Nyɛwoa Mlijɔlɛ!
“Akɛ nɔ ni Nyɔŋmɔ halamɔbii, mɛi krɔŋkrɔŋi kɛ suɔmɔmɛi ji nyɛ nɛɛ lɛ, nyɛwoa musuŋtsɔlɛ, mlihilɛ, heshibaa jwɛŋmɔ, mlijɔlɛ, tsuishitoo.”—KOLOSEBII 3:12.
1-3. Mɛni bɔfo Paulo wie yɛ Kolosebii 3:12-14 yɛ mlijɔlɛ kɛ sui krokomɛi ni Nyɔŋmɔ gbeyeishemɔ yɔɔ mli lɛ ahe?
YEHOWA kɛ mfoniri-feemɔ mli hehaanii ni hi fe fɛɛ haa ewebii. Yɛ anɔkwale mli lɛ, esa akɛ mɛi fɛɛ ni taoɔ eduromɔ lɛ awo atade ni akɛ mlijɔlɛ kpaai ni wa elo. Su ni tamɔ nɛkɛ shɛjeɔ mɔ mii, ejaakɛ ebaa haomɔ kɛ shihilɛi ni nɔnyɛɛ yɔɔ mli lɛ ashi. Ebuɔ mɔ he hu, ejaakɛ etsĩɔ béi naa.
2 Bɔfo Paulo wo nanemɛi Kristofoi ni afɔ amɛ mu lɛ hewalɛ akɛ: “No hewɔ lɛ, akɛ nɔ ni Nyɔŋmɔ halamɔbii, mɛi krɔŋkrɔŋi kɛ suɔmɔmɛi ji nyɛ nɛɛ lɛ, nyɛwoa musuŋtsɔlɛ, mlihilɛ, heshibaa jwɛŋmɔ, mlijɔlɛ, tsuishitoo.” (Kolosebii 3:12) Hela feemɔ-wiemɔ ni atsɔɔ shishi akɛ “nyɛwoa” lɛ tsɔɔ nifeemɔ ko ni akɛ hehiamɔ loo oyaiyeli baafee. Mɛi ni afɔ amɛ mu, ni ahala amɛ, mɛi krɔŋkrɔŋi, ni Nyɔŋmɔ sumɔɔ amɛ lɛ shashaoŋ shi yɛ su ni tamɔ mlijɔlɛ ni amɛaawo lɛ mli.
3 Paulo kɛfata he akɛ: “Ni kɛji mɔ ko kɛ mɔ ko na sane ko lɛ, nyɛnanaa nyɛhaa nyɛhe ni nyɛkɛ-fafaa nyɛhe, taakɛ bɔ ni [Yehowa] hu ŋɔfa nyɛ lɛ, nakai nyɛ hu nyɛfea; shi enɛɛmɛi fɛɛ sɛɛ lɛ, nyɛwoa suɔmɔ ni ji emuuyeli kpaa lɛ.” (Kolosebii 3:13, 14) Suɔmɔ, mlijɔlɛ, kɛ Nyɔŋmɔ gbeyeishemɔ sui krokomɛi haa Yehowa Odasefoi ‘feɔ ekome kɛhiɔ shi.’—Lala 133:1-3.
Aatao Nɔkwɛlɔi ni Mli Jɔ
4. Anɔkwa Kristofoi woɔ mfoniri-feemɔ mli atade ni akɛ mɛɛ sui elo?
4 Anɔkwa Kristofoi bɔɔ mɔdɛŋ ni ‘amɛgbe amɛgbɔmɔtso lɛ he nii ni ji ajwamaŋbɔɔ, nyaŋemɔ nitsumɔ, bɔlɛnamɔ he akɔnɔ, akɔnɔ fɔŋ, kɛ hiɛjoomɔ,’ ni amɛbɔɔ mɔdɛŋ ni amɛjie atadei memeji ni kpaai ni akɛlo lɛ ji mlifu, mlila, nishaianii, musubɔɔ wiemɔ, kɛ hiɛgbeji awiemɔi lɛ kɛjɛ amɛhe. (Kolosebii 3:5-11) Amɛjieɔ “gbɔmɔ momo” lɛ ni amɛwoɔ “gbɔmɔ hee” lɛ, atade hee lɛ. (Efesobii 4:22-24) Amɛ atade hee, ni akɛ musuŋtsɔlɛ, mlihilɛ, heshibaa jwɛŋmɔ, mlijɔlɛ kɛ tsuishitoo lo lɛ yeɔ ebuaa amɛ ni amɛsaa amɛteŋ bei ni amɛhiɔ shi akɛ mɛi ni sheɔ Nyɔŋmɔ gbeyei.—Mateo 5:9; 18:33; Luka 6:36; Filipibii 4:2, 3.
