Yitso Nyɔŋma Kɛ Enumɔ
Yehowa Yiŋ ní Eto yɛ Jeŋmaji lɛ Ahe
1. Mɛɛ kojomɔ he sanejajemɔ ní akɛshiɔ Ashur Yesaia ŋma efɔ̃ shi?
YEHOWA baanyɛ ekɛ jeŋmaji lɛ atsu nii ní ekɛgbala ewebii atoi yɛ amɛnɔ̃ fɔŋ feemɔ lɛ hewɔ. Kɛ́ efee nakai po lɛ, ekɛ jeŋmaji lɛ ahe ekeee amɛ yɛ amɛyitsoŋwalɛ, kɛ amɛhenɔwomɔ, kɛ nyɛ̃ɛ ní amɛnáa amɛhaa anɔkwa jamɔ yakatswaa lɛ hewɔ. Enɛ hewɔ lɛ, ekɛ mumɔ tsirɛ Yesaia ni eŋma “Babel kojomɔ he gbalɛ” efɔ̃ shi mra mli kwraa kɛtsɔ hiɛ. (Yesaia 13:1) Shi kɛlɛ, Babilon ji wɔsɛɛ beaŋ hegbeyeiwoo nɔ̃. Ashur miinyɛ Nyɔŋmɔ webii ní ekɛ amɛ efee kpaŋmɔ lɛ anɔ, yɛ Yesaia gbii lɛ amli. Ashur kpata Israel kooyigbɛ maŋtsɛyeli lɛ hiɛ ni efee Yuda hei babaoo amaŋfɔ. Shi Ashur kunimyeli lɛ sɛɛ baafo. Yesaia ŋma akɛ: “Yehowa Zebaot ekã kita akɛ: Lɛɛlɛŋ, bɔ ni misusu lɛ, nakai ebaaba mli . . . akɛ maku Ashur mli yɛ mishikpɔŋ lɛ nɔ, ni manaanaa enɔ yɛ migɔji lɛ anɔ, ni epã lɛ aaaje amɛnɔ, ní ejatsu lɛ hu aje amɛkuɛ nɔ.” (Yesaia 14:24, 25) Beni Yesaia gba gbalɛ nɛɛ sɛɛ etsɛɛɛ tsɔ lɛ, ajie Ashurbii ahegbeyeiwoo lɛ kɛjɛ Yuda.
2, 3. (a) Namɔ Yehowa kpã enine mli eshi lɛ yɛ blema beaŋ lɛ? (b) Yehowa nine ní ekpã mli eshi “jeŋmaji lɛ fɛɛ” lɛ tsɔɔ mɛni?
2 Shi jeŋmaji krokomɛi ní ji Nyɔŋmɔ webii ní ekɛ amɛ efee kpaŋmɔ lɛ ahenyɛlɔi lɛ hu? Amɛ hu esa akɛ akojo amɛ. Yesaia jaje akɛ: “Enɛ ji yiŋ ní ato yɛ shikpɔŋ muu lɛ fɛɛ he, ni enɛ ji nine ní akpã mli yɛ jeŋmaji lɛ fɛɛ nɔ. Ejaakɛ Yehowa Zebaot eto eyiŋ, ni namɔ aaaku naa? ni ekpã enine mli, ni namɔ aaakpale lɛ?” (Yesaia 14:26, 27) Yehowa ‘yiŋ ní eto’ lɛ fe ŋaawoo folo kɛkɛ. Eji eyiŋ ní ekpɛ diɛŋtsɛ, akpɔ ní ewo. (Yeremia 49:20, 30) Nyɔŋmɔ ‘nine’ lɛ ji ehewalɛ ní ekɛtsuɔ nii. Yɛ Yesaia yitso 14 lɛ naagbee gbɛ kukuji lɛ amli kɛ yitsei 15 kɛyashi 19 lɛ, Yehowa yiŋtoo lɛ teɔ shi eshiɔ Filistea, Moab, Damasko, Kush, kɛ Mizraim.
3 Shi kɛlɛ, Yesaia kɛɔ akɛ Yehowa ekpã enine mli eshi “jeŋmaji lɛ fɛɛ.” No hewɔ lɛ, eyɛ mli akɛ Yesaia gbalɛi nɛɛ ba mli klɛŋklɛŋ yɛ blema beaŋ moŋ, shi yɛ shishitoo mla ní yɔɔ mli lɛ naa lɛ, amɛkɔɔ “naagbee be lɛ,” beni Yehowa baakpã enine mli eshi shikpɔŋ lɛ nɔ maŋtsɛyelii fɛɛ lɛ hu he. (Daniel 2:44; 12:9; Romabii 15:4; Kpojiemɔ 19:11, 19-21) Yehowa, Nyɔŋmɔ ofe lɛ tsɔɔ hiɛ mra kwraa ni ekɛ hekɛnɔfɔɔ jieɔ eyiŋtoo kpo. Mɔ ko mɔ ko nyɛŋ asu enine ní ekpã mli lɛ.—Lala 33:11; Yesaia 46:10.
“Onufu Filikilɔ ní Naa Yɔɔ La” ní Aaate Shi Ashi Filistea
4. Mɛni ji Yehowa sanejajemɔ ní ekɛshiɔ Filistea lɛ mli otii lɛ ekomɛi?
4 Agbala jwɛŋmɔ kɛtee Filistibii lɛ anɔ klɛŋklɛŋ. “Afi ní maŋtsɛ Ahaz gbo lɛ nɔ kojomɔ he gbalɛ nɛ. Bo Filistea muu lɛ fɛɛ, kaanya akɛ tso ní yio lɛ ekũ! Shi shikpãa aaajɛ onufu lɛ shishifã lɛ mli aba, ni ebi aaatsɔ onufu filikilɔ ní naa yɔɔ la.”—Yesaia 14:28, 29.
5, 6. (a) Uzia tamɔ onufu kɛha Filistibii lɛ yɛ mɛɛ gbɛ nɔ? (b) Mɛni Hezekia bajie ehe kpo akɛ eji kɛha Filistea?
5 Maŋtsɛ Uzia he wa bɔ ni sa ni enyɛ́ etsĩ hegbeyeiwoo ní Filistea kɛba lɛ naa. (2 Kronika 26:6-8) Ebafee tamɔ onufu kɛha amɛ, ni etso lɛ tee nɔ etswia nakai henyɛlɔ ní yɔɔ emasɛi lɛ nii. Yɛ Uzia gbele sɛɛ lɛ—ni ‘akũ etso lɛ’—Yotam anɔkwafo lɛ baye maŋtsɛ, shi “maŋ lɛ kã amɛfitemɔ lɛ he lolo.” No sɛɛ lɛ Ahaz batsɔ maŋtsɛ. Nibii tsake, ni Filistibii asraafoi batutua Yuda yɛ omanyeyeli mli. (2 Kronika 27:2; 28:17, 18) Shi agbɛnɛ nibii miitsake ekoŋŋ. Yɛ afi 746 D.Ŋ.B. lɛ, Maŋtsɛ Ahaz gbo ni oblanyo Hezekia bata maŋtsɛsɛi lɛ nɔ. Kɛ́ Filistibii lɛ nuɔ he akɛ nibii baakã he eya nɔ jogbaŋŋ kɛha amɛ lɛ, no lɛ amɛmiilaka amɛhe kwraa. Hezekia batsɔ henyɛlɔ ní he yɔɔ gbeyei waa. Ákɛ Uzia seshinyo (“ebi” ni jɛ ‘eshishifã’ lɛ mli) lɛ, Hezekia tamɔ “onufu filikilɔ ní naa yɔɔ la”—etsɛ̃ɔ foi oya kɛtutuaa mɔ, ni ekɔ̃ɔ mɔ oya, ni ewaa mɔ he waa, tamɔ nɔ ni ekɛ ebɔɔ ewo mɔ ni ekɔ̃ lɛ lɛ mli.
6 Maŋtsɛ hee lɛ he wiemɔ ní sa jogbaŋŋ nɛ. “Lɛ [Hezekia] nɔŋŋ etswia Filistibii lɛ anii kɛyashwie Gaza kɛ ekpokpai lɛ anɔ tɔ̃ɔ.” (2 Maŋtsɛmɛi 18:8) Taakɛ Ashur Maŋtsɛ Sanherib yinɔsaji tsɔɔ lɛ, Filistibii lɛ batsɔmɔ Hezekia shishibii. “Ohiafoi lɛ”—ni ji Yuda maŋtsɛyeli ní egbɔjɔ lɛ—ebaná shweshweeshwe shihilɛ kɛ heloonaa ninamɔ mli ŋɔɔmɔ, yɛ be mli ni Filistea miigbo kɛ hɔmɔ.—Kanemɔ Yesaia 14:30, 31.
