Yeremia

36 Agbɛnɛ yɛ Yehoiakim,+ Yosia binuu lɛ, ni ji Yuda maŋtsɛ lɛ nɔyeli afi ni ji ejwɛ lɛ mli lɛ, wiemɔ nɛɛ jɛ Yehowa ŋɔɔ ba Yeremia ŋɔɔ akɛ: 2 “Kɔ wolokpo ni oŋma wiemɔi fɛɛ ni mikɛ bo wie yɛ Israel kɛ Yuda,+ kɛ jeŋmaji lɛ fɛɛ+ ahe lɛ owo mli, kɛjɛ klɛŋklɛŋ gbi ni mikɛ bo wie yɛ Yosia gbii lɛ amli lɛ kɛbashi ŋmɛnɛ gbi nɛɛ.+ 3 Ekolɛ kɛ́ Yuda shĩa lɛ mli bii lɛ nu saji fɔji fɛɛ ni mito miyiŋ akɛ mikɛbaaba amɛnɔ lɛ, amɛbaaku amɛsɛɛ kɛje amɛgbɛi fɔji lɛ anɔ, koni mikɛ amɛtɔmɔ kɛ amɛhe esha lɛ ake amɛ.”+

4 Kɛkɛ ni Yeremia tsɛ Baruk,+ Neria binuu lɛ, ni Yeremia wie wiemɔi fɛɛ ni Yehowa kɛ lɛ wie lɛ, ni Baruk ŋma yɛ wolokpo lɛ mli.+ 5 Kɛkɛ ni Yeremia fã Baruk akɛ: “Mi lɛ, atsĩ minaa ni minyɛɛɛ mabote Yehowa shĩa lɛ mli. 6 No hewɔ lɛ, bo ji mɔ ni esa akɛ oya ni oyakane Yehowa wiemɔi ni miwie ni oŋma lɛ kɛjɛ wolokpo lɛ mli lɛ waa. Kanemɔ owo maŋbii lɛ atoiiaŋ yɛ Yehowa shĩa lɛ yɛ gbi ni amɛmiihi ŋmaa nɔ; ni no baahã okane owo Yudabii fɛɛ ni jɛɔ amɛmaji lɛ amli amɛbaa jɛmɛ lɛ atoiiaŋ. 7 Ekolɛ fai ni amɛkpaa koni ana amɛ mɔbɔ lɛ baayashɛ Yehowa ŋɔɔ, ni amɛteŋ mɔ fɛɛ mɔ baaku esɛɛ kɛje egbɛi fɔji lɛ anɔ, ejaakɛ mlifu kɛ mlila ni Yehowa ewie yɛ maŋ nɛɛ he lɛ naa wa waa diɛŋtsɛ.”

8 No hewɔ lɛ, Baruk, Neria binuu lɛ, fee nibii fɛɛ ni gbalɔ Yeremia fã lɛ lɛ; ekane Yehowa wiemɔi lɛ waa kɛjɛ wolokpo lɛ mli yɛ Yehowa shĩa lɛ.+

9 Agbɛnɛ yɛ Yehoiakim,+ Yosia binuu lɛ, ni ji Yuda maŋtsɛ lɛ nɔyeli afi ni ji enumɔ lɛ mli, yɛ nyɔɔŋ ni ji nɛɛhu lɛ mli lɛ, ashiɛ akɛ mɛi fɛɛ ni yɔɔ Yerusalem lɛ, kɛ mɛi fɛɛ ni ejɛ Yuda maji lɛ amli amɛba Yerusalem lɛ ahi ŋmaa yɛ Yehowa hiɛ.+ 10 Kɛkɛ ni Baruk kane Yeremia wiemɔi lɛ waa kɛjɛ wolokpo* lɛ mli yɛ Yehowa shĩa lɛ mli yɛ maŋbii lɛ fɛɛ atoiiaŋ yɛ Gemaria,+ Shafan+ binuu woloŋmalɔ lɛ, tsũ* lɛ mli yɛ yiteŋgbɛ kpo lɛ nɔ yɛ Yehowa shĩa lɛ agbó hee lɛ naa.+