5. Mɛni yɔɔ bɔ ni Kristofoi asafo lɛ tsuɔ nii ehaa lɛ he ni haa efeɔ miishɛɛ sane akɛ aaafee efa lɛ?
5 Yɛ be babaoo mli lɛ gbɔmɛi ni asusuɔ akɛ amɛye omanye yɛ je nɛɛ mli lɛ bɛ musuŋtsɔlɛ, yiwalɔi yɛ bei komɛi amli po. (Abɛi 29:22) Kwɛ bɔ ni mɔ mii shɛɔ ehe ha akɛ yɛ Yehowa webii ateŋ lɛ enɛ yɛ sɔrɔto! Kristofoi asafo lɛ tsuuu nii tamɔ bɔ ni mɛi komɛi tsuɔ nitsumɔi komɛi lɛ—yɛ gbɛ ni mɔɔ shi, shi kɛ yiwaa ni baaha gbɔmɛi afee mɛi ni bɛ miishɛɛ lɛ nɔ. Shi moŋ, eji miishɛɛ sane akɛ mɔ ko aaafee asafo lɛ fa. Yiŋtoo lɛ ekome ji akɛ mlijɔlɛ ji nilee ni Kristofoi fɛɛ, titri lɛ nɔ ni hii ni amɛhe esa akɛ amɛtsɔɔ amɛnanemɛi heyelilɔi lɛ anii lɛ jieɔ lɛ kpo lɛ fa. Hɛɛ, miishɛɛ jɛɔ tsɔsemɔ kɛ ŋaawoo ni onukpai ni ahala amɛ ni kɛ “nilee kpoofeemɔ” tsɔɔ nii lɛ kɛhaa lɛ mli baa.—Yakobo 3:13.
6. Mɛni hewɔ esa akɛ Kristofoi onukpai afee mɛi ni mli jɔ lɛ?
6 Nyɔŋmɔ webii lɛ amumɔ loo su titri lɛ biɔ ni hii ni akɛ asafo lɛ nɔkwɛmɔ ewo amɛdɛŋ lɛ afee mɛi ni he jɔ, hiɛshikalɔi, kɛ mɛi ni yɔɔ saneshishinumɔ. (1 Timoteo 3:1-3) Yehowa tsuji tamɔ gwantɛŋi ni he jɔ, amɛjeee abotiai ni kuɛŋ ti, teji-okpɔŋɔi ni leee nii, loo klaji fulɔi. (Lala 32:9; Luka 10:3) Akɛni amɛtamɔ gwantɛŋi hewɔ lɛ, esa akɛ akɛ amɛ aye yɛ mlijɔlɛ kɛ musuŋtsɔlɛ naa. (Bɔfoi lɛ Asaji 20:28, 29) Hɛɛ, Nyɔŋmɔ miikpa onukpai lɛ agbɛ ni amɛhe ajɔ, amɛmli ahi, mɛi ni yɔɔ suɔmɔ, ni toɔ amɛtsui amɛhaa etooi lɛ.—Ezekiel 34:17-24.
7. Mɛɛ gbɛ esa akɛ onukpai atsɔ nɔ atsɔɔ mɛi krokomɛi anii loo amɛye amɛbua mɛi ni he yeɔ yɛ mumɔŋ lɛ?
7 Akɛ “Nuŋtsɔ lɛ tsulɔ lɛ,” esa akɛ onukpa lɛ “mli ajɔ aha mɛi fɛɛ, mɔ ni le nitsɔɔmɔ, mɔ ni toɔ etsui shi ehaa efɔŋ, mɔ ni kɛ mlijɔlɛ wieɔ tsɔɔ mɛi ni kuɔ enaa, akɛ aleenɔ Nyɔŋmɔ aaaha amɛ tsuitsakemɔ ni amɛle anɔkwale lɛ.” (2 Timoteo 2:24, 25) Esa akɛ nɔkwɛlɔi ni ji Kristofoi lɛ ajie mlijɔlɛ kɛ mɛi ahe susumɔ kpo beni amɛbɔɔ mɔdɛŋ ni amɛye amɛbua mɛi ni he yeɔ yɛ mumɔŋ lɛ, ejaakɛ tooi lɛ ji Nyɔŋmɔ nii. Esaaa akɛ onukpai lɛ kɛ amɛ yeɔ tamɔ apaafoi feɔ amɛnii shi moŋ esa akɛ amɛhe ajɔ, tamɔ Tookwɛlɔ Kpakpa, Yesu Kristo.—Yohane 10:11-13.
