2 Samuel
7 Be ni maŋtsɛ lɛ yahi lɛ diɛŋtsɛ emaŋtsɛ shĩa,+ ni Yehowa hã ená hejɔlɛ kɛjɛ ehenyɛlɔi fɛɛ ni ebɔle ehe lɛ adɛŋ lɛ, 2 maŋtsɛ lɛ kɛɛ gbalɔ Natan+ akɛ: “Naa! Mi lɛ, miyɛ tseneduru tsei atsũ mli,+ shi anɔkwa Nyɔŋmɔ lɛ Adeka lɛ yɛ mama tsũ mli.”+ 3 Natan kɛɛ maŋtsɛ lɛ akɛ: “Yaa ni oyafee nɔ fɛɛ nɔ ni yɔɔ otsui mli, ejaakɛ Yehowa kɛ bo yɛ.”+
4 Nakai nyɔɔŋ lɛ mli nɔŋŋ lɛ, Yehowa kɛɛ Natan* akɛ: 5 “Yaa ni oyakɛɛ mitsulɔ David akɛ: ‘Nɔ ni Yehowa kɛɛ nɛ: “Ani bo obaama shĩa ohã mi ni mahi mli?+ 6 Ejaakɛ kɛjɛ gbi nɔ ni mijie Israelbii lɛ kɛje Ejipt kɛbashi ŋmɛnɛ lɛ,+ mihiko shĩa ko mli pɛŋ, shi mama tsũ mli sɔŋŋ miyaa mibaa* yɛ.+ 7 Be ni mikɛ Israelbii lɛ fɛɛ nyiɛ lɛ fɛɛ mli lɛ, ani mikɛɛ Israel weku hiɛnyiɛlɔi ni mihala akɛ amɛkwɛ mimaŋ Israel lɛ ateŋ mɔ ko pɛŋ akɛ, ‘Mɛni hewɔ nyɛmaaa tseneduru tsei atsũ nyɛhãaa mi lɛ?’”’ 8 No hewɔ lɛ, agbɛnɛ, kɛɛmɔ mitsulɔ David akɛ: ‘Nɔ ni Yehowa, taiatsɛ lɛ kɛɛ nɛ: “Miŋɔ bo kɛjɛ hei ni kooloi yeɔ nii yɛ, kɛjɛ tooku lɛ sɛɛ,+ ni mifee bo mimaŋ Israel hiɛnyiɛlɔ.+ 9 Ni maye mabua bo yɛ* he fɛɛ he ni oyaa,+ ni magbe ohenyɛlɔi lɛ fɛɛ yɛ ohiɛ;*+ ni mahã oná gbɛ́i kpele+ tamɔ shikpɔŋ lɛ nɔ gbɔmɛi wuji ni yɔɔ gbɛ́i lɛ. 10 Mahala he ko mahã mimaŋ Israel ni mikɛ amɛ baaya jɛmɛ, ni amɛbaahi jɛmɛ ni mɔ ko gbaŋ amɛnaa dɔŋŋ; ni gbɔmɛi fɔji waŋ amɛ yi dɔŋŋ tamɔ bɔ ni amɛfee amɛ tsutsu lɛ,+ 11 kɛjɛ gbi nɔ ni mihala kojolɔi+ mito mimaŋ Israel nɔ lɛ. Ni mahã oná hejɔlɛ kɛje ohenyɛlɔi lɛ fɛɛ adɛŋ.+
“‘“Agbɛnɛ hu, Yehowa ekɛɛ bo akɛ, Yehowa baama shĩa ehã bo.*+ 12 Kɛji ogbii lɛ ba naagbee+ ni ogbo lɛ,* matee oseshinyo* ko shi yɛ osɛɛ, ni ji bo diɛŋtsɛ obinuu,* ni mahã emaŋtsɛyeli lɛ adamɔ shi shiŋŋ.+ 13 Lɛ ji mɔ ni baama shĩa ehã migbɛ́i lɛ,+ ni mahã emaŋtsɛyeli lɛ maŋtsɛ sɛi lɛ ama shi shiŋŋ kɛya naanɔ.+ 14 Matsɔ etsɛ, ni lɛ hu ebaatsɔ mibinuu.+ Kɛ́ etɔ̃ lɛ, mikɛ adesai atso kɛ gbɔmɛi abii* akpãi baajaje lɛ.+ 15 Ajieŋ misuɔmɔ ni tsakeee lɛ yɛ enɔ tamɔ bɔ ni mijie yɛ Saul,+ mɔ ni mijie lɛ yɛ ohiɛ lɛ nɔ lɛ. 16 Oshĩa lɛ kɛ omaŋtsɛyeli lɛ baadamɔ shi shiŋŋ yɛ ohiɛ kɛya naanɔ; ni omaŋtsɛ sɛi lɛ baama shi shiŋŋ kɛya naanɔ.”’”+
