Bɔfoi Lɛ Anitsumɔi

27 Agbɛnɛ, akɛni akpɛ mli akɛ wɔbaawo meele kɛya Italia hewɔ lɛ,+ amɛŋɔ Paulo kɛ gboklɛfoi krokomɛi amɛwo asraafoiatsɛ ko ni atsɛɔ lɛ Yulio ni jɛ Augusto asraafoi akuu lɛ mli lɛ dɛŋ. 2 Be ni wɔbote meele ko ni jɛ Adramitio ni baafã kɛyatsɔ Asia kpokpaa lɛ ŋshɔnaa maji lɛ anɔ lɛ mli lɛ, wɔfã; no mli lɛ Aristarko,+ ni ji Makedonianyo ko ni jɛ Tesalonika lɛ fata wɔhe. 3 Enɔ jetsɛremɔ lɛ, wɔyadamɔ Sidon, ni Yulio kɛ Paulo ye yɛ mlihilɛ naa,* ni eŋmɛ lɛ gbɛ ni eya enanemɛi lɛ aŋɔɔ ni amɛkwɛ lɛ.

4 Ni wɔkɛ meele fã kɛjɛ jɛmɛ ni wɔyatsɔ Kipro he koni no abu wɔhe kɛjɛ kɔɔyɔɔ lɛ he, ejaakɛ no mli lɛ wɔmiikpee kɔɔyɔɔ. 5 Ni wɔtsɔ ŋshɔ lɛ hiɛ kɛnyiɛ Kilikia kɛ Pamfilia koŋ nɔ ni wɔyakpeleke yɛ Mira yɛ Likia. 6 Ni asraafoiatsɛ lɛ na meele ko ni jɛ Aleksandria ni miiya Italia yɛ jɛmɛ, ni ehã wɔkwɔ no. 7 Agbɛnɛ, wɔkɛ meele lɛ nyiɛ blɛoo gbii saŋŋ, ni ekpakpa ko dani wɔbashɛ Knido. Akɛni kɔɔyɔɔ lɛ eŋmɛɛɛ wɔ gbɛ hewɔ lɛ, wɔyatsɔ Kreta he yɛ Salmone koni no abu wɔhe kɛjɛ kɔɔyɔɔ lɛ he. 8 Ni ekpakpa ko dani wɔnyɛ wɔfo mli kɛba he ko ni atsɛɔ jɛmɛ Lɛjiadaamɔhe Fɛfɛo ni bɛŋkɛ Lasea maŋ lɛ.

9 Akɛni wɔfite bei pii, ni Kpatamɔ Gbi*+ ni ahiɔ ŋmaa lɛ po eho ni ŋshɔ hiɛ nyiɛmɔ efee oshãra lɛ hewɔ lɛ, Paulo wo ŋaa ko, 10 ekɛɛ amɛ akɛ: “Ataamɛi, miina akɛ nibii babaoo baafite, ni nibii pii hu baaŋmɛɛ wɔ yɛ gbɛfãa nɛɛ mli, ni jeee meele lɛ kɛ emli jatsui lɛ pɛ baafite, shi wɔwala* hu baanyɛ aŋmɛɛ wɔ.” 11 Shi asraafoiatsɛ lɛ bo meele kudɔlɔ lɛ kɛ meeletsɛ lɛ toi moŋ fe nɔ ni eeebo nɔ ni Paulo wieɔ lɛ toi. 12 Akɛni lɛjiadaamɔhe lɛ jeee he ko ni sa ni abaanyɛ aye fɛ̃i be lɛ yɛ jɛmɛ hewɔ lɛ, amɛteŋ mɛi babaoo wo ŋaa akɛ afã kɛje jɛmɛ, ni amɛkwɛ akɛ amɛbaanyɛ amɛyashɛ Foinike, lɛjiadaamɔhe ko ni yɔɔ Kreta ni kwɛɔ wuoyi-bokã kɛ kooyi-bokã gbɛ lɛ lo, koni amɛyaye fɛ̃i be lɛ yɛ jɛmɛ.

