FƆLƆI—Te Nyɛaafee Tɛŋŋ ‘Nyɛtswa’ Nyɛshia lɛ Nyɛma Shi?
“Nilee akɛmaa tsu, ni sanesɛɛkɔmɔ akɛhoo edamɔɔ shi.”—ABƐI 24:3.
1. Mɛni ji nɔ kome ko ni he hiaa koni weku lɛ afee ekome?
SAJI komɛi amli ni atao nyɛsɛɛ nɛɛ lɛ bi nitsulɔi fe 550 ni yeɔ buaa wekui lɛ ni amɛtsɔɔ nɔ sui ni amɛnaa lɛ babaoo yɛ wekui ni efee ekome waa lɛ amli. Nɔ ni ba klɛŋklɛŋ yɛ saji ni ato naa lɛ mli ji: sanegbaa kɛ toiboo. Mɔ ni tao saji nɛɛ amli, ni ji Dolores Curran, tsɔɔ nɔ hewɔ lɛ mli: “No ji hewalɛ ni kanyaa mɔ yiŋsusumɔ, mɔ nihamɔ, nijaa kɛ nɔkpɛlɛmɔ. Kɛ wɔbooo sane toi ni wɔkɛ wɔbe haaa yɛ anɔkwayeli mli lɛ, wɔnyɛŋ wɔle wɔhe. Wɔbatsɔmɔɔ tamɔ shiabii ni yɔɔ tsu kome mli ni kpoɔ moŋ fe ni wɔɔtsu mɔ kroko lɛ hiamɔ nii ahe nii. Hɛɛ, sanegbaa ni yaa nɔ ni naatsii bɛ mli lɛ ji weku ni efee ekome lɛ wala.
2, 3. (a) Mɛɛ naagba ji nɔ ni anaa yɛ Kristofoi ashiai komɛi po mli? (b) Mɛni ji nɔ ni Abɛi 24:3, 4 jieɔ lɛ kpo ni baanyɛ aye abua ni atswa weku ni efee ekome ama shi? (d) Mɛɛ sanebimɔi ehe hiaa ni aha hetoo?
2 Shi ekomefeemɔ ni bɛ lɛ baanyɛ ekɛ oshara diɛŋtsɛ aba. Akɛ nɔkwɛmɔ lɛ, abi Buu Mɔɔ Asafo lɛ nitsumɔ he niji yɔɔ Afrika lɛ ekome sane yɛ nɔ hewɔ ni obalaŋtai Kristofoi komɛi kpoɔ Biblia mli jeŋba kpakpa lɛ. Taakɛ hetoo lɛ tsɔɔ lɛ, “gbɔjɔmɔ titri ni kɔɔ naagba nɛɛ he lɛ fɛɛ ji akɛ, fɔlɔi nyɛɛɛ afee toibolɔi kpakpai ni amɛnyɛɛɛ ni amɛkɛ amɛbii asusu saji ahe. Fɔlɔi pii yɛ ni wiemɔŋ wekukpaa diɛŋtsɛ ni mli wa kaaa amɛ kɛ amɛbii ateŋ.” Shi naagba lɛ fã kɛkɛ pɛ nɛ—eyɛ mli akɛ eji nɔ ni he hiaa. Aŋkroaŋkro toiboo kɛ obalaŋtai lɛ ni amɛaatuu amɛhe amɛha Nyɔŋmɔ jamɔ, taakɛ eji yɛ mɔ fɛɛ mɔ gbɛfaŋ lɛ baa klɛŋklɛŋ. (Romabii 14:12; 1 Timoteo 6:6) Agbɛnɛ hu susumɔ Abɛi 24:3, 4 he. Ekaneɔ nɛkɛ: “Nilee akɛmaa tsu, ni sanesɛɛkɔmɔ akɛhaa edamɔɔ shi, ni nilee akɛhaa piaiaŋ yimɔɔ kɛ nii ni jara wa ni yɔɔ fɛo fɛɛ.”
3 Shi te ooofee tɛŋŋ ni okɛ nilee kɛ sanesɛɛkɔmɔ atsu nii koni onine ashɛ teemɔŋ henumɔi ni he hiaa yɛ obalaŋtai agbɛfaŋ titri lɛ nɔ? Mɛni ofeɔ okɛtsiɔ nifeemɔ ni baanyɛ atsi sanegbaa gbɛ lɛ anaa? (Okɛto Abɛi 14:1, 12 he.) Nɔ ni fee fɛɛ lɛ, te ooofee tɛŋŋ otswa weku ni yɔɔ shiŋŋ yɛ anɔkwa jamɔ mli oma shi? Akɛni esa akɛ okɛ obe atsu nibii babaoo he nii hewɔ lɛ, obaasusu he ni obaaje shishi kɛjɛ lɛ he. Klɛŋklɛŋ su, ni ji nilee baanyɛ aye ebua bo ni okɛ nii ni he hiaa titri lɛ aye klɛŋklɛŋ gbɛhe.
