Kristofoi Ahe Ni Amɛkɛwooo Maŋsaji Amli Beni Nyɔŋmɔ Ta Lɛ Bɛŋkɛɔ Lɛ
“Gbalɔi ni gbaa hejɔlɛ lɛ, kɛji gbalɔ lɛ wiemɔ la ná ba mli lɛ, no dani aleɔ gbalɔ akɛ Yehowa tsulɛ lɛɛlɛŋ!”—Yer. 28:9.
1. Mɛni hewɔ Yeremia 27:9 wiemɔi ni teɔ shi shiɔ ŋkunyaayeli lɛ sa ŋmɛnɛ jeŋshihilɛ lɛ pɛpɛɛpɛ?
1 “SHI nyɛ lɛ, nyɛkaboa nyɛgbalɔi kɛ klamɔi kɛ okɔmfoi kɛ ŋkunyaayelɔi ni kɛɔnyɛ akɛ: Nyɛsɔmɔɔɔ Babel maŋtsɛ lɛ! atoi.” Nakai blema wiemɔi ni awie yɛ Babel Maŋtsɛyeli gbii lɛ amli lɛ sa ŋmɛnɛ jeŋshihilɛ lɛ pɛpɛɛpɛ. Mɛni hewɔ? Ejaakɛ lalɔi, ŋkunyaayelɔi, okɔmfoi kɛ klalɔi yɛ je lɛ mli lolo. (Yer. 27:9) Je lɛ maŋtiase wuji tamɔ Washington, D.C. ehe gbɛi yɛ amɛmumɔiatsɛmɔ hewɔ, ni maŋkwralɔi ni amɛjwɛŋmɔi efutu lɛ kɛ yeyeeyefeemɔ yabiɔ amɛ nii. Akɛni nakai klalɔi, mumɔiatsɛlɔi, mɛi ni tsɔɔ lamɔi ashishi kɛ mɛi ni gbaa nɔni baaba wɔsɛɛ lɛ kɛ ŋaawoo kɛ kɔkɔbɔɔ haa nɔyelɔi hewɔ lɛ, nakai mɛi ni kɛ mumɔi tsuɔ nii lɛ baanyɛ ana hewalɛ kpele yɛ je lɛ maŋkwramɔsaji anɔ. Shi nɛkɛ mumɔiatsɛlɔi nɛɛ kɛ amɛhe wooo maŋkwramɔsaji amli diɛŋtsɛ.
2. Akɛni Biblia lɛ gbaa je lɛ mli tsakemɔi kɛtsɔɔ hiɛ hewɔ lɛ, ani no tsɔɔ akɛ ekɛ ehe miiwo maŋkwramɔsaji amli, ni mɛɛ hetoo 1 Yohane 2:15-17 haa nakai sanebimɔi lɛ?
2 Blema wolo ko yɛ ni woɔ ekanelɔi lɛ aŋaa akɛ amɛkɛ amɛhe akawo mumɔiatsɛmɔi sɔrɔtoi lɛ fɛɛ ekoeko kwraa mli shi egba nibii pii ni kɔɔ je lɛ mli tsakemɔi ni baaba yɛ wɔ-afii nyɔŋmai-enyɔ lɛ mli lɛ he. Eyɛ nibii pii kɛɛmɔ yɛ wɔ-bei nɛɛ maŋkwramɔsaji ahe. Shi ani wolo nɛɛ kɛ ehe miiwo wɔ-gbii nɛɛ maŋkwramɔsaji amli yɛ enɛ hewɔ? Ani wolo nɛɛ miiwo ekanelɔi lɛ hewalɛ ni amɛkɛ amɛhe awo maŋkwramɔŋ nɔyelɔi asaji amli? Wɔmiihã maŋkwralɔi ni taoɔ akɛ amɛfo Biblia Krɔŋkrɔŋ lɛ naa akɛ eji nakai wolo lɛ hetoo akɛ, Dabi! Kristofonyo bɔfo Yohane ŋma yɛ Biblia lɛ naagbee woji lɛ ateŋ ekome mli akɛ:
“Nyɛkasumɔa je lɛ aloo nibii hu ni yɔɔ je lɛŋ. Kɛji mɔ ko miisumɔ je lɛ, belɛ tsɛ lɛ suɔmɔ lɛ bɛ emli; ejaakɛ nɔ fɛɛ nɔ ni yɔɔ je lɛŋ lɛ, heloo lɛ sɛɛdiinii lɛ kɛ hiŋmɛii lɛ asɛɛdiinii lɛ kɛ shihilɛ lɛ mli hewoo lɛ, ejɛɛɛ tsɛ lɛ mli, shi moŋ je lɛ mli ejɛ; ni je lɛ hoɔ eyaa kɛ emli sɛɛdiinii lɛ; shi mɔni feɔ Nyɔŋmɔ suɔmɔɔnaanii lɛ hiɔ shi kɛyaa naanɔ.”—1 Yoh. 2:15-17.
Biblia naagbee wolo ni bɔfo Yohane nɛɛ nɔŋŋ ŋma lɛ wie bɔni jeŋ nɛɛ kɛ emli maŋkwramɔi lɛ baaho aya lɛ he.
3. Mɛni nifeemɔ yɛ maŋkwramɔsaji ahe jamɔi ahiɛnyiɛlɔi lɛ kɛfiɔ Kristofoi anɔ, ni namɔ amɛkɛ amɛnine tsɔɔ akɛ Biblia mli nɔkwɛmɔnɔ kɛfĩɔ sɛɛ?
3 Shi jamɔi ahiɛnyiɛlɔi, paapai, osɔfoi kɛ bisiɔp nukpai po teɔ shi shiɔ Kristofoi ahe ni amɛkɛwooo maŋsaji amli lɛ ni amɛkɛɔ akɛ eji sɔ̃ ni ka Kristofonyo fɛɛ Kristofonyo nɔ akɛ akɛ ehe awo jeŋ nɛɛ maŋkwramɔsaji amli kɛ hiɛdɔɔ. Bɔni afee ni amɛkɛ Biblia mli nɔkwɛmɔnii ama amɛshidaamɔ nɛɛ nɔ mi hewɔ lɛ, amɛkɛ amɛnine tsɔɔ blema Hebri gbalɔi lɛ, tamɔ Yeremia, osɔfo Hilkia bi ni hi shi yɛ afii ohai kpawo dani Wɔ-ŋmɛnɛ Be mIi lɛ. Yɛ anɔkwale mli lɛ, Yeremia 27:9 ni atsɛ yɛ nikasemɔ nɛɛ shishijee lɛ ji nɔni Yehowa Nyɔŋmɔ kɛɛ Yeremia ni egba Edom, Moab, Amon, Tiro kɛ Zidon maŋtsɛyelii anajiaŋdamɔlɔi lɛ fã ko. (Yer. 27:1-4) Nohewɔ lɛ, akɛni “Nyɔŋmɔ Ofe lɛ gbi wulu lɛ nɔ ta” yɛ Harmagedon lɛ miibɛŋkɛ wɔ shwiŋshwiŋ hewɔ lɛ, nyɛhaa wɔsusua Yeremia ni Nyɔŋmɔ kɛtsu nii yɛ nakai blema be mli lɛ he wɔkwɛ. Ani Yeremia nɔkwɛmɔnɔ lɛ ŋmɛɔ ŋmɛnɛ anɔkwa Kristofoi agbɛ akɛ amɛkɛ amɛhe awo je lɛ maŋkwramɔsaji lɛ eko mli? Nyɛhaa wɔkwɛa.
