1 Kronika
27 Kui ni jɛ Israelbii lɛ ateŋ kɛ emli tsɛmɛi ashĩai onukpai, kɛ asraafoi akpei anɔkwɛlɔi kɛ asraafoi ohai anɔkwɛlɔi,+ kɛ nɔkwɛlɔi ni kwɛ kui lɛ anɔ amɛhã maŋtsɛ lɛ,+ ni basɔmɔɔ daa nyɔɔŋ nɔ lɛ ayibɔ nɛ. Daa nyɔɔŋ nɔ yɛ afi lɛ mli lɛ, kui lɛ ateŋ ekome basɔmɔɔ; mɛi 24,000 yɔɔ kui lɛ eko fɛɛ eko mli.
2 Mɔ ni kwɛɔ klɛŋklɛŋ kuu ni basɔmɔɔ yɛ klɛŋklɛŋ nyɔɔŋ lɛ nɔ ji Yashobeam,+ Zabdiel binuu lɛ, ni mɛi 24,000 yɛ ekuu lɛ mli. 3 Ejɛ Perez bihii+ lɛ ateŋ, ni lɛ ji kui fɛɛ ni basɔmɔɔ yɛ klɛŋklɛŋ nyɔɔŋ lɛ nɔ lɛ anɔ onukpai lɛ anɔkwɛlɔ. 4 Mɔ ni kwɛɔ kuu ni basɔmɔɔ yɛ nyɔɔŋ ni ji enyɔ lɛ nɔ ji Dodai,+ Ahohinyo+ lɛ kɛ ekuu lɛ, ni Miklot ji amɛhiɛnyiɛlɔ, ni mɛi 24,000 yɛ ekuu lɛ mli. 5 Benaia,+ osɔfonukpa Yehoiada+ binuu lɛ ji onukpa yɛ kuu ni ji etɛ ni basɔmɔɔ yɛ nyɔɔŋ ni ji etɛ lɛ nɔ lɛ nɔ, ni mɛi 24,000 yɛ ekuu lɛ mli. 6 Benaia nɛɛ ji tawulɔ kãkãlɔ yɛ mɛi nyɔŋmai etɛ lɛ ateŋ, ni lɛ ji mɛi nyɔŋmai etɛ lɛ anɔ onukpa, ni ebinuu Amizabad ji mɔ ni kwɛɔ ekuu lɛ nɔ. 7 Nɔkwɛlɔ ni ji ejwɛ ni kwɛɔ kuu ni basɔmɔɔ yɛ nyɔɔŋ ni ji ejwɛ lɛ nɔ ji Asahel,+ Yoab nyɛmi nuu+ lɛ, ni mɔ ni ye esɛɛ ji ebinuu Zebadia, ni mɛi 24,000 yɛ ekuu lɛ mli. 8 Nɔkwɛlɔ ni ji enumɔ ni kwɛɔ kuu ni basɔmɔɔ yɛ nyɔɔŋ ni ji enumɔ lɛ nɔ ji Shamhut, Izrahinyo lɛ, ni mɛi 24,000 yɛ ekuu lɛ mli. 9 Nɔkwɛlɔ ni ji ekpaa ni kwɛɔ kuu ni basɔmɔɔ yɛ nyɔɔŋ ni ji ekpaa lɛ nɔ ji Ira,+ ni ji Ikesh, Tekonyo+ lɛ binuu lɛ, ni mɛi 24,000 yɛ ekuu lɛ mli. 10 Nɔkwɛlɔ ni ji kpawo ni kwɛɔ kuu ni basɔmɔɔ yɛ nyɔɔŋ ni ji kpawo lɛ nɔ ji Helez,+ Pelonnyo ni jɛ Efraimbii lɛ ateŋ lɛ, ni mɛi 24,000 yɛ ekuu lɛ mli. 11 Nɔkwɛlɔ ni ji kpaanyɔ ni kwɛɔ kuu ni basɔmɔɔ yɛ nyɔɔŋ ni ji kpaanyɔ lɛ nɔ ji Sibekai,+ Hushanyo ni jɛ Zerabii+ lɛ ateŋ lɛ, ni mɛi 24,000 yɛ ekuu lɛ mli. 12 Nɔkwɛlɔ ni ji nɛɛhu ni kwɛɔ kuu ni basɔmɔɔ yɛ nyɔɔŋ ni ji nɛɛhu lɛ nɔ ji Abiezer,+ Anatotnyo+ ni jɛ Benyaminbii lɛ ateŋ lɛ, ni mɛi 24,000 yɛ ekuu lɛ mli. 13 Nɔkwɛlɔ ni ji nyɔŋma ni kwɛɔ kuu ni basɔmɔɔ yɛ nyɔɔŋ ni ji nyɔŋma lɛ nɔ ji Maharai,+ Netofatnyo ni jɛ Zerabii+ lɛ ateŋ lɛ, ni mɛi 24,000 yɛ ekuu lɛ mli. 14 Nɔkwɛlɔ ni ji 11 ni kwɛɔ kuu ni basɔmɔɔ yɛ nyɔɔŋ ni ji 11 lɛ nɔ ji Benaia,+ Piratonnyo ni jɛ Efraimbii lɛ ateŋ lɛ, ni mɛi 24,000 yɛ ekuu lɛ mli. 15 Nɔkwɛlɔ ni ji 12 ni kwɛɔ kuu ni basɔmɔɔ yɛ nyɔɔŋ ni ji 12 lɛ nɔ ji Heldai, Netofatnyo ni jɛ Otniel seshibii lɛ ateŋ lɛ, ni mɛi 24,000 yɛ ekuu lɛ mli.