Okɛ Nii Ni He Hiaa Titri Lɛ Amamɔ Shi Yɛ Nilee Mli
4. Mɛni esa akɛ efee Kristofoi aweku lɛ hiamɔ nii titri?
4 Lalatsɛ lɛ ŋma akɛ, “Yehowa gbeyeishemɔ ji nilee shishijee.” (Lala 111:10) Nyɔŋmɔ, ni ni osheɔ gbeyei yɛ gbɛ ni ja nɔ akɛ ooofee nɔ ni esaŋ ehiɛ, kɛ agbɛnɛ ejamɔ ni okɛaaye klɛŋklɛŋ gbɛhe lɛ he miihia. Nyɛ ko tsɔɔ bo ni ekɛ ewu fɛɛ ye omanye yɛ amɛ bihii enyɔ ni amɛtsɔse amɛ koni amɛsɔmɔ Yehowa lɛ mli: “Wɔkɛ anɔkwale lɛ wo amɛshihilɛ mli obɔ—wɔyaa kpeei sɔrɔtoi f-ɛɛ, wɔsaa wɔhe wɔhaa kpeei ni wɔyaa, wɔhaa sɔɔmɔ nitsumɔ lɛ feɔ wɔdaa gbi shihilɛ lɛ fa.” Ewu lɛ kɛfata he akɛ: “Anɔkwale lɛ jeee wɔshihilɛ lɛ fa, eji wɔshihilɛ. Nɔ fɛɛ nɔ bɔleɔ enɛ he. Ani okɛ Yehowa jamɔ hu yeɔ nibii fɛɛ hiɛ akɛ nɔ̃ titri yɛ oshia?
5. Mɛni hewɔ ehe hiaa ni fɔlɔi Kristofoi aŋmɛ pɛpɛɛpɛ lɛ?
5 Sɔɔmɔ nitsumɔ lɛ mli ni nyɛkɛ nyɛhe aaawo akɛ weku lɛ baagbala nyɛ ni nyɛfee ekome, ni kɛlɛ, nibii ni yɔɔ sɔrɔto ni he hiaa gbekɛbii lɛ biɔ oteemɔŋ be kɛ henumɔŋ nyɛmɔi ni Okɛaaha amɛ. No hewɔ lɛ, pɛpɛɛpɛ ni aŋmɛɔ he miihia koni okɛle bei abɔ ni okɛbaatsu nii yɛ shiɛmɔ mli aloo yɛ asafoŋ nitsumɔi amli yɛ be mli ni okwɛɔ ‘mɛi ni ji bo diɛŋtsɛ oshia bii’ lɛ amumɔŋ, henumɔŋ kɛ heloo gbɛfaŋ hiamɔ nii anɔ lɛ. Esa akɛ ‘okase Nyɔŋmɔ gbeyeishemɔ yɛ bo diɛŋtsɛ owe tsutsu.’ (1 Timoteo 5:4, 8) Bɔni afee ni aye abua tsɛmɛi, titri Iɛ koni amɛŋmɛ pɛpɛɛpɛ yɛ weku gbɛnaa nii ni he hiaa kɛ sɔɔmɔ nitsumɔi lɛ amli lɛ, September 15, 1959 Watchtower lɛ wo hewalɛ akɛ: “Okɛ tsiimɔ ni sa aha nibii ni he hiaa bo diɛŋtsɛ oweku lɛ. Eka shi faŋŋ akɛ Yehowa Nyɔŋmɔ kpaŋ gbɛ akɛ gbɔmɔ kɛ ebe fɛɛ baatsu nii yɛ asafoŋ nitsumɔi amli, ni ekɛye ebua enyɛmimɛi kɛ ekutsoŋbii ni ahere amɛyiwala koni ekakwɛ lɛ diɛŋtsɛ eshiabii ayiwalaheremɔ. Nuu ŋa kɛ ebii ji egbɛnaa nii titri.”
