Bɔfoi Lɛ Anitsumɔi
16 Kɛkɛ ni eyashɛ Derbe, ni etee Listra hu.+ Ni kaselɔ ko yɛ jɛmɛ ni atsɛɔ lɛ Timoteo,+ eji Yuda yoo ko ni heɔ eyeɔ lɛ binuu, shi epapa lɛ Greeknyo ni, 2 ni nyɛmimɛi ni yɔɔ Listra kɛ Ikonium lɛ wieɔ ehe ekpakpa. 3 No mli lɛ, Paulo miisumɔ akɛ Timoteo afata ehe kɛya, ni eŋɔ lɛ ni efo lɛ ketia yɛ Yudafoi ni yɔɔ jɛmɛ niiaŋ lɛ ahewɔ,+ ejaakɛ amɛ fɛɛ amɛle akɛ epapa lɛ Greeknyo ni. 4 Be ni amɛkpaa maji lɛ anɔ lɛ, amɛkɛ famɔi ni bɔfoi lɛ kɛ onukpai ni yɔɔ Yerusalem lɛ kɛhã lɛ hãa amɛ koni amɛye nɔ.+ 5 Ni anɔkwa, asafoi lɛ tee nɔ amɛhe wa yɛ hemɔkɛyeli lɛ mli ni amɛyibɔ lɛ tee nɔ efa daa gbi.
6 Agbɛnɛ hu, amɛyatsɔ Frigia kɛ Galatia kpokpaa lɛ nɔ,+ ejaakɛ mumɔ krɔŋkrɔŋ lɛ tsĩ amɛ gbɛ akɛ amɛkawie wiemɔ lɛ yɛ Asia kpokpaa lɛ nɔ. 7 Agbɛnɛ hu, be ni amɛkpeleke shi kɛba Misia lɛ, amɛka shii abɔ akɛ amɛbaaya Bitinia,+ shi Yesu mumɔ lɛ eŋmɛɛɛ amɛ gbɛ. 8 No hewɔ lɛ, amɛho Misia he* ni amɛkpeleke shi kɛba Troia. 9 Ni nyɔɔŋ lɛ mli lɛ Paulo na ninaa ko—nuu Makedonianyo ko damɔ jɛmɛ eekpa lɛ fai akɛ: “Foo mli kɛba Makedonia ni obaye obua wɔ.” 10 Be ni ena ninaa lɛ nɔŋŋ lɛ, wɔbɔ mɔdɛŋ akɛ wɔbaaya Makedonia, ejaakɛ wɔmu sane naa akɛ Nyɔŋmɔ etsɛ wɔ koni wɔyajaje sane kpakpa lɛ wɔtsɔɔ amɛ.
11 No hewɔ lɛ, wɔwo lɛlɛ kɛjɛ Troia ni wɔnyiɛ ŋshɔ lɛ hiɛ tɛ̃ɛ kɛtee Samotrake, shi enɔ jetsɛremɔ lɛ, wɔtee Neapoli; 12 be ni wɔshi jɛmɛ lɛ, wɔtee Filipi,+ ni ji Makedonia kpokpaa lɛ maŋtiase lɛ, maŋ ni Romabii lɛ yeɔ nɔ lɛ. Wɔhi maŋ nɛɛ mli gbii komɛi. 13 Yɛ Hejɔɔmɔ Gbi lɛ nɔ lɛ, wɔtee agbó lɛ naa yɛ faa ko masɛi, he ni wɔsusu akɛ he ko yɛ jɛmɛ ni asɔleɔ yɛ lɛ, ni wɔho wɔtara shi ni wɔkɛ yei ni ebabua amɛhe naa lɛ bɔi wiemɔ. 14 Ni yoo ko ni atsɛɔ lɛ Lidia, ni hɔ̃ɔ mamai ni hiɛ pɛpol kɔla, ni jɛ Tiatira+ maŋ lɛ mli, ni eji Nyɔŋmɔ jálɔ lɛ miibo toi, ni Yehowa* gbele etsui naa koni ebo nibii ni Paulo wieɔ lɛ toi jogbaŋŋ. 15 Agbɛnɛ, be ni abaptisi lɛ kɛ eshĩabii lɛ,+ ekpa wɔ fai akɛ: “Kɛ́ nyɛbu mi akɛ miyeɔ Yehowa* anɔkwa lɛ, nyɛbaa nyɛbahia mishĩa lɛ.” Ni efee aahu ni wɔkpɛlɛ.