8. Mɛni ba Mose ni he jɔ lɛ nɔ, ni mɛni hewɔ?
8 Yɛ bei komɛi amli lɛ ebaawa kɛha onukpa lɛ akɛ eeehiɛ mumɔ ni he jɔ mli. “Nɛkɛ nuu Mose nɛɛ, ehe jɔ fe gbɔmɛi fɛɛ ni yɔɔ shikpɔŋ nɛɛ nɔ.” (4 Mose 12:3) Ni kɛlɛ, beni Israelbii lɛ naaa nu yɛ Kadesh lɛ, amɛkɛ Mose bé ni amɛshwa lɛ akɛ enyiɛ amɛhiɛ kɛjɛ Mizraim kɛba ŋa ni nu bɛ nɔ. Yɛ nɔ ni Mose kɛ heshibaa ŋmɛi etsui shi yɛ mli lɛ fɛɛ sɛɛ lɛ, ekɛ mlifu wie waa eshi amɛ. Lɛ kɛ Aaron yadamɔ gbɔmɛi lɛ hiɛ, ni amɛgbala jwɛŋmɔ kɛba amɛ diɛŋtsɛ amɛnɔ, ni Mose kɛɛ: “Nyɛboa toi ko, nyɛ atuatselɔi! Ani wɔɔjie nu yɛ tɛsaa nɛɛ mli wɔha nyɛ?” Ni Mose kɛ tso lɛ tswa tɛsaa lɛ shii enyɔ, ni Nyɔŋmɔ ha “nu tue babaoo” kɛjɛ mli kɛha gbɔmɛi lɛ kɛ kooloi lɛ. Yehowa nyaaa he ejaakɛ Mose kɛ Aaron efeee Lɛ krɔŋkrɔŋ, no hewɔ lɛ Mose naaa hegbɛ akɛ eeenyiɛ Israelbii lɛ ahiɛ kɛaaya Shiwoo Shikpɔŋ lɛ nɔ.—4 Mose 20:1-13; 5 Mose 32:50-52; Lala 106:32, 33.
9. Abaanyɛ aka onukpa lɛ mlijɔlɛ lɛ akwɛ yɛ mɛɛ gbɛ nɔ?
9 Abaanyɛ aka Kristofonyo onukpa lɛ mlijɔlɛ lɛ hu akwɛ yɛ gbɛi sɔrɔtoi pii anɔ. Akɛ nɔkwɛmɔ nɔ lɛ, Paulo bɔ Timoteo kɔkɔ akɛ, mɛi komɛi baate shi ‘ni woɔ amɛhe nɔ’ ni “he miiye kɛ ŋwanejeei kɛ naataomɔi.” Paulo kɛfata he akɛ: “Ni hiɛkɔɔ, bei, musubɔɔ wiemɔi, mɛi ahe wiemɔi fɔji . . . ni ji yakayaka bolɔmɔi ni gbɔmɛi ni amɛjwɛŋmɔi efite ni ashɔ anɔkwale lɛ yɛ amɛdɛŋ” lɛ kɛbaa. Nɔkwɛlɔ Timoteo akafee keketee yɛ enɛ he, shi moŋ esa akɛ “ejo nɛkɛ nibii nɛɛ naa foi,” koni enyiɛ “jalɛ, Nyɔŋmɔ jamɔ, hemɔkɛyeli, suɔmɔ, tsuishiŋmɛɛ kɛ mlijɔlɛ sɛɛ.”—1 Timoteo 6:4, 5, 11.