16 Israel wekui lɛ ahiɛnyiɛlɔi lɛ nɛ: Yɛ Rubenbii lɛ ateŋ lɛ, Eliezer, Zikri binuu lɛ ji hiɛnyiɛlɔ; yɛ Simeonbii lɛ ateŋ lɛ, Shefatia, Maaka binuu lɛ ji hiɛnyiɛlɔ; 17 yɛ Levibii lɛ ateŋ lɛ, Hashabia, Kemuel binuu lɛ ji hiɛnyiɛlɔ; ni yɛ Aaron seshibii lɛ ateŋ lɛ, Zadok ji hiɛnyiɛlɔ; 18 yɛ Yudabii lɛ ateŋ lɛ, Elihu,+ David nyɛmimɛi hii lɛ ateŋ mɔ kome ji hiɛnyiɛlɔ; ni yɛ Isakarbii lɛ ateŋ lɛ, Omri, Mikael binuu lɛ ji hiɛnyiɛlɔ; 19 yɛ Zebulonbii lɛ ateŋ lɛ, Ishmaia, Obadia binuu lɛ ji hiɛnyiɛlɔ; yɛ Naftalibii lɛ ateŋ lɛ, Yerimot, Azriel binuu lɛ ji hiɛnyiɛlɔ; 20 yɛ Efraimbii lɛ ateŋ lɛ, Hoshea, Azazia binuu lɛ ji hiɛnyiɛlɔ; ni yɛ Manase weku lɛ fã kroko lɛ mli bii lɛ ateŋ lɛ, Yoel, Pedaia binuu lɛ ji hiɛnyiɛlɔ; 21 ni yɛ Manase weku lɛ fã kroko ni yɔɔ Gilead lɛ mli bii lɛ ateŋ lɛ, Ido, Zakaria binuu lɛ ji hiɛnyiɛlɔ; ni yɛ Benyaminbii lɛ ateŋ lɛ, Yaasiel, Abner+ binuu lɛ ji hiɛnyiɛlɔ; 22 yɛ Danbii lɛ ateŋ lɛ, Azarel, Yeroham binuu lɛ ji hiɛnyiɛlɔ. Mɛnɛɛmɛi ji Israel wekui lɛ anɔ lumɛi lɛ.
23 David kaneee mɛi ni eye afii 20 kɛ mɛi ni shɛko nakai lɛ, ejaakɛ Yehowa ewo shi akɛ ebaahã Israel yi afa tamɔ ŋwɛi ŋulamii lɛ.+ 24 Yoab, Zeruia binuu lɛ bɔi mɛi lɛ kanemɔ, shi egbeee naa; ni Nyɔŋmɔ mli fu Israel* yɛ enɛ hewɔ,+ ni no hewɔ lɛ, aŋmaaa yibɔ lɛ yɛ Maŋtsɛ David yinɔsaji awolo lɛ mli.
25 Mɔ ni kwɛɔ maŋtsɛ lɛ jwetritoohei+ lɛ anɔ ji Azmawet, Adiel binuu lɛ. Yonatan, Uzia binuu lɛ ji mɔ ni kwɛɔ nitoohei* ni yɔɔ ŋa lɛ nɔ lɛ, kɛ nɔ ni yɔɔ maji lɛ amli lɛ, kɛ akrowai lɛ amli lɛ, kɛ mɔji lɛ amli lɛ anɔ. 26 Mɔ ni kwɛɔ mɛi ni tsuɔ nii yɛ ŋmɔji lɛ amli lɛ anɔ ji Ezri, Kelub binuu lɛ. 27 Shimei, Ramanyo lɛ ji mɔ ni kwɛɔ wain ŋmɔji lɛ anɔ; ni mɔ ni kwɛɔ wain ni akɛ wain yibii lɛ fee lɛ atoohei lɛ anɔ ji Zabdi, Shifimnyo lɛ. 28 Mɔ ni kwɛɔ oliv ŋmɔji lɛ kɛ sikamore tsei+ lɛ anɔ yɛ Shefela+ lɛ ji Baal-hanan, Gedernyo lɛ; ni mɔ ni kwɛɔ mu nitoohei lɛ anɔ ji Yoash. 29 Mɔ ni kwɛɔ tsinai ni yeɔ nii yɛ Sharon+ lɛ anɔ ji Shitrai, Sharonnyo lɛ, ni Shafat, Adlai binuu lɛ ji mɔ ni kwɛɔ tsinai ni yɔɔ jɔi lɛ amli lɛ anɔ. 30 Mɔ ni kwɛɔ afukpɔŋɔi lɛ anɔ ji Obil, Ishmaelnyo lɛ; ni mɔ ni kwɛɔ tejii* lɛ anɔ ji Yedeia, Meronotnyo lɛ. 31 Mɔ ni kwɛɔ tookui lɛ anɔ ji Yaziz, Hagrinyo lɛ. Mɛnɛɛmɛi fɛɛ ji onukpai ni kwɛɔ Maŋtsɛ David nibii lɛ anɔ.
32 Yonatan,+ David nyɛmi binuu lɛ ji ŋaawolɔ, eji nuu ni nuɔ nii ashishi jogbaŋŋ ni eji woloŋmalɔ hu, ni Yehiel, Hakemoni binuu lɛ ji mɔ ni kwɛɔ maŋtsɛ lɛ bihii+ lɛ anɔ. 33 Ahitofel+ ji maŋtsɛ lɛ ŋaawolɔ, ni Hushai,+ Arkinyo lɛ ji maŋtsɛ lɛ naanyo.* 34 Yɛ Ahitofel sɛɛ lɛ, Yehoiada, Benaia binuu+ lɛ kɛ Abiatar;+ ni Yoab+ ji maŋtsɛ lɛ tatsɛ.