7. Mɛɛ hemɔkɛyeli esa akɛ Hezekia ajaje faŋŋ etsɔɔ bɔfoi ní atsu kɛba Yerusalem lɛ?
7 Etamɔ nɔ ni átsu bɔfoi kɛba Yuda—ekolɛ amɛmiitao amɛbafee kpaŋmɔ kɛte shi amɛshi Ashur. Mɛni esa akɛ akɛɛ amɛ? “Mɛɛ hetoo aaaha jeŋmaŋ lɛ bɔfoi lɛ?” Ani esa akɛ Hezekia atao shweshweeshwefeemɔ kɛjɛ maŋsɛɛ kpaŋmɔi amli? Dabi! Esa akɛ ekɛɛ bɔfoi ní atsu lɛ akɛ: “Yehowa to Zion shishi, ni emaŋ lɛ mli shitswialɔi lɛ aaababa abo yɛ jɛi!” (Yesaia 14:32) Esa akɛ maŋtsɛ lɛ aná Yehowa mli hekɛnɔfɔɔ kɛmɔ shi. Zion shishitoo lɛ ma shi shiŋŋ. Maŋtiase lɛ baakã he ahi shi ákɛ abobaahe ní yɔɔ shweshweeshwe kɛjɛ Ashurbii lɛ ahaomɔi amli.—Lala 46:2-8.
8. (a) Jeŋmaji komɛi tamɔ Filistea ŋmɛnɛ yɛ mɛɛ gbɛ nɔ? (b) Mɛni Yehowa efee ni ekɛfi ewebii ni yɔɔ ŋmɛnɛ lɛ asɛɛ, taakɛ efee blema lɛ?
8 Jeŋmaji komɛi yɛ ŋmɛnɛ ní kɛ yiwalɛ teɔ shi amɛwoɔ Nyɔŋmɔ jálɔi, taakɛ Filistea fee lɛ. Atsĩ Yehowa Odasefoi Kristofoi anaa yɛ tsuŋwoohei kɛ gboklɛfoi nsarai amli. Atsĩ amɛnitsumɔ lɛ naa. Agbe amɛteŋ mɛi babaoo. Henyɛlɔi yaa nɔ “amɛbɔɔ jalɔ susuma he gwa.” (Lala 94:21) Ekolɛ nɛkɛ Kristofoi akuu nɛɛ tamɔ “ohiafoi” kɛ “nɔ̃nalɔi” kɛha amɛhenyɛlɔi lɛ. Shi, kɛtsɔ Yehowa sɛɛfimɔ nɔ lɛ, amɛnáa mumɔŋ niyenii babaoo, yɛ be mli ní hɔmɔ yeɔ amɛhenyɛlɔi lɛ. (Yesaia 65:13, 14; Amos 8:11) Kɛ́ Yehowa kpã enine mli eshi ŋmɛnɛŋmɛnɛ beaŋ Filistibii lɛ, nɛkɛ “ohiafoi” nɛɛ baafee shweshweeshwe. Yɛ nɛgbɛ? Yɛ ekome ní amɛkɛ “Nyɔŋmɔ webii,” ní Yesu ji ekoŋtɛ ni ma shi shiŋŋ lɛ efee lɛ mli. (Efesobii 2:19, 20) Ni amɛbaahi “ŋwɛi Yerusalem,” ni ji Yehowa ŋwɛi Maŋtsɛyeli lɛ, ní Yesu Kristo ji enɔ Maŋtsɛ lɛ hebuu shishi.—Hebribii 12:22; Kpojiemɔ 14:1.
Ahã Moab Efee Dioo
9. Namɔ awie sanejajemɔ ní nyiɛ sɛɛ lɛ ashi, ni gbɔmɛi nɛɛ ejie amɛhe kpo akɛ amɛji Nyɔŋmɔ webii ahenyɛlɔ yɛ mɛɛ gbɛ nɔ?
9 Maji ní bɛŋkɛ Israel yɛ Ŋshɔ ní Egbo lɛ Bokagbɛ lɛ ekroko hu ji—Moab. Ákɛ mɛi ní tamɔɔɔ Filistibii lɛ, Moabbii lɛ kɛ Israel yɛ wekukpaa, ejaakɛ Abraham wɔfase Lot seshibii ji amɛ. (1 Mose 19:37) Yɛ nakai wekukpaa lɛ fɛɛ sɛɛ lɛ, Moab yɛ yinɔsane ni ji nyɛ̃ɛ ní kã ekɛ Israel teŋ. Ákɛ nɔkwɛmɔnɔ lɛ, yɛ Mose gbii lɛ amli tɔ̃ɔ lɛ, Moab maŋtsɛ lɛ yabɔ gbalɔ Bileam apaa kɛ hiɛnɔkamɔ akɛ ebaalomɔ Israelbii lɛ. Beni enɛ yeee omanye lɛ, Moab kɛ jeŋba shara kɛ Baal jamɔ tsu nii ni ekɛtsɔ Israel tsɔne. (4 Mose 22:4-6; 25:1-5) No hewɔ lɛ, ebɛ naakpɛɛ akɛ Yehowa kɛ mumɔ tsirɛ Yesaia agbɛnɛ ni eŋma “Moab kojomɔ he gbalɛ”!—Yesaia 15:1a.
10, 11. Mɛni baaba Moab nɔ?
10 Yesaia gbalɛ lɛ wieɔ shiɔ maŋtiasei kɛ hei babaoo ní yɔɔ Moab, ní Ar, Kir (loo Kir-Hareset), kɛ Dibon fata he lɛ. (Yesaia 15:1b, 2a) Moabbii baaye ŋkɔmɔ yɛ Kir-Hareset weinyibii atatalei, ní ekolɛ no ji nɔ̃ titri ní afeɔ yɛ maŋtiase lɛ mli lɛ he. (Yesaia 16:6, 7) Abaatutua Sibma kɛ Yazer ní ehé gbɛi yɛ wein dumɔ mli lɛ, ni abaafite amɛ. (Yesaia 16:8-10) Eglath-shelishiyah, ní ekolɛ egbɛi lɛ shishi ji “Afii Etɛ Tsina Yoo” lɛ, baafee tamɔ tsina oblayoo ní yɔɔ hewalɛ ní ewó hejaramɔ bolɔmɔ ní yɔɔ mɔbɔ nɔ. (Yesaia 15:5) Shikpɔŋ lɛ nɔ jwɛi fɔ́ baaŋãlã ni “Dimon nui” lɛ baayi obɔ̃ kɛ lá sɔŋŋ yɛ gbe ní aaagbe Moabbii lɛ hewɔ. “nimrim nui” lɛ ‘baatã’ kwraa, ekolɛ yɛ mfonirifeemɔŋ shishinumɔ naa, aloo yɛ eshishinumɔ diɛŋtsɛ naa—ekolɛ akɛni henyɛlɔi baatsĩ amɛfaai lɛ amli nui lɛ anaa lɛ hewɔ.—Yesaia 15:6-9.
11 Moabbii baabumɔ kpekpe, ni ji yarafeemɔ bo. Amɛbaashɛ amɛyi fɛɛ ni amɛkɛbaafee amɛhiɛgbele kɛ amɛyaafo lɛ he mfoniri. ‘Amɛbaakukuu’ amɛtsɛŋ, ni tsɔɔ awerɛhoyeli kɛ hiɛshishwiemɔ ni mli wa. (Yesaia 15:2b-4) Akɛni Yesaia diɛŋtsɛ yɛ nɔmimaa akɛ kojomɔi nɛɛ baaba mli hewɔ lɛ, ená henumɔi ní mli wa waa. Emusuŋ nibii hoso yɛ emli kɛ mɔbɔnalɛ, tamɔ saŋku kpãai ni miihoso oyayaayai, ekolɛ yɛ haomɔ shɛɛ sane ní ajaje ashi Moab lɛ hewɔ.—Yesaia 16:11, 12.