10. Esa akɛ Tito akai asafoi lɛ yɛ mɛni he?
10 Eyɛ mli akɛ ehe miihia ni onukpai ahe ajɔ moŋ, shi esa akɛ amɛfee shiŋŋ yɛ nɔ ni ja lɛ he. Nakai Tito ji, ni ekai mɛi ni kɛ asafoi ni yɔɔ Kreta lɛ bɔɔ lɛ akɛ “amɛkawie mɔ ko he efɔŋ, amɛkabe, shi moŋ amɛfee kpoo, ni amɛkɛ amɛhe atsɔɔ mɔ fɛɛ mɔ akɛ amɛhe jɔ.” (Tito 3:1, 2) Yɛ be mli ni etsɔɔ nɔ hewɔ ni esa akɛ Kristofoi ahe ajɔ aha mɛi fɛɛ lɛ, Tito baagbala jwɛŋmɔ kɛya bɔ ni Yehowa ejie mlihilɛ kɛ suɔmɔ kpo lɛ nɔ. Nyɔŋmɔ hereee heyelilɔi lɛ ayiwala yɛ jalɛ nii ni amɛfee hewɔ, shi moŋ yɛ emɔbɔnalɛ kɛtsɔ Yesu Kristo nɔ lɛ hewɔ. Yehowa mlijɔlɛ kɛ tsuishitoo lɛ tsɔɔ yiwalaheremɔ kɛhaa wɔ hu. No hewɔ lɛ taakɛ Tito ji lɛ, esa akɛ ŋmɛnɛŋmɛnɛ beaŋ onukpai lɛ hu akai asafoi lɛ ni amɛba amɛhe shi amɛha Nyɔŋmɔ, ni amɛkase Lɛ kɛtsɔ mɛi krokomɛi ni amɛkɛ amɛ aaaye yɛ mlijɔlɛ naa lɛ nɔ.—Tito 3:3-7; 2 Petro 3:9, 15.
Mlijɔlɛ Kudɔɔ Ŋaawolɔ Nilelɔ Lɛ
11. Taakɛ Galatabii 6:1, 2 tsɔɔ lɛ, esa akɛ akɛ ŋaawoo aha yɛ mɛɛ gbɛ nɔ?
11 Shi kɛji akɛ mfoniri-feemɔ mli too ko etɔ̃ hu? Paulo kɛɛ: “Anyɛmimɛi, kɛji nɔtɔmɔ ko banina mɔ ko trukaa lɛ, nyɛ mɛi ni nyɛji mumɔŋ gbɔmɛi lɛ, nyɛsaa nakai mɔ lɛ ekoŋŋ yɛ mlijɔlɛ mumɔ mli; ni ole ohe nɔ kwɛmɔ, koni bo hu akakao. Nyɛjatsui lɛ, nyɛkpeekpeea nyɛhe nyɛterea, ni nakai nyɛaaye Kristo mla lɛ nɔ.” (Galatabii 6:1, 2) Ŋaawoo mɔɔ shi jogbaŋŋ kɛji akɛha yɛ mlijɔlɛ mumɔ naa. Kɛji akɛ onukpai miibɔ mɔdɛŋ ni amɛwo mɔ ni mli efu lɛ ŋaa po lɛ, esa akɛ amɛjie henɔyeli kpo, ni amɛyɔse akɛ, “lilɛi ni naa jɔ lɛ, ekuɔ wu.” (Abɛi 25:15) Wiemɔ ni mli jɔ bɔdɔɔ lɛ baanyɛ aha mɔ ni yɔɔ keketee tamɔ wu lɛ po he ajɔ, ni bɔ ni ewa ha lɛ baaba shi.
12. Mumɔ ni he jɔ yeɔ ebuaa ŋaawolɔ lɛ yɛ mɛɛ gbɛ nɔ?
12 Yehowa ji Tsɔɔlɔ ni mli jɔ, ni mlijɔlɛ gbɛ ni etsɔɔ nɔ etsɔɔ nii lɛ mɔɔ shi yɛ asafo lɛ mli. Nakai enɛ ji, titri lɛ yɛ be mli ni onukpai naa akɛ ehe miihia ni amɛwo mɛi ni mumɔŋ yelikɛbuamɔ he hiaa amɛ lɛ ŋaa lɛ. Kaselɔ Yakobo ŋma akɛ: “Namɔ ji nilelɔ kɛ sanesɛɛkɔlɔ yɛ nyɛteŋ? Ha ni ekɛ jeŋba kpakpa atsɔɔ lɛ diɛŋtsɛ enitsumɔi lɛ yɛ nilee kpoofeemɔ mli.” Mlijɔlɛ jɛɔ bulɛ kɛ shidaa ni akɛhaa yɛ “nilee ni jɛ ŋwɛi lɛ” he, kɛ mɔ lɛ diɛŋtsɛ fatɔɔi ayɔsemɔ yɛ heshibaa mli lɛ mli. Mumɔ ni mli jɔ ni baa ehe shi lɛ buɔ ŋaawolɔ lɛ he koni ekawie wiemɔi komɛi kɛ tɔmɔi ni yeɔ awui, ni ehaa eŋaawoo lɛ hu feɔ nɔ ni yɔɔ mlɛo akɛ aaakpɛlɛ nɔ.—Yakobo 3:13, 17.