4. Yehoiakim maŋtsɛyeli klɛŋklɛŋ afi lɛ mli lɛ mɛni Yehowa tsɔ Yeremia nɔ ekɛɛ akɛ ebaafee sɔlemɔwe lɛ kɛ Yerusalem yɛ shihilɛi komɛi amli?
4 Wɔbaaje wɔ-sane lɛ shishi kɛjɛ afii 628 D.Ŋ.B., aloo afii 21 dani Babilonbii kpata Yerusalem hiɛ lɛ mli. Enɛ ji Yehoiakim, mɔni nyiɛ Yerusalem naagbee maŋtsɛmɛi enyɔ lɛ hiɛ lɛ nɔyeli klɛŋklɛŋ afii lɛ mli. Yɛ no sɛɛ afi ni ji ejwɛ lɛ nɔ lɛ, Yeremia gba egbalɛ ni kɔɔ Babilon Maŋtsɛ Nebukadnezar kɛ Yehowa “kpulu” ni akɛbaaha maŋtsɛmɛi kɛ maŋtsɛyelii ní fe 20 ni Edom, Moab, Amon, Tiro kɛ Zidon fata amɛhe lɛ he lɛ. (Yer. 25:1-3) Gbalɔ lɛ tsɔɔ wɔ be ni enɛ ba lɛ akɛ:
“Yuda maŋtsɛ Yehoiakim, Yosia bi lɛ, maŋtsɛyeli lɛ shishijee mli nɛkɛ wiemɔ nɛɛ jɛ Yehowa ŋɔɔ ba akɛ: Bɔni Yehowa kɛɛ nɛ: Yaadamɔ Yehowa we lɛ kpo lɛ nɔ, ni Yuda maji lɛ fɛɛ ni baa jamɔ yɛ Yehowa we lɛ, okɛɛamɛ wiemɔi fɛɛ ni mifão akɛ owie otsɔɔ amɛ lɛ; kaajie wiemɔ kome yɛ mli! Ekolɛ aleeenɔ amɛabo toi, ni amɛteŋ mɔ fɛɛ mɔ aaakũ esɛɛ kɛaajɛ egbɛ fɔŋ lɛ nɔ, ni mashwa mihe yɛ efɔŋ ni misusu akɛ mafeamɛ yɛ amɛnifeemɔnii fɔ̃ji lɛ ahewɔ lɛ he. Ni okɛɛ amɛ akɛ: Bɔni Yehowa kɛɛ nɛ: Kɛji nyɛbooomi toi ni nyɛnyiɛ mimla ni miŋɔto nyɛhiɛ lɛ mli, ni nyɛbo mitsuji, gbalɔi lɛ, ni mitsuɔ nyɛŋɔɔ, ni miteɔ shi leebi maaŋkpa mitsuɔ amɛ, shi nyɛbooo toi lɛ, atoi lɛ: no lɛ mafee nɛkɛ shia nɛɛ tamɔ Silo, ni maha nɛkɛ maŋ nɛɛ atsɔ loomɔ aha shikpɔŋ Iɛ nɔ majimaji fɛɛ!”—Yer. 26:1-6.
5. Yɛ shɛɛwiemɔi ni tsɔ hiɛ lɛ kɛhamɔ mli lɛ, mɛni hewɔ Yeremia kɛ osɔfoyeli futuuu maŋkwramɔsaji?
5 Yeremia ji osɔfo, shi Nyɔŋmɔ akpɔ nɛɛ nɔyeli etsɔɔɔ akɛ eebɔ mɔdɛŋ ni ekɛ osɔfoyeli afutu maŋsaji. Kɔkɔbɔɔ ni jɛ Yehowa ŋɔɔ lɛ kɛkɛ ekɛhaa yɛ maŋ lɛ sɛɛnamɔ hewɔ. Eŋmɛɛ he eha nɔyeli lɛ kɛ gbɔmɛi lɛ koni amɛbo nakai Nyɔŋmɔ kɔkɔbɔɔ lɛ toi. Yehowa yɛ hegbɛ ni eji sɔ̃ ni kã enɔ akɛ ebɔ Yuda Maŋtsɛyeli lɛ kɔkɔ, ejaakɛ mɛi ni yɔɔ emli lɛ kɛlɛ yɛ kpaŋmɔ mli akɛ amɛ-Nyɔŋmɔ. Yɛ e-Mla ni ekɛha amɛ kɛtsɔ Mose nɔ lɛ mli lɛ, ebɔ maŋ lɛ kɔkɔ yɛ nɔni baaba amɛnɔ kɛji amɛku kpaŋmɔ nɛɛ ni kã Nyɔŋmɔ kɛ gbɔmɔ teŋ mli lɛ he. Nohewɔ lɛ Nyɔŋmɔ gbalɔ Yeremia ebɔɔɔ mɔdɛŋ akɛ ekɛ osɔfoyeli kɛ maŋsaji afutu, shi moŋ ekɛ kɔkɔbɔɔ ni jɛ Nyɔŋmɔ, mɔni amɛkɛlɛ efee kpaŋmɔ lɛ ŋɔɔ lɛ miiha amɛ. Kɛji amɛkã he amɛku kpaŋmɔ nɛɛ mli lolo lɛ, belɛ Yehowa kpaŋmɔ adeka lɛ baalaaje yɛ amɛsɔlemɔtsu ni yɔɔ Yerusalem lɛ mli tamɔ bɔni elaaje yɛ Silo kpeebuu lɛ mli lɛ.
6. Mɛɛ shɛɛ Yeremia kuu lɛ nako kɛjɛko Yehowa ŋɔɔ hewɔ ni amɛbɛ hegbɛ akɛ amɛkɛ amɛhe woɔ Kristendom maŋkwramɔsaji amli, ni mɛɛ Yesu wiemɔi ni kɔɔ ehe nɛkɛ kuu nɛɛ yeɔ nɔ?
