15 Naajɔlɛ hetoo lɛ, ekuɔ mlila naa,+
Shi wiemɔ ni dɔɔ mɔ lɛ, eteɔ mlifu shi.+
2 Hiɛshikalɔi alilɛi kɛ nilee tsuɔ nii jogbaŋŋ,+
Shi kwashiai anaabu jieɔ buulufeemɔ kpo.
3 Yehowa hiŋmɛii yɛ he fɛɛ he,
Ekwɛɔ gbɔmɛi fɔji kɛ gbɔmɛi kpakpai fɛɛ.+
4 Naajɔlɛ lilɛi lɛ, eji wala tso,+
Shi lakamɔ wiemɔi lɛ, egbeɔ mɔ mumɔ.
5 Buulu lɛ, ebuuu epapa tsɔsemɔ,+
Shi mɔ ni hiɛ tɛ̃ lɛ, ekpɛlɛɔ jajemɔ.+
6 Jwetrii babaoo yɛ jalɔ shĩa,
Shi mɔ fɔŋ nibaa nii hãa enáa sane.+
7 Hiɛshikalɔi anaabu gbɛɔ nilee eshwãa,+
Shi kwashia tsui bɛ nakai.+
8 Mɛi fɔji afɔle lɛ, Yehowa miihi,+
Shi jalɔi asɔlemɔ hãa enáa miishɛɛ.+
9 Mɔ fɔŋ gbɛ lɛ, Yehowa miihi,+
Shi esumɔɔ mɔ ni tiuɔ jalɛ sɛɛ.+
10 Mɔ ni jeɔ gbɛ lɛ nɔ lɛ, enaa tsɔsemɔ tamɔ nɔ fɔŋ,+
Shi mɔ fɛɛ mɔ ni nyɛɔ jajemɔ lɛ, ebaagbo.+
11 Yehowa naa Gbonyobu lɛ kɛ hiɛkpatamɔ bu lɛ mli faŋŋ.+
Enyiɛ nɔŋŋ ni enaŋ gbɔmɛi abii atsuii amli!+
12 Buulu lɛ, esumɔɔɔ mɔ ni jajeɔ lɛ lɛ.+
Eyaŋ hiɛshikalɔi aŋɔɔ.+
13 Miishɛɛ tsui hãa mɔ tseɔ ehiɛ,
Shi tsuiŋdɔlɛ gbeɔ mɔ mumɔ.+
14 Tsui ni nuɔ nii ashishi lɛ taoɔ nilee,+
Shi kwashia naabu kɛ buulufeemɔ lɛɔ ehe.+
15 Nɔnalɔ gbii fɛɛ lɛ, gbii fɔji ni,+
Shi mɔ ni yɔɔ miishɛɛ tsui lɛ, eyeɔ gbi jurɔ daa.+
16 Nii fioo ni Yehowa gbeyeishemɔ fata he lɛ,+
Ehi fe ninámɔ babaoo kɛ ehe ŋkɔmɔyeli. +
17 Yelibai folo ni suɔmɔ yɔɔ he lɛ,+
Ehi fe tsinanuu ni eshwi ni nyɛɛ yɔɔ he.+
18 Mɔ ni tsui baa mramra lɛ, eteɔ béi shi,+
Shi mɔ ni mli fuuu mra lɛ, ejɔɔ béi he.+
19 Anihaolɔ gbɛ tamɔ ŋmei afabaŋ,+
Shi jalɔ gbɛ tamɔ gbɛjegbɛ ni nɔ ja.+
20 Bi ni hiɛ kã shi lɛ, ehãa epapa náa miishɛɛ,+
Shi kwashia lɛ, ebuuu emami.+
21 Mɔ ni bɛ jwɛŋmɔ lɛ,+ enyaa buulufeemɔ he,
Shi mɔ ni kɔɔ sane sɛɛ lɛ, eyaa ehiɛ tɛ̃ɛ.+
22 Kɛ́ ajinatoo bɛ lɛ, yiŋtoi feɔ efolo,
Shi kɛ́ ŋaawolɔi pii yɛ lɛ, nibii yaa nɔ jogbaŋŋ.+
23 Kɛ́ gbɔmɔ hã hetoo ni ja lɛ, enáa miishɛɛ,+
Ni wiemɔ ni awieɔ yɛ be ni sa mli lɛ—ehi waa diɛŋtsɛ!+
24 Wala gbɛ kwɔɔ kɛyaa mɔ ni yɔɔ sɛɛyoomɔ lɛ ŋɔɔ,+
Koni ejie lɛ kɛje gbɛ ni kpelekeɔ shi kɛyaa Gbonyobu lɛ mli lɛ nɔ.+
25 Yehowa baakumɔ henɔwolɔ shĩa eshwie shi,+
Shi ebaabu yoo okulafo husu lɛ he.+
26 Yehowa miihi mɔ fɔŋ ŋaatsɔi lɛ,+
Shi wiemɔi ni ŋɔɔ lɛ, amɛhe tse yɛ ehiɛ.+
27 Mɔ ni náa sɛɛnamɔ gbonyo lɛ, ekɛ sane fɔŋ baa lɛ diɛŋtsɛ eshĩabii anɔ,+
Shi mɔ ni nyɛɔ nyɔɔŋnii hemɔ lɛ, ebaaya nɔ ehi shi.+
28 Jalɔ tsui jwɛŋɔ sane nɔ dani ehãa hetoo,+
Shi mɛi fɔji anaabu jieɔ nibii gbohii akpo.
29 Yehowa kɛ mɛi fɔji ateŋ jekɛ,
Shi enuɔ jalɔi asɔlemɔi.+
30 Kɛ́ mɔ ko tse ehiɛ ehã bo lɛ, ehãa onáa miishɛɛ;
Amaniɛbɔɔ kpakpa hãa wui náa hewalɛ.+
31 Mɔ ni boɔ jajemɔ ni hãa wala toi lɛ,
Abuɔ lɛ ashiɔ hiɛshikalɔi anɔ.+
32 Mɔ fɛɛ mɔ ni mɔɔɔ tsɔsemɔ mli lɛ, ebuuu ewala,+
Shi mɔ fɛɛ mɔ ni boɔ jajemɔ toi lɛ, enuɔ nii ashishi.+
33 Yehowa gbeyeishemɔ ji tsɔsemɔ ni hãa mɔ hiɛ kãa shi,+
Ni anunyam nyiɛɔ heshibaa sɛɛ.+