Ŋmɛnɛbeaŋ Biblia Shaa He Yiŋtoo Lɛ Efee Efolo
“Maŋtsɛ lɛ kɛ woloŋmalɔ kakla ni ekɛwoɔ la ni yɔɔ ŋɛsu lɛŋ lɛ mli aahu kɛyashi beyinɔ ni wolokpo lɛ fɛɛ tswɛm shaa yɛ la ni yɔɔ ŋɛsu lɛŋ lɛ mli.”—Yer. 36:23.
1. Mɛni hewɔ Biblia tso muu fɛɛ aloo efa ni ashaa lɛ jeee nɔ̃ hee lɛ?
1 BIBLIA KRƆŊKRƆŊ tso muu lɛ fɛɛ aloo efã ko ni ashaa Iɛ jeee nɔ̃ hee. Klɛŋklɛŋnɔ̃ ni abɔ he amaniɛ lɛ ba aaafee afii 2,600 ni eho nɛ. Enɛ ba yɛ maŋ ni akɛ Biblia ha kɛjɛ shishijee lɛ naagbee maŋtsɛmɛi etɛ lɛ gbii amli.
2. Mɛni ha akɛ Yeremia gbalɛ wolo lɛ fee mu ni akɛwo la ko mli lɛ?
2 Enɛ ba yɛ fɛibe ko mli yɛ Yerusalem beni Maŋtsɛ Yehoiakim ta ŋɛsu la ni haa emaŋtsɛwe lɛ dɔlɛ lɛ he. Anɔkwasaji ni aŋma afɔ shi lɛ tsɔɔ akɛ, akɛ Ŋmalɛ Krɔŋkrɔŋ lɛ fã ni he hiaa jogbaŋŋ lɛ fee mu ni akɛwoɔ la ni yɔɔ ŋɛsu ko mli lɛ. Emli amaniɛbɔɔ lɛ fã ko kɛɛ akɛ:
“Ni eba mli akɛ Yosia bi Yehoiakim, Yuda maŋtsɛ lɛ, yinɔ afi ni ji ejwɛ lɛ nɔ lɛ, nɛkɛ wiemɔ nɛɛ jɛ Yehowa ŋɔɔ ba Yeremia ŋɔɔ akɛ: Kɔ wolokpo ko oha ohe, ni oŋma wiemɔi fɛɛ ni mikɛo ewie yɛ Israel kɛ Yuda kɛ jeŋmaji lɛ fɛɛ he kɛjɛ gbii ni mikɛo bɔ̃i wiemɔ yɛ Yosia yinɔ kɛbashi ŋmɛnɛ lɛ owo mli; aleeenɔ ekolɛ Yuda we lɛ aaanu efɔŋ fɛɛ ni mito miyiŋ akɛ mafee amɛ lɛ, koni amɛteŋ mɔ fɛɛ mɔ akpale kɛjɛ egbɛ fɔŋ lɛ nɔ, ni maŋɔ amɛnishaianii kɛ amɛhe eshai lɛ mafa amɛ.” (Yer. 36:1-3)
Kɛji wɔkane Yeremia wolo lɛ yitsei 35 ni tsɔ enɛ hiɛ lɛ, wɔbaana bɔni amɛsumɔɔɔ wiemɔi ni eŋmala lɛ.
3. Mɛni hewɔ jeee haomɔ Yeremia taoɔ ni ehao gbɔmɛi lɛ, shi be enyiɛ eshwɛ kɛha mɛi lɛ koni amɛkɛfee nɔni baa lɛ he nɔ ko?