6 Jeee nɔkwɛmɔnɔ Yerema feɔ ehaa ŋmɛnɛbe mli Kristendom osɔfoi lɛ akɛ amɛkɛ amɛhe awo jakumaŋ maŋkwramɔsaji amli. Mɛi ni ji Yeremia kuu ŋmɛnɛ lɛ eyɔse akɛ amɛbɛ hegbɛ akɛ amɛkɛ amɛhe awo jakumaŋ ko aIoo jeŋ hewalɛi maji aloo Kristendom maji tete po maŋkwramɔsaji amli. Amɛle akɛ yɛ Kristendom tsitsi ni eshi lɛ fɛɛ sɛɛ lɛ, ekɛ Yehowa bɛ kpaŋmɔ mli. Ebaanyɛ eshi etsitsi akɛ eyɛ kpaŋmɔ hee ni teŋdamɔlɔ ji Yesu Kristo, Mɔni da fe Mose lɛ mli moŋ, shi anɔkwasaji tsɔɔ akɛ enɛ ji amale. Nohewɔ lɛ, mɛi ni ji Yeremia kuu lɛ mlibii le jogbaŋŋ akɛ amɛbɛ shɛɛ ko kɛjɛ Yehowa dɛŋ ni amɛkɛbaaba Kristendom maji Iɛ aloo ni amɛna gbɛfaŋnɔ ko yɛ nakai maji lɛ amaŋkwramɔsaji amli. Yehowa kɔkɔbɔɔ ni amɛshiɛɔ yɛ anɔkwale mli kɛha Kristendom kɛ maji ni jeee Kristofoi lɛ jeee amɛhe ni amɛkɛwoɔ jeŋ maŋkwramɔi amli. Amɛsumɔɔɔ “je lɛ aloo nibii ni yɔɔ je lɛŋ” lɛ, shi amɛyeɔ Yesu wiemɔi nɛɛ nɔ akɛ: “Amɛjɛɛɛ je lɛ mli.” (Yoh. 17:14, 16; 1 Yoh. 2:15) Yɛ amɛhe ni amɛkɛwooo maŋsaji amli kwraa hewɔ lɛ, amɛwiɔ amɛhe kɛjɛɔ maŋkwramɔsaji sɔrɔtoi fɛɛ he.
Jamɔi Anifeemɔ
7. Yɛ ehefãmɔ yɛ Yerusalem kojomɔhe lɛ naamuamɔ mli lɛ, mɛni Yeremia kɛɛ yɛ Yeremia 26:12-15 kɛ gbeekpaamɔ naa?
7 Osɔfoi kɛ mɛi ni atsɛɔ amɛ “gbalɔi” krokomɛi lɛ gbala Yeremia kɛtee lumɛi akojolɔi lɛ kɛ maŋ lɛ hiɛ yɛ sɔlemɔtsu lɛ agbo naa. Amɛfo enaa akɛ ekɛ atuatsemɔ wiemɔi miifite mɛi lɛ ajwɛŋmɔ. Amɛkɛɛ akɛ; “Nuu nɛɛ sa gbele; ejaakɛ egba eshi maŋ nɛɛ, taakɛ bɔni nyɛdiɛŋtsɛ nyɛnu kɛ nyɛtoii lɛ!” (Yer. 26:7-11) Yɛ ehefãmɔ lɛ naamuamɔ mli lɛ, Yeremia kɛɛ Yerusalem kojomɔhe lɛ akɛ: “Le kɛkɛ nyɛlea akɛ, kɛji nyɛgbemi lɛ, lá ni efeko nɔko nyɛbaloo nyɛshwie nyɛ kɛ maŋ nɛɛ kɛ emlibii lɛ anɔ; ejaakɛ eyɛ mli lɛɛlɛŋ akɛ Yehowa tsumi nyɛŋɔɔ, koni mibawie nɛkɛ wiemɔi nɛɛ fɛɛ yɛ nyɛtoiaŋ!”—Yer. 26:12-15
8. Te Kristendom osɔfoi lɛ efee amɛnii tamɔ Yerusalem “maŋhedɔlɔi” lɛ yɛ Yeremia kuu lɛ he tɛɛŋ?
8 Mɛɛ maŋhedɔɔ mumɔ nɛkɛ mɛi ni taoɔ Yeremia lá lɛ ejie kpo nɛɛ! Kulɛ esani enɛ atsɔ kojomɔhe lɛ yiŋ tamɔ bɔni maŋhedɔɔ he nibimɔi lɛ fee yɛ kojomɔhei krokomɛi nyɛsɛɛ nɛɛ lɛ. Amɛku amɛhiɛ amɛshwie Yehowa fai ni ekpa amɛ akɛ amɛtsake lɛ nɔ. Amɛku amɛhiɛ amɛshwie fɔ ni amɛye yɛ E-hiɛ lɛ nɔ, ni amɛkpliŋ amɛhenilee. Nakai pɛpɛɛpɛ ji bɔni ebalɛ yɛ Yeremia kuu ni afɔ amɛ mu yɛ ŋmɛnɛbe nɛɛ mli lɛ agbɛfaŋ. Kristendom nyɔŋmɔiajamɔ mli hiɛnyiɛlɔi lɛ ebi nakai nɔŋŋ akɛ awa amɛyi. Amɛanyiɛ hiɛ yɛ hoofeemɔ akɛ agbe Yeremia kuu lɛ mli, koni amɛye amɛhe kɛjɛ amɛdiɛŋtsɛ amɛhenilee fɔ̃ji lɛ afɔbuu mli.
9. Yɛ Yeremia sane lɛ mli lɛ ani lumɛi akojolɔi lɛ bo nyɔŋmɔiajalɔi lɛ toi, ni mɛɛ mɔdɛŋ amɛbɔ akɛ amɛaajo oshra naa foi?
9 Lumɛi ni bɔ mɔdɛŋ ni ajie Yeremia kɛjɛ gbele fɔbuu lɛ mli ateŋ mɔkome ji Ahikam, Shafan bi lɛ. Lumɛi lɛ booo nɔni nyɔŋmɔijalɔi lɛ taoɔ ni afee lɛ toi. Amɛyɔse akɛ Yeremia ji Yehowa naawielɔ lɛɛlɛŋ. Amɛsumɔɔɔ ni Yehowa kɛ esɔɔlɔ anɔkwafa lɛ lá ni eye bem lɛ baa amɛnɔ. Amɛkpɛ mli kɛfi Yeremia sɛɛ akɛ: eyeee fɔ! Ehefãmɔ lɛ ha amɛkai nibii tamɔ nakai ni eba pɛŋ lɛ. Akɛ nɔkwɛmɔnɔ lɛ, aaafee afii 100 kɛbashi nakai be mli lɛ, Mika gba eshi Yuda kɛ Yerusalem. Maŋtsɛ Hezekia jie ehe kɛjɛ layisɔ̃ he yɛ Mika yiwala ni ehere yɛ jwɛŋmɔ ni ahiɛ akɛ eewie atuatsemɔ wiemɔ ni baaye Maŋ lɛ awui mli lɛ. Onukpai ni kɛ ŋaa yeɔ Yeremia sane lɛ kɛɛ akɛ: “Ni wɔ lɛ wɔɔɔfee efɔŋ kpele nɛɛ wɔshi wɔsusumai lo?”—Yer. 26:16-19, 24; Mika 3:9-12.