13 Be ni kɔɔyɔɔ hɛrɛbii ko tswa kɛjɛ wuoyigbɛ lɛ, amɛsusu akɛ amɛyiŋtoo lɛ baaba mli, ni amɛfamɔ sɛ́kɛi lɛ, ni amɛfã kɛtsɔ Kreta he kpaakpa. 14 Shi etsɛɛɛ kɛkɛ ni kɔɔyɔɔ ko ni naa wa ni atsɛɔ lɛ Yurakilo* lɛ fã kɛba ŋshɔkpɔ lɛ nɔ. 15 Akɛni meele lɛ miihoso waa ni enyɛɛɛ kɔɔyɔɔ lɛ ekpee hewɔ lɛ, wɔhã kɔɔyɔɔ lɛ tsi wɔ kɛtee. 16 Kɛkɛ ni wɔkɛ foi yatsɔ ŋshɔkpɔ bibioo ko ni atsɛɔ lɛ Kauda lɛ he koni no abu wɔhe kɛjɛ kɔɔyɔɔ lɛ he, shi ekpakpa ko dani wɔnyɛ wɔmɔ lɛlɛ bibioo* ni yɔɔ meele lɛ sɛɛ lɛ mli. 17 Shi be ni amɛgbala lɛlɛ bibioo* lɛ kɛwo meele lɛ mli lɛ, amɛkɛ kpãi fimɔ meele lɛ, ni akɛni amɛmiishe gbeyei akɛ amɛbaayagbee Sirti* shia lɛ nɔ hewɔ lɛ, amɛjie abalaa lɛ he nibii lɛ, ni kɔɔyɔɔ lɛ tsi wɔ kɛtee. 18 Akɛni kɔɔyɔɔ ni naa wa lɛ miitswa meele lɛ gbeyeigbeyei hewɔ lɛ, enɔ jetsɛremɔ lɛ, amɛjie meele lɛ mli nibii lɛ eko amɛshwie koni meele lɛ akatsii tsɔ. 19 Ni gbi ni ji etɛ lɛ nɔ lɛ, amɛkɛ amɛ diɛŋtsɛ amɛniji jie meele lɛ he nibii lɛ ekomɛi amɛshwie.

20 Akɛni wɔnaaa hulu loo ŋulamii gbii saŋŋ, ni kɔɔyɔɔ ni tswaa kɛkpeɔ wɔ lɛ hu naa wa waa* hewɔ lɛ, wɔhiɛnɔkamɔ akɛ abaahere wɔyiwala lɛ fɛɛ bɔi tãa. 21 Be ni amɛteŋ mɔ ko mɔ ko yeko nii be saŋŋ lɛ, Paulo te shi edamɔ shi yɛ amɛteŋ ni ekɛɛ: “Ataamɛi, kulɛ esa akɛ nyɛbo miŋaawoo lɛ toi, ni wɔkafã kɛje Kreta, kulɛ nibii fiteŋ ni nibii hu eŋmɛŋ wɔ nɛkɛ.+ 22 Fɛɛ sɛɛ lɛ, amrɔ nɛɛ, miiwo nyɛ hewalɛ akɛ nyɛtsɛa nyɛtsui nyɛŋmɛa nyɛmli,* ejaakɛ nyɛteŋ mɔ ko wala* eŋmɛŋ lɛ, meele lɛ pɛ baafite. 23 Nyɔɔŋ nɛɛ mli lɛ, Nyɔŋmɔ, mɔ ni nii ji mi lɛ kɛ mɔ hu ni mikɛ sɔɔmɔ krɔŋŋ hãa lɛ lɛ, bɔfo+ ko badamɔ mimasɛi, 24 ni ekɛɛ, ‘Kaashe gbeyei, Paulo. Esa akɛ oyadamɔ Kaisare hiɛ,+ ni naa! Nyɔŋmɔ eŋɔ mɛi ni kɛ bo yɔɔ meele lɛ mli lɛ fɛɛ eke bo.’ 25 No hewɔ lɛ, ataamɛi, nyɛtsɛa nyɛtsui nyɛŋmɛa nyɛmli,* ejaakɛ miheɔ Nyɔŋmɔ miyeɔ akɛ bɔ ni akɛɛ mi lɛ, ebaaba mli nakai pɛpɛɛpɛ. 26 Shi bɔ fɛɛ bɔ ni fee lɛ, wɔbaayasha shi yɛ ŋshɔkpɔ ko nɔ.”+