3 Ŋmɛnɛ hu nakai nɔŋŋ gbɔmɛi sumɔɔɔ saji ni tamɔ nɔni afã Yeremia akɛ eŋmala yɛ “wolokpo” lɛ mli lɛ. Shi akɛ wiemɔ nɛɛ haaa akɛ akɛwo gbɔmɛi amlila, akɛhao amɛ aloo akɛpii amɛ yɛ amanehulu ko mli. Jeee haomɔ Kristofoi ni yɔɔ ŋmɛnɛ ni tamɔ Yeremia lɛ taoɔ ni amɛhao amɛ. Shi moŋ amɛmiitsu maŋ sɔɔmɔ nitsumɔ ko ni ji gbɔmɛi fɛɛ akɔkɔbɔɔ koni amɛle jeŋ fɛɛ hiɛkpatamɔ ko ni baa lɛ. Enɛ baaha mɛikomɛi ahɛle shi ni amɛtsake amɛtsui yɛ be mli ni Yehowa kã he ehereɔ mɛi lolo nɛɛ. Nɛkɛ gbɛ nɔ abaatsɔ ahere gbɔmɛi ayiwala kɛjɛ oshara ni baa lɛ mli. Yɛ Yeremia gbii amli lɛ, no mli lɛ eshwɛ afii 18 pɛ kɛba Yuda maŋ lɛ dani Babilonbii lɛ akpata Yerusalem maŋ krɔŋkrɔŋ lɛ hiɛ. Yɛ ŋmɛnɛbeaŋ Yeremia kuu lɛ sɔɔmɔ afii 60 sɛɛ lɛ, be enyiɛ eshwɛ kɛha Yerusalem henɔ ni ji Kristendom lɛ hiɛkpatamɔ ni baaje shishi yɛ “amanehulu kpeteŋkpele” ni baaba jeŋ muu lɛ fɛɛ nɔ mli lɛ?
Hiɛkpatamɔ Wiemɔ Yɛ Maŋ Fɛɛ
4. Beni Yeremia gbe egbaIɛ wolo Iɛ ŋmalamɔ naa lɛ, mɛɛ gbɛ nɔ atsɔ akɛ emli shɛɛ lɛ yaha yɛ Yerusalem, ni mɛni hewɔ?
4 Yeremia bo toi ni etsɛ shɛɛ wiemɔi lɛ eha ewoloŋmalɔ Baruk ni ji Neria bi lɛ ni eŋmala. Nɔni aŋmala lɛ hiɛ wiemɔi fɛɛ ni Yehowa wie etsɔɔ Yeremia kɛjɛ Maŋtsɛ Yosia nɔyeli afi ni ji 13 lɛ nɔ kɛyaa, afi nɔ ni Yehowa wo oblanyo osɔfo Yeremia gbalɔ lɛ. Beni aŋma agbe naa lɛ, Yeremia nu he akɛ, enyɛɛ ekɛya Yerusalem ni jɛkɛmɔ aaafee shitoi etɛ kɛjɛ Levibii amaŋtiase Anatot lɛ mli koni eyakane wiemɔ lɛ etsɔɔ yɛ sɔlemɔwe lɛ. Nohewɔ lɛ, etsu ewoloŋmalɔ Baruk kɛtee jɛmɛ koni eyakane gbalɛ wiemɔ lɛ, ni ekɛfata he akɛ: “Ekolɛ amɛkɛ amɛfaikpamɔ aaashwie Yehowa hiɛ, ni amɛteŋ mɔ fɛɛ mɔ aaakpale kɛjɛ egbɛ fɔŋ lɛ nɔ; ejaakɛ mlifu kɛ mlila ni Yehowa ewie yɛ nɛkɛ maŋ nɛɛ he lɛ da naakpa.”—Yer. 36:4-7.
5. Mɛɛ be baafee be ni sa kɛha Yeremia gbalɛ wolo lɛ kanemɔ yɛ Yerusalem sɔlemɔwe lɛ?
5 Ani wɔteŋ mɔ ko baasumɔ ni eyadamɔ blohuiaŋ ni ekane wiemɔ ni tamɔ nɛkɛ ewo maŋ ko toiaŋ? Enɛ biɔ ekãa babaoo yɛ Baruk gbɛɛ faŋ. Shi yɛ e-Nyɔŋmɔ lɛ hewalɛ naa lɛ, enyɛ etsu enɛ! Esani wɔkai akɛ eŋɔ Baruk be ni ekɛŋmala wiemɔi fɛɛ ni Yeremia tsɛ ehalɛ lɛ. (Yer. 36:17, 18) Akɛni wiemɔi ni aŋmala nɛɛ ji Yehowa hiɛdɔɔ wiemɔ ni teɔ shi eshiɔ jeŋmaji fɛɛ ni Yuda kɛ Israel fata he hewɔ lɛ, esani akane awo amɛtoiaŋ yɛ maŋ lɛ gbijurɔyeli ko nɔ. Tamɔ maŋ muu lɛ ŋmaahii be nɛkɛ! No mli lɛ, ŋmaahilɔi baaho yuu kɛya Yerusalem sɔlemɔwe lɛ. Esani amɛ aahu kɛyashi beni nakai be lɛ baaashɛ!