11 Be ni Mikaia, Shafan binuu Gemaria binuu lɛ, nu Yehowa wiemɔi fɛɛ ni yɔɔ wolokpo* lɛ mli lɛ, 12 ekpeleke shi kɛtee maŋtsɛ lɛ shĩa lɛ, ni etee woloŋmalɔ lɛ tsũ lɛ mli. No mli lɛ, lumɛi* lɛ fɛɛ tara jɛmɛ: Elishama,+ woloŋmalɔ lɛ, kɛ Delaia, Shemaia binuu lɛ, kɛ Elnatan,+ Akbor+ binuu lɛ, kɛ Gemaria, Shafan binuu lɛ, kɛ Zedekia, Hanania binuu lɛ, kɛ lumɛi krokomɛi lɛ fɛɛ. 13 Mikaia gba amɛ wiemɔi fɛɛ ni enu be ni Baruk kane wolokpo* lɛ ewo maŋbii lɛ atoiiaŋ lɛ.

14 Kɛkɛ ni lumɛi lɛ fɛɛ tsu Yehudi, Kushi binuu Shelemia binuu Netania binuu lɛ kɛtee Baruk ŋɔɔ akɛ: “Kɔ wolokpo lɛ ni okane owo maŋbii lɛ atoiiaŋ lɛ ni oba.” Kɛkɛ ni Baruk, Neria binuu lɛ kɔ wolokpo lɛ ehiɛ edɛ̃, ni etee amɛŋɔɔ. 15 Amɛkɛɛ lɛ akɛ: “Ofainɛ ta shi, ni okane owo wɔtoiiaŋ.” Kɛkɛ ni Baruk kane ewo amɛtoiiaŋ.

16 Be ni amɛnu wiemɔi lɛ fɛɛ lɛ, amɛkɛ gbeyeishemɔ kwɛkwɛɛ amɛhiɛiaŋ, ni amɛkɛɛ Baruk akɛ: “Esa akɛ wɔyakɛɛ maŋtsɛ lɛ wiemɔi nɛɛ fɛɛ.” 17 Ni amɛbi Baruk akɛ: “Ofainɛ, kɛɛmɔ wɔ, te ofee tɛŋŋ oŋma wiemɔi nɛɛ fɛɛ? Ani ewie ni oŋma?” 18 Baruk here amɛ nɔ akɛ: “Ewie wiemɔi nɛɛ fɛɛ etsɔɔ mi, ni mikɛ iŋki ŋma miwo wolokpo* nɛɛ mli.” 19 Lumɛi lɛ kɛɛ Baruk akɛ: “Yaa ni oyatee ohe, bo kɛ Yeremia fɛɛ, ni nyɛkahãa mɔ ko mɔ ko lea he ni nyɛyɔɔ.”+

20 Kɛkɛ ni amɛtee maŋtsɛ lɛ ŋɔɔ yɛ kpo lɛ nɔ, ni amɛkɛ wolokpo lɛ yafɔ̃ Elishama, woloŋmalɔ lɛ tsu lɛ mli, ni amɛkɛɛ maŋtsɛ lɛ nɔ fɛɛ nɔ ni amɛnu lɛ.