12. Yesaia wiemɔi ní ewie eshi Moab lɛ ba mli yɛ mɛɛ gbɛ nɔ?
12 Mɛɛ be gbalɛ nɛɛ baaba mli? Etsɛŋ kwraa. “Enɛ ji wiemɔ ní Yehowa wie shi Moab tsutsu lɛ; shi agbɛnɛ Yehowa miiwie akɛ: Biɛ afii etɛ ní tamɔ apaafonyo afii lɛ, Moab anunyam lɛ he guɔ agbó kɛ emɛi babaoo lɛ fɛɛ, ni mɛi ní aaashwɛ lɛ shɛŋ nɔ ko, ni amɛjeee mɛi komɛi.” (Yesaia 16:13, 14) Yɛ enɛ kɛ gbeekpamɔ naa lɛ, shitsaa kɛha blema nibii ataomɔ mli odaseyeli yɛ ní tsɔɔ akɛ yɛ afi ohai kpaanyɔ D.Ŋ.B. lɛ, Moab na amanehulu ní naa wa waa diɛŋtsɛ, ni eshikãmɔhei lɛ babaoo amli bii fɛɛ tã. Tiglat-Pileser III tsĩ Salamanu ni ji Moabnyo lɛ tã akɛ efata nɔyelɔi ní tsu onia amɛha lɛ lɛ ahe. Sanherib hé onia kɛjɛ Moab maŋtsɛ Kammusunadbi dɛŋ. Ashur maŋtsɛmɛi ni ji Esar-Hadon kɛ Ashurbanipal wie Moabbii a-Maŋtsɛmɛi ni ji Musuri kɛ Kamashaltu he akɛ amɛhi amɛshishi. Afii ohai abɔ nɛ ní Moabbii lɛ laaje kwraa kɛjɛ shihilɛ mli akɛ maŋ. Ána maŋtiasei komɛi ní asusuɔ akɛ eji Moabbii amaji ní etsɔmɔ amaŋfɔ, shi kɛbashi bianɛ lɛ, odaseyeli bibioo pɛ anaa ní tsɔɔ akɛ Israel henyɛlɔ ní be ko lɛ ehe wa nɛɛ ehi shi pɛŋ.
Ŋmɛnɛŋmɛnɛ Beaŋ “Moab” Hiɛ Kpata
13. Mɛɛ gbɛjianɔtoo abaanyɛ akɛto Moab he ŋmɛnɛ?
13 Jeŋ muu fɛɛ gbɛjianɔtoo ko yɛ ŋmɛnɛ ní tamɔ blema Moab pɛpɛɛpɛ. No ji Kristendom, ni ji “Babilon kpeteŋkpele lɛ” fã titri fe fɛɛ lɛ. (Kpojiemɔ 17:5) Moab kɛ Israel fɛɛ jɛ Abraham tsɛ, Tera mli. Nakai nɔŋŋ Kristendom hu kɛɔ akɛ eshishifãi yɛ klɛŋklɛŋ afii oha lɛ mli Kristofoi asafo lɛ mli tɔ̃ɔ, tamɔ bɔ ni Kristofoi ní afɔ amɛ mu lɛ asafo lɛ ji ŋmɛnɛ lɛ. (Galatabii 6:16) Shi, Kristendom efite—taakɛ Moab ji lɛ—ni ewoɔ mumɔŋ jeŋba shara shihilɛ kɛ nyɔŋmɔi krokomɛi moŋ ajamɔ he hewalɛ, yɛ anɔkwa Nyɔŋmɔ kome, Yehowa najiaŋ. (Yakobo 4:4; 1 Yohane 5:21) Ákɛ kuu lɛ, Kristendom hiɛnyiɛlɔi lɛ teɔ shi woɔ mɛi ní shiɛɔ Maŋtsɛyeli lɛ he sanekpakpa lɛ.—Mateo 24:9, 14.
14. Yɛ Yehowa yiŋ ní eto yɛ ŋmɛnɛŋmɛnɛ beaŋ “Moab” he lɛ fɛɛ sɛɛ lɛ, mɛɛ hiɛnɔkamɔ yɔɔ kɛha nakai gbɛjianɔtoo lɛ mli bii aŋkroaŋkroi lɛ?
14 Yɛ naagbee lɛ aha Moab fee dioo. Nakai nɔŋŋ baaba Kristendom hu nɔ. Yehowa kɛ ŋmɛnɛŋmɛnɛ beaŋ henɔ ní kɛ Ashur yeɔ egbɔ lɛ baatsu nii ni ekɛbaaha etsɔ amaŋfɔ. (Kpojiemɔ 17:16, 17) Shi kɛlɛ, hiɛnɔkamɔ yɛ kɛha gbɔmɛi ní yɔɔ ŋmɛnɛŋmɛnɛ beaŋ “Moab” nɛɛ mli lɛ. Beni egbaa eshiɔ Moab lɛ mli nɔŋŋ lɛ, Yesaia wie akɛ: “Akɛ maŋtsɛsɛi ko aaama shi yɛ mɔbɔnalɛ mli, ni mɔ ko aaatá nɔ yɛ anɔkwale mli, yɛ David buu lɛ mli; ni eeenyiɛ jalɛ sane sɛɛ ekojo, ni eeeha jalɛ aba oyá!” (Yesaia 16:5) Yɛ afi 1914 lɛ, Yehowa kɛ Yesu, ni ji Nɔyelɔ ní jɛ Maŋtsɛ David seshi lɛ mli lɛ, maŋtsɛsɛi lɛ ma shi shiŋŋ. Yesu maŋtsɛyeli lɛ ji Yehowa suɔmɔ kɛ mlihilɛ lɛ kpojiemɔ, ni yɛ kpaŋmɔ ní Nyɔŋmɔ kɛ Maŋtsɛ David fee lɛ mlibaa mli lɛ, ebaahi shi kɛya naanɔ. (Lala 72:2; 85:11, 12; 89:4, 5; Luka 1:32) Heshibalɔi babaoo eshi ŋmɛnɛŋmɛnɛ beaŋ “Moab” ni amɛba amɛhe shi amɛha Yesu koni amɛná naanɔ wala. (Kpojiemɔ 18:4) Kwɛ miishɛjemɔ ní eji kɛha mɛnɛɛmɛi akɛ amɛaale akɛ Yesu ‘baajaje kojomɔ etsɔɔ jeŋmaji lɛ’!—Mateo 12:18; Yeremia 33:15.
Damasko Batsɔ Amaŋfɔ ní Miifite
15, 16. (a) Mɛɛ shitee-kɛ-woo nifeemɔi Damasko kɛ Israel fee amɛshi Yuda, ni mɛni jɛ mli ba kɛha Damasko? (b) Namɔ hu fata sanejajemɔ ni akɛshi Damasko lɛ he? (d) Mɛni Kristofoi baanyɛ akase kɛjɛ Israel nɔkwɛmɔnɔ lɛ mli ŋmɛnɛ?
15 No sɛɛ lɛ, Yesaia ŋma “Damasko kojomɔ he gbalɛ.” (Kanemɔ Yesaia 17:1-6.) Damasko, ní kã Israel kooyigbɛ lɛ, ji “Aram yitso.” (Yesaia 7:8) Yɛ Yuda Maŋtsɛ Ahaz nɔyeli beaŋ lɛ, Rezin, ní jɛ Damasko ní ekɛ Peka ní jɛ Israel lɛ efee kpaŋmɔ lɛ, yatutua Yuda. Shi, yɛ Ahaz faikpamɔ naa lɛ, Ashurnyo Tiglat-Pileser III wuu eshi Damasko, ni eye amɛnɔ kunim ni eŋɔ maŋbii lɛ ateŋ mɛi babaoo nom. Kɛjɛ nakai beaŋ kɛyaa lɛ, Damasko ebafeee hegbeyeiwoo nɔ̃ kɛhaaa Yuda dɔŋŋ.—2 Maŋtsɛmɛi 16:5-9; 2 Kronika 28:5, 16.
16 Eeenyɛ efee akɛ kpaŋmɔ ní Israel kɛ Damasko fee lɛ hewɔ lɛ, kojomɔ wiemɔi ní akɛshiɔ kooyigbɛ maŋtsɛyeli ní yeee anɔkwa lɛ fata Yehowa sanejajemɔ ni ekɛshi Damasko lɛ he. (Yesaia 17:3-6) Israel baatsɔ tamɔ ŋmɔ yɛ nikpamɔ beaŋ beni eshwɛ ŋmãa fioo pɛ lɛ, loo tamɔ mutso ní ahoso mutso yibii lɛ babaoo kɛjɛ tsei aniji lɛ anɔ. (Yesaia 17:4-6) Kwɛ nɔkwɛmɔnɔ ní hiɛdɔɔ yɔɔ mli ni enɛ ji kɛha mɛi ni ejɔɔ amɛhe nɔ amɛha Yehowa lɛ! Ekpáa hetuu-kɛhamɔ ní akɛaaha ekome too lɛ gbɛ ni ekpɛlɛɔ sɔɔmɔ krɔŋŋ ní jɛ tsuiŋ pɛ nɔ. Ni enyɛ̃ɔ mɛi ní teɔ shi amɛwoɔ amɛnyɛmimɛi lɛ.—2 Mose 20:5; Yesaia 17:10, 11; Mateo 24:48-50.