6. Mɛɛ oshara ji nɔ ni esa akɛ fɔlɔi akwa, ni mɛɛ gbɛ nɔ aaatsɔ afee enɛ yɛ?
6 Jeee ŋmɛlɛtswaa babaoo ni afiteɔ yɛ gbekɛbii ahe lɛ ji nɛkɛ gbɛnaa nii nɛɛ he nitsumɔ, shi moŋ be lɛ ni akɛbaatsu nii ni sɛɛnamɔ aba he. Nɔ ni yɔɔ mɔbɔ ji akɛ, fɔlɔi komɛi kɛ amɛhe ewo asafoŋ saji ahe nitsumɔi ni biɔ be babaoo yɛ amɛdɛŋ lɛ amli aahu, aloo amɛkɛ amɛhe ewo heloo gbɛfaŋ nibii amli aahu akɛ kɛ́ amɛyɛ amɛbii ateŋ po lɛ, amɛjwɛŋmɔ yɛ nibii krokomɛi anɔ. Beni oshara ko eba Iɛ no dani amɛhɛleɔ shi ni amɛyoɔ bɔ ni ehe hiaa akɛ amɛaaŋmɛ nibii ni he hiaa amɛ titri lɛ amɛkwɛ. ‘Nilee ni jɛ ŋwɛi lɛ, tsutsu lɛ . . . ehiɛ ka shi, eboɔ toi.” (Yakobo 3:17) Nɛkɛ ŋwɛi nilee nɛɛ baaye abua bo ni oja obe kɛ henumɔ mli bɔ ni sa bɔni afee ni onyɛ obo Yehowa kitai Iɛ fɛɛ toi.
Tso kɛ Kamɔ Haa Mɔ Leɔ Nii
7. Te aaafee tɛŋŋ ni akɛ Abɛi 29:15 atsu nii yɛ gbɛ ni mɔɔ shi nɔ?
7 Shiŋŋ ni afeɔ ahaa jalɛ Shishitoo mlai, ni ajieɔ lɛ kpo yɛ mlihilɛ mli lɛ kɛɛɔ obii Iɛ akɛ osusuɔ amɛhe. Gbɛ ni aŋmɛɔ yɛ nɔ fɛɛ nɔ feemɔ mli Iɛ kɛ gbekɛbii afitemɔ kɛ shweshweeshwe ni anuɔ he akɛ abɛ baa. “Tso kɛ kamɔ haa mɔ leɔ nii.” (Abɛi 29:15; 22:15) Bɔni afee ni efee nɔ ni sɛɛnamɔ yɔɔ he lɛ, esa akɛ suɔmɔ afata “tso kɛ kamɔ” he. Tsɔsemɔ ni akɛtsuɔ nii ni shishinumɔ bɛ he aloo yɛ be mli ni mli efu lɛ baanyɛ akumɔ gbekɛ lɛ mumɔ. “Nyɛ tsɛmɛi lɛ, nyɛkawoa nyɛbii amli la, koni amɛtsuii akafaa.” (Kolosebii 3:21) Nɔ ni fataa tsɔsemɔ “tso” lɛ he ji toigbalamɔ ni sa, shi kɛji akɛ ofeɔ nibii ni shishinumɔ bɛ mli, oyɛ keketee, ni oshwieɔ gbekɛ lɛ hiɛ shi lɛ, eji “tso” ni akɛmiitsu nii yɛ gbɛ ni ejaaa nɔ, ni ebaanyɛ efite gbekɛ lɛ hekɛnɔfɔɔ yɛ lɛ diɛŋtsɛ emli kɛ bo hu omli. ‘Etsui baanyɛ afa.’
8. Tsɔɔmɔ nɔ hewɔ ni “kamɔ” tsɔɔ babaoo fe mɔ hiɛkamɔ loo jɛmɔ lɛ?
8 Shi “tso kɛ kamɔ” he miihia. Kamɔ biɔ nɔ ni fe toigbalamɔ ni ‘mli wa kɛkɛ; nɔ ni fata he ji anɔkwalei ni okɛaashwie shi koni okɛtsɔ mɔ kroko yiŋ.a Atsɔɔ Hebri wiemɔ kɛha “kamɔ” shishi hu akɛ ‘sanenaajiemɔ.’ (Lala 38: 5) No hewɔ lɛ, ni oooka mɔ ko diɛŋtsɛ lɛ tsɔɔ akɛ oosumɔ ni obaanyɛ ni okɛ anɔkwa saji Iɛ ashwie shi bɔni afee ni gbekɛ lɛ ana yiŋtoo hewɔ ni ofeɔ nii lɛ. Saji komɛi yɛ ni aŋmala yɛ Buu Mɔɔ Asafo Iɛ woji amli ni aŋmala ekomɛi aha obalaŋtai titri, ni ebaaye abua bo ni okɛ yiŋtoi ni hi ni kɔɔ nɔ hewɔ ni gbɛ ko ehiii lɛ amamɔ obi lɛ hiɛ. Ani okɛ enɛɛmɛi fɛɛ miitsu nii?
Sanesɛɛkɔmɔ Kɛ Nu Ni Anuɔ He Ahaa Mɔ Baa
9. Mɛni ji sanesɛɛkɔmɔ, ni mɛni hewɔ ehe hiaa lɛ?
9 Sanesɛɛkɔmɔ hu ji hesaa yɛ sanegbaa mli lɛ fa ko ni he hiaa. Shishijee Hebri wiemɔ lɛ jɛ shishifaa wiemɔ ko ni eshishi ji “ayoo nibii amli,” “anyɛ atsɔɔ nibii amli” lɛ mli. Nɛkɛ nibii amli lee nɛɛ boteɔ nɔ ni anaa lɛ shishi, no hewɔ lɛ, anyɛɔ akɛtoɔ shishinumɔ, ni anuɔ he ahaa mɔ, kɛ mɔbanalɛ he.—1 Petro 3:8.
