Yoshua
22 Kɛkɛ ni Yoshua tsɛ Rubenbii lɛ kɛ Gadbii lɛ kɛ Manase weku lɛ fã lɛ 2 ni ekɛɛ amɛ akɛ: “Nyɛfee nɔ fɛɛ nɔ ni Yehowa tsulɔ Mose fã nyɛ lɛ,+ ni nyɛbo migbee toi yɛ nɔ fɛɛ nɔ ni mifã nyɛ lɛ mli.+ 3 Nyɛkwako nyɛnyɛmimɛi lɛ yɛ nɛkɛ be nɛɛ mli fɛɛ, aahu kɛbashi ŋmɛnɛ gbi nɛɛ;+ ni nyɛye Yehowa, nyɛ-Nyɔŋmɔ lɛ, kitã lɛ nɔ.+ 4 Amrɔ nɛɛ, Yehowa, nyɛ-Nyɔŋmɔ lɛ, ehã nyɛnyɛmimɛi lɛ ahe ejɔ amɛ, tamɔ bɔ ni ewo amɛ shi lɛ pɛpɛɛpɛ.+ No hewɔ lɛ, agbɛnɛ, nyɛbaanyɛ nyɛku nyɛsɛɛ kɛya nyɛmama tsũi lɛ amli yɛ shikpɔŋ ni Yehowa tsulɔ Mose kɛhã nyɛ akɛ nyɛnɔ, yɛ Yordan lɛ sɛɛ* lɛ nɔ.+ 5 Nyɛkwɛa nyɛhe nɔ jogbaŋŋ kɛkɛ ni nyɛye kitã kɛ Mla ni Yehowa tsulɔ Mose wo nyɛ lɛ nɔ,+ no ji akɛ, nyɛsumɔa Yehowa, nyɛ-Nyɔŋmɔ lɛ,+ ni nyɛnyiɛa egbɛi lɛ fɛɛ anɔ,+ ni nyɛyea ekitãi lɛ fɛɛ anɔ,+ ni nyɛkpɛtɛa ehe,+ ni nyɛsɔmɔa lɛ+ kɛ nyɛtsui fɛɛ kɛ nyɛsusuma* fɛɛ.”+
6 Kɛkɛ ni Yoshua jɔɔ amɛ ni ewo amɛ gbɛ, ni amɛyi mli amɛtee amɛmama tsũi lɛ amli. 7 Manase weku lɛ fã lɛ, Mose hã amɛ gboshinii yɛ Bashan,+ ni eweku lɛ fã kroko lɛ, Yoshua hã amɛ shikpɔŋ yɛ Yordan lɛ anaigbɛ,+ yɛ amɛnyɛmimɛi lɛ ateŋ. Agbɛnɛ hu, be ni Yoshua wo amɛ gbɛ akɛ amɛya amɛmama tsũi lɛ amli lɛ, ejɔɔ amɛ 8 ni ekɛɛ amɛ akɛ: “Nyɛkua nyɛsɛɛ kɛyaa nyɛmama tsũi lɛ amli kɛ nii babaoo, kɛ lɛɛ kooloi babaoo diɛŋtsɛ, kɛ jwiɛtɛi kɛ shika tsuru, akɔɔble kɛ dade, kɛ atadei pii diɛŋtsɛ.+ Nyɛkɛ nyɛnyɛmimɛi lɛ ajaa nyɛhenyɛlɔi lɛ anibii ni nyɛloo* lɛ.”+
9 Enɛ sɛɛ lɛ, Rubenbii lɛ kɛ Gadbii lɛ kɛ Manase weku lɛ fã lɛ yi mli kɛjɛ Israelbii krokomɛi lɛ aŋɔɔ yɛ Shilo, yɛ Kanaan shikpɔŋ lɛ nɔ, ni amɛku amɛsɛɛ kɛtee Gilead shikpɔŋ lɛ nɔ,+ shikpɔŋ ni akɛhã amɛ akɛ amɛnɔ ni amɛhi nɔ yɛ famɔ ni Yehowa tsɔ Mose nɔ ekɛhã lɛ naa lɛ.+ 10 Be ni Rubenbii lɛ kɛ Gadbii lɛ kɛ Manase weku lɛ fã lɛ bashɛ Yordan lɛ niiaŋ yɛ Kanaan shikpɔŋ lɛ nɔ lɛ, amɛma afɔleshaa latɛ yɛ jɛmɛ, yɛ Yordan lɛ naa, afɔleshaa latɛ ni da waa diɛŋtsɛ. 11 Sɛɛ mli lɛ, Israelbii krokomɛi lɛ nu+ ni akɛɛ: “Naa! Rubenbii lɛ kɛ Gadbii lɛ kɛ Manase weku lɛ fã lɛ ema afɔleshaa latɛ yɛ Kanaan shikpɔŋ lɛ husu lɛ naa, yɛ Yordan lɛ niiaŋ, yɛ afã ni ji Israelbii lɛ anɔ lɛ nɔ.” 12 Be ni Israelbii lɛ nu he lɛ, Israel asafo muu lɛ fɛɛ bua amɛhe naa yɛ Shilo+ koni amɛkɛ amɛ ayawu.