Hekɛnɔfɔɔ Kwraa ní Aaaná yɛ Yehowa Mli
17, 18. (a) Te mɛi ni yɔɔ Israel lɛ ateŋ mɛi komɛi fee amɛnii yɛ Yehowa sanejajemɔ lɛ he amɛha tɛŋŋ, shi te mɛi babaoo fee amɛnii yɛ he amɛha tɛŋŋ? (b) Nibii ní yaa nɔ ŋmɛnɛ lɛ tamɔ Hezekia gbii lɛ amli nɔ̃ lɛ yɛ mɛɛ gbɛ nɔ?
17 Agbɛnɛ Yesaia wie akɛ: “Nakai gbi lɛ nɔ lɛ gbɔmɔ hiɛ aaatsɔɔ efeelɔ lɛ, ni ehiŋmɛii aaakwɛ Israel Mɔ krɔŋkrɔŋ lɛ gbɛ; ni ehiɛ tsɔɔŋ afɔleshaa latɛi lɛ ni ji eninenaa nitsumɔi lɛ dɔŋŋ, ni nii ní enine waabii fee lɛ hu, wɔŋ kooi lɛ oo, hulu amagai lɛ oo, ekwɛŋ dɔŋŋ.” (Yesaia 17:7, 8) Hɛɛ, mɛi komɛi yɛ Israel ní bo Yehowa kɔkɔbɔɔ sanejajemɔ lɛ toi. Ákɛ nɔkwɛmɔnɔ lɛ, beni Hezekia fɔ̃ Israel maŋ lɛ mli bii lɛ nine akɛ amɛbafata Yuda he ní akɛye Hehoo lɛ, Israelbii lɛ ekomɛi here nɔ ni amɛfã gbɛ kɛtee wuoyigbɛ ni amɛyafata amɛnyɛmimɛi lɛ ahe yɛ jamɔ krɔŋŋ mli. (2 Kronika 30:1-12) Shi kɛlɛ, Israel maŋ lɛ mli bii babaoo ye bɔfoi ní atsu ní amɛkɛ ninefɔɔ ayaha mɛi lɛ ahe fɛo. Maŋ lɛ etsɔ hemɔkɛyeli kwalɔi ní ehiii amɛ tsamɔ. No hewɔ lɛ, Yehowa yiŋ ní eto yɛ ehe lɛ ba mli. Ashur kpata Israel maŋtiasei lɛ ahiɛ, ni shikpɔŋ lɛ tsɔ amaŋfɔ, ni kooloi aniyelihei fɛɛ gbĩ.—Kanemɔ Yesaia 17:9-11.
18 Ni ŋmɛnɛ hu? Israel fee ehe hemɔkɛyeli kwalɔi amaŋ. No hewɔ lɛ, bɔ ni Hezekia bɔ mɔdɛŋ akɛ eeeye ebua aŋkroaŋkroi yɛ nakai maŋ lɛ mli ní amɛku amɛsɛɛ kɛba anɔkwa jamɔ mli ekoŋŋ lɛ haa wɔkaiɔ bɔ ni anɔkwa Kristofoi bɔɔ mɔdɛŋ akɛ amɛaaye amɛbua aŋkroaŋkroi yɛ Kristendom hemɔkɛyeli kwalɔi agbɛjianɔtoo lɛ mli ŋmɛnɛ lɛ. Kɛjɛ afi 1919 kɛbaa nɛɛ, bɔfoi ni jɛ “Nyɔŋmɔ Israel lɛ” mli etsɔ Kristendom mli kɛho, ni amɛfɔ̃ gbɔmɛi anine koni amɛbafata anɔkwa jamɔ he. (Galatabii 6:16) Amɛteŋ mɛi pii ekpoo enɛ. Mɛi babaoo eye bɔfoi lɛ ahe fɛo. Shi, mɛi komɛi ehere ninefɔɔ lɛ nɔ. Amrɔ nɛɛ amɛyifalɛ shɛɔ akpekpei abɔ, ni amɛmli filiɔ amɛ akɛ ‘amɛaakwɛ Israel Mɔ Krɔŋkrɔŋ lɛ gbɛ’ koni etsɔɔ amɛ nii. (Yesaia 54:13) Amɛshi afɔleshaa latɛi ni bɛ krɔŋkrɔŋ lɛ ahe jamɔ—ni ji hetuu-kɛhamɔ kɛ hekɛnɔfɔɔ ní akɛhaa nyɔŋmɔi ní adesai fee lɛ—ni amɛkɛ oyaiyeli baa Yehowa ŋɔɔ. (Lala 146:3, 4) Taakɛ Mika ni hi shi yɛ Yesaia beaŋ lɛ kɛɛ lɛ, amɛteŋ mɔ fɛɛ mɔ kɛɔ akɛ: “Shi mi lɛ, makwɛ Yehowa gbɛ, mamɛ miyiwalaheremɔ Nyɔŋmɔ lɛ; mi-Nyɔŋmɔ lɛ aaabo mi toi!”—Mika 7:7.
19. Namɛi Yehowa baakã amɛhiɛ lɛ, ni mɛni enɛ baatsɔɔ kɛha amɛ?
19 Kwɛ bɔ ni esoro amɛ kwraa yɛ mɛi ní kɛ amɛhiɛ fɔ̃ɔ adesa nɔ lɛ ahe! Adesai kɛ yiwalɛ nifeemɔi kɛ basabasafeemɔi ní efá babaoo miikpe be fɛɛ be yɛ naagbee gbii nɛɛ amli. “Ŋshɔ” ni ji adesai ní efee hamahama, ní amɛtseɔ atua lɛ looɔ mii ní shɛɛɛ nii ahe kɛ basabasafeemɔ eshwieɔ. (Yesaia 57:20; Kpojiemɔ 8:8, 9; 13:1) Yehowa ‘baaŋa’ asafo ní feɔ hoo nɛɛ ‘yi.’ Eŋwɛi Maŋtsɛyeli lɛ baakpata gbɛjianɔtoi kɛ adesai fɛɛ ní kɛ naagbai baa lɛ ahiɛ, ni “amɛaajo foi kɛaatee shɔŋŋ . . . tamɔ lasuogbele mli mulu yɛ ahum naa.”—Yesaia 17:12, 13; Kpojiemɔ 16:14, 16.
20. Yɛ ‘hà’ ní jeŋmaji lɛ ‘baahà’ amɛnibii lɛ fɛɛ sɛɛ lɛ, mɛɛ hekɛnɔfɔɔ anɔkwa Kristofoi yɔɔ?
20 Mɛni baajɛ mli aba? Yesaia kɛɔ akɛ: “Ni gbɛkɛnaashi lɛ, naa, ŋmiŋmi eba, ni dani shɛɔ leebi lɛ, amɛbɛ. Enɛ ji mɛi ní hàa wɔ lɛ agbɛnaa, kɛ mɛi ní tswaa wɔ ojo lɛ agbɛfaŋnɔ!” (Yesaia 17:14) Mɛi pii miihà Yehowa webii anii, ni amɛkɛ amɛ miiye yɛ yiwalɛ gbɛ ní bulɛ bɛ mli nɔ. Akɛni anɔkwa Kristofoi jeee je lɛŋ jamɔi wuji lɛ fã—ni amɛsumɔɔɔ ní amɛfee efã hu—hewɔ lɛ, mɛi ní hiɛ amɛhe jwɛŋmɔ fɔŋ kɛ mɛi ní kɛ jamɔ he sɛkɛyeli teɔ shi woɔ amɛ lɛ buɔ amɛ akɛ hàa nii ní amɛnine baanyɛ ashɛ amɛnɔ yɛ gbɛ ní waaa nɔ. Shi Nyɔŋmɔ webii yɛ hiɛnɔkamɔ akɛ “leebi,” beni amɛmanehului lɛ baaba naagbee lɛ miibɛŋkɛ oyayaayai.—2 Tesalonikabii 1:6-9; 1 Petro 5:6-11.
Kush kɛ Nikeenii Baha Yehowa
21, 22. Mɛɛ maŋ ná kojomɔ sanejajemɔ kɛnyiɛ sɛɛ, ni Yesaia wiemɔi ni jɛ mumɔŋ lɛ ba mli yɛ mɛɛ gbɛ nɔ?