10. Mɛɛ sɔrɔto yɔɔ bɔni Maŋtsɛ Yehoiakim fee gbalɔ Uria lɛ kɛ Maŋtsɛ Hezekia teŋ?
10 Hezekia nanakaŋsowa Yehoiakim klɛŋklɛŋ afi ni ekɛta Yerusalem maŋtsɛsɛi lɛ nɔ lɛ tamɔɔɔ Maŋtsɛ Hezekia ni kɛ Yehowa kɔkɔbɔɔ ni ekɛtsɔ Mika nɔ wo etsui mli lɛ! E-nɔyeli klɛŋklɛŋ afi lɛ yi obɔ̃ kɛ lashishwiemɔ, ejaakɛ eha agbe Shemaia bi Uria. Bɔni afee ni gbalɔ Uria ajo Maŋtsɛ Yehoiakim mlifu lɛ naa foi hewɔ lɛ, ejo fói kɛtee Mizraim. Aleee akɛ maŋtsɛ lɛ kɛ Mizraim to gbɛjianɔ akɛ akpale Uria kɛya emaŋ, shi maŋtsɛ oweletɔlɔ lɛ tsu mɛi ni ayagbɔbi Uria ni agbalalɛ ekãanaa kɛya Yuda shikpɔŋ lɛ nɔ koni egbo akɛ lá odasefonyo. (Yer. 26:20-23) Nohewɔ Iɛ, yɛ maŋtsɛ hee lɛ klɛŋklɛŋ afi lɛ mli lɛ, Yeremia ná nɔdaamɔnɔ kroko; ni yɛ Yehowa, fãmɔ naa lɛ egba nɔni efee lɛ eto. Esani akadi yɛ enɛ mli akɛ, Farao Neko ewo Yehoiakim Yuda nɔ maŋtsɛ. (2 Maŋts. 23:34, 35) Nohewɔ lɛ ekolɛ Farao Neko kɛ Maŋtsɛ Yehoiakim fee ekome yɛ awuyeli lɛ mli.
11. Mɛɛ oshra Yehoiakim kɛba lɛdiɛntsɛ ehe enɔ?
11 Yehoiakim kɛ oshra ba lɛdiɛŋtsɛ ehe nɔ. Yɛ e-nɔyeli afi ni ji kpaanyɔ lɛ nɔ lɛ, Maŋtsɛ Nebukadnezar bawo Yerusalem he ka ni efee Yehoiakim maŋtsɛfioo kɛha Babilon jeŋ hewalɛ hee lɛ. Yɛ afii etɛ sɛɛ lɛ, Yehoiakim gbo kpatugbele. Ashɛ e-gbonyo lɛ afɔ̃ Yerusalem gbogbo lɛ sɛɛ koni ‘afũlɛ tamɔ afũɔ teji.’ Eba mli pɛpɛɛpɛ tamɔ bɔni Yeremia gba eto lɛ. (Yer. 22:18, 19; 2 Kron. 36:5-8; 2. Maŋts. 24:1-6) Mɛɛ gbeyeisane po nɛ!
12. Te ajie Yeremia kuu ni yɔɔ ŋmɛnɛ lɛ kɛjɛ gbele mli yɛ nyɔŋmɔjamɔ mli hewalɔi adɛ tamɔ blema mli tɛɛŋ?
12 Ajie Yeremia kuu ni yɔɔ wɔ afii ohai 20 nɛɛ mli lɛ kɛjɛ gbele mli tamɔ bɔni ajie Yeremia, Hilkia bi lɛ kɛjɛ gbele mli lɛ. Jeee saji fɛɛ mli ni jeee shikpɔji fɛɛ nɔ kojolɔi lɛ boɔ Kristendom jamɔ mli hewalɔi lɛ ayiwalɛ taomɔnii lɛ atoi yɛ. Kojolɔi komɛi yɛ ni eyɔse jamɔ mli hegbɛi kɛ heyelii ni Yeremia kuu ni damɔ Yehowa Nyɔŋmɔ asafo ni tamɔ eŋa lɛ najiaŋ yɛ shikpɔŋ nɔ lɛ yɔɔ lɛ. Nohewɔ lɛ, nɔni ba lɛ tamɔ nɔni afee he mfoniri yɛ Kpojiemɔ 12:15, 16 lɛ pɛpɛɛpɛ. “Shikpɔŋ” lɛ nɔ bii kɛ kwamaŋ nɔyelii lɛ ye bua Nyɔŋmɔ “yoo” lɛ najiaŋdamɔlɔi lɛ ni amɛfite Satan Abonsam jamɔ mli samaŋfoi amɔdɛŋ ni amɛbɔ akɛ amɛtua Yeremia kuu lɛ ni akpata amɛhiɛ kwraa lɛ.
13. Mɛni Yeremia kuu lɛ yaa nɔ amɛjajeɔ, ni no feemɔ mli lɛ, mɛni mli amɛkɛ amɛhe wooo?
13 Yeremia kuu lɛ mlibii lɛ yaa nɔ amɛjajeɔ nɔ fɛɛ nɔ ni Yehowa efã amɛ akɛ amɛjaje kɛshi Yuda kɛ Yerusalem henɔ ni yɔɔ ŋmɛnɛ lɛ kɛ nibii agbɛjianɔtoo nɛɛ maŋkwramɔ fãi krokomɛi lɛ. Eyɛ mli akɛ anyɛ amɛnɔ awo ‘nu shishi’ yɛ heikomɛi moŋ, shi amɛbɔɔɔ mɔdɛŋ akɛ amɛbaakpa nɔyelii ni ato ama shi lɛ koni amɛha nɔni amɛgbaa lɛ aba mli yɛ ekãa naa. Amɛdamɔɔ nɔnyɛi fɛɛ ni baaha amɛkɛ amɛhe awo maŋkwramɔ kuu ko mli lɛ naa. Amɛkpɛlɛɛɛ akɛ amɛŋmɛɛ Kristofoi ahe ni amɛkɛwooo maŋsaji amli lɛ he.
