɔɔ nyaŋemɔ, kɛ amɛtɔmɔi lɛ fɛɛ buleŋ amɛhe dɔŋŋ.+ Mahere amɛ kɛje nibii ni hã amɛje misɛɛ kɛfee esha lɛ fɛɛ amli, ni mahã amɛhe atse. Amɛbaatsɔ mimaŋ, ni mi diɛŋtsɛ matsɔ amɛ-Nyɔŋmɔ.+

24 “‘“Mitsulɔ David baatsɔ amɛmaŋtsɛ,+ ni amɛ fɛɛ amɛbaayaje tookwɛlɔ kome shishi.+ Amɛbaanyiɛ yɛ miyiŋkpɛi* lɛ amli ni amɛbaaye mimlai lɛ anɔ jogbaŋŋ.+ 25 Amɛbaahi shikpɔŋ ni mikɛhã mitsulɔ lɛ, Yakob, he ni nyɛtsɛmɛi lɛ hi lɛ nɔ,+ ni amɛbaahi nɔ kɛya naanɔ,+ amɛ kɛ amɛbii* kɛ amɛbii lɛ abii;+ ni mitsulɔ David baatsɔ amɛlumɔ kɛya naanɔ.+

26 “‘“Ni mikɛ amɛ baafee toiŋjɔlɛ kpaŋmɔ;+ ebaafee naanɔ kpaŋmɔ yɛ mi kɛ amɛ teŋ. Mato amɛ shishi, ni mahã amɛyi afa+ ni mahã mijamɔhe lɛ ahi amɛteŋ kɛya naanɔ. 27 Mimama tsũ* lɛ baahi amɛteŋ,* ni matsɔ amɛ-Nyɔŋmɔ, ni amɛbaatsɔ mimaŋ.+ 28 Ni kɛ́ mijamɔhe lɛ hi amɛteŋ kɛtee naanɔ lɛ, jeŋmaji lɛ baaná ale akɛ mi, Yehowa, miifee Israel krɔŋkrɔŋ.”’”+