Yeremia

27 Yɛ Yehoiakim, Yosia binuu lɛ, ni ji Yuda maŋtsɛ lɛ nɔyeli lɛ shishijee mli lɛ wiemɔ nɛɛ jɛ Yehowa ŋɔɔ eba Yeremia ŋɔɔ akɛ: 2 “Nɔ ni Yehowa kɛɛ mi nɛ, ‘Feemɔ kpãi kɛ kɔɔŋtsei ni okɛshwie okuɛ nɔ. 3 Ni okɛtsu tsuji ni eba Yuda maŋtsɛ Zedekia ŋɔɔ yɛ Yerusalem lɛ koni amɛkɛyahã Edom+ maŋtsɛ lɛ, kɛ Moab+ maŋtsɛ lɛ, kɛ Amonbii+ lɛ amaŋtsɛ lɛ, kɛ Tiro+ maŋtsɛ lɛ, kɛ Sidon+ maŋtsɛ lɛ. 4 Ni ofã amɛ ni amɛyakɛɛ amɛnuŋtsɔmɛi lɛ akɛ:

“‘“Nɔ ni Yehowa, taiatsɛ lɛ, Israel Nyɔŋmɔ lɛ kɛɛ nɛ; nɔ ni nyɛyakɛa nyɛnuŋtsɔmɛi lɛ nɛ, 5 ‘Mi, mifee shikpɔŋ lɛ, kɛ gbɔmɛi, kɛ kooloi ni yɔɔ shikpɔŋ lɛ nɔ lɛ yɛ mihewalɛ kpele lɛ kɛ minine ni mikpã mli lɛ naa; ni mikɛhãa mɔ fɛɛ mɔ ni misumɔɔ.*+ 6 Ni agbɛnɛ, mikɛ shikpɔŋ lɛ fɛɛ ewo mitsulɔ Babilon maŋtsɛ Nebukadnezar+ dɛŋ; mikɛ ŋa mli kooloi lɛ po ehã lɛ ni amɛsɔmɔ lɛ. 7 Jeŋmaji lɛ fɛɛ baasɔmɔ lɛ kɛ ebinuu kɛ enabi nuu aahu kɛyashi lɛ diɛŋtsɛ eshikpɔŋ lɛ be baashɛ,+ be ni lɛ hu jeŋmaji babaoo kɛ maŋtsɛmɛi wuji baafee lɛ amɛnyɔŋ lɛ.’+

8 “‘“‘Kɛ́ jeŋmaŋ ko loo maŋtsɛyeli ko sɔmɔɔɔ Babilon maŋtsɛ Nebukadnezar ni esumɔɔɔ akɛ ekɛ ekuɛ awo Babilon maŋtsɛ lɛ kɔɔŋtso lɛ shishi lɛ, no lɛ, mikɛ klante, kɛ hɔmɔ, kɛ tsɛŋemɔ hela ni gbeɔ mɔ baagbala nakai jeŋmaŋ lɛ toi+ kɛyashi matsɔ enine nɔ makpãtã amɛhiɛ kwraa,’ Yehowa kɛɛ.

9 “‘“‘No hewɔ lɛ, nyɛkaboa gbalɔi lɛ, kɛ klamɔfoi lɛ, kɛ lamɔiatsɛmɛi lɛ, kɛ majikfeelɔi lɛ, kɛ ŋkunyaayelɔi lɛ ni yɔɔ nyɛteŋ lɛ atoi, mɛi ni kɛɔ nyɛ akɛ: “Nyɛsɔmɔŋ Babilon maŋtsɛ lɛ.” 10 Ejaakɛ amɛgbaa amalei amɛtsɔɔ nyɛ, koni aŋɔ nyɛ kɛje nyɛshikpɔŋ lɛ nɔ kɛya shɔŋŋ, ni mashwie nyɛ ni nyɛhiɛ akpãtã.

11 “‘“‘Shi jeŋmaŋ ni kɛ ekuɛ baawo Babilon maŋtsɛ lɛ kɔɔŋtso lɛ shishi ni ebaasɔmɔ lɛ lɛ, mahã eya nɔ ehi* eshikpɔŋ lɛ nɔ, ni edu nii yɛ nɔ, ni ehi nɔ,’ Yehowa kɛɛ.”’”

