Ester
5 Gbi ni ji etɛ+ lɛ nɔ lɛ, Ester wo emaŋnyɛ atadei lɛ ni eyadamɔ maŋtsɛ shĩa lɛ mligbɛ kpo lɛ ni yɔɔ maŋtsɛ shĩa lɛ hiɛ lɛ nɔ. No mli lɛ, maŋtsɛ lɛ ta emaŋtsɛ sɛi lɛ nɔ yɛ emaŋtsɛyeli shĩa ni hiɛ kwɛɔ shĩa lɛ naa gbɛ lɛ mli. 2 Be ni maŋtsɛ lɛ na Maŋnyɛ Ester damɔ kpo lɛ nɔ nɔŋŋ lɛ, Ester hiɛ ba nyam yɛ ehiɛ, ni maŋtsɛ lɛ kpã shika tsuru maŋtsɛtso+ ni ehiɛ lɛ mli etsɔɔ Ester. Kɛkɛ ni Ester tee eŋɔɔ ni ekɛ enine yasa maŋtsɛtso lɛ naa.
3 Maŋtsɛ lɛ bi lɛ akɛ: “Mɛni sane, Maŋnyɛ Ester? Mɛni otaoɔ ni afee ahã bo? Kɛ́* mimaŋtsɛyeli lɛ mlijaa fã po, akɛbaahã bo aahu!” 4 Ester kɛɛ akɛ: “Kɛ́ esa maŋtsɛ hiɛ lɛ, ŋmɛnɛ lɛ, maŋtsɛ kɛ Haman+ aba okpɔlɔ ni miŋmɛ mihã maŋtsɛ lɛ he.” 5 No hewɔ lɛ, maŋtsɛ lɛ kɛɛ ehii lɛ akɛ: “Nyɛyakɛa Haman ni eba amrɔ nɔŋŋ, tamɔ bɔ ni Ester ekɛɛ lɛ.” No hewɔ lɛ, maŋtsɛ lɛ kɛ Haman tee okpɔlɔ ni Ester eŋmɛ lɛ he.
6 Be ni ayɔɔ wain okpɔlɔŋmɛɛ lɛ shishi lɛ, maŋtsɛ lɛ bi Ester akɛ: “Mɛni otaoɔ ni obi? Akɛbaahã bo aahu! Ni mɛni otaoɔ ni afee ahã bo? Kɛ́* mimaŋtsɛyeli lɛ mlijaa fã po, abaafee ahã bo aahu!”+ 7 Ester kɛɛ maŋtsɛ lɛ akɛ: “Nɔ ni mitaoɔ mabi, kɛ nɔ ni mitaoɔ ni afee ahã mi ji, 8 kɛ́ mihiɛ eba nyam yɛ maŋtsɛ hiɛ, ni esa maŋtsɛ hiɛ akɛ ebaahã mi nɔ ni mabi, ni ebaafee nɔ ni mitaoɔ lɛ ehã mi lɛ, no lɛ, maŋtsɛ kɛ Haman aba okpɔlɔ ni maŋmɛ amɛ wɔ lɛ he; ni wɔ lɛ, mafee tamɔ bɔ ni maŋtsɛ ewie lɛ.”
9 Nakai gbi lɛ, Haman je kpo kɛtee kɛ miishɛɛ, ni etsui etɔ waa diɛŋtsɛ. Shi be ni Haman na Mordekai yɛ maŋtsɛ lɛ agbó lɛ mli, ni ena akɛ Mordekai eteee shi, ni ehe hu kpokpooo yɛ ehiɛ lɛ, Haman mli wo la ewo Mordekai waa.+ 10 Shi Haman ye ehe nɔ, ni etee shĩa. Kɛkɛ ni etsu ayatsɛ enanemɛi kɛ eŋa Zeresh+ kɛba. 11 Haman kɛ enii ni eyɔɔ ni no ehã ehiɛ eba nyam lɛ, kɛ ebihii babaoo,+ kɛ bɔ ni maŋtsɛ lɛ ehã lɛ hegbɛ wulu, ni ewó enɔ fe lumɛi lɛ kɛ maŋtsɛ lɛ tsuji lɛ shwã.+
12 Haman saa ekɛɛ akɛ: “Nɔ ni fe fɛɛ lɛ, Maŋnyɛ Ester efɔ̃ɔɔ mɔ ko mɔ ko nine ni efata maŋtsɛ lɛ he kɛba okpɔlɔ ni eŋmɛ lɛ he,+ ja mi pɛ. Ni wɔ hu lɛ, efɔ̃ mi nine ni mibafata lɛ kɛ maŋtsɛ lɛ he.+ 13 Enɛɛmɛi fɛɛ hãaa mitsui anyɔ mimli, gbii abɔ ni minaa nakai Yudanyo Mordekai lɛ ta maŋtsɛ lɛ agbó lɛ mli lɛ.” 14 No hewɔ lɛ, eŋa Zeresh kɛ lɛ Haman lɛ nanemɛi lɛ fɛɛ kɛɛ lɛ akɛ: “Hã akɛ tso ni kwɔlɛ ji ninetalɔi 50* ama shi. Ni leebi lɛ kɛɛmɔ maŋtsɛ lɛ ni ehã asɛŋ Mordekai yɛ nɔ.+ Koni no sɛɛ lɛ, okɛ maŋtsɛ lɛ aya koni oyaná ohewɔ miishɛɛ yɛ okpɔlɔŋmɛɛ lɛ shishi.” Ŋaawoo nɛɛ sa Haman hiɛ jogbaŋŋ, no hewɔ lɛ, ehã akɛ tso lɛ ma shi.