1 Samuel
12 Ni Samuel kɛɛ Israel fɛɛ akɛ: “Naa, mifee nibii fɛɛ ni nyɛbi mi lɛ,* ni miwó maŋtsɛ mihã nyɛ koni eye nyɛnɔ.+ 2 Agbɛnɛ naa, maŋtsɛ lɛ ji mɔ ni nyiɛ nyɛhiɛ nɛɛ!+ Mi lɛ, migbɔ ni mije waŋ, ni mibihii lɛ kɛ nyɛ yɔɔ.+ Minyiɛ nyɛhiɛ kɛjɛ miblahiiaŋ aahu kɛbashi ŋmɛnɛ gbi nɛɛ.+ 3 Naa, mi nɛ. Nyɛyea odase nyɛshia mi yɛ Yehowa hiɛ kɛ mɔ ni efɔ lɛ mu lɛ hu hiɛ:+ Namɔ tsinanuu loo teji mishɔ̃?+ Aloo namɔ mishishiu* loo miwa lɛ yi? Namɔ dɛŋ mihe nyɔɔŋnii yɛ koni maku mihiɛ mashwie sane nɔ?+ Kɛji mifee nakai lɛ, mato nyɛ najiaŋ.”+ 4 Kɛkɛ ni amɛkɛɛ akɛ: “Oshishiuko* wɔ, ni owako wɔ yi, ni oheko nɔ ko nɔ ko yɛ wɔteŋ mɔ ko dɛŋ.” 5 No hewɔ lɛ, ekɛɛ amɛ akɛ: “Yehowa ji odasefonyo ni yeɔ odase eshiɔ nyɛ, ni mɔ ni efɔ lɛ mu lɛ hu ji odasefonyo ŋmɛnɛ gbi nɛɛ akɛ nyɛnyɛɛɛ nyɛkɛ sane ko afɔ̃ minɔ.”* Kɛkɛ ni amɛkɛɛ akɛ: “Lɛ ji odasefonyo.”
6 No hewɔ lɛ, Samuel kɛɛ maŋbii lɛ akɛ: “Yehowa, mɔ ni kɛ Mose kɛ Aaron tsu nii, ni ewó nyɛtsɛmɛi lɛ kɛje Ejipt shikpɔŋ lɛ nɔ+ lɛ ji odasefonyo. 7 No hewɔ lɛ, agbɛnɛ nyɛbadamɔa shi ni makojo nyɛ yɛ Yehowa hiɛ yɛ jalɛ nibii fɛɛ ni Yehowa efee ehã nyɛ kɛ nyɛtsɛmɛi lɛ ahewɔ.
8 “Be ni Yakob ba Ejipt+ ni nyɛtsɛmɛi lɛ bɔi Yehowa tsɛmɔ koni ebaye ebua amɛ lɛ nɔŋŋ+ ni Yehowa tsu Mose+ kɛ Aaron koni amɛnyiɛ nyɛtsɛmɛi lɛ ahiɛ kɛje Ejipt, ni amɛhã amɛbahi biɛ.+ 9 Shi amɛhiɛ kpa Yehowa, amɛ-Nyɔŋmɔ lɛ nɔ, ni ehɔ̃ɔ amɛ+ ewo Sisera,+ ni ji Hazor tatsɛ lɛ dɛŋ, kɛ Filistibii lɛ adɛŋ,+ kɛ Moab maŋtsɛ lɛ dɛŋ,+ ni amɛkɛ amɛ wu. 10 Kɛkɛ ni amɛbo amɛtsɛ Yehowa koni ebaye ebua amɛ,+ ni amɛkɛɛ: ‘Wɔfee esha,+ ejaakɛ wɔkwa Yehowa ni wɔyasɔmɔ Baal srɔtoi+ lɛ kɛ Ashtoret+ amagai lɛ; jiemɔ wɔ kɛje wɔhenyɛlɔi lɛ adɛŋ koni wɔsɔmɔ bo.’ 11 Kɛkɛ ni Yehowa tsu Yerubaal,+ kɛ Bedan, kɛ Yefta,+ kɛ Samuel+ ni ejie nyɛ kɛje nyɛhenyɛlɔi fɛɛ ni ebɔle nyɛ lɛ adɛŋ, koni nyɛhi shi shweshweeshwe.+ 12 Be ni nyɛna akɛ, Nahash,+ Amon maŋtsɛ lɛ eba koni ekɛ nyɛ abawu lɛ, nyɛtee nɔ nyɛkɛɛ mi akɛ, ‘Dabi, wɔmiisumɔ ni owó maŋtsɛ ohã wɔ!’