6. Yɛ afi mli ni Yeremia ŋma ewolo lɛ, mɛɛ gbɛ nɔ atsɔ ana mɔni akɛbaatsu nii koni etsu Yeremia gbalɛ lɛ he nii yɛ Yerusalem butumɔ mli?
6 Nohewɔ lɛ, Baruk naaa akane wolo lɛ etsɔɔ maŋ lɛ yɛ Maŋtsɛ Yehoiakim afi ni ji ejwɛ lɛ nɔ, afi nɔ ni Babel Maŋtsɛ Nebukadnezar ye Mizraim maŋtsɛ Farao Neko tabilɔi lɛ anɔ kunim ni lɛ diɛŋtsɛ ewó ehe je lɛ nɔ maŋtsɛ hee lɛ. Nebukadnezar nɛɛ ji Jeŋmaji lɛ amaŋtsɛ ko ni Yeremia gba yɛ ehe akɛ ebaabutu Yuda kɛ Yerusalem koni shikpɔŋ lɛ aka shi amaŋfɔ ni gbɔmɔ aloo koolo akahi nɔ afi 70 lɛ.—Yer. 36:6; 25:1-11.
7. Mɛɛ afi nɔ ni mɛɛ gbijurɔyeli mli Baruk kane Yeremia wolo lɛ yɛ Yerusalem sɔlemɔwe lɛ?
7 Yuda Maŋtsɛ Yehoiakim nɔyeli lɛ ena afii enumɔ agbɛnɛ. Nɛkɛ afi lɛ nɔŋŋ mli Nebukadnezar nɔyeli lɛ ena afii enyɔ akɛ jeŋ nɔyelɔ. Nɔni aŋma afɔ shi yɛ Yeremia 36:9, 10 lɛ maa enɛ anɔ mi. Ekɛɛ akɛ:
Ni eba mli akɛ Yosia bi Yehoiakim, Yuda maŋtsɛ lɛ, yinɔ afi ni ji enumɔ [624-623 D.Ŋ.B.] lɛ nɔ nyɔɔŋ ni ji nɛɛhu lɛ nɔ lɛ ashiɛ ŋmaahilɛ yɛ Yehowa hiɛ aha Yerusalem maŋ nuu lɛ fɛɛ kɛ mɛi fɛɛ ni jɛɔɔ Yuda maji lɛ amli baa Yerusalem lɛ. Kɛkɛ ni Baruk kane Yeremia wiemɔi ni yɔɔ wolo lɛ mli lɛ yɛ Yehowa we lɛ yɛ woloŋmalɔ Shafan bi Gemaria lɛ pia lɛ mli yɛ yiteŋgbɛ kpo lɛ nɔ yɛ Yehowa we lɛ agbo lɛ shinaa lɛ naa ewo maŋ muu lɛ fɛɛ toiaŋ.
8. Mɛɛ be mli yɛ nakai afi lɛ mli Baruk bɔ̃i Yeremia famɔ lɛ he nitsumɔ?
8 Akaneɔ Yuda maŋtsɛyelii lɛ kɛjɛɔ agbiɛnaa be nyɔɔŋ ni ji Abib aloo Nisan nɔ. Amɛnyɔɔŋtsere afi lɛ nyɔji nɛɛhu ni atsɛɔlɛ Kislev lɛ pueɔ yɛ fɛibe mli. Nyɔɔŋ ni wɔtsɛɔlɛ December (Latin wiemɔ ni shishi ji nyɔɔŋ ni ji 10) lɛ fã ko fata he. Yɛ Makabibii agbii amli lɛ, ayeɔ “sɔlemɔtsunaagbelemɔ kaimɔ gbijurɔ” yɛ Kislev 25, ni akɛɛ nakai be lɛ ji “fɛibe” amli. (Yoh. 10:22) Yɛ Kislev nyɔɔŋ lɛ fɛi ni naa wa lɛ fɛɛ sɛɛ lɛ, Baruk ni ji Yeremia woloŋmalɔ lɛ je shishi ebɔ̃i Yeremia famɔ lɛ he nitsumɔ.