10. Te fee tɛŋŋ ni shihilɛ ko ni abote mli jogbaŋŋ lɛ tsĩ béi ko ni kulɛ ebaanyɛ eba yɛ Biblia bei amli lɛ naa lɛ?
10 Biblia mli nɔkwɛmɔ nɔ ni tsɔɔ sɛɛnamɔ ni yɔɔ sanesɛɛkɔmɔ he lɛ jeɔ kpo yɛ Yoshua 22:9-34. Rubenbii, Gadbii kɛ Manase akutso lɛ ni aha amɛ shikpɔŋ akɛ amɛgboshinii yɛ Yordan Faa lɛ bokagbɛ lɛ ma “afɔleshaalatɛ kpeteŋkpele” ko yɛ jɛmɛ. Akɛni akutsei krokomɛi lɛ yasusu akɛ enɛ ji hemɔkɛyeli kwamɔ hewɔ lɛ, amɛsaa amɛhe koni amɛgbala amɛtoi yɛ nɔ ni amɛsusuɔ akɛ eji Nyɔŋmɔ mla lɛ ni amɛje gbɛ amɛku mli lɛ hewɔ. (3 Mose 17:8, 9) Dani amɛaafee nakai lɛ, amɛtsu gbɔmɛi koni amɛkɛ nakai akutsei enyɔ kɛ fa lɛ ayawie. (Abɛi 13:10) Sanegbaa lɛ jie lɛ kpo akɛ amɛmaaa nakai afɔleshaalatɛ lɛ koni amɛsha afɔle yɛ nɔ shi moŋ ‘yɛ aleee nɔ̃ wɔsɛɛ sane ko ni amɛsusuɔ he lɛ hewɔ.’ Akɛni Yordan faa lɛ egbala akutsei enyɔ kɛ fa lɛ kɛjɛ akutsei krokomɛi lɛ ahe hewɔ, amɛsusu amɛseshibii ni baaba yɛ wɔsɛɛ be mli lɛ ni ekolɛ aaafo amɛ kɛaajɛ Yehowa sɔɔmɔ he ashɛ afɔ Iɛ ahe. Afɔleshaalatɛ lɛ baakai amɛ daa ákɛ “odaseyeli nɔ̃” ni tsɔɔ akɛ amɛ hu amɛji Nyɔŋmɔ webii. Kwɛ bɔ ni nɛkɛ sanemlitsɔɔmɔ nɛɛ tsake nibii kwraa ha! Anu sane lɛ shishi agbɛnɛ yɛ nɔ ni kulɛ amɛsusu akɛ eji efɔŋfeemɔ kwraa lɛ he. Akɛni ‘amɛmli fuuu mra’ hewɔ lɛ, enɛ ye ebua nakai akutsei lɛ ni amɛkɔ bɔ ni shihilɛ lɛ yɔɔ diɛŋtsɛ lɛ sɛɛ, ni enɛ kɛ shishinumɔ ba.—Abɛi 14:29.
11. Fɔlɔ ko jie sanesɛɛkɔmɔ kpo yɛ mɛɛ gbɛ nɔ?
11 Kɛ naagba ko te shi yɛ obi ko he lɛ, ani obɔɔ mɔdɛŋ ni okɛ sanesɛɛkɔmɔ atsu nii? Akɛ nɔkwɛmɔ nɔ lɛ, Kristofoi gbalashihilɛ mli hefatalɔi ko abihii lɛ ateŋ mɔ ko jɛɔ skul ebaa shia ‘ni emli efu je lɛ.’ Tsɛ lɛ tsɔɔ mli akɛ, “esumɔɔɔ ni etsɔɔ nɔ hewɔ ni emli efu nakai lɛ. Klɛŋklɛŋ lɛ miisusu akɛ eetse atua kɛkɛ, shi miyoo akɛ beni mibi lɛ skul lɛ mli saji lɛ efee dioo. No sɛɛ lɛ, wɔgba sane kakadaŋŋ, ni miyoo akɛ akɛni eji gbɔmɔ bibioo aloo egbɔmɔtso edaaa hewɔ lɛ, skul gbekɛbii lɛ miiye ehe fɛo. Yɛ be mli ni miha ena nɔmimaa akɛ minuɔ bɔ ni nɔ ni afeɔ lɛ lɛ mli wa ha lɛ he lɛ, miwo lɛ ŋaai komɛi ni baaye abua lɛ ni enyɛ etsu enɛ he nii.” Gbekɛnuu lɛ su kɛ baŋ tsake kɛha ekpakpa agbɛnɛ.