21 Kɛ́ hoo lɛ, Kush, ní yɔɔ Mizraim wuoyigbɛ lɛ, ewuu ta eshi Yuda shii enyɔ sɔŋŋ. (2 Kronika 12:2, 3; 14:1, 9-15; 16:8) Agbɛnɛ Yesaia gba kojomɔ ní baaba nakai maŋ lɛ nɔ lɛ efɔ̃ shi, akɛ: “Ao! efijiaŋ gbɛɛmɔ shikpɔŋ ni yɔɔ Kush faai lɛ asɛɛ!” (Kanemɔ Yesaia 18:1-6.)a Yehowa ewo akpɔ akɛ ‘abaafo’ Kush ‘afɔ̃ shi, ni abaajie lɛ, ni abaatserɛ emli.’
22 Je lɛŋ yinɔsane kɛɔ wɔ akɛ yɛ afii ohai kpaanyɔ D.Ŋ.B. lɛ naagbee gbɛ lɛ, Kush ye Mizraim nɔ kunim ni eye enɔ aaashɛ afii 60. Ashur Maŋtsɛmɛi ni ji Esar-Hadon kɛ Ashurbanipal yatutua lɛ kɛtsara nɔ. Yɛ Thebes hiɛ ní Ashurbanipal kpata lɛ hewɔ lɛ, Ashur ye Mizraim nɔ kunim, ni no kɛ hewalɛ ní Kush yɔɔ yɛ Nilo Jɔɔ lɛ niiaŋ lɛ ba naagbee. (Kwɛmɔ Yesaia 20:3-6 hu.) Ni ŋmɛnɛŋmɛnɛ beaŋ hu?
23. Mɛɛ gbɛfaŋnɔ ŋmɛnɛŋmɛnɛ beaŋ “Kush” náa, ni mɛni hewɔ ekɛ hiɛkpatamɔ kpe lɛ?
23 Yɛ Daniel gbalɛ ní kɔɔ “naagbee be lɛ” he lɛ mli lɛ, awie “kooyigbɛ maŋtsɛ” ní tutuaa mɔ lɛ he akɛ Kush kɛ Lub “aaanyiɛ esɛɛ,” ní tsɔɔ akɛ, amɛbaabo egbɛtsɔɔmɔi atoi. (Daniel 11:40-43) Atsĩ Kush tã hu ákɛ efata “Gog ní yɔɔ Magog shikpɔŋ lɛ nɔ” lɛ tai lɛ ahe. (Ezekiel 38:2-5, 8) Gog tai lɛ, ní kooyigbɛ maŋtsɛ lɛ fata he lɛ, baaba amɛnaagbee yɛ be mli ní amɛaatutua Yehowa maŋ krɔŋkrɔŋ lɛ. No hewɔ lɛ, Yehowa baakpã enine mli eshi ŋmɛnɛŋmɛnɛ beaŋ “Kush” hu yɛ shi ní eteɔ ewoɔ maŋtsɛ ní Yehowa ji lɛ hewɔ.—Ezekiel 38:21-23; Daniel 11:45.
24. Akɛ “nikeenii” ejɛ jeŋmaji lɛ amli kɛbaha Yehowa yɛ mɛɛ gbɛ̀i anɔ?
24 Shi kɛlɛ, gbalɛ lɛ kɛɔ hu akɛ: “Nakai be lɛ mli lɛ akɛ maŋ ní kɛlɛ ní amɛhe yɔɔ trotro lɛ aaabake Yehowa Zebaot, ni asaŋ akɛ mɛi komɛi aaajɛ maŋ ní asheɔ lɛ gbeyei kɛyaa shɔŋŋ lɛ . . . ateŋ aba he ni Yehowa Zebaot gbɛi lɛ yɔɔ ni ji Zion gɔŋ lɛ nɔ.” (Yesaia 18:7) Eyɛ mli akɛ jeŋmaji lɛ ekpɛlɛɛɛ maŋtsɛ ní Yehowa ji lɛ nɔ moŋ, shi bei komɛi lɛ amɛfeɔ nii yɛ gbɛ̀i ní he baa sɛɛnamɔ kɛhaa Yehowa webii lɛ nɔ. Yɛ shikpɔji komɛi anɔ lɛ, nɔyelɔi lɛ ewo mlai ni amɛkɛ kojomɔ yiŋkpɛi eha ni enɛ eha Yehowa jálɔi anɔkwafoi lɛ ená mla naa hegbɛi komɛi. (Bɔfoi lɛ Asaji 5:29; Kpojiemɔ 12:15, 16) Ni nikeenii krokomɛi hu yɛ. “Maŋtsɛmɛi kɛ nikeenii aaabahao. . . . Lumɛi aaajɛ Mizraim aba; Kush he aaafee oyá ni ekpã eniji amli eha Nyɔŋmɔ.” (Lala 68:30-32) Ŋmɛnɛ, ŋmɛnɛŋmɛnɛ beaŋ “Kushbii” akpekpei abɔ ní sheɔ Yehowa gbeyei lɛ kɛ “nikeenii” miiba kɛtsɔ jamɔ nɔ. (Maleaki 1:11) Amɛmiiná nitsumɔ kpeteŋkpele ni ji Maŋtsɛyeli lɛ he sanekpakpa ní ashiɛɔ yɛ shikpɔŋ lɛ nɔ fɛɛ lɛ mli gbɛfaŋnɔ. (Mateo 24:14; Kpojiemɔ 14:6, 7) Kwɛ nikeenii fɛfɛo ní akɛhaa Yehowa!—Hebribii 13:15.
Mizraim Tsui Fã Waa
25. Mɛni ba blema Mizraim nɔ ni eha Yesaia 19:1-11 lɛ ba mli?
25 Maŋ ní bɛŋkɛ Yuda yɛ wuoyigbɛ nɔŋŋ ji Mizraim, ni ji Nyɔŋmɔ webii ní ekɛ amɛ efee kpaŋmɔ lɛ ahenyɛlɔ kɛjɛ blema tɔ̃ɔ lɛ. Yesaia yitso 19 lɛ wieɔ basabasa shihilɛ ni yɔɔ Mizraim yɛ Yesaia wala beaŋ lɛ he. Maŋ ta miiya nɔ yɛ Mizraim, “maŋ kɛ maŋ, maŋtsɛyeli kɛ maŋtsɛyeli.” (Yesaia 19:2, 13, 14) Yinɔsaneŋmalɔi kɛ bɔ ni maŋtsɛmɛi awekui ní kɛ amɛhe shĩɔ akaŋ lɛ yeɔ maŋ lɛ fãi srɔtoi anɔ yɛ be kome too mli lɛ he odaseyeli haa. Mizraim nilee ní ekɛshwãa, kɛ ‘eyakayaka wɔji kɛ eklamɔi’ lɛ hereee eyiwala kɛjɛɛɛ “nuntsɔmɛi yiwalɔi adɛŋ.” (Yesaia 19:3, 4) Ashur, Babilon, Persia, Hela, kɛ Roma fɛɛ ye Mizraim nɔ kunim kɛtsara nɔ. Nibii ni ba nɛɛ fɛɛ ha Yesaia 19:1-11 lɛ ba mli.
26. Yɛ emlibaa ni da mli lɛ, te mɛi ni yɔɔ ŋmɛnɛŋmɛnɛ beaŋ “Mizraim” lɛ baafee amɛnii yɛ Yehowa kojomɔ nifeemɔi lɛ ahe amɛha tɛŋŋ?
26 Shi, bei pii lɛ, Mizraim feɔ Satan je lɛ he mfoniri yɛ Biblia lɛ mli. (Ezekiel 29:3; Yoel 4:19; Kpojiemɔ 11:8) No hewɔ lɛ, ani “Mizraim kojomɔ he gbalɛ” ní Yesaia gba lɛ yɛ emlibaa ni da? Hɛɛ, eyɛ mlibaa ni da! Esa akɛ gbalɛ lɛ shishijee wiemɔi lɛ aha mɔ fɛɛ mɔ akadi enɛ jogbaŋŋ, akɛ: “Naa, Yehowa tá atatu ni he yɔɔ oyá nɔ kɛmiiba Mizraim: ni Mizraim yakayaka wɔji lɛ ahe aaakpokpo yɛ ehiɛ, ni Mizraim tsui aaafã yɛ emli.” (Yesaia 19:1) Etsɛŋ ni Yehowa baate shi ashi Satan gbɛjianɔtoo lɛ. Yɛ nakai beaŋ lɛ, abaana nibii agbɛjianɔtoo nɛɛ nyɔŋmɔi lɛ akɛ amɛhe bɛ sɛɛnamɔ ko kwraa. (Lala 96:5; 97:7) “Mizraim tsui aaafã yɛ emli” kɛ gbeyeishemɔ. Yesu gba yɛ nakai be lɛ he efɔ̃ shi akɛ: “Jeŋmaji afimɔ lɛ aaaba shikpɔŋ lɛ nɔ, ni amɛaafee yeyeeye, yɛ ŋshɔ kɛ ŋshɔkei agbɛɛmɔ hewɔ; ni nɔ̃ aaanyɔnyɔɔ gbɔmɛi anɔ yɛ gbeyei kɛ nibii ní baa je lɛŋ lɛ agbɛkwɛmɔ hewɔ.”—Luka 21:25, 26.