9. Te Yuda lumɛi lɛ nu he amɛha tɛɛŋ yɛ wolokpo ni akane atsɔɔ amɛ lɛ he, ni mɛni amɛkɛɛ Baruk kɛ Yeremia akɛ amɛfee?
9 Yeremia wiemɔi ni Baruk kane waa ewo gbɔmɛi lɛ atoiaŋ yɛ sɔlemɔwe lɛ kɔɔ maŋ muu lɛ fɛɛ he. Nohewɔ lɛ, Yuda lumɛi lɛ fɔ nine amɛtsɛ Baruk koni ebakane gbalɛwiemɔ lɛ etsɔɔ amɛ. (Yer. 36:11-15) Kɛji wɔkane nɔ ni Yeremia gbalɛ lɛ yitsei ni etsɔ hiɛ lɛ kɛɔ yɛ Yuda maŋtsɛyeli ni abulɛ fɔ lɛ he lɛ, wɔbaana nɔhewɔ ni ŋmiŋmi mɔmɔ lumɛi ni nu nɔni Baruk kane etsɔɔ amɛ lɛ. Maŋhedɔɔ mumɔ tsirɛ amɛ akɛ esani amɛyabɔ Maŋtsɛ Yehoiakim amaniɛ. Amɛhe wolo lɛ yɛ Baruk dɛ, shi beni amɛna akɛ amɛ ji mɛi ni wielɔ kɛ woloŋmalɔ lɛ fɛɛ kɛwieɔ lɛ, amɛkɛɛ Baruk akɛ ekɛ Yeremia fɛɛ ayatee amɛhe ni mɔ ko akana amɛ. Enɛ ye omanye jogbaŋŋ.—Yer. 36:16-20.
Klɛŋklɛŋ Be Mli Ni Asha Biblia
10. Mɛni Maŋtsɛ Yehoiakim fee beni Yehudi kane wolo lɛ etsɔɔlɛ lɛ, ni mɛɛ hewalɛ nifeemɔ nɛɛ na yɛ amɛnɔ?
10 Lumɛi lɛ tee fɛibe-tsu lɛ mli amɛyabɔ Maŋtsɛ Yehoiakim amaniɛ. Etao ni enine ashɛ Yeremia gbalɛ wolokpo lɛ nɔ. Nohewɔ lɛ, etsu epiafonyo ni atsɛɔlɛ Yehudi lɛ akɛ eyakɔ wolokpo lɛ yɛ sɔlemɔtsu lɛ mli heni ashi yɛ lɛ kɛba. Agbɛnɛ mɛni ba yɛ be mli ni Yehudi gbele wɔlokpo lɛ naa ni ekane ebaafai lɛ ekomekome kɛwo amɛtoiaŋ lɛ? “Ni eba mli akɛ, kɛ Yehudi kane wolo baafai etɛ aloo ejwɛ lɛ, maŋtsɛ lɛ kɛ woloŋmalɔ kakla folɔɔ ni ekɛwoɔ la ni yɔɔ ŋɛsu lɛŋ lɛ mli aahu kɛyashi beyinɔ ni wolokpo lɛ fɛɛ tswɛm shaa yɛ la ni yɔɔ ŋɛsu lɛŋ lɛ mli. Ni maŋtsɛ lɛ kɛ etsuji lɛ fɛɛ ni nu nɛkɛ wiemɔi nɛɛ, amɛteŋ mɔ ko sheee gbeyei, ni amɛgbalaaa amɛtadei hu.”—Yer. 36:21-24.
11. Beni akane 5 Mose wolo Iɛ atsɔɔ Yehoiakim lɛ, mɛɛ gbɛ nɔ esoro ejeŋba yɛ etsɛ Yosia nɔ̃ lɛ he, ani Yehoiakim bo 5 Mose 17:18-20 Iɛ toi?
