1 Kronika

28 Kɛkɛ ni David bua Israel lumɛi lɛ fɛɛ anaa kɛtee Yerusalem: Israel wekui lɛ anɔ lumɛi lɛ, kɛ kui ni sɔmɔɔ maŋtsɛ lɛ anɔ onukpai lɛ,+ kɛ asraafoi akpei anɔkwɛlɔi lɛ kɛ asraafoi ohai anɔkwɛlɔi lɛ,+ kɛ onukpai ni kwɛɔ maŋtsɛ lɛ nibii kɛ ekooloi+ kɛ ebii+ lɛ hu anibii kɛ amɛkooloi fɛɛ anɔ lɛ, kɛ agbɛnɛ hu maŋtsɛ shĩa onukpai lɛ kɛ nuu kãkãlɔ fɛɛ nuu kãkãlɔ.+ 2 Kɛkɛ ni Maŋtsɛ David te shi edamɔ shi ni ekɛɛ:

“Minyɛmimɛi hii kɛ mimaŋbii, nyɛboa mi toi. Kulɛ, ekã mitsui nɔ akɛ mama shĩa akɛ hejɔɔmɔhe mahã Yehowa kpaŋmɔ adeka lɛ, kɛ agbɛnɛ hu, akɛ wɔ-Nyɔŋmɔ lɛ najiashi sɛi,+ ni misaa nibii mito koni mikɛma.+ 3 Shi anɔkwa Nyɔŋmɔ lɛ kɛɛ mi akɛ: ‘Jeee bo ji mɔ ni baama shĩa ohã migbɛ́i lɛ,+ ejaakɛ tawulɔ ji bo, ni oshwie lá shi.’+ 4 Shi Yehowa, Israel Nyɔŋmɔ lɛ, hala mi kɛjɛ mitsɛ shĩa lɛ akɛ maŋtsɛ koni miye Israel nɔ kɛya naanɔ,+ ejaakɛ ehala Yuda akɛ hiɛnyiɛlɔ,+ ni yɛ Yuda weku* lɛ mli lɛ ehala mitsɛ shĩa lɛ,+ ni yɛ mitsɛ bihii lɛ ateŋ lɛ, miji mɔ ni ená mihe miishɛɛ akɛ ewó mi maŋtsɛ yɛ Israel fɛɛ nɔ.+ 5 Agbɛnɛ hu, Yehowa edro mi bihii babaoo,+ ni yɛ mibihii lɛ fɛɛ ateŋ lɛ, ehala mibinuu Solomon+ koni eta Yehowa maŋtsɛyeli lɛ maŋtsɛ sɛi lɛ nɔ, ni eye Israel nɔ.+

6 “Ekɛɛ mi akɛ, ‘Obinuu Solomon ji mɔ ni baama mishĩa lɛ kɛ mikpoi lɛ, ejaakɛ mihala lɛ mifee mibinuu, ni matsɔ etsɛ.+ 7 Kɛ́ ekɛ etsui fɛɛ ye mikitãi lɛ kɛ mimlai* lɛ anɔ+ tamɔ bɔ ni efeɔ amrɔ nɛɛ, mahã emaŋtsɛyeli lɛ adamɔ shi shiŋŋ kɛya naanɔ.’+ 8 No hewɔ lɛ, miiwie yɛ Israel fɛɛ, ni ji Yehowa asafo lɛ hiɛ, kɛ wɔ-Nyɔŋmɔ lɛ toiiaŋ akɛ: Nyɛbɔa mɔdɛŋ ni nyɛkasea Yehowa, nyɛ-Nyɔŋmɔ lɛ, kitãi lɛ jogbaŋŋ ni nyɛyea nɔ, koni nyɛya nɔ nyɛhi shi yɛ shikpɔŋ kpakpa lɛ nɔ,+ ni nyɛshi nyɛhã nyɛbihii ni baaba yɛ nyɛsɛɛ lɛ akɛ gboshinii kɛya naanɔ.

9 “Ni bo, mibinuu Solomon, bɔɔ mɔdɛŋ ni ole otsɛ Nyɔŋmɔ lɛ ni okɛ otsui muu fɛɛ asɔmɔ* lɛ,+ ni ojɛ osuɔmɔ mli hu osɔmɔ lɛ,* ejaakɛ Yehowa taoɔ tsuii fɛɛ amli,+ ni eyɔseɔ nɔ ni mɔ fɛɛ mɔ shweɔ kɛ nɔ ni esusuɔ yɛ etsui mli.+ Kɛ́ otao esɛɛ gbɛ lɛ, ebaahã ona lɛ,+ shi kɛ́ oshi lɛ lɛ, lɛ hu ebaakpoo bo kɛya naanɔ.+ 10 Naa, ohiɛ ahi ohe nɔ, ejaakɛ Yehowa ehala bo koni oma shĩa ohã lɛ akɛ jamɔhe. Feemɔ ekãa, ni oje nitsumɔ lɛ shishi.”