12. Mɛni hewɔ obalaŋtaiaŋ afii lɛ ji be ni mli wa fe fɛɛ lɛ, ni mɛni he hiaa yɛ fɔlɔi agbɛfaŋ?
12 Kulɛ ani obaanyɛ ojie nakai tsuishitoo lɛ nɔŋŋ kpo yɛ obi he? Nibii ni tamɔ nɛkɛ ni yaa nɔ yɛ skul tamɔ bɔ ni mɔ ko gbɔmɔtso yɔɔ, bɔlɛnamɔ he akɔnɔi kɛ gbeyeishemɔ baanyɛ aná obalaŋtai, titri gbekɛbii anɔ hewalɛ waa. Wolo Adolescence lɛ tsɔɔ mli akɛ: “Yɛ gbɔmɔ dalɛ ni tamɔ atrakwei lɛ fɛɛ mli lɛ, obalaŋtaiaŋ ji be ni mli wa fe fɛɛ. Akɛni obalaŋtai lɛ wieɔ shiɔ amɛhe ni amɛbɛ niiashikpamɔ hewɔ lɛ, amɛnuɔ he akɛ amɛshɛɛɛ yɛ jeŋ ni akaŋshii kɛ nu ni anuuu nii ahe ahaaa mɔ eyi mli obɔ tɔ nɛɛ mli. Ni amɛaakpɛlɛ bɔ ni abaa mɔ shi ahaa kɛ hiɛnɔkamɔ ni feɔ yaka nɔ moŋ lɛ, amɛkɛ mlifu kɛ yeyeeyefeemɔ jieɔ amɛhenumɔi akpo babaoo.” Nɛkɛ henumɔi ni naagba yɔɔ mli nɛɛ baanyɛ asa gbekɛ ko subaŋ he. (Okɛto Jajelɔ 7:7a he.) Sanegbaa kpakpa ni aaaka bo kɛ obi lɛ teŋ pɛ ji nɔ ni baaha onu naagba Iɛ diɛŋtsɛ shishi ni oyoo gbɛ ni hi fe fɛɛ ni oootsɔ nɔ oye obua.
13. (a) Mɛni ji nibii ni tsiɔ sanegbaa gbɛ lɛ ekomɛi? (b) Mɛni hewɔ esa akɛ fɔlɔi kɛ Abɛi 20:5 atsu nii yɛ be fɛɛ mli lɛ? Feemɔ enɛ he nɔkwɛmɔ nɔ.
13 Nibii ahe miishɛɛ ni amɛbɛ ni amɛaatsɔɔ mli yɛ wiemɔi amli lɛ wa kɛha obalaŋtai babaoo. No hewɔ lɛ yɛ be mli ni obi lɛ jeɔ shishi egbaa sane fiofio lɛ, tsi ohe kɛjɛ wiemɔi ni jwɛŋmɔ bɛ mli ni tsurɔɔ mɔ lɛ he, tamɔ: ‘No nɔŋŋ nɛ?’ ‘Misusu akɛ eji sane ko ni he hiaa.’ ‘Nɔ ni ehiii yɛ ohe ji akɛ . . . ’ ‘Mɛni hewɔ ofee mi nakai? ‘Ojogbaŋŋ, mɛni otaoɔ ni mafee? Kaimɔ akɛ gbekɛ jio.’ (Abɛi 12:18) Esheɔ be ni ehe hiaa ni apɛi obalaŋtai asaji amli, titri lɛ kɛ́ eyɛ naagba ko ni henumɔ yɔɔ mli waa. “Gbɔmɔ ni kɔɔ sane sɛɛ” lɛ baaya nɔ abɔ mɔdɛŋ ‘agbala’ nɛkɛ henumɔi nɛɛ kɛje kpo. (Abɛi 20:5) Wu kɛ ŋa Kristofoi komɛi yoo be ko akɛ amɛbiyoo lɛ miigbala ehe shi kɛmiijɛ weku lɛ mli nitsumɔi ahe. Fɔlɔi lɛ tao nibii amli shi amɛyeee omanye. Amɛtee nɔ. Nyɛ lɛ bɔ amaniɛ akɛ: “Yɛ naagbee lɛ, gbi ko lɛ mikɛ lɛ ta saatso lɛ nɔ, mikɛ minine fɔ ekuɛ, ni mibi lɛ ekoŋŋ akɛ mɛni gbaa onaa. Ekɛ yaafo kɛɛ mi akɛ enuɔ he akɛ wɔ kɛ mɛi krokomɛi lɛ sumɔɔɔ ni wɔkɛ lɛ bɔɔ naanyo. No hewɔ lɛ etsiɔ ehe kɛyaa sɛɛ bɔ ni eeenyɛ. Klɛŋklɛŋ wiemɔ ni ba midaaŋ ni esa akɛ mawie ji akɛ, ‘Enɛ bɛ mli kwraa,’ shi mifee diŋŋ ni mibo lɛ toi, yɛ be mli ni efɔseɔ nɔ ni yɔɔ etsui mli lɛ eshwieɔ shi lɛ.” Fɔlɔi lɛ ha enu shishi akɛ amɛsusuɔ ehe waa ni kɛjɛ no sɛɛ lɛ, amɛkwɛ’ jogbaŋŋ koni amɛha enu he akɛ efata weku kɔkrɔɔ lɛ he. Eye naagba lɛ nɔ kunim, ni amrɔ nɛɛ eesɔmɔ akɛ be fɛɛ sanekpakpa shiɛlɔ ni yɔɔ miishɛɛ.
