1 Mose

24 Agbɛnɛ Abraham egbɔ, eda yɛ afii amli, ni Yehowa ejɔɔ Abraham yɛ nɔ fɛɛ nɔ mli.+ 2 Abraham kɛɛ etsulɔ ni ji onukpa fe fɛɛ yɛ eshĩabii lɛ ateŋ, mɔ ni kwɛɔ nibii fɛɛ ni eyɔɔ lɛ nɔ+ lɛ akɛ: “Ofainɛ, okɛ onine abawo mishuɔ shishi, 3 ni mahã okã kitã yɛ Yehowa, ŋwɛi Nyɔŋmɔ lɛ kɛ shikpɔŋ Nyɔŋmɔ lɛ hiɛ akɛ, oŋɔŋ Kanaanbii ni miyɔɔ amɛteŋ lɛ abiyei lɛ eko akɛ ŋa ohãŋ mibinuu lɛ.+ 4 Shi moŋ, obaaya mimaŋ kɛ miwekumɛi+ lɛ aŋɔɔ ní oyaŋɔ yoo obahã mibinuu Isak akɛ eŋa.”

5 Shi tsulɔ lɛ kɛɛ lɛ akɛ: “Ni kɛ́ yoo lɛ sumɔɔɔ ni ekɛ mi baa shikpɔŋ nɛɛ nɔ hu? Ani no lɛ, mikɛ obinuu lɛ aku sɛɛ kɛya shikpɔŋ ni ojɛ nɔ lɛ nɔ?”+ 6 Kɛkɛ ni Abraham kɛɛ lɛ akɛ: “Kwɛmɔ ni okɛ mibinuu lɛ akaya jɛmɛ.+ 7 Yehowa, ŋwɛi Nyɔŋmɔ lɛ, mɔ ni ŋɔ mi kɛje mitsɛ shĩa lɛ kɛ miwekumɛi+ lɛ ashikpɔŋ lɛ nɔ, ní ekɛ mi wie ní ekã mi kitã+ akɛ: ‘Oseshi+ lɛ mikɛ shikpɔŋ nɛɛ+ baahã’ lɛ, lɛ ebaatsu ebɔfo kɛnyiɛ ohiɛ,+ ni obaaŋɔ yoo yɛ jɛmɛ+ obahã mibinuu lɛ akɛ eŋa. 8 Shi kɛ́ yoo lɛ sumɔɔɔ ni ekɛ bo baa lɛ, no lɛ, obaaye ohe kɛje kitã nɛɛ shishi. Shi okɛ mibinuu lɛ akaya jɛmɛ.” 9 Kɛkɛ ni tsulɔ lɛ kɛ enine wo enuŋtsɔ Abraham shuɔ shishi, ni ekã lɛ kitã yɛ sane nɛɛ he.+

10 No hewɔ lɛ, tsulɔ lɛ ŋɔ enuŋtsɔ lɛ afukpɔŋɔi lɛ nyɔŋma ni eyi mli, ni eŋɔ enuŋtsɔ lɛ nibii kpakpai srɔtoi fɛɛ eko kɛtee. Kɛkɛ ni eyi mli etee Mesopotamia, kɛtee Nahor maŋ lɛ mli. 11 Ehã afukpɔŋɔi lɛ bumɔ shi yɛ nubu ko he yɛ maŋ lɛ klotia lɛ, aaafee gbɛkɛnaashi mli. Nakai beiaŋ yei lɛ jeɔ kpo yayɛɔ nu. 12 Kɛkɛ ni ekɛɛ: “Yehowa, minuŋtsɔ Abraham Nyɔŋmɔ, ofainɛ, hã maye omanye ŋmɛnɛ gbi nɛɛ, ní ojie osuɔmɔ ni tsakeee lɛ kpo otsɔɔ minuŋtsɔ Abraham. 13 Naa, midamɔ nubu* he yɛ biɛ, ni maŋ lɛ mli hii lɛ abiyei lɛ miiba amɛbayɛ nu. 14 Hã eba akɛ oblayoo ní makɛɛ lɛ akɛ, ‘Ofainɛ, okɛ onugbɛ́ lɛ aba shi koni manu nu lɛ eko,’ ní ebaakɛɛ mi akɛ, ‘Nuu eko, ni mahã ofukpɔŋɔi lɛ hu nu’ lɛ, mɔ nɛɛ afee mɔ ni ohala ohã otsulɔ Isak; ni tsɔ enɛ nɔ ohã male akɛ ojie osuɔmɔ ni tsakeee kpo otsɔɔ minuŋtsɔ lɛ.”