11 Kɛkɛ ni David kɛ wolo ni etɛŋ+ ablanaa+ lɛ, kɛ ehe tsũi lɛ, kɛ ehe nitoohei lɛ, kɛ ehe ŋwɛi asai lɛ, kɛ ehe sɛɛtsui lɛ, kɛ kpatamɔnɔ* lɛ tsũ+ lɛ fɛɛ yɛ nɔ lɛ hã ebinuu Solomon. 12 Ekɛ nibii fɛɛ ni atsɔ mumɔ lɛ nɔ ajie atsɔɔ lɛ ni etɛŋ yɛ wolo nɔ lɛ hã Solomon; nibii lɛ ji, Yehowa shĩa lɛ kpoi+ lɛ, niyelihei fɛɛ ni bɔle he lɛ, anɔkwa Nyɔŋmɔ lɛ shĩa lɛ jwetritoohei lɛ, kɛ nibii ni afee amɛ krɔŋkrɔŋ* lɛ atoohei lɛ;+ 13 ni ekɛ osɔfoi lɛ kɛ Levibii lɛ ni aja amɛmli awo kuikui amli lɛ,+ kɛ nibii fɛɛ ni esa akɛ atsu yɛ Yehowa shĩa lɛ, kɛ nibii fɛɛ ni esa akɛ akɛsɔmɔ yɛ Yehowa shĩa lɛ he famɔi hu hã lɛ; 14 agbɛnɛ hu, etsɔɔ lɛ shika tsuru lɛ tsiimɔ, ni ji shika tsuru ni akɛbaafee nibii fɛɛ ni akɛbaatsu nitsumɔi srɔtoi lɛ, kɛ jwiɛtɛi nibii lɛ fɛɛ atsiimɔ, ni ji jwiɛtɛi ni akɛbaafee nibii fɛɛ ni akɛbaatsu nitsumɔi srɔtoi lɛ; 15 agbɛnɛ hu, etsɔɔ lɛ shika tsuru kanetsei+ lɛ kɛ amɛhe shika tsuru kanei lɛ atsiimɔ, ni ji shika tsuru ni akɛbaafee kanetsei lɛ kɛ amɛhe kanei lɛ, kɛ jwiɛtɛi kanetsei lɛ kɛ amɛhe jwiɛtɛi kanei lɛ atsiimɔ, ni ji jwiɛtɛi ni akɛbaafee kanetsei lɛ kɛ amɛhe kanei lɛ, yɛ nɔ ni akɛ eko fɛɛ eko baatsu lɛ naa; 16 agbɛnɛ hu, etsɔɔ lɛ shika tsuru ni akɛbaafee okpɔlɔi ni akɛ blodo ni eko kã eko nɔ*+ lɛ baashwie nɔ lɛ eko fɛɛ eko tsiimɔ, kɛ jwiɛtɛi ni akɛbaafee jwiɛtɛi okpɔlɔi lɛ atsiimɔ, 17 ni etsɔɔ lɛ fakai lɛ, kɛ tsɛnsii lɛ, kɛ kɔɔpoi wuji ni akɛ shika tsuru krɔŋŋ fee lɛ atsiimɔ, kɛ tsɛnsii bibii ni akɛ shika tsuru fee+ lɛ eko fɛɛ eko tsiimɔ, kɛ tsɛnsii bibii ni akɛ jwiɛtɛi fee lɛ eko fɛɛ eko tsiimɔ. 18 Agbɛnɛ hu, etsɔɔ lɛ shika tsuru ni atsuu he ni akɛbaafee tsofa-kɛ-ŋma afɔleshaa latɛ+ lɛ tsiimɔ kɛ shika tsuru ni akɛbaafee shwiili lɛ he okadi+ lɛ ni ji, kerubim+ ni amɛgbɛ amɛfiji amli yɛ Yehowa kpaŋmɔ adeka lɛ nɔ lɛ atsiimɔ. 19 David kɛɛ akɛ: “Yehowa ye ebua mi,* ni ehã mi sɛɛyoomɔ koni mitɛŋ tsũ lɛ he nibii lɛ fɛɛ fitsofitso+ yɛ wolo nɔ.”+

20 Kɛkɛ ni David kɛɛ ebinuu Solomon akɛ: “Feemɔ ekãa ni owaje ohe ni oje nitsumɔ lɛ shishi. Kaashe gbeyei, ni otsui akafã hu, ejaakɛ Yehowa Nyɔŋmɔ, ni ji mi-Nyɔŋmɔ lɛ, baaye abua bo.*+ Eshiŋ bo ni ekwaŋ bo hu,+ shi moŋ ebaaye ebua bo* kɛyashi abaagbe Yehowa shĩa lɛ he nitsumɔi lɛ fɛɛ anaa. 21 Ni naa osɔfoi kɛ Levibii+ ni aja amɛmli awo kuikui amli+ ni tsuɔ nitsumɔi fɛɛ ni atsuɔ yɛ anɔkwa Nyɔŋmɔ lɛ shĩa lɛ. Oyɛ mɛi ni le ŋaa nitsumɔi srɔtoi ni miisumɔ ni amɛtsu nii,+ kɛ agbɛnɛ hu lumɛi+ kɛ maŋbii lɛ fɛɛ ni baabo ofamɔi fɛɛ toi.”