14. Mɛni hewɔ weku ni efee ekome yɛ henumɔŋ pɛ lɛ faaa lɛ?
14 Weku ni efee ekome ni aaatswa ama shi lɛ he miihia, ni je lɛŋ wekui komɛi po enyɛ amɛfee nakai. Shi eji sane kroko hu akɛ aaatswa weku ni jwɛŋmɔ yɔɔ mumɔŋ nibii anɔ ni kɛ ehe kpɛtɛɔ Yehowa he kpaakpa ni efee ekome kɛbɔle e-Wiemɔ lɛ he ama shi. Bɔni afee ni anyɛ afee enɛ lɛ babaoo yɛ ni he hiaa fe ni ooobɛŋkɛ obii lɛ yɛ henumɔŋ pɛ kɛkɛ.
Ŋaalee Ni Aaaha Afa
15. Mɛɛ nilee loo ŋaalee nɛkɛ he hiaa lɛ, ni mɛni hewɔ?
15 “Nilee akɛhaa piaiaŋ yimɔɔ kɛ nii ni jara wa ni yɔɔ fɛo fɛɛ.” (Abɛi 24:4) Nɛkɛ nii ni jara wa nɛɛ ji heloonaa jwetrii, shi nɔ ni fata he ji shweshweeshwe shihilɛ yɛ mumɔŋ, suɔmɔ ni haa akɛ he shaa afɔle, Nyɔŋmɔ gbeyeishemɔ kɛ hemɔkɛyeli ni damɔ Nyɔŋmɔ nilee nɔ. Enɛɛmɛi haa weku shihilɛ feɔ nɔ ni hi. (Abɛi 2:5; 15:16, 17; 1Petro 1:7) Nɛkɛ ŋaalee nɛɛ baaha gbekɛbii ana mligbɛ hewalɛ ni baaha amɛnyɛ amɛte shi amɛwo Satan ŋaatsɔɔi lɛ fɛɛ, nɔ ni yɔɔ nigii lɛ po, ejaakɛ Abɛi 24:5 jajeɔ akɛ: “Nilelɔ lɛ, hewalɔ ni, ni gbɔmɔ ni le ŋaa lɛ ehewalɛ fa.” Shi esa akɛ otɛo nɛkɛ nilee loo ŋaalee nɛɛ owo amɛtsuii amli.—5 Mose 6:6, 7; 1 Yohane 2:14.
16. (a) Mɛni he hiaa bɔni afee ni aha Nyɔŋmɔ he nilee abote gbekɛ lɛ tsui mli? (b) Bɔni afee ni ehe aba sɛɛnamɔ diɛŋtsɛ aha gbekɛbii lɛ, mɛni he hiaa?
16 Yelikɛbuamɔ nii ni hi fe fɛɛ ni obaanyɛ otsɔ nɔ otɛo Nyɔŋmɔ Wiemɔ lɛ yɛ obii amli ji daa weku nikasemɔ ni wɔɔ amɛ hewalɛ koni amɛha anɔkwale lɛ afee amɛ diɛŋtsɛ amɛnɔ̃. Fɔlɔ ko ni hiɛ bii ejwɛ ni eye omanye yɛ enɛ mli lɛ jaje akɛ: “Weku nikasemɔ lɛ kɛ jwɛŋmɔ ni ja lɛ baa, ni enɛ jajeɔ obi lɛ jwɛŋmɔ kɛhaa tsɔsemɔ toiboo.” Ni ekɛfata he akɛ: “Kɛ oje shishi akɛ ooojaje gbekɛbii lɛ pɛ lɛ, amrɔ nɔŋŋ lɛ ‘amɛteɔ shi amɛwoɔ.’ Shi kɛji akɛ obaanyɛ ni okɛ amɛ asusu sane ko he yɛ be mli ni mlifu loo shitee kɛ woo ko bɛ lɛ, tamɔ eko lɛ yɛ weku nikasemɔ mli lɛ, hegbɛ baa yɛ biɛ akɛ saji otii ni otaoɔ ni amɛle lɛ baabote amɛmli.” Shi bɔni afee ni gbekɛbii lɛ ana he sɛɛ diɛŋtsɛ lɛ, ehe mihiɛ ni okase bɔfo Paulo, ni ŋma akɛ: “Miishwe akɛ mana nyɛ koni mikɛ mumɔŋ duromɔ keenii lɛ eko aha nyɛ, bɔni afee ni aŋɔwaje nyɛ.” (Romabii 1:11) Hiɛ sɔɔ keenii, titri lɛ, kɛji akɛ eji nɔ ko ni mɔ ni nine shɛɔ nɔ lɛ baanyɛ ekɛtsu nii ni he yɔɔ sɛɛnamɔ diɛŋtsɛ kɛha lɛ lɛ. No hewɔ lɛ gbalamɔ nɔ ko ni saa gbekɛ lɛ shihilɛ he kɛjɛ nikasemɔ lɛ mli.