11 Mɛɛ bulɛ ni abɛ kɛha Nyɔŋmɔ wiemɔ ni jɛ mumɔŋ lɛ po ji enɛ! Kwɛ bɔni Maŋtsɛ Yehoiakim nifeemɔ nɛɛ tamɔɔɔ etsɛ Yosia nɔ lɛ! Beni ana gbalɔ Mose wolo ni ji enumɔ lɛ yɛ sɔlemɔtsu ni abule lɛ saamɔ kɛ ehetsuumɔ mli lɛ, Yosia ha woloŋmalɔ ko kane ehalɛ. Yosia kɛ wiemɔi lɛ wo etsui mli ni egbala ehe atadei. No sɛɛ lɛ, eha maŋ lɛ kɛ Yehowa fee kpaŋmɔ krɛdɛɛ ko akɛ amɛbaabo egbee toi koni amɛhiɛ ejamɔ krɔŋŋ lɛ mli. (2 Kron. 34:14-33) Shi nakai mla kpaŋmɔ lɛ bi Israel maŋtsɛmɛi ni baanyiɛ sɛɛ lɛ akɛ amɛŋmala nakai mla lɛ pɛpɛɛpɛ amɛkɛto koni amɛkane be fɛɛ be ni amɛye nɔ. (5 Mose 17:18-20) Mɛni tsɔɔ akɛ Maŋtsɛ Yehoiakim tsu Nyɔŋmɔ famɔ nɛɛ he nii? Dabida! Efee nɔkwɛmɔnɔ gbonyo!
12. Mɛɛ nɔkwɛmɔnii enyɔ atsi ta yɛ biɛ ni tsɔɔ akɛ mɛikomɛi yɛ ŋmɛnɛ ni tamɔ Yehoiakim aloo eko bɛ?
12 Ani ŋmɛnɛbe mli Yehoiakim-bii yɛ? Hɛɛ, yɛ Ŋmalɛ Krɔŋkrɔŋ lɛ shaa gbɛfaŋ. Hɛɛ, yɛ Kristendom teŋ tuuŋtu! Kaimɔ nɔni ba yɛ Eutla, Oaxaca, Mexico, yɛ afi 1961 mli beni Roma Katolik osɔfo ko ha asafo yuu ko yatua shia ko ni akpeɔ yɛ mli lɛ ni amɛloo Biblia fɛɛ ni amɛna lɛ kɛtee amɛyasha yɛ maŋ fɛɛ hiɛ lɛ. Maŋ nɛɛ mli adafitswaawolo ko bɔ amaniɛ akɛ etamɔ nɔni ‘hemɔkɛyeli’ mli amɛjɛ amɛfee enɛ. Yɛ afi 1962 February mli lɛ, awo mla yɛ Portugal akɛ akaha Yehowa Odasefoi maje amɛwoji lɛ kɛtsɔ maŋ lɛ woji amajemɔhe lɛ. Enɛ ha ashɔ Yehowa Odasefoi ajamɔŋ woji lɛ kɛ Bibliai pii yɛ amɛdɛ ni asha, tsɛbelɛ adafitswaa ko bɛ ni tsɔɔ akɛ Portugal nɔyeli lɛ egu Yehowa Odasefoi anitsumɔ lɛ.
13, 14. (a) Mɛni ba yɛ Argentina yɛ afi 1976 mli? (b) Enɛ teɔ mɛɛ sanebimɔ shi, ni mɛɛ yiŋtoo krɛdɛɛ hewɔ osɔfoi lɛ taoɔ ni amɛtsi Yehowa Odasefoi anitsumɔ akɛ Kristofoi lɛ naa?
13 Yɛ afi 1976 mli lɛ, agu Yehowa Odasefoi anitsumɔ lɛ yɛ Argentina, ni afii enyɔ pɛ ni eho nɛ yɛ amɛnitsumɔhe wulu ni yɔɔ Buenos Aires lɛ, ashɔ woji pii kɛ Spanish Jeŋ Hee Shishitsɔɔmɔ Biblia 250 yɛ amɛdɛ. Ahɔɔ enɛɛmɛi fɛɛ aha woji afeelɔi ni amɛfɔlɔ fɛɛ amɛhoo amɛkɛfee nibii krokomɛi. No sɛɛ lɛ ashɔ Yehowa Odasefoi ni ana amɛ beni amɛjɛ Uruguay kɛyaa Argentina lɛ a-Bibliai ni amɛhiɛ lɛ yɛ amɛdɛ ni asha. Wɔbaaha wɔnikanelɔi ale nɔkwɛmɔnii krokomɛi ni tsɔɔ Bibliai ni ashaa lɛ yɛ sɛɛ mli, shi enɛɛmɛi fɛɛ teɔ sanebimɔ ko shi.