13. Mɛɛ gbɛ nɔ “nilee kpoofeemɔ” saa gbɛ ni atsɔɔ nɔ akɛ ŋaawoo haa lɛ he yɛ?
13 “Nilee kpoofeemɔ” lɛ haaa ŋaawolɔ lɛ afee mɔ ni susuuu saji ahe ni ewieɔ kpookpoo loo eyɔɔ keketee. Ni kɛlɛ, onukpa lɛ akaha naanyobɔɔ loo mɔ ko hiɛ duromɔ ni eeena lɛ miitsirɛ lɛ koni ewie nibii ni akɛaasa mɛi ahiɛ fe ni ekɛ ŋaawoo ni damɔ Nyɔŋmɔ Wiemɔ lɛ nɔ lɛ aaaha tɛɛ yɛ mlijɔlɛ mumɔ mli. (Abɛi 24:24-26; 28:23) Amnon miisumɔ ŋaawoo ni enine shɛ nɔ kɛjɛ etsɛ nyɛmi bi lɛ dɛŋ lɛ, shi egbo yɛ enɛ hewɔ. (2 Samuel 13:1-19, 28, 29) No hewɔ lɛ, esaaa akɛ ŋmɛnɛŋmɛnɛ beaŋ onukpai lɛ gbɔjɔɔ Biblia shishitoo mlai lɛ amli koni amɛkɛha mɔ ko henilee he ajɔ lɛ, ejaakɛ nakai feemɔ kɛ mɔ lɛ wala baawo oshara mli. Taakɛ Paulo ji lɛ, onukpai akagbala “Nyɔŋmɔ ŋaawoo lɛ fɛɛ” ni amɛaakɛɛ gbɔmɛi lɛ asɛɛ. (Bɔfoi lɛ Asaji 20:26, 27; 2 Timoteo 4:1-4) Kristofonyo ŋaawolɔ ni eda yɛ mumɔŋ lɛ jieɔ Nyɔŋmɔ gbeyeishemɔ kpo ni ekɛ ŋaawoo ni ja haa kɛ mlijɔlɛ ni nilee yɔɔ mli.
14. Mɛni hewɔ esa akɛ onukpa lɛ akwɛ jogbaŋŋ koni ekɛkpɛ yiŋ ni esa akɛ mɛi krokomɛi afee lɛ eha amɛ lɛ?
14 Mlijɔlɛ ni ŋwɛi nilee fata he lɛ baatsi onukpa ko naa koni ekabi nibii ni yɔɔ keketee. Esa akɛ eyoo hu akɛ nilee bɛ mli ni esaaa hu akɛ ekpɛɔ yiŋ ni esa akɛ mɔ kroko afee aha lɛ diɛŋtsɛ ehe lɛ ehaa mɔ lɛ. Kɛji akɛ onukpa ko kpɛ yiŋ eha mɛi krokomɛi lɛ, akɛ nɔ ni ehiii ni baajɛ mli aba lɛ he sɔ̃ kɛ shwamɔ baafɔ enɔ. Onukpa lɛ baanyɛ agbala jwɛŋmɔ kɛya nɔ ni Biblia lɛ kɛɔ lɛ nɔ, shi kɛ Ŋmalɛ mli mla ko bɛ yɛ sane ko he lɛ, belɛ esa akɛ mɔ aŋkro lɛ kojomɔ kɛ ehenilee atsɔɔ lɛ nɔ ni ebaafee loo efeŋ. Taakɛ Paulo kɛɛ lɛ: “Mɔ fɛɛ mɔ aaatere lɛ diɛŋtsɛ ejatsu.” (Galatabii 6:5; Romabii 14:12) Shi, abaanyɛ aye abua mɔ ni taoɔ nibii amli ale lɛ koni ekpɛ eyiŋ yɛ gbɛ ni ja nɔ kɛtsɔ saji ni onukpa lɛ aaabi ni baaye abua mɔ lɛ koni esusu ŋmalɛi ni kɔɔ gbɛi ni ebaanyɛ ehala ni ka shi ha lɛ lɛ ahe lɛ nɔ.