16 Agbɛnɛ, eba mli akɛ be ni wɔyaa he ni asɔleɔ yɛ lɛ, tsulɔ yoo ko ni yɔɔ mumɔ ko, daimonio ni klaa,+ kɛ wɔ bakpe. Ekɛ eklamɔ* lɛ hãa enuŋtsɔmɛi lɛ náa nii pii. 17 Gbekɛ yoo nɛɛ tee nɔ enyiɛ wɔ kɛ Paulo sɛɛ ni ebolɔɔ kɛ wiemɔi nɛɛ akɛ: “Hii nɛɛ ji Nyɔŋmɔ, Mɔ Ni Nɔ Kwɔ Fe Fɛɛ lɛ nyɔji,+ ni amɛmiijaje yiwalaheremɔ gbɛ lɛ amɛmiitsɔɔ nyɛ.” 18 Etee nɔ efee nakai gbii pii. Agbɛnɛ, efee Paulo ahuntoo ni etsɔ ehe ni ekɛɛ mumɔ lɛ akɛ: “Miifã bo yɛ Yesu Kristo gbɛ́i mli akɛ oje emli.” Ni eje kpo yɛ nakai ŋmɛlɛtswaa lɛ nɔ nɔŋŋ.+
19 Anɔkwa, be ni enuŋtsɔmɛi lɛ na akɛ nɔ ni hãa amɛnáa nii lɛ ebɔ amɛ lɛ,+ amɛmɔ Paulo kɛ Sila ni amɛgbala amɛ kɛtee nɔyelɔi lɛ aŋɔɔ yɛ jara lɛ nɔ.+ 20 Amɛkɛ amɛ tee maŋ lɛ nɔkwɛlɔi lɛ ahiɛ, ni amɛkɛɛ: “Hii nɛɛ miigba wɔmaŋ lɛ naa waa.+ Yudafoi ji amɛ, 21 ni amɛmiijaje kusumii ni mla eŋmɛɛɛ gbɛ akɛ wɔŋɔ loo wɔye nɔ, ejaakɛ Romabii ji wɔ.” 22 Ni mɛi ni bua shi lɛ fɛɛ te shi amɛwo amɛ, ni maŋ lɛ nɔkwɛlɔi lɛ gbála Paulo kɛ mɛi ni fata ehe lɛ atadei lɛ yɛ amɛhe, ni amɛfã akɛ ayi amɛ kpãi.+ 23 Be ni amɛyi amɛ kpãi babaoo amɛgbe naa lɛ, amɛwo amɛ tsuŋ, ni amɛfã tsuŋwoohe nɔkwɛlɔ lɛ akɛ ekɛ amɛ ato jogbaŋŋ.+ 24 Akɛni awo lɛ nɛkɛ kitã hewɔ lɛ, ekɛ amɛ yawo tsuŋwoohe ni yɔɔ sɛɛgbɛ tɔ̃ɔ lɛ mli, ni ebɔ amɛnaji apã.