13 Ni Israelbii lɛ tsu osɔfo Eleazar binuu Finehas+ kɛtee Rubenbii lɛ kɛ Gadbii lɛ kɛ Manase weku lɛ fã lɛ ŋɔɔ yɛ Gilead shikpɔŋ lɛ nɔ, 14 ni onukpai nyɔŋma fata ehe, ahala onukpa kome kɛjɛ Israel wekui lɛ atsɛmɛi ashĩai lɛ eko fɛɛ eko mli, ni amɛteŋ mɔ fɛɛ mɔ ji etsɛmɛi ashĩa lɛ nɔ onukpa yɛ Israel akpei abɔ* lɛ ateŋ. + 15 Be ni amɛyashɛ Rubenbii lɛ kɛ Gadbii lɛ kɛ Manase weku lɛ fã lɛ ŋɔɔ yɛ Gilead shikpɔŋ lɛ nɔ lɛ, amɛkɛɛ amɛ akɛ:
16 “Nɔ ni Yehowa asafo muu lɛ fɛɛ kɛɛ nɛ: ‘Mɛni hewɔ nyɛfee nɔ ko tamɔ nɛkɛ kɛtsɔɔ akɛ nyɛyeee Israel Nyɔŋmɔ lɛ anɔkwa lɛ?+ Ŋmɛnɛ lɛ, nyɛje Yehowa sɛɛ, ejaakɛ nyɛma afɔleshaa latɛ nyɛhã nyɛhe, ni nyɛtse Yehowa hiɛ atua.+ 17 Ani tɔmɔ ni atɔ̃ yɛ Peor lɛ faaa hãaa wɔ? Eyɛ mli akɛ haomɔ ko ba Yehowa asafo lɛ nɔ yɛ he moŋ, shi wɔnyɛko wɔtsuu wɔhe kɛje mli kɛbashi ŋmɛnɛ gbi nɛɛ.+ 18 Ni ŋmɛnɛ lɛ, nyɛmiije Yehowa sɛɛ! Kɛ́ nyɛtse Yehowa hiɛ atua ŋmɛnɛ lɛ, no lɛ wɔ́ lɛ, emli baawo la ewo Israel asafo muu lɛ fɛɛ.+ 19 Agbɛnɛ, kɛ́ nyɛsusuɔ akɛ shikpɔŋ ni akɛhã nyɛ akɛ nyɛnɔ lɛ nɔ tseee lɛ, no lɛ, nyɛfoa mli kɛbaa shikpɔŋ ni ji Yehowa nɔ lɛ nɔ,+ he ni Yehowa sɔlemɔ buu lɛ yɔɔ lɛ,+ ni nyɛbahia wɔteŋ, shi nyɛkatsea Yehowa hiɛ atua, ni nyɛkahãa wɔtsɔmɔa atuatselɔi, akɛni nyɛma afɔleshaa latɛ kroko nyɛhã nyɛhe nyɛfata Yehowa, wɔ-Nyɔŋmɔ lɛ, afɔleshaa latɛ lɛ he lɛ hewɔ.+ 20 Be ni Zera binuu Akan+ tɔ̃ tɔmɔ ni tsɔɔ akɛ eyeee anɔkwa yɛ nibii ni atu ahã hiɛkpatamɔ lɛ agbɛfaŋ lɛ, ani mlifu baaa Israel asafo muu lɛ fɛɛ nɔ?+ Ni jeee ekome too pɛ egbo yɛ etɔmɔ lɛ hewɔ.’”+
21 Kɛkɛ ni Rubenbii lɛ kɛ Gadbii lɛ kɛ Manase weku lɛ fã lɛ hã Israel akpei abɔ* lɛ anɔ onukpai lɛ hetoo akɛ:+ 22 “Yehowa, nyɔŋmɔi a-Nyɔŋmɔ* lɛ! Yehowa, nyɔŋmɔi a-Nyɔŋmɔ lɛ!+ Lɛ ele, ni Israel hu baaná ale. Kɛji wɔtse Yehowa hiɛ atua, ni wɔyeee lɛ anɔkwa lɛ, no lɛ, ŋmɛnɛ gbi nɛɛ, nyɛkɛ wɔhe akakea wɔ. 23 Kɛ́ wɔma afɔleshaa latɛ wɔhã wɔhe koni wɔje Yehowa sɛɛ, ní wɔshã shãa afɔlei kɛ ŋmaa* afɔlei kɛ naanyobɔɔ afɔlei yɛ nɔ lɛ, no lɛ, Yehowa akwɛ ni egbala wɔtoi.+ 24 Dabi, yiŋtoo kroko hewɔ wɔfee enɛ lɛ, ejaakɛ wɔkɛɛ akɛ, ‘Wɔsɛɛ ko lɛ, nyɛbii* lɛ baakɛɛ wɔbii* lɛ akɛ: “Mɛni nyɛkɛ Yehowa, Israel Nyɔŋmɔ lɛ, yɔɔ feemɔ? 25 Yehowa kɛ Yordan lɛ efo husu yɛ wɔ kɛ nyɛ, ni ji Rubenbii kɛ Gadbii lɛ ateŋ. Nyɛbɛ gbɛfaŋnɔ ko yɛ Yehowa mli.” Ni nyɛbii* lɛ baatsĩ wɔbii* lɛ gbɛ ní amɛkajá Yehowa.’*