15. Mɛni esa akɛ afee kɛ onukpa lɛ leee sanebimɔ ko hetoo lɛ?
15 Kɛji akɛ onukpa lɛ leee sanebimɔ ko hetoo lɛ, esaaa akɛ ehaa sane lɛ hetoo ko kɛkɛ koni ekɛna bulɛ eha ehe. Mlijɔlɛ ni jɛ nilee mli lɛ haŋ eka eyiŋ ewie nɔ ko, koni ekolɛ eha hetoo ko ni ejaaa ni yɛ sɛɛ mli lɛ ekɛ naagba aaaba. “Dioofeemɔ be yɛ, ni wiemɔ be yɛ.” (Jajelɔ 3:7; okɛto Abɛi 21:23 he.) Esa akɛ onukpa lɛ ‘awie’ yɛ be mli ni ele sanebimɔ ko hetoo aloo epɛi nibii amli bɔ ni sa ni eeenyɛ eha hetoo ni ja. Jwɛŋmɔ yɛ mli akɛ aaashi sanebimɔi ni abɛ nɔmimaa yɛ he lɛ ni ahaaa hetoo.—Abɛi 12:8; 17:27; 1 Timoteo 1:3-7; 2 Timoteo 2:14.
Sɛɛnamɔ ni Yɔɔ Ŋaawolɔi Pii Ahe
16, 17. Mɛni hewɔ esa jogbaŋŋ akɛ onukpai akpe ni amɛkɛ amɛhe asusu saji ahe lɛ?
16 Sɔlemɔ kɛ nikasemɔ baaye abua onukpai lɛ ni amɛha sanebimɔi ahetoo ni amɛtsu naagbai ni mli wawai lɛ ahe nii, shi esa akɛ akai akɛ, “kɛ ŋaawolɔi pii yɛ lɛ, amɛnyɛɔ nɔ ko amɛtsuɔ.” (Abɛi 15:22, NW) Nɔ ni jɛɔ onukpai krokomɛi ni akɛ amɛ kpeɔ asusuɔ saji ahe lɛ mli baa ji nilee ni abuaa naa. (Abɛi 13:20) Jeee onukpai fɛɛ yɔɔ niiashikpamɔ loo Biblia mli nilee ni yeɔ egbɔ. No hewɔ lɛ, esa akɛ mlijɔlɛ ni nilee yɔɔ mli atsirɛ onukpa ni he esako tsɔ lɛ koni ebibii onukpai ni yɔɔ nilee babaoo ni amɛ niiashikpamɔ fa lɛ saji, titri lɛ kɛ ehe miihia ni atsu sane ko ni hiɛdɔɔ yɔɔ he lɛ he nii lɛ.
17 Kɛ ahala onukpai koni amɛtsu sane ko ni hiɛdɔɔ yɔɔ mli he nii lɛ, amɛbaanyɛ amɛtao yelikɛbuamɔ yɛ teemɔŋ. Bɔni afee ni eye ebua lɛ ni ekojo Israelbii lɛ, Mose hala “hii ni yɔɔ hewalɛ, ni sheɔ Nyɔŋmɔ gbeyei, ni amɛji anɔkwafoi, ni hiɔ hiɛjoomɔ.” Eyɛ mli akɛ amɛji onukpai moŋ, shi amɛbɛ nilee kɛ niiashikpamɔ ni Mose yɔɔ lɛ eko. No hewɔ lɛ, “saji ni wa lɛ, amɛkɛbaa Mose ŋɔɔ, shi saji bibii fɛɛ lɛ amɛ diɛŋtsɛ amɛyeɔ.” (2 Mose 18:13-27) No hewɔ lɛ kɛ ehe miihia lɛ, onukpai ni miitsu sane ko ni wa he nii ŋmɛnɛ lɛ baanyɛ abi yelikɛbuamɔ kɛjɛ onukpai ni yɔɔ niiashikpamɔ lɛ aŋɔɔ yɛ gbɛ ni ja nɔ, eyɛ mli akɛ amɛ diɛŋtsɛ amɛbaakpɛ amɛyiŋ yɛ naagbee.
