2 Samuel
24 Yehowa mli wo la ewo Israel,+ be ni awo David yiŋ yɛ amɛhe akɛ: “Yaa ni oyakane+ Israel kɛ Yuda” lɛ.+ 2 No hewɔ lɛ, maŋtsɛ lɛ kɛɛ Yoab,+ ni ji tatsɛ ni fata ehe lɛ akɛ: “Ofainɛ yaakpa Israel wekui lɛ fɛɛ amli, kɛjɛ Dan aahu kɛyashi Beer-sheba,+ ni okane mɛi lɛ, koni male mɛi lɛ ayifalɛ.” 3 Shi Yoab kɛɛ maŋtsɛ lɛ akɛ: “Yehowa, o-Nyɔŋmɔ lɛ, ahã maŋ lɛ aku abɔ he toi 100, ni minuŋtsɔ maŋtsɛ ana, shi mɛni hewɔ kwraa minuŋtsɔ maŋtsɛ taoɔ afee nɔ ko tamɔ nɛkɛ?”
4 Shi maŋtsɛ lɛ wiemɔ lɛ ye Yoab kɛ tatsɛmɛi lɛ anɔ lɛ nɔ. No hewɔ lɛ, Yoab kɛ tatsɛmɛi lɛ shi maŋtsɛ lɛ hiɛ amɛtee koni amɛyakane Israelbii lɛ.+ 5 Amɛfo Yordan Faa lɛ ni amɛyabɔ nsara yɛ Aroer,+ yɛ maŋ ni yɔɔ jɔɔ* lɛ teŋ lɛ ninejurɔgbɛ,* ni amɛwo amɛhiɛ amɛwo Gadbii lɛ ashikpɔŋ lɛ nɔ gbɛ, ni amɛtse mli kɛtee Yazer.+ 6 No sɛɛ lɛ, amɛtee Gilead+ kɛ Tatim-hodshi shikpɔŋ lɛ nɔ, ni amɛtsa nɔ kɛtee Dan-yaan, ni amɛlɔgɔ kɛtee Sidon.+ 7 Kɛkɛ ni amɛtee Tiro+ mɔɔ lɛ he kɛ Hivbii+ lɛ kɛ Kanaanbii lɛ amaji lɛ fɛɛ amli, ni amɛyagbe naa yɛ Negeb+ lɛ ni yɔɔ Yuda yɛ Beer-sheba+ lɛ. 8 No hewɔ lɛ, amɛkpa shikpɔŋ lɛ nɔ fɛɛ ni amɛbashɛ Yerusalem yɛ nyɔji nɛɛhu kɛ gbii 20 sɛɛ. 9 Ni Yoab kɛ mɛi ni ayakane lɛ yibɔ lɛ bahã maŋtsɛ lɛ. Tawulɔi ni hiɛɔ klante ni yɔɔ Israel lɛ ayifalɛ ji mɛi 800,000, ni Yuda hii lɛ ayifalɛ ji mɛi 500,000.+
10 Shi David tsui bu lɛ fɔ*+ be ni eyakane mɛi lɛ sɛɛ. Kɛkɛ ni David kɛɛ Yehowa akɛ: “Mifee esha+ kpele yɛ enɛ ni mifee lɛ hewɔ. No hewɔ lɛ, Yehowa, ofainɛ ni okɛ otsulɔ tɔmɔ lɛ ake lɛ,+ ejaakɛ miye kwashiai asane diɛŋtsɛ.”+ 11 Leebi be ni David te shi lɛ, Yehowa kɛɛ gbalɔ Gad,+ ni ji David ninalɔ lɛ akɛ:* 12 “Yaa ni oyakɛɛ David akɛ, ‘Nɔ ni Yehowa kɛɛ nɛ: “Mikɛ nibii etɛ miishwie ohiɛ. Kɔ amɛteŋ nɔ ni mihã eba onɔ.”’”+ 13 No hewɔ lɛ, Gad ba David ŋɔɔ ebakɛɛ lɛ akɛ: “Ani oosumɔ ni hɔmɔ aba oshikpɔŋ lɛ nɔ+ afii kpawo? Aloo oosumɔ ni ojo foi yɛ ohenyɛlɔi lɛ ahiɛ, ni amɛtiu bo+ nyɔji etɛ? Aloo oosumɔ ni gbele hela aba oshikpɔŋ lɛ nɔ+ gbii etɛ? No hewɔ lɛ, susumɔ he jogbaŋŋ, ni otsɔɔ mi nɔ ni miyakɛɛ mɔ ni tsu mi lɛ.” 14 No hewɔ lɛ, David kɛɛ Gad akɛ: “Sane nɛɛ ehã mihao waa. Ofainɛ, hã wɔgbee Yehowa dɛŋ,+ ejaakɛ emɔbɔnalɛ fa;+ shi kaahã migbee gbɔmɔ dɛŋ.”+
15 Kɛkɛ ni Yehowa kɛ gbele hela+ ba Israel nɔ kɛjɛ leebi kɛyashi be ni ato lɛ, ni mɛi lɛ ateŋ mɛi 70,000 gboi+ kɛjɛ Dan kɛyashi Beer-sheba.+ 16 Be ni ŋwɛibɔfo lɛ kpã enine mli kɛtsɔɔ Yerusalem koni ekpãtã hiɛ lɛ, Yehowa shwa ehe* yɛ amanehulu lɛ hewɔ,+ ni ekɛɛ ŋwɛibɔfo lɛ ni yaakpãtã mɛi lɛ ahiɛ lɛ akɛ: “Efa! Agbɛnɛ suu onine.” No mli lɛ, Yehowa bɔfo lɛ yɛ Arauna,+ Yebusnyo+ lɛ, ŋmaagbeemɔhe lɛ masɛi.