15 Enaa enyɔɔɔ shi po ni Rebeka pue ní enugbɛ́ tswa ekɔɔŋ. Rebeka ji Betuel+ biyoo, ni Betuel ji Abraham nyɛmi nuu Nahor+ ŋa Milka+ binuu. 16 Ni oblayoo lɛ he yɛ fɛo waa, oblayoo fro ni; nuu ko kɛ lɛ náko bɔlɛ dã. Ekpeleke shi kɛtee nubu lɛ he, eyawo enugbɛ́ lɛ obɔ, ni ekwɔ kɛje kpo kɛba. 17 Amrɔ nɔŋŋ lɛ, tsulɔ lɛ sha foi ekɛ lɛ yakpe, ni ekɛɛ: “Ofainɛ, hã mi ogbɛ́ lɛ mli nu lɛ fioo manu.” 18 Ni oblayoo lɛ hu kɛɛ: “Nuu, minuŋtsɔ.” Kɛkɛ ni ehe fee oya ni ekɛ egbɛ́ lɛ ba shi ni ehiɛ yɛ edɛ̃, ni ehã lɛ eko enu. 19 Be ni ehã lɛ nu lɛ egbe naa lɛ, ekɛɛ: “Mayɛ nu mahã ofukpɔŋɔi lɛ hu kɛyashi amɛbaanu amɛgbe naa.” 20 No hewɔ lɛ, ehe fee oya ni etsɔ egbɛ́ lɛ mli nu lɛ ewo nunumɔnɔ lɛ mli, ni esha foi kɛtee nubu lɛ he kɛba shii abɔ eyayɛ nu lɛ, ni etee nɔ eyɛ nu lɛ ehã nuu lɛ afukpɔŋɔi lɛ fɛɛ. 21 Be nɛɛ mli fɛɛ lɛ, nuu lɛ efee diŋŋ kɛmiikwɛ lɛ, ni enaa ekpɛ ehe, ni eeshwie eyiŋ eekwɛ kɛji Yehowa ehã eye omanye yɛ egbɛfãa lɛ mli aloo ehãko eye omanye.

22 Be ni afukpɔŋɔi lɛ nu nu lɛ amɛgbe naa lɛ, nuu lɛ jie shika tsuru gugɔŋ ga ní tsiimɔ ji shekel* fã, kɛ shika tsuru nineshi nii enyɔ ní tsiimɔ ji shekeli* nyɔŋma ehã oblayoo lɛ, 23 ni ekɛɛ: “Ofainɛ, kɛɛmɔ mi, namɔ biyoo ji bo? Ani tsũ yɛ opapa shĩa lɛ ní wɔbaanyɛ wɔye jenamɔ lɛ yɛ jɛmɛ?” 24 Kɛkɛ ni ekɛɛ nuu lɛ akɛ: “Betuel,+ ni ji binuu ni Milka fɔ ehã Nahor+ lɛ, biyoo ji mi.” 25 Ni ekɛɛ kɛfata he akɛ: “Wɔyɛ jwɛi kɛ kooloi aniyenii babaoo, kɛ he ko hu ni nyɛbaanyɛ nyɛye jenamɔ lɛ yɛ.” 26 Kɛkɛ ni nuu lɛ kula shi ni ekɛ ehiɛ bu shi yɛ Yehowa hiɛ 27 ni ekɛɛ: “Ajie Yehowa, minuŋtsɔ Abraham Nyɔŋmɔ lɛ yi, ejaakɛ ehãko esuɔmɔ ni tsakeee kɛ enɔkwayeli lɛ sɛɛ afo yɛ minuŋtsɔ lɛ nɔ. Yehowa etsɔɔ mi gbɛ kɛba minuŋtsɔ lɛ nyɛmimɛi lɛ ashĩa.”