18. Mɛni ji nibii titrii ni maa nɔ mi akɛ abaakpɛ yiŋ yɛ gbɛ kpakpa nɔ yɛ be mli ni atsuɔ kojomɔ saji ahe nii lɛ?
18 Yudafoi a-Mishna lɛ kɛɔ akɛ mɛi ni yeɔ saji yɛ akrowai amli yɛ Israel lɛ ayifalɛ soroɔ yɛ hiɛdɔɔ ni yɔɔ sane ni ayeɔ lɛ mli lɛ naa. Sɛɛnamɔ diɛŋtsɛ yɛ ŋaawolɔi ayifalɛ mli, eyɛ mli akɛ yifalɛ pɛ emaaa jalɛsaneyeli nɔ mi moŋ, ejaakɛ mɛi ni fa hu baanyɛ atɔ̃. (2 Mose 23:2) Nibii titrii ni maa nɔ mi akɛ abaakpɛ yiŋ yɛ gbɛ ni ja nɔ lɛ ji Ŋmalɛi lɛ kɛ Nyɔŋmɔ mumɔ lɛ. Nilee kɛ mlijɔlɛ baatsirɛ Kristofoi ni amɛba amɛhe shi amɛha enɛɛmɛi.
Odaseyeli Kɛ Mlijɔlɛ
19. Yɛ mɛɛ gbɛ nɔ mlijɔlɛ yeɔ ebuaa Yehowa webii koni amɛye mɛi krokomɛi odase?
19 Mlijɔlɛ hu yeɔ ebuaa Yehowa tsuji koni amɛye gbɔmɛi ni hiɛ sui sɔrɔtoi fɛɛ lɛ odase. (1 Korintobii 9:22, 23) Akɛni Yesu kɛ mlijɔlɛ tsɔɔ nii hewɔ lɛ, heshibalɔi sheee lɛ gbeyei, taakɛ amɛsheɔ jamɔ mli hiɛnyiɛlɔi ni yi wa lɛ agbeyei lɛ. (Mateo 9:36) Lɛlɛŋ akɛ, emlijɔlɛ gbɛi lɛ gbala “gwantɛŋi,” jeee “abotiai” ni yi wa. (Mateo 25:31-46; Yohane 3:16-21) Eyɛ mli akɛ Yesu kɛ wiemɔi ni wa tsu nii yɛ be mli ni ekɛ osatofoi ni tamɔ abotiai lɛ yeɔ lɛ moŋ, shi esa akɛ Yehowa Odasefoi ajie mlijɔlɛ kpo yɛ be mli ni amɛjajeɔ Nyɔŋmɔ kojomɔ shɛɛ saji ŋmɛnɛ lɛ, ejaakɛ amɛbɛ sanesɛɛkɔmɔ kɛ hegbɛ ni Yesu yɔɔ lɛ eko. (Mateo 23:13-36) Yɛ be mli ni amɛboɔ Maŋtsɛyeli lɛ he sane lɛ ni akɛ mlijɔlɛ shiɛɔ lɛ toi lɛ, ‘mɛi abɔ ni kɛ amɛhe haa naanɔ wala lɛ batsɔmɔɔ heyelilɔi,’ tamɔ bɔ ni mɛi ni tamɔ gwantɛŋi ni nu Yesu shiɛmɔ lɛ fee lɛ.—Bɔfoi lɛ Asaji 13:48.