12 Ni nakai nɔŋŋ mikɛ Yuda maŋtsɛ Zedekia+ hu wie akɛ: “Nyɛkɛ nyɛkuɛ ayawoa Babilon maŋtsɛ lɛ kɔɔŋtso lɛ shishi ni nyɛsɔmɔ lɛ kɛ emaŋbii lɛ, koni nyɛya nɔ nyɛhi wala mli.+ 13 Mɛni hewɔ esa akɛ klante, kɛ hɔmɔ,+ kɛ tsɛŋemɔ hela ni gbeɔ mɔ+ agbe bo kɛ omaŋbii+ lɛ tamɔ bɔ ni Yehowa ewie akɛ ebaaba jeŋmaŋ ni sɔmɔɔɔ Babilon maŋtsɛ lɛ nɔ lɛ? 14 Nyɛkaboa wiemɔi ni gbalɔi lɛ kɛɔ nyɛ akɛ, ‘Nyɛsɔmɔŋ Babilon maŋtsɛ lɛ’ toi,+ ejaakɛ amɛmiigba amalei amɛmiitsɔɔ nyɛ.+

15 “‘Ejaakɛ mitsuko amɛ shi amɛmiigba amale gbalɛi yɛ migbɛ́i mli koni mashwie nyɛ ni nyɛhiɛ akpãtã, nyɛ kɛ gbalɔi ni gbaa amɛtsɔɔ nyɛ lɛ fɛɛ,’+ Yehowa kɛɛ.”

16 Ni mikɛɛ osɔfoi lɛ kɛ maŋbii nɛɛ fɛɛ akɛ: “Nɔ ni Yehowa kɛɛ nɛ, ‘Nyɛkaboa gbalɔi ni gbaa amɛtsɔɔ nyɛ akɛ: “Naa! Etsɛŋ kwraa ni abaaku sɛɛ akɛ Yehowa shĩa lɛ nibii lɛ ajɛ Babilon kɛba!” lɛ toi,+ ejaakɛ amɛmiigba amalei amɛmiitsɔɔ nyɛ.+ 17 Nyɛkaboa amɛ toi. Nyɛsɔmɔa Babilon maŋtsɛ lɛ koni nyɛya nɔ nyɛhi wala mli.+ Mɛni hewɔ esa akɛ maŋ nɛɛ atsɔ amaŋfɔ? 18 Shi kɛ́ gbalɔi ji amɛ, ni Yehowa wiemɔ lɛ yɛ amɛnaa lɛɛlɛŋ lɛ, ofainɛ hã amɛkpa Yehowa, taiatsɛ lɛ fai koni akaloo nibii ni eshwɛ yɛ Yehowa shĩa lɛ, kɛ Yuda maŋtsɛ lɛ shĩa lɛ, kɛ Yerusalem lɛ kɛtee Babilon.’

19 “Ejaakɛ nɔ ni Yehowa, taiatsɛ lɛ wieɔ yɛ akulashiŋi+ lɛ, kɛ Ŋshɔ+ lɛ,* kɛ nu shwiilii+ lɛ, kɛ nibii ni eshwɛ yɛ maŋ nɛɛ mli lɛ ahe nɛ, 20 nibii ni Babilon maŋtsɛ Nebukadnezar elooo kɛyaaa be ni eŋɔ Yekonia, Yehoiakim binuu lɛ, ni ji Yuda maŋtsɛ lɛ, kɛ Yuda kɛ Yerusalem abladei lɛ fɛɛ nom kɛjɛ Yerusalem kɛtee Babilon lɛ;+ 21 hɛɛ, nɔ ni Yehowa, taiatsɛ lɛ, Israel Nyɔŋmɔ lɛ wieɔ yɛ nibii ni eshwɛ yɛ Yehowa shĩa lɛ, kɛ Yuda maŋtsɛ lɛ shĩa lɛ, kɛ Yerusalem lɛ ahe nɛ: 22 ‘“Akɛbaaya Babilon+ ni jɛmɛ amɛbaahi kɛyashi gbi ni magbala mijwɛŋmɔ kɛya amɛnɔ lɛ nɔ,” Yehowa kɛɛ. “Kɛkɛ lɛ, mikɛbaaku sɛɛ kɛba ni mikɛbaaba biɛ ekoŋŋ.”’”+