14 Mɛni haa Biblia lɛ bafeɔ tamɔ Yehowa Odasefoi adɛŋdade ko ni yeɔ mɔ awui hewɔ ni maji ni tsɛɔ amɛhe Kristofoi lɛ po heɔ yɛ mɛi adɛ yɛ gbɛ ni ejaaa nɔ ni amɛshaa? Akɛni maŋhedɔlɔi lɛ naa Yehowa Odasefoi tamɔ bɔni Maŋtsɛ Yehoiakim na Yeremia kɛ Baruk—akɛ maŋshishinyiɛlɔi ni he yɔɔ gbeyei kɛha maŋ lɛ kɛ mɛi ni tsĩɔ maŋ hebuu naa lɛ hewɔ? Enɛ ji nɔni Kristendom jamɔŋ hiɛnyiɛlɔi taoɔ ni maŋkwramɔŋ hiɛnyiɛlɔi lɛ ahe aye! Shi yiŋtoo krɛdɛɛ hewɔ ni amralofoi kɛ osɔfoi lɛ taoɔ ni amɛtsĩ Yehowa Odasefoi anitsumɔ lɛ naa ji akɛ: Amɛsɔmɔɔ Nyɔŋmɔ kometoo lɛ nɔŋŋ ni Yeremia kɛ Baruk sɔmɔ lɛ, amɛkwɛɔ Hebri Ŋmalɛi lɛ amli ni amɛnaa Nyɔŋmɔ shɛɛ ni tamɔ nɔni ekɛha gbalɔ Yeremia lɛ. Agbɛnɛ amɛtamɔ Yeremia; amɛfeɔ toiboo amɛhaa Yehowa famɔ ni yɔɔ nakai Ŋmalɛ ni jɛ mumɔ mli lɛ mli, ni amɛshiɛɔ eshɛɛ lɛ kɛshiɔ ŋmɛnɛ nibii agbɛjianɔto fɔŋ ni Kristendom kɛ jeŋ gbɛjianɔtoi krokomɛi fɛɛ ni ekɛgbalaa kɔŋtso lɛ hu fata he lɛ. Nohewɔ lɛ, aba Yehowa Odasefoi lɛ ashi, mɛi ni haa anaa Kristendom shishi lɛ!
15, 16. (a) Mɛɛ nɔkwɛmɔnii wɔyɔɔ yɛ afii ohai kpawo D.Ŋ.B. lɛ mli ni tsɔɔ kɛji nɔyeli hiɛnyiɛlɔi fɛɛ sumɔɔ akɛ awa Yehowa Odasefoi ayi aloo jeee amɛ fɛɛ? (b) Mɛni Yehowa efee eha etsuji lɛ?
15 Nɔyeli hiɛnyiɛlɔi ashishibii onukpai fioo komɛi yɛ ni kɛ amɛnukpai lɛ kpaaa gbee yɛ yiwaa ni akɛbaa Yehowa Odasefoi anɔ lɛ mli. Amɛteɔ shi amɛwoɔ enɛ yɛ jalɛ naa kɛ bulɛ ni amɛyɔɔ kɛha Nyɔŋmɔ ni Kristofoi ni anyɛɔ amɛ nɛɛ ji edasefoi lɛ hewɔ—shi fɛɛ efee efolo! Enɛ tamɔ sane ko ni ba yɛ afii ohai kpawo D.Ŋ.B. mli lɛ. “Tsɛ Elnatan kɛ Delaia ka Germaria kpa maŋtsɛ lɛ fai akɛ eka-sha wolokpo lɛ, shi ebooo amɛ toi. Shi moŋ maŋtsɛ lɛ fa Yerameel, Hamelek bi lɛ, kɛ Seraia, kɛ Azriel bi lɛ, kɛ Selemia, Abdeel biŋ lɛ, akɛ amɛyamɔmɔ Baruk, woloŋmalɔ lɛ, kɛ gbalɔ Yeremia kɛba; shi Yehowa ŋɔ amɛ etee.’—Yer. 36:25, 26.