17. (a) Mɛni baanyɛ aye ebua ni weku nikasemɔ lɛ afee nɔ ni ŋɔɔ ni sɛɛnamɔ yɔɔ he? (b) Ani oyɛ ŋaawooi krokomɛi kɛfata he?
17 Esa akɛ fɔlɔi akwɛ koni weku lɛ mlibii fɛɛ ale nikasemɔ be lɛ, kɛ agbɛnɛ nɔ ni abaakase lɛ hu. Mɛi komɛi kɛ nibii ni anaa tamɔ shikpɔŋ he mfoniri kɛ taoi tsuɔ nii koni akɛlɛɛ nɔ ni akaseɔ lɛ he shishinumɔ lɛ mli. Fɔlɔi komɛi hu kɛ daaŋjiemɔ nibii baa dani ajeɔ nikasemɔ lɛ shishi aloo yɛ no sɛɛ. Yɛ nikasemɔ lɛ sɛɛ lɛ amɛbaanyɛ amɛsusu gbi loo otsi lɛ mli naagbai lɛ ahe. (Kwɛmɔ akrabatsa fioo ni afo lɛ kɛha ŋaawoi krokomɛi ni fata he.) Yɛ fɛɛ sɛɛ lɛ, feemɔ nɛkɛ Biblia mli nikasemɔ nɛɛ daa! Fɔlɔi bɔɔ mɔdɛŋ diɛŋtsɛ dani amɛna niyenii kɛ wɔɔhe amɛha amɛbii; shi ehe miihia titri moŋ akɛ aaana “wiemɔ lɛ mli fufɔ krɔŋŋ lɛ . . . koni [obii] ada yɛ mli kɛna yiwalaheremɔ.”—1 Petro 2:2; Yohane 17:3.
18. Mɛni baaye abua ni ‘otswa’ oshia Iɛ ‘oma shi’?
18 Weku ni he wa yɛ mumɔŋ ni aaatswa ama shi lɛ biɔ hesaa kɛ be. Tswaa ofai shi akɛ Obaana sanegbaa mli hesaai ni he hiaa lɛ bɔni afee ni onyɛ Obɛŋkɛ obii lɛ ahe kpaakpa yɛ henumɔŋ Kaaha nɔ ko miitsio gbɛ yɛ be ni he hiaa ni oootao ni okɛwaje oweku lɛ kɛtsɔ nilee, sanesɛɛkɔmɔ kɛ ŋaalee mli lɛ nɔ. Sɔlemɔ oha obii lɛ, okɛ amɛ asɔle akɛni ole akɛ Yehowa pɛ baanyɛ aha ‘otsutswaai’ ahe mɔdɛŋbɔɔ lɛ aye omanye hewɔ.—Lala 127:1.b
[Shishigbɛ niŋmai]
a Ajie kɛjɛ November 1, 1986 Watchtower lɛ mli.
b Taakɛ The Hebrew and English Lexicon ni John Parkhurst ŋma lɛ tsɔɔ lɛ, wiemɔ kɛha “kamɔ” le jɛ feemɔ wiemɔ ni eshishi ji ‘atsɔɔ faŋŋ, akɛ anɔkwalei atsɔɔ nɔ ko, afee nɔ ko he nɔkwɛmɔ nɔ, akɛ odaseyelii ni tsɔɔ mɔ yiŋ loo yiŋtoi loo naataomɔi aha’ mli. Old Testament Word Study ni William Wilson ŋma lɛ hu wieɔ nɛkɛ feemɔ wiemɔ nɛɛ nɔŋŋ he akɛ: “atsɔɔ bɔ ni nɔ ko ji anɔkwale ha.”
Ani Okaiɔ?
◻ Nilee wajeɔ shia yɛ mɛɛ gbɛ nɔ, ni mɛni baanyɛ ayɛ abua gbekɛbii m amɛna enɛ?
◻ Mɛni hewɔ sanesɛɛkɔmɔ yeɔ buaa ni sanegbaa kpakpa hiɔ weku mli lɛ?
◻ Mɛni hewɔ Nyɔŋmɔ he nilee he hiaa lɛ?