14. Yeremia kuu lɛ yɔseɔ akɛ ta lɛ ji namɔ nɔ̃, ni yɛ ta lɛ sɛɛ lɛ te shikpɔŋ lɛ nɔ baatamɔ kɛha hilɛ tɛɛŋ?
14 Nohewɔ lɛ, akɛni amɛkɛ amɛhe wooo maŋkwramɔsaji amli hewɔ lɛ amɛtsiɔ amɛhe ‘kɛjɛɔ je lɛ he.’ Amɛle jogbaŋŋ akɛ mɔ ko mɔ ko yelikɛbuamɔ he ehiaaa Yehowa Nyɔŋmɔ, Ofe lɛ. Enɔ̃ ji ta lɛ! Jeee amɛ amɛbaawuu ta lɛ! Amɛdamɔɔ shi kpɛŋŋ yɛ Kristofoi emuuyeli mli kɛ nɔmimaa akɛ “Nyɔŋmɔ Ofe lɛ gbi wulu lɛ nɔ ta lɛ” ebɛŋkɛ tamɔ bɔni mumɔi fɔji ahewalɛi ni anaaa lɛ kɛ amɛkunyaayeli hewalɛi lɛ miibua je lɛ nɔyelɔi lɛ anaa kɛmiiya je Iɛ shihilɛhe ko ni atsɛɔ yɛ mifonirifeemɔ mli akɛ Harmagedon lɛ mli. (Kpoj. 16:13-16) Nohewɔ lɛ, Yeremia kuu lɛ naa miishɛɛ akɛ amɛ-Kristofoi ahe ni amɛkɛwooo maŋsaji amli Iɛ ji jeŋ muu fɛɛ maŋtsɛ ni Yehowa ji lɛ sɛɛfimɔ. Mɛɛ he ko fɛɛfɛo po wɔshikpɔŋ nɛɛ baaji aha Yeremia kuu lɛ kɛ amɛnanemɛi Kristofoi ni kɛ amɛhe wooo maŋsaji amli lɛ nɛkɛ yɛ be mli ni amɛye Yehowa maŋtsɛyeli lɛ kunimyeli yɛ Harmagedon lɛ he odase sɛɛ lɛ!
Yehowa Sɔɔlɔ-Maŋtsɛ Lɛ He Yinɔkpaŋmɔ
15. Mɛni hewɔ be nɛɛ ji be kɛha jeŋ fɛɛ yinɔkpaŋmɔ kpele ni fe fɛɛ yɛ adesai ayinɔsane fɛɛ mli, ni mɛni Kpojiemɔ 14:12 kɛɛ akɛ enɛ baaji aha Kristofoi ni sheɔ Nyɔŋmɔ gbeyei lɛ?
15 Be nɛɛ ji beni esa akɛ aka Kristofoi ni tamɔ mɛi ni Biblia tsĩ amɛ tã lɛ ahetsemɔ yɛ maŋkwramɔsaji amli kɛ emuuyeli lɛ akwɛ. Be nɛɛ ji be kɛha jeŋ muu fɛɛ yinɔkpaŋmɔ kpele ni fe fɛɛ yɛ adesai ayinɔsane fɛɛ mli, ejaakɛ amrɔ nɛɛ ji Jeŋmaji Ekomefeemɔ, nɔ̃ mli ni maji 151 yɔɔ ŋmɛnɛ lɛ be. Mɛni hewɔ atsɛ Jeŋmaji Ekomefeemɔ lɛ akɛ jeŋ fɛɛ yinɔkpaŋmɔ? Ejaakɛ eji adesai agbɛjianɔtoo ni tsiɔ hewalɛi anaa, aahu po ni kɛ eeehi lɛ etsĩ Yehowa maŋtsɛyeli kɛtsɔ e-Kristo nɔ lɛ nɔyeli hegbɛ lɛ naa. Te nɔni baaye kunim hu, Yehowa Mesia maŋtsɛyeli lɛ, aloo Jeŋmaji Ekomefeemɔ lɛ? Gbɔmɛi fɛɛ a-shweshweeshwe shihilɛ kɛ toiŋjɔlɛ he eba sane. Beni egbaa kaa ni Jeŋmaji Ekomefeemɔ kɛha je lɛŋ hebuu lɛ abei lɛ kɛbaaba lɛ, Kpojiemɔ 14:12 kɛɛ akɛ: “Biɛ krɔŋkrɔŋbii lɛ ni yeɔ Nyɔŋmɔ kitãi lɛ kɛ Yesu nɔ hemɔkɛyeli lɛ nɔ lɛ atsuishiŋmɛɛ lɛ yɔɔ.”—Kɛto Yesaia 8:12, 13 he.
16. Afii ohai 19 ni eho nɛ lɛ, namɔ he jeŋ lɛɛ kpaŋ yɛ, ni mɛni Lala 2:1-4 fã ni ebɛ mli lɛ kɛ enine tsɔɔ?
16 Afii ohai nyɔŋma-kɛ nɛɛhu ni eho nɛ lɛ, jeŋ muu lɛ fɛɛ bɔ mɔdɛŋ amɛkpaŋ Kristo diɛŋtsɛ yinɔ, ni Nyɔŋmɔ ŋmɛ enɛ gbɛ ni Yesu agbo lá odasefonyo gbele. (Bɔf. 3:13; 4:27; 13:28, 29; 1 Tim. 6:13) Agba enɛ ato yɛ Lala 2:1-4. Nɛkɛ lala nɛɛ kɛ efã ni eba mli afii ohai 19 ni eho nɛɛ lɛ kɛ enine tsɔɔ jeŋ fɛɛ yinɔkpaŋmɔ kɛshi Yehowa kɛ e-Kristo lɛ yɛ be nɛɛ mli ni “je nɛŋ maŋtsɛyeli” hegbɛ lɛ fɛɛ ji amɛyi enyɔ lɛ nɔ lɛ.—Kpoj. 11:15-18.
17. Yehowa Odasefoi eyɔse akɛ ŋmɛnɛ jeŋ gbɛjianɔtoo lɛ miibɔ namɛi ahe mɔdɛŋ ni mɛɛ shidaamɔ ni amɛkɔ yɛ 1919 mli amɛhiɛ ŋmɛnɛ?
17 Anɔkwa Kristofoi baayɔse akɛ akɛ jeŋ fɛɛ yinɔkpaŋmɔ lɛ miitsu nii kɛmiishi Yehowa kɛ e-Kristo lɛ ŋmɛnɛ. Nohewɔ lɛ amɛbaaya nɔ amɛmia amɛhiɛ yɛ amɛhetsemɔ kɛjɛ maŋsaji ahe tamɔ Kristo lɛ mli, ni amɛhiɛ amɛgbɛ ni amɛkɔ yɛ afi 1919 mli yɛ International Bible Students Association kpee ni amɛfee yɛ Cedar Point (Ohio) lɛ mli kpɛŋŋ, ni amɛfã Yehowa maŋtsɛyeli ni yɔɔ Kristo dɛŋ lɛ he shi jeee Jeŋmaji Akpaŋmɔ kɛha jeŋ toiŋjɔlɛ kɛ shweshweeshwe shihilɛ ni Jeŋmaji Ekomefeemɔ ebaye enajiaŋ lɛ. Eji gbalɔ Yeremia yɛ ŋmɛnɛ kulɛ, nɛkɛ shidaamɔ lɛ hu ebaakɔ ejaakɛ ekɛ kɔkɔbɔɔ ni jɛ mumɔ mli ni kɔɔ nakai kpaŋmɔ yɛ Yehowa maŋtsɛ “tsulɔ” lɛ he lɛ ha.