16 Maŋtsɛ Yehoiakim tsuuu egboshiniyelɔ Yehoiakim shi otsu ‘ebi’ Yerameel kɛ epiafoi krokomɛi enyɔ moŋ akɛ amɛyamɔmɔ Yeremia kɛ ewoloŋmalɔ lɛ kɛba. Eka shi faŋŋ akɛ maŋtsɛ lɛ hiɛ yiŋtoo fɔŋ. Shi Yehowa haaa ale heni aŋɔ amɛ atee yɛ, kɛji Yerusalem jio, Anatot jio, mɔ ko mɔ ko leee. Yehowa wo Yeremia shi yɛ egbalɛ nitsumɔ lɛ shishijee mli akɛɛ “Amɛkɛo aaawu, shi amɛnyɛŋo; ejaakɛ mikɛo yɛ, ni majieo, Yehowa kɛɛ.”—Yer. 1:19
17, 18. (a) Yɛ gbalɛ ni tsɔ hiɛ yɛ Yesaia 40:8 lo naa lɛ, te yiŋtoo ni hɔ Yehoiakim Biblia shaa lɛ, sɛɛ lɛ baagbe naa aha tɛɛŋ? (b) Mɛni afã Yeremia akɛ eŋma yɛ wolokpo kroko nɔ kɛshi Yehoiakim?
17 Yɛ afii oha ni tsɔ Yeremia hiɛ lɛ mli lɛ, gbalɔ Yesaia ŋma akɛ: “Wɔ-Nyɔŋmɔ lɛ wiemɔ lɛ aaadamɔ shi kɛaaatee naanɔ!” (Yes. 40:8; 1 Pet. 1:25) Nohewɔ lɛ, yɛ Nyɔŋmɔ gbɛjianɔtoo naa lɛ, esani yiŋtoo fɔŋ ni yɔɔ Yeremia gbalɛ wolokpo lɛ ni Maŋtsɛ Yehoiakim sha lɛ sɛɛ lɛ afee efolo. Nyɔŋmɔ yiŋtoo ji akɛ wɔ mɛi ni wɔyɔɔ ŋmɛnɛ yɛ afii ni fe akpei enyɔ kɛ fã sɛɛ lɛ ana Yeremia gbalɛ lɛ fɛɛ. Mɛɛ gbɛ nɔ enɛ ba mli nakai yɛ? Yeremia gbaa wɔ enɛ yɛ be mli ni Yehowa ŋɔ ekɛ Baruk etee lɛ.
18 “Ni beni maŋtsɛ lɛ esha wolokpo lɛ kɛ wiemɔi ni Baruk ŋma kɛjɛ Yeremia naa lɛ sɛɛ lɛ, kɛkɛ ni Yehowa wiemɔ ba Yeremia ŋɔɔ akɛ: Kɔ wolokpo kroko ni oŋma tsutsu wiemɔi lɛ fɛɛ ni yɔɔ klɛŋklɛŋ wolokpo lɛ ni Yuda maŋtsɛ Yehoiakim sha lɛ mli lɛ owo mli. Shi kɛɛmɔ yɛ Yuda maŋtsɛ Yehoiakim lɛ hewɔ akɛ: Bɔni Yehowa kɛɛ nɛ: Bo lɛ osha nɛkɛ wolokpo nɛɛ, okɛɛ: Mɛɛ hewɔ ni oŋma owo mli akɛ: ‘Ba kɛ̃ Babel maŋtsɛ lɛ aaaba ni ebafite nɛkɛ shikpɔŋ nɛɛ, ni eha enɔ gbɔmɛi kɛ kooloi fɛɛ atã!’? Nohewɔ lɛ bɔni Yehowa kɛɛ yɛ Yuda maŋtsɛ Yehoiakim lɛ hewɔ nɛ: Enaŋ mɔ ko ni aaata David maŋtsɛsɛi lɛ nɔ, ni aaashɛ egbonyo lɛ afɔ ni latsaa aaatsalɛ shwane ni fɛi aaayelɛ nyɔɔŋ. Ni mawo lɛ kɛ eseshibii lɛ kɛ etsuji lɛ nyɔmɔ yɛ amɛnishaianii lɛ ahewɔ, ni amɛ kɛ Yerusalembii lɛ kɛ Yudabii lɛ, mikɛ efɔŋ fɛɛ ni miwie yɛ amɛhe ni amɛbooo toi lɛ aaaba amɛnɔ.”—Yer. 36:27-31.
19. Nyɔŋmɔ famɔ Iɛ toiboo biɔ ni Yeremia kɛ Baruk atsu mɛɛ nitsumɔ kroko, ni te nibii ni aŋmala ato najiaŋ lɛ falɛ tamɔ tɛɛŋ?