26 “No hewɔ lɛ, wɔkɛɛ akɛ, ‘Bɔ fɛɛ bɔ ni fee lɛ, nyɛhãa wɔfea he nɔ ko, ní wɔma afɔleshaa latɛ ko, jeee koni wɔshã shãa afɔlei loo afɔlei krokomɛi yɛ nɔ, 27 shi moŋ, koni etsɔ odasefonyo yɛ nyɛ kɛ wɔ teŋ,+ kɛ wɔseshibii* ni baaba yɛ wɔsɛɛ lɛ hu ateŋ, akɛ wɔkɛ wɔshãa afɔlei kɛ wɔnaanyobɔɔ afɔlei kɛ wɔfɔlei krokomɛi lɛ baasɔmɔ Yehowa yɛ ehiɛ,+ koni wɔsɛɛ ko lɛ, nyɛbii* lɛ akakɛɛ wɔbii* lɛ akɛ: “Nyɛbɛ gbɛfaŋnɔ ko yɛ Yehowa mli.”’ 28 No hewɔ lɛ, wɔkɛɛ, ‘Kɛ́ wɔsɛɛ ko lɛ amɛaakɛɛ wɔ kɛ wɔseshibii* lɛ nakai lɛ, no lɛ, wɔbaakɛɛ akɛ: “Nyɛkwɛa Yehowa afɔleshaa latɛ lɛ henɔ ni wɔtsɛmɛi lɛ ma, jeee koni ashã shãa afɔlei loo afɔlei krokomɛi yɛ nɔ, shi moŋ, koni etsɔ odasefonyo yɛ nyɛ kɛ wɔ teŋ.”’ 29 Ekaba lɛ nakai kɔkɔɔkɔ akɛ ŋmɛnɛ lɛ, wɔɔshi Yehowa, wɔ-Nyɔŋmɔ lɛ, afɔleshaa latɛ ni yɔɔ esɔlemɔ buu lɛ hiɛ lɛ sɛɛ ní wɔma afɔleshaa latɛ kroko ní ashã shãa afɔlei kɛ ŋmaa afɔlei kɛ afɔlei krokomɛi yɛ nɔ+ koni wɔkɛtse Yehowa hiɛ atua, ni wɔje Yehowa sɛɛ!”+
30 Be ni osɔfo Finehas, maŋ lɛ mli onukpai lɛ, kɛ Israel akpei abɔ* lɛ anɔ onukpai ni fata ehe lɛ nu wiemɔi ni Ruben kɛ Gad kɛ Manase seshibii lɛ wie lɛ, amɛtsui nyɔ amɛmli.+ 31 No hewɔ lɛ, osɔfo Eleazar binuu Finehas kɛɛ Ruben kɛ Gad kɛ Manase seshibii lɛ akɛ: “Ŋmɛnɛ lɛ, wɔná wɔle akɛ Yehowa yɛ wɔteŋ, ejaakɛ nyɛfeko nɔ ko ni tsɔɔ akɛ nyɛyeee Yehowa anɔkwa. Agbɛnɛ, nyɛhere Israelbii lɛ yɛ Yehowa dɛŋ.”
32 Ni osɔfo Eleazar binuu Finehas kɛ onukpai lɛ ku amɛsɛɛ kɛjɛ Rubenbii lɛ kɛ Gadbii lɛ aŋɔɔ yɛ Gilead shikpɔŋ lɛ nɔ kɛba Kanaan shikpɔŋ lɛ nɔ, ni amɛkɛ wiemɔ bahã Israelbii krokomɛi lɛ. 33 Ni Israelbii lɛ nya amaniɛbɔɔ lɛ he. Kɛkɛ ni Israelbii lɛ jie Nyɔŋmɔ yi, ni amɛwieee dɔŋŋ akɛ amɛbaaya amɛkɛ Rubenbii lɛ kɛ Gadbii lɛ ayawu, ní amɛkpãtã shikpɔŋ ni amɛyɔɔ nɔ lɛ hiɛ.
34 No hewɔ lɛ, Rubenbii lɛ kɛ Gadbii lɛ wo afɔleshaa latɛ lɛ gbɛ́i,* ejaakɛ amɛkɛɛ akɛ, “eji odasefonyo yɛ wɔteŋ akɛ, Yehowa ji anɔkwa Nyɔŋmɔ lɛ.”