28 Ni oblayoo lɛ wó foi ni eyakɛɛ emami shĩabii lɛ nibii nɛɛ. 29 No mli lɛ, Rebeka yɛ nyɛmi nuu ko ní atsɛɔ lɛ Laban.+ No hewɔ lɛ, Laban wó foi kɛtee nuu lɛ ŋɔɔ yɛ nubu lɛ he yɛ maŋ lɛ klotia. 30 Be ni ena gugɔŋ ga lɛ kɛ nineshi nii lɛ yɛ enyɛmi yoo Rebeka nijiashi, ní enu enyɛmi yoo lɛ wiemɔi ni ewie akɛ, “Bɔ ni nuu lɛ kɛ mi wie nɛ” lɛ, eba nuu lɛ ŋɔɔ, ni no mli lɛ, nuu lɛ damɔ afukpɔŋɔi lɛ amasɛi yɛ nubu lɛ he lolo. 31 Amrɔ lɛ ekɛɛ: “Ba, bo mɔ ni Yehowa ejɔɔ bo. Mɛni hewɔ odamɔ biɛ lolo? Misaa shĩa lɛ, ni misaa he ko mihã afukpɔŋɔi lɛ.” 32 Kɛkɛ ni nuu lɛ ba shĩa lɛ mli, ni ejie* afukpɔŋɔi lɛ anɔ nii lɛ, ni ehã afukpɔŋɔi lɛ jwɛi kɛ niyenii, ni ehã nuu lɛ kɛ hii ni kɛ lɛ nyiɛ lɛ nu koni akɛfɔ amɛnaji ahe. 33 Shi be ni akɛ nɔ ko bama ehiɛ koni eye lɛ, ekɛɛ: “Miyeŋ nii, ja mikɛɛ nyɛ nɔ ni miyɔɔ kɛɛmɔ lɛ dã.” No hewɔ lɛ, Laban kɛɛ: “Wiemɔ!”

34 Kɛkɛ ni ekɛɛ: “Abraham tsulɔ ji mi.+ 35 Ni Yehowa ejɔɔ minuŋtsɔ lɛ naakpa, ni ehã etsɔ niiatsɛ kpele, ejaakɛ ehã lɛ toi kɛ tsinai, jwiɛtɛi kɛ shika tsuru, tsuji hii kɛ tsuji yei, kɛ afukpɔŋɔi kɛ tejii.+ 36 Agbɛnɛ hu, be ni minuŋtsɔ lɛ ŋa Sara egbɔ sɛɛ lɛ,+ efɔ binuu ehã minuŋtsɔ lɛ, ni minuŋtsɔ lɛ kɛ nɔ fɛɛ nɔ ni eyɔɔ lɛ baahã lɛ.+ 37 No hewɔ lɛ, minuŋtsɔ lɛ hã mikã kitã, ewie akɛ: ‘Kaaŋɔ Kanaanbii ni miyɔɔ amɛteŋ lɛ abiyei lɛ eko akɛ ŋa ohã mibinuu lɛ.+ 38 Dabi, shi moŋ, yaa mitsɛ shĩa lɛ kɛ miwekumɛi lɛ aŋɔɔ,+ ní oyaŋɔ yoo obahã mibinuu lɛ akɛ eŋa.’+ 39 Shi mikɛɛ minuŋtsɔ lɛ akɛ: ‘Ni kɛ́ yoo lɛ sumɔɔɔ ni ekɛ mi aba hu?’+ 40 Ekɛɛ mi akɛ: ‘Yehowa, mɔ hiɛ ní minyiɛɔ+ yɛ lɛ baatsu ebɔfo+ ni ekɛ bo aya, ni ebaahã oye omanye yɛ ogbɛfãa lɛ mli, ni ŋɔɔ yoo kɛjɛ miwekumɛi lɛ aŋɔɔ kɛ mitsɛ shĩa+ lɛ obahã mibinuu lɛ akɛ eŋa. 41 Kɛ́ otee miwekumɛi lɛ aŋɔɔ ni amɛkɛ yoo lɛ hãaa bo lɛ, no lɛ, obaaye ohe kɛje kitã ni okã mi lɛ shishi. Enɛ baahã oye ohe kɛje kitã ni okã lɛ shishi.’+