19 Nyɔŋmɔ famɔ lɛ toiboo biɔ ni gbalɔ lɛ kɛ ewoloŋmalɔ lɛ atsu nii yɛ teemɔ mli, shi ani Yeremia bo toii “Kɛkɛ ni Yeremia kɔ wolokpo kroko, ni ekɛha Baruk, Neria bi lɛ, ni ji woloŋmalɔ lɛ, ni eŋma wiemɔi fɛɛ ni yɔɔ wolo ni Yuda maŋtsɛ Yehoiakin sha yɛ la mli lɛŋ lɛ kɛjɛ Yeremia naa ewo mli; ni aŋɔ wiemɔi babaoo ni tamɔ nomɛi afata he tete.”—Yer. 36:32.
20. Beni Yehoiakim gbo lɛ, te afulɛ tɛɛŋ, ni ani ebinuu Yehoiakin bii lɛ eko ta Yerusalem maŋtsɛsɛi lɛ nɔ?
20 Yɛ enaagbee mli lɛ, Yehoiakim gbo gbele ni hiɛ bɛ nyam tamɔ bɔni teji gboɔ lɛ, ni afuuulɛ yɛ Yerusalem maŋtsɛmɛi afuuhe lɛ. (Yer. 22:18, 19) Ebinuu Yehoiakin (aloo Konia) baye maŋtsɛ nyɔji etɛ kɛ gbii 10 pɛ yɛ Yerusalem, kɛkɛ ni eŋɔ ehe eha Babilonbii lɛ ni aŋɔlɛ nom kɛtee Babilon, ni ekuuu esɛɛ ebaaa dɔŋŋ. (Yer. 22:24-30; 37:1) Yehoiakim bi Yehoiakin seshinyo ko yeee maŋtsɛ dɔŋŋ yɛ Yuda odehei akutso lɛ mli yɛ Yerusalem kɛyashi beyinɔ ni Romabii lɛ bakpata Yerusalem maŋtiase ni asaa ama lɛ hiɛ yɛ afi 70 Ŋ.B. lɛ. Yeremia gbalɛ wiemɔ ni eŋma yɛ eteemɔhe lɛ efeee efolo, eba mli anɔkwale!
21. Kɛji anyɛ ŋmɛnɛ Yehowa Odasefoi anɔ kɛtee nu shishi lɛ, mɛni amɛfeɔ, ni mɛɛ omanye ŋmɛnɛbeaŋ Biblia ni ashaa lɛ eye?
21 Anyɛ Yehowa Odasefoi anɔ kɛtee nu shishi yɛ shikpɔji pii anɔ ŋmɛnɛ. Kɛ ahe Biblia ni amɛkɛtsuɔ nii lɛ yɛ amɛdɛ ni asha lɛ, mɛni amɛfeɔ? Amɛkalaa ehee aloo amɛtaoɔ Biblia shishitsɔɔmɔi krokomɛi amɛkɛtsuɔ nii. Yɛ amɛteemɔhe lɛ po diɛŋtsɛ lɛ, amɛshiɛɔ hiɛkpatamɔ ni baaba jeŋ ni ekwa Nyɔŋmɔ nɔ lɛ amɛtsɔɔ kɛ hegbɛ yɛ lɛ, taakɛ bɔni Yeremia fee lɛ. Biblia ni ashaa kɛ yiŋtoo akɛ Yehowa Odasefoi ni yɔɔ ŋmɛnɛ lɛ afee dioo lɛ efee efolo. Enɛ wooo amɛhe gbeyei koni amɛkpa Biblia woji ajaa aloo enyɛŋ etsi Yehowa wiemɔ lɛ mlibaa naa yɛ jaramɔbei ni kã wɔhiɛ lɛ amli! Shiteekɛwolɔi etsɔɔ faŋŋ akɛ amɛsa naanɔ hiɛkpatamɔ yɛ nakai be mli! a
[Shishigbɛ niŋmai]
a Ajie kɛjɛ February 1, 1980 Blɔfo Buu-Mɔɔ lɛ mli.
[Mfoniri ni yɔɔ baafa 4]
Yehoiakim miisha Nyɔŋmɔ wiemɔ lɛ—nɔkwɛmɔnɔ ni anyiɛ sɛɛ yɛ ŋmɛnɛ mli