18. Yɛ Yehoiakim maŋtsɛyeli klɛŋklɛŋ afi lɛ mli lɛ mɛni akɛɛ Yeremia akɛ efee, ni namɛi esani ekɛ nibii lɛ kɛ ehe shɛɛ amaje?
18 Nohewɔ lɛ Yeremia yitso 27 gbalɛ lɛ yɛ ŋmɛnɛŋmɛnɛ shishinumɔ kɛhawɔ. Gbalɔ lɛ kɛɛ yɛ jɛmɛ akɛ:
“Zedekia, Yosia bi ni ji Yuda maŋtsɛ lɛ, maŋtsɛyeli lɛ shishijeee [yɛ 628 D.Ŋ.B.] mli nɛkɛ wiemɔ nɛɛ jɛ Yehowa ŋɔɔ ba Yeremia ŋɔɔ, akɛ: Bɔni Yehowa kɛɛmi nɛ: Feemɔ kpãi kɛ kɔŋtsei oha ohe, ni oŋɔfĩ okuɛ. Ni oŋɔmaje Edom maŋtsɛ lɛ kɛ Moab maŋtsɛ lɛ kɛ Tiro maŋtsɛ lɛ kɛ Zidon maŋtsɛ lɛ, kɛtsɔ bɔfoi ni ba Yerusalem yɛ Yuda maŋtsɛ Zedekia ŋɔɔ lɛ anine nɔ, ni ofáamɛ ni amɛyakɛɛ amɛnuŋtsɔmɛi lɛ akɛ: Bɔni Yehowa Zebaot, Israel Nyɔŋmɔ lɛ kɛɛ nɛ: Nyɛyakɛɛa nyɛnuŋtsɔmɛi lɛ akɛ.”—Yer. 27:1-4.
19. Yɛ Hebri ŋmalɛ ni ale lɛ naa lɛ, mɛɛ be mli Yeremia nine shɛ Yehowa shɛɛ lɛ nɔ, ni mɛni feemɔ mli etsu he nii?
19 Wɔkadiɔ yɛ biɛ akɛ atsĩ maŋtsɛmɛi enyɔ tã akɛ amɛ amɛyeɔ Yuda kɛ Yerusalem nɔ; klɛŋklɛŋ lɛ, Yehoiakim, kɛ agbɛnɛ enyɛminuu Zedekia, mɔni ye nɔ yɛ Yehoiakim kɛ ebinuu Yehoiakin sɛɛ lɛ. Kɛ gbɛi Yehoakim lɛ ja yɛ Yeremia 27:1 lɛ, belɛ Yeremia nine shɛ egbalɛ lɛ nɔ yɛ afi 628 D.Ŋ.B. ni ekɛto afi 11 dani etsu he nii. Shi Hebri nineniŋmaa etɛ kɛ Siria kɛ Arabia shishitsɔɔmɔ kɛha Yeremia 27:1 lɛ tsɛ “Zedekia” moŋ yɛ “Yehoiakim” najiaŋ ni nɛkɛ ji bɔni ŋmɛnɛŋmɛnɛ Biblia shishitsɔɔmɔi pii wie sane lɛ. Shi Yeremia nifeemɔ yɛ Yehowa kitã lɛ toiboo naa lɛ je kpo yɛ Maŋtsɛ Zedekia nɔyelibe lɛ mli yɛ be mli ni Edom, Moab, Amon, Tiro kɛ Zidon maji kpaanyɔ ni bɔle amɛ lɛ najiaŋdamɔlɔi lɛ ba Yerusalem ni amɛkɛ Maŋtsɛ Zedekia abato nii lɛ. Yɛ nɛkɛ be mli lɛ, Nebukadnezar eye Babilon nɔ kɛhooo kwraa lɛ afii kpaanyɔ, ni etswa Maŋtsɛ Yehoiakin nane shi tu kɛtee Babilon ni ekɛ etsɛkwɛ Zedekia ta Yerusalem maŋtsɛsɛi lɛ nɔ. Ákɛ maŋtsɛfioo lɛ esani Zedekia kɛ bulɛ kɛ heshibaa asɔmɔ Babilon.
20. Mɛɛ nifeemɔ nakai bɔfoi enumɔ lɛ baa lɛ tsɔɔ, ni mɛni hewɔ akɛɛ amɛ akɛ amɛkabo ŋkunyaayelɔi lɛ awiemɔi atoi?
20 Maji enumɔ ni bɔle amɛ anajiaŋdamɔlɔi ni ba lɛ ji nifeemɔ ko ni akpaŋ. Eji nɔ ko ni ato akɛ abaafee. Eka shi faŋŋ yɛ nɔni akɛɛ Yeremia ni ekɛɛ nɛkɛ bɔfoi nɛɛ mli akɛ atsu yinɔkpaŋmɔ ko he nii ni akɛwó atuatsemɔ nɔ ashi Maŋtsɛ Nebukadnezar. Mɛi ni gbaa nibii ni baaba kɛ ŋkunyaayelɔi lɛ kpɛlɛ atuatsemɔ lɛ nɔ. Enɛ hewɔ akɛɛ Yeremia ni ekɛɛ bɔfoi lɛ akɛ: “Shi nyɛ lɛ nyɛkaboa nyɛgbalɔi kɛ klamɔi kɛ lamɔi kɛ okɔmfoi kɛ ŋkunyaayelɔi lɛ ni kɛɔnyɛ akɛ: Nyɛsɔmɔŋ Babel maŋtsɛ lɛ! atoi. Ejaakɛ amale amɛgbaa amɛhaanyɛ, beni afee ni afãnyɛ kɛjɛ nyɛshikpɔŋ lɛ nɔ kɛya shɔŋŋ, ni mashwienyɛ ni nyɛhiɛ akpatã.”—Yer. 27:9, 10.