42 “Be ni mishɛ nubu lɛ he ŋmɛnɛ lɛ, mikɛɛ akɛ: ‘Yehowa, minuŋtsɔ Abraham Nyɔŋmɔ, kɛ́ obaahã maye omanye yɛ migbɛfãa lɛ mli lɛ, 43 no lɛ naa, midamɔ nubu nɛɛ he yɛ biɛ. Eba akɛ, oblayoo+ ní baaba nuyɛɛ ní makɛɛ lɛ akɛ, “Ofainɛ, hã mi ogbɛ́ lɛ mli nu fioo manu,” 44 ní ebaakɛɛ mi akɛ, “Nuu eko, ni mayɛ nu mahã ofukpɔŋɔi lɛ hu lɛ,” hã nakai yoo lɛ afee mɔ ni Yehowa ehala ehã minuŋtsɔ lɛ binuu lɛ.’+

45 “Shi dani magbe nɔ ni miwieɔ yɛ mitsuiŋ lɛ naa lɛ, naa Rebeka miiba ní egbɛ́ tswa ekɔɔŋ, ni ekpeleke shi kɛtee nubu lɛ he ni eyabɔi nu yɛɛ. Kɛkɛ ni mikɛɛ lɛ akɛ: ‘Ofainɛ, hã mi nu lɛ eko manu.’+ 46 No hewɔ lɛ, ehe fee oya ni ekɛ egbɛ́ lɛ ba shi kɛjɛ ekɔɔŋ nɔ, ni ekɛɛ: ‘Nuu eko,+ ni mahã ofukpɔŋɔi lɛ hu nu.’ Kɛkɛ ni minu nu lɛ eko, ni ehã afukpɔŋɔi lɛ hu eko amɛnu. 47 No sɛɛ lɛ, mibi lɛ akɛ, ‘Namɔ biyoo ji bo?’ ni ehã mi hetoo akɛ, ‘Betuel, Nahor binuu ní Milka fɔ ehã lɛ lɛ biyoo ji mi.’ No hewɔ lɛ, mikɛ ga lɛ wo egugɔ, ni mikɛ nineshi nii lɛ wo eniji.+ 48 Ni mikula shi ni mikɛ mihiɛ bu shi yɛ Yehowa hiɛ ni mijie Yehowa, minuŋtsɔ Abraham Nyɔŋmɔ lɛ yi,+ ejaakɛ enyiɛ mihiɛ tɛ̃ɛ kɛba koni mibaŋɔ minuŋtsɔ lɛ nyɛmi nuu biyoo miyahã ebinuu lɛ. 49 Ni amrɔ nɛɛ, kɛji nyɛmiisumɔ ní nyɛjie suɔmɔ ni tsakeee kɛ anɔkwayeli kpo nyɛtsɔɔ minuŋtsɔ lɛ, nyɛkɛa mi; shi kɛjeee nakai hu lɛ, nyɛkɛa mi, koni male nɔ ni mafee.”*+

50 Kɛkɛ ni Laban kɛ Betuel hã hetoo akɛ: “Yehowa ŋɔɔ enɛ jɛ. Wɔnyɛŋ wɔkɛɛ bo akɛ hɛɛ loo dabi.* 51 Naa, Rebeka lɛ nɛ. Ŋɔɔ lɛ ní nyɛya, ní eyatsɔ onuŋtsɔ lɛ binuu lɛ ŋa, tamɔ bɔ ni Yehowa ewie lɛ.” 52 Be ni Abraham tsulɔ lɛ nu amɛwiemɔi lɛ, amrɔ lɛ, ekula shi ni ekɛ ehiɛ bu shi yɛ Yehowa hiɛ. 53 Ni tsulɔ lɛ jie jwiɛtɛi nibii kɛ shika tsuru nibii kɛ mamai* kɛba, ni ekɛhã Rebeka, ni ehã enyɛmi nuu lɛ kɛ emami hu nibii ni jara wawai. 54 No sɛɛ lɛ, lɛ kɛ hii ni fata ehe lɛ ye nii ni amɛnu nɔ ko, ni amɛye jenamɔ lɛ yɛ jɛmɛ.