17 Be ni David na ŋwɛibɔfo ni kpãtãa mɛi lɛ ahiɛ lɛ, ekɛɛ Yehowa akɛ: “Miji mɔ ni efee esha lɛ, ni miji mɔ ni etɔ̃ lɛ; shi gwantɛŋi+ nɛɛ—mɛni amɛfee? Ofainɛ, kpã onine mli owo mi kɛ mitsɛ shĩa lɛ moŋ.”+
18 No hewɔ lɛ, Gad ba David ŋɔɔ yɛ nakai gbi lɛ nɔ, ni ekɛɛ lɛ akɛ: “Kwɔɔ kɛya ni oyama afɔleshaa latɛ ohã Yehowa yɛ Arauna, Yebusnyo lɛ, ŋmaagbeemɔhe lɛ.”+ 19 No hewɔ lɛ, David kwɔ kɛtee yɛ Gad wiemɔ lɛ naa tamɔ bɔ ni Yehowa efã lɛ pɛpɛɛpɛ. 20 Be ni Arauna ma eyi shi ni ena akɛ maŋtsɛ lɛ kɛ etsuji lɛ miiba eŋɔɔ lɛ, amrɔ nɔŋŋ ni Arauna je kpo ni eyakoto maŋtsɛ lɛ ni ekɛ ehiɛ bu shi. 21 Arauna bi akɛ: “Mɛni hewɔ minuŋtsɔ maŋtsɛ eba etsulɔ ŋɔɔ nɛɛ?” David kɛɛ akɛ: “Miba koni mibahé oŋmaagbeemɔhe lɛ koni mama afɔleshaa latɛ yɛ nɔ mahã Yehowa, koni gbele hela ni eba maŋbii lɛ anɔ lɛ sɛɛ afo.”+ 22 Shi Arauna kɛɛ David akɛ: “Minuŋtsɔ maŋtsɛ aŋɔ ni ekɛshã afɔle fɛɛ afɔle ni sa ehiɛ. Okɛ tsinai nɛɛ ashã shãa afɔlei lɛ ni oŋɔ ŋmaagbeemɔ shwiili lɛ kɛ tsinai lɛ ahe tso lɛ hu ofee lai. 23 Maŋtsɛ, Arauna kɛ enɛɛmɛi fɛɛ miihã maŋtsɛ.” Kɛkɛ ni Arauna kɛɛ maŋtsɛ lɛ akɛ: “Yehowa, o-Nyɔŋmɔ lɛ, ajɔɔ bo.”
24 Shi maŋtsɛ lɛ kɛɛ Arauna akɛ: “Dabi, esa akɛ mahé ni mawo he nyɔmɔ. Esaaa akɛ mikɛ nɔ ko ni miná lɛ yaka lɛ shãa shãa afɔlei mihãa Yehowa, mi-Nyɔŋmɔ lɛ, ni nɔ ko eŋmɛɛɛ mi.” No hewɔ lɛ, David kɛ jwiɛtɛi shekeli* 50 hé ŋmaagbeemɔhe lɛ kɛ tsinai lɛ.+ 25 Ni David ma afɔleshaa latɛ+ yɛ jɛmɛ ehã Yehowa, ni eshã shãa afɔlei kɛ naanyobɔɔ afɔlei yɛ nɔ. Kɛkɛ ni Yehowa bo maŋ lɛ faikpamɔ lɛ toi,+ ni gbele hela ni ba Israel nɔ lɛ sɛɛ fo.