27. Mɛɛ mligbalamɔi agba afɔ̃ shi akɛ ebaaba “Mizraim” teŋ, ni enɛ miiba mli ŋmɛnɛ yɛ mɛɛ gbɛ nɔ?
27 Yehowa wie be ní baatsɔ be ní ekɛbaatsu kojomɔ he nii lɛ hiɛ lɛ he, yɛ gbalɛ wiemɔ mli akɛ: “Maha Mizraimbii ate shi awo Mizraimbii, ní amɛkɛ amɛhe awuwui: mɔ kɛ enyɛmi, mɔ kɛ enaanyo, maŋ kɛ maŋ, maŋtsɛyeli kɛ maŋtsɛyeli.” (Yesaia 19:2) Kɛjɛ be mli ní ato Nyɔŋmɔ Maŋtsɛyeli lɛ ama shi yɛ afi 1914 kɛbaa nɛɛ, nɔ ni ekadi ‘ba ní Yesu eba lɛ he okadi’ lɛ ji maŋ ní teɔ shi woɔ maŋ kɛ maŋtsɛyeli hu ní teɔ shi woɔ maŋtsɛyeli. Wekui ateŋ gbɔmɔgbeei, seshii ashishibulemɔ kɛ láshishwiemɔ babaoo, kɛ nɔ ni atsɛɔ lɛ hewolonɔ sui ashishibulemɔ lɛ ekpata gbɔmɛi akpekpei abɔ awala hiɛ yɛ naagbee gbii nɛɛ amli. Nɛkɛ “kɔ̃ɔmɔi” nɛɛ amli baawo wu beni naagbee lɛ bɛŋkɛɔ kpaakpa lɛ.—Mateo 24:3, 7, 8.
28. Mɛni apasa jamɔ baanyɛ efee ní ekɛhere nibii agbɛjianɔtoo nɛɛ yiwala yɛ kojomɔ gbi lɛ nɔ?
28 “Mizraim mumɔ aaatã yɛ emli, ni maha ejinatoo afee yaka. Ni amɛaatee amɛyafee nii yɛ amɛyakayaka wɔji kɛ amɛklamɔi kɛ amɛkɔmfoi kɛ amɛwɔjiatsɛmɛi hu aŋɔɔ.” (Yesaia 19:3) Beni Mose yapue yɛ Farao hiɛ lɛ, awo Mizraim okɔmfoi lɛ hiɛgbele, ni amɛnyɛɛɛ amɛdamɔ Yehowa hewalɛ lɛ naa. (2 Mose 8:18, 19; Bɔfoi lɛ Asaji 13:8; 2 Timoteo 3:8) Nakai nɔŋŋ hu yɛ kojomɔ gbi lɛ nɔ lɛ, apasa jamɔ nyɛŋ ahere gbɛjianɔtoo ní efite nɛɛ yiwala. (Okɛto Yesaia 47:1, 11-13 he.) Yɛ naagbee lɛ, Mizraim yaje “nuntsɔmɛi yiwalɔi,” ni ji Ashur shishi. (Yesaia 19:4) Enɛ feɔ wɔsɛɛ be fɔŋ ni kã nibii agbɛjianɔtoo nɛɛ hiɛ lɛ he mfoniri.
29. Kɛ́ Yehowa gbi lɛ shɛ lɛ, mɛɛ yelikɛbuamɔ maŋkwralɔi baanyɛ amɛkɛha?
29 Shi maŋkwramɔŋ hiɛnyiɛlɔi lɛ hu? Ani amɛbaanyɛ amɛye amɛbua? “Zoan lumɛi lɛ kwashiai sɔŋŋ ni, Farao ŋaawolɔi ní le nii jogbaŋŋ lɛ aŋaawoo lɛ etsɔ buului aŋaawoo.” (Kanemɔ Yesaia 19:5-11.) Kwɛ bɔ ni nilee bɛ mli akɛ akɛ hiɛ aaafɔ̃ adesai ŋaawolɔi anɔ akɛ amɛhe baaba sɛɛnamɔ ko yɛ kojomɔ gbi lɛ nɔ! Yɛ je lɛŋ nilee ní amɛbaanyɛ amɛná lɛ fɛɛ sɛɛ lɛ, amɛbɛ Nyɔŋmɔ he nilee. (1 Korintobii 3:19) Amɛkpoo Yehowa ni amɛtsɔ amɛhe kɛtee nɔ ni jeŋ nilee tsɛɔ lɛ nilee, shika, ŋɔɔmɔyeli, kɛ nyɔŋmɔi krokomɛi ni akɛyeɔ enajiaŋ lɛ aŋɔɔ. Enɛ hewɔ lɛ, amɛbɛ Nyɔŋmɔ yiŋtoi ahe nilee ko kwraa. Alaka amɛ ni amɛyiŋ efutu amɛ. Amɛnitsumɔi lɛ efee efolo. (Kanemɔ Yesaia 19:12-15.) “Nilelɔi lɛ ahiɛ egboi, amɛjijaa, ni amɔmɔ amɛ; naa, Yehowa wiemɔ lɛ amɛkwa nɛɛ: ni mɛɛ nilee srɔto yɔɔ amɛmli?”—Yeremia 8:9.
Okadi kɛ Odase Kɛha Yehowa
30. ‘Yuda shikpɔŋ lɛ he aaaba gbeyei kɛha Mizraim’ yɛ mɛɛ gbɛ nɔ?
30 Shi kɛlɛ, eyɛ mli akɛ “Mizraim” hiɛnyiɛlɔi lɛ ahe waaa “tamɔ yei” moŋ, shi aŋkroaŋkroi komɛi yɛ lolo ní miitao ní amɛná Nyɔŋmɔ he nilee. Yehowa webii ní afɔ amɛ mu lɛ kɛ amɛhefatalɔi lɛ ‘jajeɔ Nyɔŋmɔ agbojeei lɛ.’ (Yesaia 19:16; 1 Petro 2:9) Amɛmiibɔ mɔdɛŋ fɛɛ ní amɛaanyɛ ni amɛbɔ gbɔmɛi akɔkɔ yɛ Satan gbɛjianɔtoo lɛ hiɛkpatamɔ ni baa lɛ he. Beni Yesaia kpáa shihilɛ nɛɛ gbɛ lɛ, ewie akɛ: “Yuda shikpɔŋ lɛ he aaaba gbeyei aha Mizraim; mɔ fɛɛ mɔ ní aaatsĩ etã atsɔɔ lɛ lɛ eeeshe gbeyei, yɛ Yehowa Zebaot yiŋ ní eto yɛ Mizraim he lɛ hewɔ.” (Yesaia 19:17) Yehowa tsuji anɔkwafoi lɛ yaa amɛyagbaa gbɔmɛi anɔkwale lɛ—ni haomɔi ní Yehowa gba yɛ he efɔ̃ shi lɛ he adafitswaa fata he. (Kpojiemɔ 8:7-12; 16:2-12) Enɛ haoɔ je lɛŋ jamɔ mli hiɛnyiɛlɔi lɛ waa.
31. Te efee tɛŋŋ eba lɛ akɛ awieɔ “Kanaan wiemɔ lɛ” yɛ Mizraim maŋtiasei amli (a) yɛ blema beaŋ lɛ? (b) yɛ ŋmɛnɛŋmɛnɛ beaŋ?