Be ni ete shi leebi lɛ, ekɛɛ: “Nyɛwoa mi gbɛ ní maya minuŋtsɔ lɛ ŋɔɔ.” 55 Kɛkɛ ni enyɛmi nuu lɛ kɛ emami kɛɛ: “Hã oblayoo lɛ kɛ wɔ ahi shi, kɛ́ hooo lɛ gbii nyɔŋma. No sɛɛ lɛ, ebaanyɛ eya.” 56 Shi ekɛɛ amɛ akɛ: “Nyɛkatsĩa minaa, ejaakɛ nyɛmiina akɛ Yehowa ehã miye omanye yɛ migbɛfãa lɛ mli. Nyɛwoa mi gbɛ, bɔ ni afee ni maya minuŋtsɔ lɛ ŋɔɔ.” 57 No hewɔ lɛ, amɛkɛɛ akɛ: “Hã wɔtsɛ oblayoo lɛ ní wɔbi lɛ.” 58 Amɛtsɛ Rebeka ni amɛkɛɛ lɛ akɛ: “Okɛ nuu nɛɛ baaya lo?” Ehã hetoo akɛ: “Hɛɛ, maya.”

59 No hewɔ lɛ, amɛwo amɛnyɛmi yoo Rebeka+ kɛ mɔ ni kwɛɔ lɛ lɛ*+ kɛ Abraham tsulɔ lɛ kɛ ehii lɛ gbɛ. 60 Ni amɛjɔɔ Rebeka ni amɛkɛɛ lɛ akɛ: “Wɔnyɛmi yoo, tsɔ mɛi akpei toi akpei nyɔŋma,* ní oseshibii lɛ aŋɔ mɛi ni he tsɛ̃ɔ amɛ lɛ agbó* lɛ.”+ 61 Kɛkɛ ni Rebeka kɛ yei ni sɔmɔɔ lɛ lɛ te shi, amɛtara afukpɔŋɔi lɛ anɔ, ni amɛnyiɛ nuu lɛ sɛɛ. No hewɔ lɛ, tsulɔ lɛ ŋɔ Rebeka ni eyi mli etee.

62 Agbɛnɛ, Isak jɛ Beer-lahai-roi+ gbɛ eba, ejaakɛ no mli lɛ, eyɛ Negeb+ shikpɔŋ lɛ nɔ. 63 Ni Isak eje kpo etee ŋa lɛ nɔ aaafee gbɛkɛnaashi mli koni eyashwie eyiŋ.+ Be ni ewó ehiɛ nɔ ekwɛ lɛ, ena akɛ afukpɔŋɔi miiba! 64 Be ni Rebeka wó ehiɛ nɔ lɛ, ehiŋmɛi gba Isak nɔ, ni eyi shi oya kɛje afukpɔŋɔ lɛ nɔ. 65 Kɛkɛ ni ebi tsulɔ lɛ akɛ: “Mɛɛ nuu nyiɛ jɛmɛ yɛ ŋa lɛ mli ebaa ekɛ wɔ abakpe lɛ?” Ni tsulɔ lɛ kɛɛ: “Minuŋtsɔ lɛ ni.” No hewɔ lɛ, ekɔ ehiɛhaanɔ lɛ ni ekɛha ehe. 66 Ni tsulɔ lɛ gba Isak nibii fɛɛ ní eyafee lɛ. 67 No sɛɛ lɛ, Isak kɛ lɛ ba emami Sara mama tsũ lɛ mli.+ No hewɔ lɛ, Rebeka batsɔ eŋa; ni esumɔ lɛ,+ ni no shɛje Isak mii yɛ emami gbele lɛ sɛɛ.+