Petro Klɛŋklɛŋ Wolo Lɛ
1 Petro, ni ji Yesu Kristo bɔfo+ lɛ, kɛ wolo nɛɛ miimaje gbɔi ni egbɛ eshwã Ponto kɛ Galatia kɛ Kapadokia+ kɛ Asia kɛ Bitinia lɛ, mɛi ni ahala 2 yɛ le ni Nyɔŋmɔ, ni ji Tsɛ lɛ le eto momo lɛ naa,+ mɛi ni akɛ mumɔ lɛ efee amɛ krɔŋkrɔŋ,*+ kɛ yiŋtoo akɛ amɛtsɔmɔ toibolɔi, ni akɛ Yesu Kristo lá lɛ eshwã amɛnɔ lɛ:+
Dromɔ kɛ toiŋjɔlɛ aya nɔ afa ahã nyɛ.
3 Ajie wɔ-Nuŋtsɔ Yesu Kristo Nyɔŋmɔ kɛ e-Tsɛ lɛ yi, ejaakɛ yɛ emɔbɔnalɛ kpele lɛ naa lɛ, etsɔ shi ni etee Yesu Kristo kɛjɛ gbohii ateŋ+ lɛ nɔ ehã afɔ wɔ ehee+ koni wɔná hiɛnɔkamɔ ni hiɛ kã,+ 4 koni wɔná gboshinii ni fiteee ni abuleko ni kwaaa lɛ.+ Akɛto yɛ ŋwɛi ahã nyɛ,+ 5 nyɛ mɛi ni aatsɔ hemɔkɛyeli nɔ aabu nyɛhe yɛ Nyɔŋmɔ hewalɛ naa kɛhã yiwalaheremɔ ko ni asaa ato ni abaajie kpo yɛ naagbee be lɛ mli lɛ. 6 Enɛ hewɔ lɛ, nyɛyɛ miishɛɛ babaoo, eyɛ mli akɛ ehe miihia ni shihilɛi ni mli wawai srɔtoi ahã nyɛwerɛ aho nyɛhe be fioo ko moŋ,+ 7 bɔ ni afee ni nyɛhemɔkɛyeli ni aka akwɛ yɛ nɛkɛ gbɛ nɔ lɛ,+ nɔ ni jara wa kwraa fe shika tsuru ni aka yɛ la mli akwɛ* shi fɛɛ sɛɛ lɛ efiteɔ lɛ, ahã nyɛná yijiemɔ kɛ anunyam kɛ woo yɛ Yesu Kristo kpojiemɔ lɛ mli.+ 8 Eyɛ mli akɛ nyɛnako lɛ pɛŋ moŋ, shi nyɛsumɔɔ lɛ. Eyɛ mli akɛ nyɛnaaa lɛ amrɔ nɛɛ moŋ, shi nyɛheɔ enɔ nyɛyeɔ,* ni nyɛmii shɛɔ nyɛhe babaoo kɛ miishɛɛ ni yɔɔ nyam ni anyɛɛɛ naa atsɔɔ, 9 be mli ni nyɛnine shɛɔ nyɛyiwalaheremɔ* lɛ, ni ji nyɛhemɔkɛyeli lɛ he oti lɛ nɔ lɛ.+
10 Nɛkɛ yiwalaheremɔ nɛɛ, gbalɔi ni gba yɛ dromɔ ni nyɛbaaná lɛ he lɛ tao mli jogbaŋŋ ni amɛpɛi mli fitsofitso.+ 11 Amɛtee nɔ amɛtao be tuuntu ni mumɔ ni yɔɔ amɛmli lɛ tsɔɔ akɛ nibii ni kɔɔ Kristo lɛ he+ lɛ baaba mli kɛ shihilɛ mli ni ebaaba mli yɛ, ejaakɛ no mli lɛ mumɔ lɛ miiye amanehului ni baaba Kristo nɔ+ lɛ kɛ anunyam ni baanyiɛ nomɛi asɛɛ lɛ he odase eetsɔɔ kɛmiito. 12 Ajie kpo atsɔɔ amɛ akɛ jeee amɛ diɛŋtsɛ amɛhe amɛsɔmɔɔ lɛ, shi moŋ, amɛmiisɔmɔ nyɛ, yɛ nɔ ni amrɔ nɛɛ mɛi ni tsɔ mumɔ krɔŋkrɔŋ ni atsu kɛjɛ ŋwɛi lɛ nɔ amɛjaje sane kpakpa lɛ amɛtsɔɔ nyɛ lɛ ekɛɛ nyɛ lɛ gbɛfaŋ.+ Nɛkɛ nibii nɛɛ, ŋwɛibɔfoi po miishwe ni amɛnu shishi jogbaŋŋ.