25 Shi aaafee nyɔɔŋteŋ lɛ, Paulo kɛ Sila miisɔle ni amɛmiilá kɛmiijie Nyɔŋmɔ yi,+ ni mɛi ni awo amɛ tsuŋ lɛ miibo amɛ toi. 26 Trukaa lɛ, shikpɔŋhosomɔ kpele ko ba, ni tsuŋwoohe lɛ faneshii lɛ hoso. Ni amrɔ lɛ shinai lɛ fɛɛ gbelegbelei, ni amɛ fɛɛ amɛtsein* lɛ kpɔlɔ yɛ amɛhe.+ 27 Be ni tsuŋwoohe nɔkwɛlɔ lɛ hiɛ tsɛ̃ ni ena akɛ tsuŋwoohe lɛ shinai lɛ anaa kamɔ lɛ, egbala eklante ni kulɛ eyaagbe ehe, ejaakɛ esusu akɛ mɛi ni awo amɛ tsuŋ lɛ ejo foi.+ 28 Shi Paulo bo kɛ gbee ni wa ekɛɛ: “Kaaye ohe awui, ejaakɛ wɔ fɛɛ wɔyɛ biɛ!” 29 No hewɔ lɛ, ebi ni ahã lɛ kanei, ni esha foi kɛbote mli, ni ekɛ hekpokpomɔ ho egbee Paulo kɛ Sila hiɛ. 30 Ekɛ amɛ je kpo ni ekɛɛ: “Onukpai, mɛni esa akɛ mafee koni ahere miyiwala?” 31 Amɛkɛɛ: “Hemɔ Nuŋtsɔ Yesu nɔ oye ni abaahere oyiwala, bo kɛ oshĩabii lɛ fɛɛ.”+ 32 Ni amɛjaje Yehowa* wiemɔ lɛ amɛtsɔɔ lɛ kɛ mɛi fɛɛ ni yɔɔ eshĩa lɛ. 33 Ni ekɛ amɛ tee yɛ nakai nyɔɔŋ lɛ mli ŋmɛlɛtswaa lɛ mli nɔŋŋ, ni eyafɔ amɛpilamɔi lɛ anɔ ehã amɛ. Kɛkɛ ni abaptisi lɛ kɛ eshĩabii lɛ fɛɛ amrɔ nɔŋŋ.+ 34 Ekɛ amɛ tee eshĩa lɛ ni eyaŋmɛ amɛ okpɔlɔ, ni lɛ kɛ eshĩabii lɛ fɛɛ ná miishɛɛ babaoo akɛ amrɔ nɛɛ ehe Nyɔŋmɔ nɔ eye.
35 Be ni je tsɛre lɛ, maŋ lɛ nɔkwɛlɔi lɛ tsu bulɔi lɛ ni amɛyakɛɛ akɛ: “Ŋmɛɛmɔ nakai hii lɛ ahe ni amɛya.” 36 Tsuŋwoohe nɔkwɛlɔ lɛ jaje amɛwiemɔi lɛ etsɔɔ Paulo akɛ: “Maŋ lɛ nɔkwɛlɔi lɛ etsu mɛi kɛba akɛ aŋmɛɛ nyɛhe. No hewɔ lɛ, agbɛnɛ, nyɛjea kpo ni nyɛyaa yɛ toiŋjɔlɛ mli.” 37 Shi Paulo kɛɛ amɛ akɛ: “Eyɛ mli akɛ Romabii ji wɔ moŋ, shi amɛgwao wɔ yɛ mɛi ahiɛ be ni abuko wɔ fɔ,*+ ni amɛwo wɔ tsuŋ. Ani amrɔ nɛɛ amɛmiishwie wɔ nigii? Dabida! Hã amɛ diɛŋtsɛ amɛba ni amɛbajie wɔ.” 38 Bulɔi lɛ yajaje wiemɔi nɛɛ amɛtsɔɔ maŋ lɛ nɔkwɛlɔi lɛ. Ni be ni amɛnu akɛ Romabii ji hii nɛɛ, gbeyei mɔmɔ amɛ.+ 39 No hewɔ lɛ, amɛba ni amɛbakpa amɛ fai, ni be ni amɛjie amɛ lɛ, amɛkpa amɛ fai akɛ amɛshi maŋ lɛ mli amɛya. 40 Shi amɛje kpo kɛjɛ tsuŋwoohe lɛ, ni amɛtee Lidia shĩa lɛ; ni be ni amɛna nyɛmimɛi lɛ, amɛwo amɛ hewalɛ+ ni amɛshi amɛtee.