20. Mɛɛ gbɛ nɔ Biblia kaselɔ lɛ naa he sɛɛ yɛ, kɛ atsɔɔ lɛ nii yɛ mlijɔlɛ mli?
20 Nibii kpakpai baa kɛtsɔɔ odase ni ayeɔ kɛ nii ni atsɔɔ mɛi krokomɛi yɛ mlijɔlɛ mli kɛ sane naatsɔmɔ ni ja, Biblia mli shishitoo mlai, kɛ anɔkwale nɔ ni adamɔɔ akɛ sane fɔɔ amɛhiɛ lɛ nɔ. Petro ŋma akɛ: “Shi Nuŋtsɔ Kristo lɛ, nyɛbua lɛ krɔŋkrɔŋ yɛ nyɛtsuii amli; ni daa nɛɛ nyɛsaa nyɛhe nyɛtoa, koni nyɛna hetoo nyɛha mɔ fɛɛ mɔ ni biɔ nyɛ hiɛnɔkamɔ ni yɔɔ nyɛmli lɛ shishi lɛ, kɛ mlijɔlɛ kɛ gbeyeishemɔ.” (1 Petro 3:15) Nikaselɔ ni atsɔɔ lɛ nii yɛ mlijɔlɛ naa lɛ baanyɛ ajwɛŋ nii ni ekaseɔ lɛ nɔ moŋ fe ni nɔ ko aaagbala ejwɛŋmɔ aloo po ni wiemɔ ni wa ni tamɔ ŋwanejee aaatɔ̃tɔ̃ enane. Taakɛ Paulo ji lɛ, sɔɔlɔi ni kɛ mlijɔlɛ tsɔɔ nii lɛ baanyɛ akɛɛ akɛ: “Wɔtooo mɔ ko mɔ ko pampi yɛ nɔ ko nɔ ko mli, koni akagbe sɔɔmɔ lɛ he guɔ.” (2 Korintobii 6:3) Yɛ bei komɛi amli lɛ, shitee-kɛ-wolɔi po boɔ mɛi ni kɛ mlijɔlɛ tsɔɔ amɛ nii lɛ toi.
Aabi Mlijɔlɛ Kɛmiijɛ Wɔ Fɛɛ Wɔdɛŋ
21, 22. Mlijɔlɛ he baa sɛɛnamɔ kɛhaa Yehowa webii fɛɛ yɛ mɛɛ gbɛ nɔ?
21 Esaaa akɛ awoɔ Kristofoi amlijɔlɛ lɛ tamɔ atade ko ni akɛsa mɛi ni yɔɔ Yehowa gbɛjianɔtoo lɛ sɛɛ lɛ ahiɛ. Nɛkɛ su nɛɛ hu he miihia yɛ wekukpaa ni ka Yehowa webii ateŋ lɛ mli. (Kolosebii 3:12-14; 1 Petro 4:8) Kɛ onukpai kɛ asafoŋ sɔɔlɔi ni mli jɔ fee ekome kɛtsu nii yɛ gbeekpamɔ mli lɛ etswaa asafoi lɛ emaa shi yɛ mumɔŋ. Mlijɔlɛ kɛ sui krokomɛi ni Nyɔŋmɔ gbeyeishemɔ yɔɔ mli ni ajieɔ lɛ kpo lɛ he miihia Yehowa webii lɛ ateŋ mɔ fɛɛ mɔ, ejaakɛ “mla kome” yɔɔ kɛha mɔ fɛɛ mɔ.—2 Mose 12:49; 3 Mose 24:22.
22 Mlijɔlɛ haa toiŋjɔlɛ kɛ miishɛɛ baa Nyɔŋmɔ webii ateŋ. No hewɔ lɛ esa akɛ efee sui ni tamɔ kpãai ni feɔ atade ni Kristofoi fɛɛ woɔ yɛ shia, yɛ asafo lɛ mli, kɛ he fɛɛ he lɛ fa. Hɛɛ, ehe miihia ni Yehowa tsuji fɛɛ awo mlijɔlɛ loo amɛkɛha amɛhe.
Te Obaaha Hetoo Oha Tɛŋŋ?
◻ Mɛni hewɔ esa akɛ Kristofoi onukpai afee mɛi ni he jɔ lɛ?
◻ Mlijɔlɛ kudɔɔ ŋaawolɔ nilelɔ lɛ yɛ mɛɛ gbɛ nɔ?
◻ Mɛɛ sɛɛnamɔ yɔɔ ŋaawolɔi babaoo he?
◻ Mɛni hewɔ sɛɛnamɔ yoo mlijɔlɛ ni akɛaashiɛ lɛ he lɛ?
[Mfoniri ni yɔɔ baafa 17]
Yehowa webii tamɔ gwantɛŋi ni ehe miihia ni akɛ amɛ aye yɛ mlijɔlɛ naa
[He ni Sane lɛ Jɛ]
Garo Nalbandian
[Mfoniri ni yɔɔ baafa 19]
Mlijɔlɛ haa Yehowa webii yeɔ gbɔmɛi ni yɔɔ sui sɔrɔtoi fɛɛ lɛ odase