31 Mɛɛ naakpɛɛ nii baajɛ nɛkɛ sanejajemɔ nitsumɔ nɛɛ mli aba? “Nakai gbi lɛ nɔ lɛ Mizraim shikpɔŋ lɛ nɔ maji enumɔ aaawie Kanaan wiemɔ, ni amɛaakãmɔ Yehowa Zebaot kita; ni aaatsɛ́ ekome akɛ Ir-Heres.” (Yesaia 19:18) Blema beaŋ lɛ, nɛkɛ gbalɛ nɛɛ ba mli faŋŋ beni Yudafoi ni ejo foi kɛtee Mizraimbii amaŋtiasei amli lɛ wieɔ Hebri wiemɔ lɛ yɛ jɛmɛ lɛ. (Yeremia 24:1, 8-10; 41:1-3; 42:9–43:7; 44:1) Ŋmɛnɛ hu gbɔmɛi yɛ ŋmɛnɛŋmɛnɛ beaŋ “Mizraim” shikpɔŋkuku lɛ mli ní ekase ‘wiemɔ krɔŋŋ,’ ni ji Biblia mli anɔkwale lɛ bianɛ. (Zefania 3:9) Atsɛɔ mfonirifeemɔŋ maŋtiasei enumɔ lɛ ateŋ ekome akɛ “Ir-Heres” (‘Maŋtiase ní Butuɔ Maŋ’), ni tsɔɔ akɛ ‘wiemɔ krɔŋŋ’ lɛ fã ko kɔ́ɔ Satan gbɛjianɔtoo lɛ he mama kpamɔ kɛ ‘ebutumɔ’ he.
32. (a) Mɛɛ “afɔleshaa latɛ” ko yɔɔ Mizraim shikpɔŋ lɛ teŋ? (b) Mɛi ni afɔ amɛ mu lɛ tamɔ “okadi tɛ” yɛ Mizraim husui lɛ anɔ yɛ mɛɛ gbɛ nɔ?
32 Yehowa webii asanejajemɔ nitsumɔ lɛ hewɔ lɛ, eka shi faŋŋ akɛ abaale egbɛi kpeteŋkpele lɛ yɛ nibii agbɛjianɔtoo nɛɛ mli. “Nakai gbi lɛ nɔ lɛ afɔleshaa latɛ ko aaama Mizraim shikpɔŋ lɛ teŋ aha Yehowa, ni okadi tɛ ko hu aaama ehusui lɛ anɔ aha Yehowa.” (Yesaia 19:19) Nɛkɛ wiemɔi nɛɛ gbalaa jwɛŋmɔ kɛyaa Kristofoi ní afɔ amɛ mu lɛ, ní kɛ Nyɔŋmɔ yɔɔ kpaŋmɔ wekukpaa mli lɛ agbɛhe lɛ nɔ. (Lala 50:5) Ákɛ “afɔleshaa latɛ” lɛ, amɛkɛ amɛfɔleshai lɛ miiha; ákɛ “anɔkwale lɛ akulashiŋ kɛ enɔdaamɔnɔ lɛ,” amɛmiiye odase kɛmiiha Yehowa. (1 Timoteo 3:15; Romabii 12:1; Hebribii 13:15, 16) Amɛyɛ “shikpɔŋ lɛ teŋ,” ejaakɛ anaa amɛ—kɛ amɛhefatalɔi ni ji “tooi krokomɛi” lɛ—yɛ shikpɔji kɛ ŋshɔkpɔi ni fa fe 230 nɔ. Shi “amɛjɛɛɛ je lɛ mli.” (Yohane 10:16; 17:15, 16) Kɛ́ wɔɔwie yɛ mfonirifeemɔŋ lɛ, amɛdamɔ je nɛɛ kɛ Nyɔŋmɔ Maŋtsɛyeli lɛ husu lɛ nɔ tuuntu, ní amɛfee klalo ní amɛbaafo nakai husu lɛ koni amɛnine ashɛ amɛ ŋwɛi nyɔmɔwoo lɛ nɔ.
33. Mɛi ní afɔ amɛ mu lɛ ji “okadi” kɛ “odase” yɛ “Mizraim” yɛ mɛɛ gbɛ nɔ?
33 Yesaia yaa nɔ akɛ: “Eeetsɔ okadi kɛ odase eha Yehowa Zebaot yɛ Mizraim shikpɔŋ lɛ nɔ: ni kɛ́ amɛbolɔ amɛtsɛ́ Yehowa yɛ haolɔi ahewɔ lɛ, eeetsu yiwalaherelɔ kɛ hefãlɔ kɛaaba amɛŋɔɔ ní ebahere amɛ.” (Yesaia 19:20) Ákɛ “okadi” kɛ “odase” lɛ, mɛi ní afɔ amɛ mu lɛ nyiɛɔ shiɛmɔ nitsumɔ lɛ hiɛ ni amɛwóɔ Yehowa gbɛi lɛ nɔ gojoo yɛ nibii agbɛjianɔtoo nɛɛ mli. (Yesaia 8:18; Hebribii 2:13) Anuɔ gbɔmɛi ní anyɛɔ amɛnɔ lɛ abolɔmɔi ahe yɛ je lɛŋ he fɛɛ he, shi yɛ fɛɛ sɛɛ lɛ, adesai anɔyelii lɛ nyɛɛɛ aye abua amɛ. Shi, Yehowa baatsu Yiwalaherelɔ Kpeteŋkpele, ni ji Maŋtsɛ Yesu Kristo, koni ebakpɔ̃ mɛi ni he jɔ lɛ fɛɛ. Kɛ́ nɛkɛ naagbee gbii nɛɛ yashɛ enaagbee kwraa yɛ Harmagedon ta lɛ mli lɛ, ekɛ heyeli kɛ naanɔ jɔɔmɔi baaba abaha adesai ní sheɔ Nyɔŋmɔ gbeyei lɛ.—Lala 72:2, 4, 7, 12-14.
34. (a) Te aaafee tɛŋŋ ní “Mizraimbii lɛ” aaale Yehowa, ni mɛɛ afɔleshaa kɛ nikeenii amɛkɛbaaba amɛbaha lɛ? (b) Mɛɛ be Yehowa baatswa “Mizraim” nii lɛ, ni mɛɛ tsamɔ baanyiɛ sɛɛ?
34 Shi dani be nɛɛ aaashɛ lɛ, eji Nyɔŋmɔ suɔmɔnaa nii akɛ gbɔmɛi fɛɛ aná anɔkwale nilee koni ahere amɛyiwala. (1 Timoteo 2:4) No hewɔ lɛ, Yesaia ŋma akɛ: “Yehowa aaajie ehe shi atsɔɔ Mizraim, ni Mizraimbii aaale Yehowa yɛ nakai gbi lɛ nɔ, ni amɛkɛ afɔle kɛ nikeenii aaabasɔmɔ lɛ, ni amɛaawo Yehowa shi ni amɛaaye nɔ. Ni Yehowa aaatswia Mizraim nii: eeetswia amɛ nii, ni esaa eeetsá amɛ; ni amɛaaku amɛsɛɛ kɛaaba Yehowa ŋɔɔ, ni eeebo amɛ toi, ni eeetsá amɛ.” (Yesaia 19:21, 22) Gbɔmɛi ni jɛ Satan je lɛ mli jeŋmaji fɛɛ mli, ni ji “Mizraimbii” aŋkroaŋkroi baleɔ Yehowa ni amɛkɛ afɔleshaa bahaa lɛ, no ji “naabui ni jajeɔ egbɛi lɛ ayibii lɛ.” (Hebribii 13:15) Amɛwoɔ Yehowa shi kɛtsɔɔ amɛhe nɔ ní amɛjɔɔ amɛhaa lɛ lɛ nɔ, ni amɛyeɔ amɛshiwoo lɛ nɔ kɛtsɔɔ anɔkwa sɔɔmɔ shihilɛ ni amɛkɛhiɔ shi lɛ nɔ. Yɛ ‘nii’ ní Yehowa ‘baatswa’ nibii agbɛjianɔtoo nɛɛ yɛ Harmagedon lɛ sɛɛ lɛ, ekɛ e-Maŋtsɛyeli lɛ baatsu nii ní ekɛtsá adesai. Abaahole adesai anɔ kɛshɛ mumɔŋ, jwɛŋmɔŋ, jeŋba, kɛ gbɔmɔtsoŋ emuuyeli mli, yɛ Yesu Afi Akpe Nɔyeli lɛ mli—tsamɔ diɛŋtsɛ nɛ!—Kpojiemɔ 22:1, 2.
‘Aaajɔɔ Mimaŋ Lɛ’
35, 36. Yɛ Yesaia 19:23-25 lɛ mlibaa mli lɛ, mɛɛ tsakpãai bakã Mizraim, Ashur, kɛ Israel teŋ yɛ blema beaŋ?