◻ Te aaafee tɛŋŋ ni weku nikasemɔ afee nɔ ni miishɛɛ yɔɔ mli ni akaseɔ nii kɛjɛɔ mli hu?
[Wiemɔ ni akɔ ni akɛmiitsu nii]
“Okɛ Ohiɛ afɔ Yehowa nɔ kɛ otsui fɛɛ, ni okɛ ohe akakpasa bo diɛŋtsɛ ojwɛŋmɔ;kaimɔ lɛ yɛ ogbɛi fɛɛ mli, ni lɛ eeejaje otempɔŋi lɛ. Kaabu ohe nilelɔ, she Yehowa gbeyei ni oje efɔŋ he”—Abɛi 3:5-7.
[Akrabatsa ni yɔɔ baafa 24]
WEKU NIKASEMƆ NI MƆƆ SHI
Te esa akɛ afee nikasemɔ lɛ aha tɛŋŋ?
Kaaha eefee keketee, ni kɛlɛ bule aba mii. Kaawo he mlai keketee. Okɛ sanebimɔi krokomɛi afata he ni okɛ nɔkwɛmɔ nii atsu nii ni okɛkanya jwɛŋmɔ ni mɔ fɛɛ mɔ kɛ ehe awo mli. Gbãlamɔ sanebimɔ lɛ mli kɛ ehe miihia. Kaatsɔ nikasemɔ be nɔ okɛkã gbekɛbii ahiɛ. Ekolɛ obaanyɛ ni okɛ kamɔ lɛ aha yɛ teemɔŋ.
Mɛni sa akɛ akase?
Halamɔ nɔ ni he baahia weku lɛ. Feemɔ tswaa. Ekolɛ daa otsi Buu-Mɔɔ nikasemɔ Iɛ ni atsɔɔ hiɛ akaseɔ. Ehe bahia ni asusu saji otii lɛ ahe, tamɔ naagbai ni obalaŋtai kɛkpeɔ yɛ skul, kpojee loo nyiɛmɔ ni tsoɔ gbalashihilɛ hiɛ, skul sɛɛ nitsumɔi tamɔ akaŋshii kɛ jeŋba mli sui. Okɛ saji loo woji ni wieɔ enɛ he lɛ atsu nii. Abaanya aja nikasemɔ be lɛ mii ni ekɔ saji sɔrɔtoi ahe.
Mɛɛ be esa akɛ afee, ni esɛɛjɛkɛmɔ hu?
Weku yitso lɛ baatsɔɔ yɛ be mli ni ekɛ weku lɛ mlibii fɛɛ esusu saji ahe. Esa akɛ asusu afii ni gbekɛbii lɛ eye kɛ bɔ ni amɛnuɔ nikasemɔ lɛ shishi amɛhaa lɛ he. Ekolɛ abaanyɛ afolɔ nikasemɔ lɛ mli afee Iɛ kukuji shii abɔ yɛ otsi lɛ mli kɛ́ gbekɛbii lɛ darako tsɔ. Mɛi komɛi feɔ nakai yɛ niyeli be yɛ niyenii lɛ sɛɛ nɔŋŋ. Jeee nɔ ni he hiaa lɛ ji be sɛɛkɛlɛ shi moŋ be ni ayeɔ kutuu lɛ hilɛ kɛ sɛɛnamɔ.
Te ooofee tamɔ ole akɛ onine miishe gbekɛ lɛ tsui nɔ?
Wo hewalɛ ni gbekɛ lɛ aha hetoo yɛ lɛ diɛŋtsɛ ewiemɔ mli. Tsɔ ŋaa gbɛ nɔ obi saji ni aaha gbekɛ lɛ atsɔɔ ejwɛŋmɔ kɛ bɔ ni enuɔ sane Iɛ he ehaa. Obaanyɛ obi akɛ: “Te gbekɛbii ni yɔɔ skul lɛ nuɔ sane nɛɛ he amɛhaa tɛŋŋ? Ani osusuɔ akɛ amɛsane lɛ ja?” Aloo, “Mɛɛ gbɛ no obaatsɔ atsɔɔ no hewɔ ni obɔɔɔ ajwamaŋ lɛ mli otsɔɔ oklasbii? Ani osusuɔ akɛ enɛ hi diɛŋtsɛ kɛha bo? Mɛni hewɔ?” Kwɛmɔ jogbaŋŋ koni okafee nii kɛmiiteke nɔ yɛ hetoo ni akɛhaa beni mɔ ko tsoɔ ejwɛŋmɔ nɛɛ he, bɔni afee ni gbekɛ lɛ anyɛ atsɔɔ ejwɛŋmɔ yɛ anɔkwale mli. Ha mɔ fɛɛ mɔ ana be ni ekɛwie, koni ona ole akɛ mɔ lɛ nuɔ saji otii ni he hiaa lɛ ashishi jogbaŋŋ lo.