Yesaia
19 Sane ni awie ashi Ejipt lɛ nɛ:+
Naa! Yehowa ta atatu ni he yɔɔ oya nɔ, ni eeba Ejipt.
Ejipt nyɔŋmɔi ni he bɛ sɛɛnamɔ lɛ ahe baakpokpo yɛ ehiɛ,+
Ni Ejipt tsui baasere yɛ emli.
2 “Mahã Ejiptbii ate shi awo Ejiptbii,
Ni amɛkɛ amɛhe baanɔ,
Mɔ baate shi awo enyɛmi, ni mɔ baate shi awo enaanyo,
Maŋ baate shi awo maŋ, ni maŋtsɛyeli baate shi awo maŋtsɛyeli.
Amɛbaaya amɛnyɔŋmɔi ni he bɛ sɛɛnamɔ lɛ aŋɔɔ,
Amɛbaaya mɛi ni feɔ majik, kɛ mumɔi atsɛlɔi, kɛ klamɔfoi lɛ aŋɔɔ.+
4 Mikɛ Ejipt baawo nuŋtsɔ ko ni yitsoŋ wa dɛŋ,
Ni maŋtsɛ ko ni nineshi wa baaye amɛnɔ,”+ mi, anɔkwa Nuŋtsɔ lɛ, Yehowa, taiatsɛ lɛ, mikɛɛ.
5 Ŋshɔ lɛ mli nu lɛ baagbi,
Ni faa lɛ baamii ni ebaagbi.+
6 Ni fai lɛ baaje fu;
Nilo nujɔi ni yɔɔ Ejipt lɛ baamii ni amɛbaagbi.
Gãlãi lɛ kɛ jwɛi lɛ baakpɔtɔ.+
7 Nibii ni ekwɛ̃kwɛ̃ɛ yɛ Nilo Faa lɛ he, yɛ Nilo lɛ naabu,
Kɛ shikpɔŋ fɛɛ ni yɔɔ Nilo lɛ he,+ ni adu nii yɛ nɔ lɛ hu baagbi.+
Kɔɔyɔɔ baaloo lɛ kɛya, ni ehiŋ shi dɔŋŋ.
8 Ni wolɛi lɛ baaye awerɛho,
Mɛi ni fɔ̃ɔ kpoŋ amɛwoɔ Nilo lɛ mli lɛ baafó,
Ni mɛi ni fɔ̃ɔ amɛyai yɛ nu lɛ mli lɛ anɔ baagbɔ.
10 Abaakumɔ mɛi ni loɔ nii amɛhãa lɛ lɛ;
Apaafoi lɛ fɛɛ baaye awerɛho.*
11 Zoan+ lumɛi lɛ, buului sɔŋŋ ni.
Farao ŋaawolɔi ni hiɛ kã shi fe fɛɛ lɛ woɔ ŋaa ni nilee bɛ mli.+
Te feɔ tɛŋŋ ni okɛɔ Farao akɛ:
“Hiɛshikalɔi lɛ aseshinyo ji mi,
Blema maŋtsɛmɛi lɛ aseshinyo ji mi” lɛ?
12 No lɛ, nɛgbɛ ohiɛshikalɔi lɛ yɔɔ mɔ?+
Kɛ́ amɛle nɔ ni Yehowa, taiatsɛ lɛ, ekpɛ mli yɛ Ejipt he lɛ, hã amɛkɛɛ bo.
13 Zoan lumɛi lɛ feɔ buuluianii;
Ejipt wekui lɛ anɔ onukpai lɛ ehã Ejipt edu gbɛ.
14 Yehowa efɔse yiŋfutumɔ mumɔ eshwie enɔ;+
Ni amɛhã Ejipt edu gbɛ yɛ nɔ fɛɛ nɔ ni efeɔ lɛ mli,
Tamɔ dãatɔlɔ ni miididãa yɛ eshwee mli.
16 Nakai gbi lɛ nɔ lɛ, Ejipt baatsɔ tamɔ yei, ebaakpokpo ni ebaashe gbeyei yɛ Yehowa, taiatsɛ lɛ, nine nɔ ni ewó yɛ enɔ lɛ hewɔ.+ 17 Ni Yuda shikpɔŋ lɛ he baaba gbeyei ahã Ejipt. Kɛ́ atsĩ Yuda gbɛ́i tã nɔŋŋ lɛ, amɛbaashe gbeyei yɛ yiŋ ni Yehowa, taiatsɛ lɛ, ekpɛ eshi amɛ lɛ hewɔ.+
18 Nakai gbi lɛ nɔ lɛ, abaaná maji enumɔ yɛ Ejipt shikpɔŋ lɛ nɔ ni wieɔ Kanaan+ wiemɔ ni baakã Yehowa, taiatsɛ lɛ, kitã akɛ amɛbaaye lɛ anɔkwa. Abaatsɛ maji nɛɛ ateŋ ekome akɛ Maŋ Ni Kumɔɔ Nii Eshwieɔ Shi.
19 Nakai gbi lɛ nɔ lɛ, abaama afɔleshaa latɛ ko yɛ Ejipt shikpɔŋ lɛ teŋ tuuntu ahã Yehowa, kɛ akulashiŋ ko yɛ ehusu lɛ naa ahã Yehowa. 20 Ebaafee okadi kɛ odaseyeli ehã Yehowa, taiatsɛ lɛ, yɛ Ejipt shikpɔŋ lɛ nɔ; ejaakɛ amɛbaabo amɛtsɛ Yehowa yɛ yiwalɔi lɛ ahewɔ, ni ebaatsu yiwalaherelɔ ko, mɔ wulu ko, koni ebahere amɛ. 21 Ni Yehowa baahã Ejiptbii lɛ ale mɔ ni eji, ni Ejiptbii lɛ baale Yehowa yɛ nakai gbi lɛ nɔ, ni amɛbaashã afɔlei, ni amɛkɛ nikeenii baaba, ni amɛbaawo Yehowa shi ni amɛbaaye nɔ. 22 Yehowa baatswa Ejipt nɔ,+ ebaatswa lɛ nɔ, ni ebaatsa lɛ; ni amɛbaaku amɛsɛɛ kɛya Yehowa ŋɔɔ, ni ebaabo amɛfaikpamɔi lɛ toi, ni ebaatsa amɛ.
23 Nakai gbi lɛ nɔ lɛ, gbɛjegbɛ+ ko baakã shi kɛjɛ Ejipt kɛya Asiria. Kɛkɛ lɛ, Asiria baaba Ejipt, ni Ejipt hu baaya Asiria, ni Ejipt baafata Asiria he ni amɛjá Nyɔŋmɔ. 24 Nakai gbi lɛ nɔ lɛ, Israel baafee mɔ ni ji etɛ ni fata Ejipt kɛ Asiria he,+ ni ebaatsɔ jɔɔmɔ yɛ shikpɔŋ lɛ teŋ, 25 ejaakɛ Yehowa, taiatsɛ lɛ, baajɔɔ lɛ, ebaakɛɛ akɛ: “Ajɔɔ mimaŋ, Ejipt, kɛ mininenaa nitsumɔ, Asiria, kɛ migboshinii, Israel.”+