13 No hewɔ lɛ, nyɛsaa nyɛjwɛŋmɔi nyɛtoa nitsumɔ;*+ nyɛhiɛ ahia nyɛhe nɔ jogbaŋŋ kɛmɔa shi;+ nyɛhãa nyɛhiɛ akãa dromɔ ni akɛbaahã nyɛ yɛ Yesu Kristo kpojiemɔ lɛ mli lɛ nɔ waa. 14 Akɛ bii toibolɔi lɛ, nyɛkahãa nibii ni nyɛshweɔ tsutsu be ni nyɛleee nɔ ko lɛ yaa nɔ eshɔ̃a nyɛ dɔŋŋ,* 15 shi moŋ, tamɔ bɔ ni Mɔ Krɔŋkrɔŋ ni tsɛ nyɛ lɛ yɔɔ lɛ, nyɛ hu nyɛfea mɛi krɔŋkrɔŋi yɛ nyɛnifeemɔi fɛɛ amli,+ 16 ejaakɛ aŋma akɛ: “Nyɛfea krɔŋkrɔŋ, ejaakɛ miyɛ krɔŋkrɔŋ.”+
17 Ni kɛ́ nyɛmiibo nyɛmiitsɛ Tsɛ lɛ, mɔ ni kojoɔ mɔ fɛɛ mɔ yɛ enitsumɔ naa, ni ekwɛɛɛ hiɛiaŋ lɛ,+ no lɛ, nyɛkɛ gbeyeishemɔ abaa nyɛjeŋ+ yɛ be nɛɛ ni nyɛji gbɔi lɛ mli. 18 Ejaakɛ nyɛle akɛ jeee nibii ni fiteɔ, tamɔ jwiɛtɛi loo shika tsuru, akɛhã nyɛye nyɛhe*+ kɛjɛ nyɛyaka jeŋba ni nyɛná kɛjɛ nyɛtsɛmɛi lɛ aŋɔɔ* lɛ mli. 19 Shi moŋ akɛ Kristo+ lá ni jara wa lɛ,+ tamɔ gwantɛŋbi+ ni kpa ko kɛ muji ko hu bɛ ehe lɛ lá. 20 Anɔkwa, ale lɛ ato momo dani ato je lɛ shishi,*+ shi ajie lɛ kpo yɛ bei lɛ anaagbee mli yɛ nyɛhewɔ.+ 21 Nyɛtsɔ enɔ nyɛhe Nyɔŋmɔ, mɔ ni tee lɛ shi kɛjɛ gbohii ateŋ,+ ni ehã lɛ anunyam+ lɛ nɔ nyɛye,+ koni nyɛhemɔkɛyeli kɛ nyɛhiɛnɔkamɔ lɛ ahi Nyɔŋmɔ mli.
22 Akɛni nyɛtsɔ anɔkwale lɛ toiboo nɔ nyɛfee nyɛhe* krɔŋkrɔŋ, ni no ehã nyɛjieɔ nyɛmimɛi ateŋ suɔmɔ ni osato bɛ mli+ kpo hewɔ lɛ, amrɔ nɛɛ, nyɛjɛa nyɛtsuiŋ nyɛsumɔsumɔa nyɛhe waa.+ 23 Ejaakɛ atsɔ Nyɔŋmɔ ni hiɛ kã ni hiɔ shi daa+ lɛ wiemɔ lɛ nɔ afɔ nyɛ ehee,+ ni jeee dumɔwu ni fiteɔ mli ajɛ afɔ nyɛ, shi moŋ ajɛ dumɔwu ni fiteee*+ mli. 24 Ejaakɛ “heloo fɛɛ* tamɔ jwɛi fɔ, ni enunyam lɛ fɛɛ tamɔ ŋa nɔ fɔfɔi; jwɛi fɔ gbiɔ, ni fɔfɔi kpalaa, 25 shi Yehowa* wiemɔ lɛ hiɔ shi kɛyaa naanɔ.”+ Ni “wiemɔ” nɛɛ ji sane kpakpa ni ajaje atsɔɔ nyɛ lɛ.+