27 Agbɛnɛ, gbi ni ji 14 lɛ mli nyɔɔŋ, be ni kɔɔyɔɔ lɛ tswaa wɔ kɛyaa kɛbaa yɛ Adria Ŋshɔ lɛ nɔ lɛ, nyɔɔŋteŋ lɛ amlakui lɛ bɔi susumɔ akɛ amɛmiibɛŋkɛ shikpɔŋ ko. 28 Amɛŋmɛɛ susumɔ kpãa lɛ he amɛwo ŋshɔ lɛ mli, ni amɛná abasaŋ 20,* no hewɔ lɛ, amɛtee hiɛ fioo ni amɛŋmɛɛ he ekoŋŋ ni amɛná abasaŋ 15.* 29 Ni akɛni amɛmiishe gbeyei akɛ ekolɛ wɔbaayagbee tɛsai anɔ hewɔ lɛ, amɛŋmɛ sɛ́kɛi ejwɛ yɛ meele lɛ sɛɛgbɛ, ni amɛmiishwe ni je atsɛre. 30 Shi be ni amlakui lɛ taoɔ amɛjo foi kɛje meele lɛ mli, ni amɛkwa amɛfee tamɔ nɔ ni amɛkɛ lɛlɛ bibioo* lɛ miima ŋshɔ lɛ hiɛ oookɛɛ nɔ ni amɛyaaŋmɛ sɛ́kɛi yɛ meele lɛ yitsogbɛ lɛ, 31 Paulo kɛɛ asraafoiatsɛ lɛ kɛ asraafoi lɛ akɛ: “Kɛji hii nɛɛ ehiii meele lɛ mli lɛ, no lɛ anyɛŋ nyɛyiwala ahere.”+ 32 Kɛkɛ ni asraafoi lɛ folɔ lɛlɛ bibioo* lɛ he kpãi lɛ ni amɛhã eyagbee shi.

33 Agbɛnɛ be ni je miihe atsɛre lɛ, Paulo wo amɛ fɛɛ hewalɛ akɛ amɛye nɔ ko, ni ekɛɛ: “Ŋmɛnɛ ji gbi ni ji 14 ni nyɛtee nɔ nyɛye nyɛtsui kɛmɛ, ni nyɛyeko nɔ ko nɔ ko kwraa. 34 No hewɔ lɛ, miiwo nyɛ hewalɛ ni nyɛye nɔ ko; ejaakɛ no hi hã nyɛ, ejaakɛ nyɛteŋ mɔ ko mɔ ko yiteŋ tsɔi kome folo elaajeŋ.” 35 Be ni ewie enɛ lɛ, ekɔ blodo, ni eda Nyɔŋmɔ shi yɛ amɛ fɛɛ amɛhiɛ, ekumɔ mli, ni ebɔi yeli. 36 Ni amɛ fɛɛ amɛtsui nyɔ amɛmli ni amɛ hu amɛbɔi niyeli. 37 Wɔ mɛi ni wɔyɔɔ meele lɛ mli lɛ fɛɛ ayifalɛ ji mɛi* 276. 38 Be ni amɛye nii ni amɛtɔrɔ lɛ, amɛshɛrɛ wiiti ni amɛwó lɛ amɛshwie ŋshɔ lɛ mli koni meele lɛ mli akatsii.+

39 Be ni je tsɛre lɛ, amɛnaaa shikpɔŋ lɛ jogbaŋŋ+ shi amɛna ŋshɔ lɛ naa he ko ni shia pii yɔɔ, ni amɛtswa amɛfai shi akɛ, kɛ́ amɛbaanyɛ lɛ, amɛbaahã meele lɛ ayakpeleke jɛmɛ. 40 No hewɔ lɛ, amɛfolɔ sɛ́kɛi lɛ amɛwo ŋshɔ lɛ mli, ni nakai be lɛ mli nɔŋŋ lɛ, amɛfɛne kudɔi lɛ ahe kpãi lɛ; ni amɛshi meele lɛ hiɛgbɛ abalaa lɛ koni kɔɔyɔɔ lɛ atsi meele lɛ kɛya ŋshɔnaagbɛ. 41 Be ni amɛyagbee shia ni etĩa babaoo yɛ ŋshɔ lɛ mli lɛ nɔ lɛ, amɛkɛ meele lɛ yagbee shi* ni meele lɛ yitsogbɛ yatsɛkɛ shi ni etsiii ehe, shi ŋshɔkei lɛ anaawalɛ lɛ jwara meele lɛ sɛɛgbɛ dukuduku.+ 42 Kɛkɛ ni asraafoi lɛ kpɛ mli akɛ amɛbaagbe gboklɛfoi lɛ, koni mɔ ko mɔ ko akasere ni ejo foi. 43 Shi akɛni asraafoiatsɛ lɛ etswa efai shi akɛ ebaabaa Paulo yi hewɔ lɛ, eŋmɛɛɛ amɛ gbɛ ni amɛtsu amɛyiŋtoo lɛ he nii. Efã mɛi ni baanyɛ asere lɛ akɛ amɛtu amɛgbee ŋshɔ lɛ mli ni amɛ tsutsu amɛya shikpɔŋ, 44 koni mɛi ni eshwɛ lɛ ateŋ mɛi komɛi abumɔ ŋmoŋmoloi anɔ ni mɛi krokomɛi hu abumɔ meele lɛ he nibii ni ekumɔ lɛ anɔ kɛnyiɛ sɛɛ. No hewɔ lɛ, amɛ fɛɛ amɛyashɛ shikpɔŋ shweshweeshwe.+