21 Kɛkɛ ni maŋtsɛ lɛ tsu Yehudi+ koni eyakɔ wolokpo lɛ kɛba, ni eyakɔ yɛ Elishama, woloŋmalɔ lɛ, tsũ lɛ mli kɛba. Yehudi kane ewo maŋtsɛ lɛ, kɛ lumɛi lɛ fɛɛ ni damɔ maŋtsɛ lɛ masɛi lɛ atoiiaŋ. 22 No mli lɛ, maŋtsɛ lɛ ta fɛ̃i be tsũ lɛ mli yɛ nyɔɔŋ ni ji nɛɛhu lɛ mli,* ni ashɛre la yɛ klopɔɔtu mli kɛma ehiɛ. 23 Kɛ́ Yehudi kane fãi etɛ loo ejwɛ lɛ, maŋtsɛ lɛ kɛ woloŋmalɔ kakla folɔɔ nakai fãi lɛ ni ekɛwoɔ la ni ashɛre yɛ klopɔɔtu mli kɛma ehiɛ lɛ mli, efee nakai aahu kɛyashi ekɛ wolokpo muu lɛ fɛɛ wo la ni ashɛre yɛ klopɔɔtu mli kɛma ehiɛ lɛ mli. 24 Ni amɛsheee gbeyei; maŋtsɛ lɛ kɛ etsuji lɛ fɛɛ ni nu wiemɔi nɛɛ fɛɛ ateŋ mɔ ko kwraa gbálaaa etadei. 25 Eyɛ mli akɛ, Elnatan,+ kɛ Delaia,+ kɛ Gemaria+ kpa maŋtsɛ lɛ fai koni ekashã wolokpo lɛ moŋ, shi ebooo amɛ toi. 26 Agbɛnɛ hu, maŋtsɛ lɛ fã Yerameel, maŋtsɛ lɛ binuu lɛ, kɛ Seraia, Azriel binuu lɛ, kɛ Shelemia Abdeel binuu lɛ, koni amɛyamɔ Baruk, woloŋmalɔ lɛ, kɛ gbalɔ Yeremia, shi Yehowa kɛ amɛ tee.+

27 Ni be ni maŋtsɛ lɛ eshã wolokpo ni wiemɔi ni Yeremia wie etsɔɔ Baruk ni eŋma lɛ yɔɔ mli lɛ sɛɛ lɛ, Yehowa kɛɛ Yeremia ekoŋŋ+ akɛ: 28 “Kɔ wolokpo kroko ni oŋma wiemɔi ni yɔɔ klɛŋklɛŋ wolokpo lɛ, ni Yuda maŋtsɛ Yehoiakim shã lɛ mli lɛ nɔŋŋ owo mli.+ 29 Ni owie oshi Yuda maŋtsɛ Yehoiakim akɛ, ‘Nɔ ni Yehowa kɛɛ nɛ: “Oshã wolokpo nɛɛ, ni okɛɛ akɛ, ‘Mɛni hewɔ oŋma yɛ mli akɛ: “Bɔ fɛɛ bɔ ni fee lɛ, Babilon maŋtsɛ lɛ baaba ni ebakpãtã shikpɔŋ nɛɛ hiɛ, ni ebaahã gbɔmɛi kɛ kooloi fɛɛ atã yɛ nɔ” lɛ?’+ 30 No hewɔ lɛ, nɔ ni Yehowa wieɔ eshiɔ Yuda maŋtsɛ Yehoiakim nɛ, ‘Enáŋ mɔ ko ni baata David maŋtsɛ sɛi lɛ nɔ,+ ni abaashi egbonyo ni hulu ashã lɛ yɛ jetsɛremɔ mli, ni fɛ̃i aye lɛ yɛ jenamɔ mli.+ 31 Mahã lɛ kɛ eseshibii* lɛ kɛ etsuji lɛ abu amɛtɔmɔ lɛ he akɔntaa, ni mikɛ saji fɔji fɛɛ ni miwie mishi amɛ shi amɛbooo toi+ lɛ baaba amɛ, kɛ mɛi ni yɔɔ Yerusalem lɛ, kɛ Yuda hii lɛ anɔ.’”’”+

32 Kɛkɛ ni Yeremia kɔ wolokpo kroko ni ekɛhã Baruk, Neria binuu lɛ, woloŋmalɔ+ lɛ, ni Yeremia saa ewie wiemɔi fɛɛ ni yɔɔ wolokpo ni Yuda maŋtsɛ Yehoiakim shã yɛ la mli lɛ etsɔɔ lɛ,+ ni eŋma fɛɛ. Ni akɛ wiemɔi babaoo ni tamɔ nomɛi nɔŋŋ fata he.