21. Yɛ nakai be mli lɛ mɛni daimonioi lɛ tsirɛɔ maji ni atsi amɛ tã lɛ asɛɛ akɛ amɛfee?
21 Bɔni daimonioi lɛ kpalaa maŋkwramɔŋ nɔyelɔi lɛ kɛyaa Harmagedon, “Nyɔŋmɔ Ofe lɛ gbi wulu lɛ nɔ ta” ŋmɛnɛ lɛ, nakai nɔŋŋ yɛ nakai be mli lɛ nakai daimonioi lɛ nɔŋŋ tsilɛ maji anɔ ni bɔfoi lɛ jɛ amɛbatse atua amɛshi Yehowa “tsulɔ” Nebukadnezar lɛ maŋkwramɔŋ nɔyelɔi lɛ ayisɛɛ. (Kpoj. 16:13-16) Nohewɔ lɛ beni Yuda Maŋtsɛ Zedekia tse atua yɛ enɔyeli afi ni ji nɛɛhu lɛ nɔ lɛ, nakai maji lɛ eteee shi amɛshiii.
22. Beni Yeremia kɛ Yehowa shɛɛ lɛ ha nakai bɔfoi lɛ, mɛni hewɔ etsɔɔɔ akɛ ekɛ ehe miiwo maŋkwramɔsaji amli, ni te Yehowa ma maŋtsɛ ni eji lɛ nɔ mi yɛ shɛɛ lɛ mli eha tɛɛŋ?
22 Beni Yeremia kɛ shɛɛwiemɔi ni jɛ Yehowa ŋɔɔ lɛ ha bɔfoi ni jɛ maji enumɔ ni efee ekome mli lɛ, jeee maŋkwramɔŋ saji amli ekɛ ehe woɔ, ejaakɛ e-Nyɔŋmɔ, Yehowa lɛ ji “jeŋmaji lɛ a-Maŋtsɛ,” ni kɔkɔbɔɔ ni he hiaa maŋ muu Iɛ fɛɛ ni ekɛha amɛ lɛ ji duromɔ kɛha maji enumɔ lɛ. Beni Yehowa maa jeŋ muu fɛɛ maŋtsɛ ni eji lɛ nɔ mi lɛ, ekɛɛ Yeremia ni ekɛɛ amɛ akɛ:
“Mi mifee shikpɔŋ lɛ kɛ gbɔmɛi kɛ kooloi ni yɔɔ shikpɔŋ lɛ nɔ lɛ yɛ mihewalɛ kpeteŋkpele lɛ kɛ minine ni mikpã mli lɛ naa, ni miŋɔhaa mɔ fɛɛ mɔ ni misumɔɔ; ni agbɛnɛ lɛ miŋɔ nɛkɛ shikpɔji nɛɛ fɛɛ miwo Nebukadnezar, Babel maŋtsɛ lɛ ni ji mitsulɔ lɛ dɛ, ni miŋɔ jwɛiaŋ kooloi tete mihalɛ ni amɛsɔmɔlɛ. Ni jeŋmaji fɛɛ aaasɔmɔlɛ kɛ ebi [Evilmerodach] kɛ enabi [Belshazar] aahu kɛyashi beyinɔ ni lɛ hu eshikpɔŋ lɛ be aaashɛ, ni aaaha esɔmɔ jeŋmaji babaoo kɛ maŋtsɛmɛi agboi.”—Yer. 27:5-7; 2 Maŋts. 25:27; Dan. 5:1, 11, 18, 22.
23. Be enyiɛ esani amɛfee nyɔji yɛ Babilon, ni mɛni baaba maŋ ni baate shi ashi Yehowa kitã lɛ nɔ?
23 Nohewɔ lɛ yɛ Yehowa fãmɔ naa lɛ ebaaye be kplaŋŋ—efii 70 sɔŋŋ—nɔ̃ mli ni maji ni Babilon Nɔyeli lɛ baatua lɛ baaba nyɔŋyeli kɔŋtso shishi. Nakai nyɔŋyeli lɛ ji nɔni akɛ kpãi kɛ kɔŋtsei ni Yehowa kɛɛ Yeremia akɛ efee ni ekɛha maŋsɛɛ maji anɔ bɔfoi ni ba Maŋtsɛ Zedekia ŋɔɔ lɛ fee he mfoniri. Nakai maji lɛ atuatsemɔ lɛ nyɛŋ akũ Nyɔŋmɔ kitã lɛ mli.
“Ni aaaba mli akɛ jeŋmaŋ loo maŋtsɛyeli ni sɔmɔɔɔ lɛ Nebukadnezar, Babel maŋtsɛ lɛ, . . . mikɛ klante kɛ hɔmɔ kɛ gbelehela aaawo nakai jeŋmaŋ lɛ nyɔmɔ, kɛyashi beyinɔ ni matsɔ enine nɔ mapleneamɛ, Yehowa kɛɛ.”—Yer. 27:8.
24. Mɛni hewɔ esani Yehowa Tsulɔ-Maŋtsɛ, Yesu Kristo aye maŋtsɛ yɛ ehenyɛlɔi ateŋ bianɛ?
24 Tamɔ bɔni eji yɛ Maŋtsɛ Zedekia gbii lɛ amli lɛ, nakai nɔŋŋ yɛ Yeremia kuu lɛ be lɛ mli ŋmɛnɛ lɛ, ehe baaba sɛɛnamɔ akɛ abo jeŋ fɛɛ Nuntsɔ Maŋtsɛ lɛ ŋaawooi atoi fe ni aaabo daimonioi lɛ atoi. (Yer. 27:9-11) Yɛ anɔkwale mli lɛ wɔsumɔɔɔ ni wɔkɛ wɔhe awo jeŋ fɛɛ yinɔ ni akpaŋɔɔ ashiɔ Yehowa Tsulɔ-Maŋtsɛ, Yesu Kristo lɛ mli. Yeremia kuu lɛ ni afɔ amɛ mu lɛ kɛ amɛshiɛmɔi babaoo lɛ ebɔ maŋkwramɔŋ nɔyelɔi, titri mɛi ni yɔɔ Kristendom mli lɛ kɔkɔ, shi nɔyelɔi lɛ miisumɔ ni amɛhi Jeŋmaji Ekomefeemɔ lɛ mli. (Yer. 27:12-15; Kpoj. 17:12, 13) Amɛhiɛ amɛ-jakumaŋ maŋtsɛyelii lɛ amli kpɛŋŋ ni amɛkpɛlɛɛɛ kwraa ni amɛkɛ amɛkɔji awo Yehowa Tsulɔ-Maŋtsɛ lɛ apã lɛ shishi. Akɛni amɛbuuu Jeŋmaji Abei lɛ anaagbee yɛ 1914 lɛ hiɛdɔɔsane hewɔ lɛ, maŋkwramɔŋ nɔyelɔi lɛ yɔseee akɛ amɛfata jeŋ fɛɛ yinɔkpaŋmɔ ni akɛshiɔ Yehowa Tsulɔ-Maŋtsɛ lɛ jeŋ fɛɛ nɔyeli lɛ he. Shi tamɔ bɔni Yehowa “tsulɔ” Nebukadnezar ŋmɛ Zedekia gbɛ akɛ eye Yuda nɔ maŋtsɛ lɛ, nakai nɔŋŋ eji kɛha maŋkwramɔŋ nɔyelɔi lɛ kɛ mɛi ni yɔɔ Kristendom mli lɛ bianɛ. Aŋmɛ amɛ gbɛ kɛjɛ 1914 akɛ amɛya nɔ amɛye amɛmaŋkwramɔŋ saji lɛ. Enɛ hewɔ lɛ esani Yehowa Tsulɔ-Maŋtsɛ lɛ aye maŋtsɛ yɛ ehenyɛlɔi, eyinɔkpalɔi lɛ ateŋ bianɛ.
