Nahum
2 Mɔ ko ni gbɛɔ mɛi eshwãa efã kɛba onɔ.*+
Buu ohei ni atswa gbogboi awo amɛhe lɛ ahe.
Buu gbɛjegbɛ lɛ he.
Nyɛsaa nyɛhe,* ni nyɛtɛjea nyɛhe kɛ nyɛhewalɛ fɛɛ.
2 Ejaakɛ Yehowa kɛ nɔ ni Yakob kɛshiɔ etsitsi lɛ baahã lɛ ekoŋŋ,
Kɛ nɔ ni Israel hu kɛshiɔ etsitsi lɛ,
Ejaakɛ hiɛkpatalɔi lɛ ekpãtã amɛhiɛ;+
Ni amɛfite amɛtsei aniji ni etsɛ̃rɛ̃ lɛ.
3 Ehii kãkãlɔi lɛ atsɛŋi lɛ, awo amɛ kɔla tsuru,
Etawulɔi lɛ wo atadei ni tsuɔ waa.
Eta shwiilii lɛ ahe dadei lɛ kpɛlɛɔ tamɔ la
Yɛ gbi ni esaa ehe kɛhã ta lɛ nɔ,
Ni ahosoɔ akpɔlɔi ni akɛ junipa tsei fee lɛ.
4 Ta shwiilii lɛ joɔ foi gidigidi yɛ gbɛjegbɛi lɛ anɔ.
Amɛshaa foi kɛyaa kɛbaa yɛ henaabuamɔhei lɛ.
Amɛkpɛlɛɔ tamɔ latsei* ni miitso, ni amɛshaa foi tamɔ sarawa.
5 Ebaatsɛ enukpai lɛ kɛba.
Amɛbaatɛrɛ be ni amɛnyiɛɔ lɛ.
Amɛbaasha foi kɛya egbogbo lɛ he;
Amɛbaafo afabaŋ.
7 Akpɛ mli ato:* Akpa ehe mama,
Aŋɔ lɛ kɛtee, ni enyɔji yei lɛ miikɛ̃mɔ;
Amɛgbee tamɔ okpoi agbee be ni amɛgbálaa amɛtsitsii* mai lɛ.
8 Ninive+ gbii lɛ amli fɛɛ lɛ, etamɔ nui ni bua shi,
Shi amrɔ nɛɛ, amɛmiijo foi.
“Nyɛdamɔa shi! Nyɛdamɔa shi!”
Shi mɔ ko mɔ ko tsɔɔɔ esɛɛ.+
9 Nyɛhaa jwiɛtɛi, nyɛhaa shika tsuru!
Jwetrii lɛ etãaa.
Abua ojarawa nibii srɔtoisrɔtoi fɛɛ anaa ato yɛ emli.
10 Maŋ lɛ kã shi efolo, etsɔ amaŋfɔ, akpãtã hiɛ!+
Amɛtsuii efã waa, amɛnakutsei amli ejɔ, ni amɛhɛi miikpokpo;
Amɛ fɛɛ amɛhiɛ miitsɔɔ akɛ amɛhao waa.
11 Nɛgbɛ jatai lɛ ashihilɛhe lɛ yɔɔ,+ he ni jatai* lɛ yeɔ nii yɛ,
He ni jata lɛ nyiɛɔ ebii lɛ ahiɛ kɛjeɔ kpo yɛ,
Ní mɔ ko mɔ ko wooo amɛhe gbeyei lɛ?
12 Jata lɛ tserɛ kooloi ni fa bɔ ni sa amli ehã ebii lɛ
Ni eshɔ̃tɔ̃ eko ehã ejatayei lɛ.
Ewo ebui lɛ amli obɔbɔ kɛ kooloi ni emɔmɔ lɛ,
Ni ehã eshihilɛhei lɛ hu yi kɛ kooloi ni etserɛ amɛmli lɛ.