+ tsɛbelɛ, Yehowa, nyɛ-Nyɔŋmɔ lɛ ji nyɛ-Maŋtsɛ.+ 13 Agbɛnɛ naa, maŋtsɛ lɛ ni no mli lɛ, nyɛtaoɔ, ni nyɛbi lɛ nɛ. Naa! Yehowa ewó maŋtsɛ ehã nyɛ.+ 14 Kɛ́ nyɛshe Yehowa gbeyei,+ ni nyɛsɔmɔ lɛ,+ ni nyɛbo egbee toi,+ ni nyɛtseee Yehowa famɔ lɛ hiɛ atua, ni nyɛ kɛ maŋtsɛ lɛ ni yeɔ nyɛnɔ lɛ fɛɛ nyiɛ Yehowa, nyɛ-Nyɔŋmɔ lɛ sɛɛ lɛ, ebaahi ehã nyɛ. 15 Shi kɛ́ nyɛbooo Yehowa gbee toi, ni nyɛtse Yehowa famɔ lɛ hiɛ atua lɛ, no lɛ, Yehowa nine baakã nyɛ kɛ nyɛtsɛmɛi lɛ anɔ.+ 16 No hewɔ lɛ, agbɛnɛ nyɛbadamɔa shi ni nyɛkwɛa nɔ kpele ko ni Yehowa baafee yɛ nyɛhiɛ. 17 Ani jeee wiitikpamɔ gbi ji ŋmɛnɛ? Matsɛ Yehowa koni ehã nugbɔ ashimɔ ni nugbɔ anɛ; ni no baahã nyɛná nyɛle ni nyɛnu shishi akɛ nyɛfee efɔŋ yɛ Yehowa hiɛ yɛ maŋtsɛ ni nyɛbi ni ahã nyɛ lɛ hewɔ.”+
18 Kɛkɛ ni Samuel tsɛ Yehowa, ni Yehowa hã nugbɔ shimɔ ni nugbɔ nɛ nakai gbi lɛ, ni maŋbii lɛ fɛɛ she Yehowa kɛ Samuel gbeyei waa. 19 Ni maŋbii lɛ fɛɛ kɛɛ Samuel akɛ: “Sɔlemɔ ohã Yehowa, o-Nyɔŋmɔ lɛ, yɛ otsuji anajiaŋ,+ ejaakɛ wɔsumɔɔɔ ni wɔgboi, ejaakɛ wɔfee esha kroko wɔfata wɔhe eshai lɛ ahe yɛ maŋtsɛ ni wɔbi ni ahã wɔ lɛ hewɔ.”
20 No hewɔ lɛ, Samuel kɛɛ mɛi lɛ akɛ: “Nyɛkashea gbeyei. Lɛɛlɛŋ, nyɛfee efɔŋ nɛɛ fɛɛ moŋ, shi nyɛkajea Yehowa sɛɛ,+ moŋ lɛ, nyɛsɔmɔa Yehowa kɛ nyɛtsui fɛɛ.+ 21 Nyɛkakua nyɛsɛɛ nyɛyanyiɛa amale nyɔŋmɔi*+ ni sɛɛnamɔ ko bɛ amɛhe,+ ni amɛnyɛɛɛ mɔ amɛkpɔ̃ lɛ asɛɛ, ejaakɛ amɛji amagai ni bɛ hewalɛ ko.* 22 Yehowa gbɛ́i kpele lɛ hewɔ lɛ,+ ekwaŋ emaŋ lɛ,+ ejaakɛ Yehowa eŋɔ efɔ̃ enɔ akɛ ebaahã nyɛtsɔmɔ emaŋ.+ 23 Yɛ migbɛfaŋ lɛ, akaba mli kɔkɔɔkɔ akɛ mafee esha mashi Yehowa akɛ misɔleŋ mihãŋ nyɛ, ni maya nɔ matsɔɔ nyɛ gbɛ ni hi kɛ gbɛ ni ja. 24 Nyɛshea Yehowa gbeyei+ kɛkɛ ni nyɛyea lɛ anɔkwa* kɛ nyɛtsui fɛɛ, ni nyɛkaia nibii kpelei ni efee ehã nyɛ lɛ.+ 25 Shi kɛ́ nyɛkɛ kuɛŋtimɔ fee efɔŋ lɛ, no lɛ, ebaabɛɛ nyɛ,+ nyɛ kɛ nyɛmaŋtsɛ lɛ, fɛɛ eshwie.”+