25. (a) Akɛni maŋtsɛmɛi lɛ sumɔɔɔ ni amɛboɔ toi hewɔ lɛ, namɛi aŋɔɔ esani Yeremia kuu lɛ kɛ shɛɛwiemɔ lɛ aya? (b) Eji gbalɔi ni gbaa heyeli ni abaaná yɛ mra mli lɛ jɛ Yehowa ŋɔɔ kulɛ, mɛɛ sɔlemɔ akɛɛ amɛsɔle yɛ nibii ni eshwɛ lɛ he?
25 Akɛni maŋkwramɔŋ nɔyelɔi anifeemɔ tsɔɔ faŋŋ akɛ amɛkɛ amɛkuɛ wooo Yehowa Tsulɔ ni ji e-Bi ni awolɛ maŋtsɛ yɛ ŋwɛi lɛ ‘apã’ lɛ shishi hewɔ lɛ, mɛni esani Yeremia kuu lɛ afee? Amɛya gbɔmɛi lɛ aŋɔɔ aŋkroaŋkro. Esani Yeremia kuu lɛ ajie yinɔkpalɔi lɛ kpo atsɔɔ mɛi lɛ.
“Bɔni Yehowa kɛɛ nɛ: Nyɛkaboa nyɛgbalɔi ni gbaa haanyɛ akɛ: ‘Naa, etsɛŋ ni aaaŋɔ Yehowa we lɛ nibii lɛ kɛaajɛ Babel kɛaaba ekoŋ!’ lɛ awremɔi lɛ atoi; ejaakɛ amale gbalɛ amɛgbaa amɛhaanyɛ lɛ. Nyɛkaboa amɛ toi; nyɛsɔmɔa Babel maŋtsɛ lɛ, ni nyɛyi aaana wala: mɛɛba ni nɛkɛ maŋ nɛɛ aaatsɔ amaŋfɔ̃? Shi kɛji gbalɔi ji amɛ ni Yehowa wiemɔ yɛ amɛmli lɛ, ha ni amɛkpa Yehowa Zebaot fai moŋ, koni nibii ni eshwɛ yɛ Yehowa we lɛ kɛ Yuda maŋtsɛ lɛ we lɛ kɛ Yerusalem lɛ akaya Babel.”—Yer. 27:16-18.
26. Nɔ̃ najiaŋ ni akɛ nibii lɛ aaakũ sɛɛ kɛba amrɔnɔŋŋ lɛ, mɛni esani eba nibii ni eshwɛ lɛ nɔ yɛ Yehowa wiemɔ naa?
26 No mli lɛ sɔlemɔtsu lɛ kɛ ekulashiŋii lɛ damɔ Yerusalem lolo. Lalakã agbo ni afɔɔ dɛ yɛ mli ni atsɛɔlɛ “ŋshɔ” lɛ kɛ shishi adeka ni akɛholeɔ kã bibii kɛ shianibii krokomɛi ni osɔfoi kɛ Lewibii lɛ kɛtsuɔ nii lɛ yɛ sɔlemɔtsu lɛ kpo lɛ nɔ lolo. Shi nɛkɛ sɔlemɔtsu mli nibii krokomɛi babaoo nɛɛmɛi hu?
“Ejaakɛ bɔni Yehowa Zebaot, Israel Nyɔŋmɔ lɛ, kɛɛ yɛ nibii ni eshwɛ yɛ Yehowa we lɛ kɛ maŋtsɛwe lɛ kɛ Yerusalem lɛ ahewɔ nɛ: Akɛamɛ aaatee Babel, ni amɛaahi jɛi kɛyashi beyinɔ ni mayasara amɛ, ni mikɛamɛ aaaba abato biɛnɛɛ ekoŋŋ, Yehowa kɛɛ.”—Yer. 27:19-22.
27. (a) Mɛni Yehowa wiemɔ lɛ tsɔɔ yɛ jeŋ fɛɛ yinɔkpaŋmɔ lɛ he? (b) Nohewɔ lɛ mɛɛ gbɛ ni wɔɔɔkɔ lɛ baaha wɔye Yehowa tatsɛnukpa lɛ kunimyeli yibii lɛ eko yɛ Gbɛjianɔtoo Hee lɛ mli?
27 Mɛni Yehowa wiemɔ nɛɛ tsɔɔ? No ji akɛ: Jeŋ fɛɛ yinɔkpaŋmɔ yɛ Yehowa “tsulɔ” lɛ nɔyeli he lɛ baafee efolo. Esani nyɔŋmɔiajamɔŋ gbalɔi kɛ ŋkunyaayelɔi ni egba nibii ni baaba lɛ amɛto Iɛ afee amalelɔi, ni eha mɛi ni heɔ amɛnɔ amɛyeɔ lɛ adu gbɛ kɛbote hiɛkpatamɔ mli. Kɛji wɔjie wɔtoii kɛjɛ amɛhe lɛ ebaafee yibaamɔ eha wɔ. Esaaani wɔkɛ wɔhe fɔɔ Jeŋmaji Ekomefeemɔ aloo jeŋ fɛɛ gbɛjianɔtoo kroko ko nɔ, shi moŋ wɔkɛ wɔhe afɔ Yehowa maŋtsɛyeli ni yɔɔ lɛ diɛŋtsɛ e-Tsulɔ-Maŋtsɛ, Yesu Kristo dɛ lɛ nɔ. Yɛ Kristofoi ahe ni amɛkɛwooo maŋsaji amli yɛ je nɛɛ mli maŋkwramɔsaji kɛ bei amli lɛ hewɔ lɛ, wɔbaaba wɔhe shi koni wɔkɛ wɔkɔji awo mɔni Yehowa ehalalɛ ni efiɔ esɛɛ akɛ etatsɛnukpa yɛ “Nyɔŋmɔ Ofe lɛ gbi wulu lɛ nɔ ta” yɛ Harmagedon lɛ apã lɛ shishi. Enɛ baaha wɔye e-nunyam kunimyeli yibii lɛ eko yɛ Yehowa jalɛ gbɛjianɔtoo hee lɛ mli.a
[Shishigbɛ niŋmai]
a Ajie kɛjɛ November 1, 1979 Blɔfo Buu-Mɔɔ lɛ mli.