35 No sɛɛ lɛ, gbalɔ lɛ tsɔ hiɛ ena nifeemɔ ko ní sa kadimɔ waa: “Nakai gbi lɛ nɔ lɛ aaaje gbɛjegbɛ kɛaajɛ Mizraim kɛaatee Ashur, ni Ashurnyo aaaba Mizraim, ni Mizraimnyo hu aaatee Ashur, ni Mizraimbii kɛ Ashurbii aaafee ekome asɔmɔ Yehowa. Nakai gbi lɛ nɔ lɛ Israel aaafee mɔ ni ji etɛ ní fata Mizraim kɛ Ashur he, ni amɛaatsɔ jɔɔmɔ yɛ shikpɔŋ lɛ teŋ. Ni Yehowa Zebaot aaajɔɔ amɛ akɛ: Aaajɔɔ Mizraim ni ji mimaŋ lɛ, kɛ Ashur ni ji mininenaa nitsumɔ lɛ, kɛ Israel ni ji migbɛfaŋnɔ lɛ.” (Yesaia 19:23-25) Hɛɛ, gbi ko lɛ naanyobɔɔ wekukpaa baakã Mizraim kɛ Ashur teŋ. Yɛ mɛɛ gbɛ nɔ?
36 Beni Yehowa kpɔ̃ ewebii lɛ kɛjɛ jeŋmaji lɛ adɛŋ yɛ blema beaŋ lɛ, kɛ́ wɔɔkɛɛ lɛ, eje gbɛjegbɛi ní yaa heyeli mli eha amɛ. (Yesaia 11:16; 35:8-10; 49:11-13; Yeremia 31:21) Gbalɛ nɛɛ mlibaa bibioo ba yɛ Babilon nɔ kunimyeli lɛ sɛɛ, beni akɛ nomii ni jɛ Ashur kɛ Mizraim, kɛ mɛi ní jɛ Babilon hu lɛ, ku sɛɛ kɛba Shiwoo Shikpɔŋ lɛ nɔ ekoŋŋ lɛ. (Yesaia 11:11) Shi ŋmɛnɛŋmɛnɛ beaŋ hu?
37. Gbɔmɛi akpekpei abɔ hiɔ shi ŋmɛnɛ tamɔ nɔ ni gbɛjegbɛ ko kã “Ashur” kɛ “Mizraim” teŋ yɛ mɛɛ gbɛ nɔ?
37 Ŋmɛnɛ, mumɔŋ Israelbii ní afɔ amɛ mu lɛ ateŋ shwɛɛnii lɛ ji “jɔɔmɔ yɛ shikpɔŋ lɛ teŋ.” Amɛwóɔ anɔkwa jamɔ nɔ ni amɛjajeɔ Maŋtsɛyeli shɛɛ sane lɛ amɛtsɔɔ gbɔmɛi yɛ jeŋmaji fɛɛ mli. Nɛkɛ jeŋmaji nɛɛ ekomɛi tamɔ Ashur pɛpɛɛpɛ, amɛyɛ asraafoi kɛ tawuu nii babaoo. Jeŋmaji krokomɛi lɛ amli hi fioo, ekolɛ tamɔ Mizraim—mɔ ni be ko lɛ, eji “wuoyigbɛ maŋtsɛ lɛ” yɛ Daniel gbalɛ lɛ mli lɛ. (Daniel 11:5, 8) Aŋkroaŋkroi akpekpei abɔ ni jɛ jeŋmaji ni yɔɔ asraafoi kɛ tawuu nii babaoo, kɛ jeŋmaji ni mli hi fioo lɛ amli ebɔi anɔkwa jamɔ gbɛ lɛ nɔ nyiɛmɔ. Enɛ hewɔ lɛ, gbɔmɛi ni jɛ jeŋmaji fɛɛ mli efee ekome ni ‘amɛkɛ sɔɔmɔ krɔŋŋ miiha.’ Majimaji ateŋ mligbalamɔ ko kwraa bɛ mɛnɛɛmɛi ateŋ. Amɛyɛ suɔmɔ kɛha amɛhe, ni abaanyɛ awie lɛɛlɛŋ akɛ ‘Ashur baa Mizraim ni Mizraim hu yaa Ashur.’ Etamɔ nɔ ni aje gbɛjegbɛ kɛjɛ maŋ kome mli kɛtee ekroko lɛ mli.—1 Petro 2:17.
38. (a) Israel “aaafee mɔ ni ji etɛ ní fata Mizraim kɛ Ashur he” yɛ mɛɛ gbɛ nɔ? (b) Mɛni hewɔ Yehowa kɛɔ akɛ ‘Aaajɔɔ mimaŋ lɛ’?
38 Shi, te aaafee tɛŋŋ ni Israel “aaafee mɔ ni ji etɛ ní fata Mizraim kɛ Ashur he” hu? “Naagbee be lɛ” shishijee gbɛ lɛ, no mli lɛ mɛi ni sɔmɔɔ Yehowa yɛ shikpɔŋ nɔ lɛ ateŋ mɛi babaoo ji “Nyɔŋmɔ Israel lɛ” mli bii. (Daniel 12:9; Galatabii 6:16) Kɛjɛ afi 1930 afii lɛ amli kɛbaa nɛɛ, asafo babaoo ni ji “tooi krokomɛi” ní yɔɔ shikpɔŋ nɔ hiɛnɔkamɔ lɛ epue. (Yohane 10:16a; Kpojiemɔ 7:9) Amɛjɛ jeŋmaji—ní Mizraim kɛ Ashur feɔ amɛhe mfoniri—lɛ ateŋ, ni amɛmiike yuu kɛmiiba Yehowa shia kɛha jamɔ lɛ mli, ni amɛfɔ̃ɔ mɛi krokomɛi hu nine ní amɛbafata amɛhe. (Yesaia 2:2-4) Amɛtsuɔ shiɛmɔ nitsumɔ koome lɛ nɔŋŋ tamɔ amɛnyɛmimɛi ní afɔ amɛ mu lɛ, amɛkpeeɔ kaai ní tamɔ amɛnɔ̃ lɛ anaa, amɛjieɔ anɔkwayeli kɛ emuuyeli mlihiɛmɔ koome lɛ nɔŋŋ kpo, ni amɛyeɔ nii yɛ mumɔŋ okpɔlɔ kome nɔ. Lɛɛlɛŋ, mɛi ní afɔ amɛ mu lɛ kɛ “tooi krokomɛi” lɛ efee “kuu kome kɛ kwɛlɔ kome.” (Yohane 10:16b) Ani mɔ ko baanyɛ aje bɔ ni Yehowa naa ekãa ní amɛyɔɔ kɛ amɛhiɛmiamɔ lɛ, ní enáa amɛnitsumɔ lɛ he miishɛɛ lɛ he ŋwane? Ebɛ naakpɛɛ akɛ ejajeɔ jɔɔmɔi eshwieɔ amɛnɔ ni ekɛɔ akɛ: ‘Aaajɔɔ mimaŋ lɛ’!
[Shishigbɛ niŋmaa]
a Woloŋlelɔi komɛi kɛɔ akɛ wiemɔ ni ji “efijiaŋ gbɛɛmɔ shikpɔŋ” lɛ miitsɔɔ baalabii ní bei komɛi lɛ amɛhoɔ babaoo yɛ Kush lɛ. Mɛi krokomɛi hu tsɔɔ akɛ Hebri wiemɔ kɛha ‘fijiaŋ gbɛɛmɔ,’ ni ji tsela·tsalʹ lɛ, tamɔ bɔ ni gbɛi ní Gallabii, ni ji Hambii ni yɔɔ Kush kooyigbɛ lɛ kɛtsɛɔ ofɔi, ni ji tsaltsalya lɛ gbɛɔ ehaa lɛ pɛpɛɛpɛ.
[Mfoniri ni yɔɔ baafa 191]
Filistibii tabilɔi ní miitutua amɛhenyɛlɔi (Mizraim mfoniri ní atɛŋ yɛ afii ohai 12 D.Ŋ.B.)
[Mfoniri ni yɔɔ baafa 192]
Tɛ ní akpɛ́ ni miitsɔɔ Moab tabilɔ loo nyɔŋmɔ (yɛ afii ohai 11 kɛ 8 D.Ŋ.B. lɛ teŋgbɛ)
[Mfoniri ni yɔɔ baafa 196]
Aram tabilɔ ní ta yooma nɔ (afii ohai nɛɛhu D.Ŋ.B.)
[Mfoniri ni yɔɔ baafa 198]
“Ŋshɔ” ni ji adesai ní tseɔ atua lɛ looɔ mii ní shɛɛɛ nii ahe kɛ basabasafeemɔ eshwieɔ
[Mfoniri ni yɔɔ baafa 203]
Mizraim okɔmfoi lɛ nyɛɛɛ adamɔ Yehowa hewalɛ lɛ naa