17 Natan kɛɛ David wiemɔi nɛɛ fɛɛ kɛ ninaa tso muu lɛ fɛɛ.+
18 Kɛkɛ ni Maŋtsɛ David ba ni ebata Yehowa hiɛ ni ekɛɛ: “Ao, Nuŋtsɔ Ofe Yehowa, namɔ po ji mi? Ni mɛni ji mishĩa lɛ po ni okɛ mi ebashɛ he ni okɛ mi eshɛ nɛɛ?+ 19 Ao, Nuŋtsɔ Ofe Yehowa, oookɛɛ enɛ kɛkɛ faaa lɛ, osaa oowie otsulɔ shĩa lɛ he kɛmiiya wɔsɛɛ tɔ̃ɔ; ni enɛ ji gbɛtsɔɔmɔ* kɛhã adesai fɛɛ, Nuŋtsɔ Ofe Yehowa. 20 Ao, Nuŋtsɔ Ofe Yehowa, mɛni ekoŋŋ otsulɔ David baanyɛ akɛɛ bo, ejaakɛ ole mi jogbaŋŋ?+ 21 Owiemɔ lɛ kɛ nɔ ni otsui sumɔɔ* lɛ hewɔ ofee nibii wuji nɛɛ fɛɛ ni ojie amɛ kpo otsɔɔ otsulɔ lɛ.+ 22 No hewɔ ni oje agbo+ lɛɛlɛŋ lɛ, Nuŋtsɔ Ofe Yehowa. Mɔ ko bɛ ni tamɔ bo,+ ni Nyɔŋmɔ ko bɛ akɛ ja bo;+ ni nibii fɛɛ ni wɔnu kɛ wɔtoi lɛ maa enɛ nɔ mi. 23 Mɛɛ jeŋmaŋ kroko yɔɔ shikpɔŋ lɛ nɔ ni tamɔ omaŋ Israel?+ Nyɔŋmɔ tee eyakpɔ̃ amɛ ni efee amɛ emaŋ,+ ni etsɔ nibii kpelei kɛ nibii ni yɔɔ naakpɛɛ ni efee ehã amɛ+ lɛ nɔ efee gbɛ́i ehã ehe.+ Ojie* jeŋmaji lɛ kɛ amɛnyɔŋmɔi lɛ yɛ omaŋ ni okpɔ̃ kɛje Ejipt ohã ohe lɛ hewɔ. 24 Oto omaŋ Israel akɛ bo diɛŋtsɛ omaŋ kɛmiiya naanɔ;+ ni bo, Ao Yehowa, otsɔ amɛ-Nyɔŋmɔ.+
25 “No hewɔ lɛ, agbɛnɛ, Ao, Yehowa Nyɔŋmɔ, ye shi ni owo yɛ otsulɔ kɛ eshĩa lɛ he lɛ nɔ kɛya naanɔ, ni feemɔ tamɔ bɔ ni owo shi lɛ pɛpɛɛpɛ.+ 26 Awó ogbɛ́i lɛ nɔ gojoo kɛya naanɔ,+ koni mɛi akɛɛ akɛ, ‘Yehowa, taiatsɛ lɛ, ji Nyɔŋmɔ yɛ Israel nɔ,’ ni hã otsulɔ David shĩa lɛ ama shi shiŋŋ yɛ ohiɛ.+ 27 Ejaakɛ bo, Yehowa taiatsɛ, Israel Nyɔŋmɔ lɛ, ojie sane ko kpo otsɔɔ otsulɔ akɛ, ‘Mama shĩa mahã bo.’*+ Enɛ hewɔ ni otsulɔ ená ekãa* ni esɔleɔ sɔlemɔ nɛɛ ehãa bo lɛ. 28 Ni agbɛnɛ, Ao, Nuŋtsɔ Ofe Yehowa, bo ji anɔkwa Nyɔŋmɔ lɛ, ni owiemɔi lɛ fɛɛ lɛ anɔkwale ni,+ ni okɛ nibii kpakpai nɛɛ ewo otsulɔ shi. 29 No hewɔ lɛ, jɛɛ osuɔmɔ mli ojɔɔ otsulɔ shĩa lɛ, ni ohã ehi shi kɛya naanɔ yɛ ohiɛ;+ ejaakɛ bo, Nuŋtsɔ Ofe Yehowa, owo shi, ni hã akɛ ojɔɔmɔ lɛ ajɔɔ otsulɔ shĩa lɛ kɛya naanɔ.”+