Kristo KƐ Ekaa Nyiɛɔ E-Safo Lɛ Hiɛ
“Wɔ Nuŋtsɔ Yesu Kristo Nyɔŋmɔ . . . Iɛ . . . eŋɔ lɛ efee nibii fɛɛ yitso eha asafo lɛ.”—EFESOBII 1:17,22
1. Te Kristendom sɔlemɔi lɛ amli bii komɛi bashɛ sanebimɔ, ‘Namɔ ji nyɛhiɛnyiɛlɔ?’ lɛ hetoo aha tɛŋŋ, shi te Yehowa Odasefoi haa hetoo amɛhaa tɛŋŋ?
YEHOWA ODASEFOI ekpɛlɛɛɛ gbɔmɔ ko nɔ akɛ amɛhiɛnyiɛlɔi. Bɔ ni amɛgbɛjianɔtoo lɛ yɔɔ hewɔ lɛ amɛbɛ mɔ ko ni tamɔ Roman Katolek sɔlemɔ lɛ paapa lɛ, Bokagbɛ Ortɔdɔsk sɔlemɔi lɛ ablematsɛmɛi lɛ, eloo Kristendom jamɔi sɔrɔtoi lɛ amli sɔlemɔi lɛ amli hiɛnyiɛlɔi lɛ. Amɛbaa amɛhe shi amɛhaa Yesu Kristo, Kristofoi asafo lɛ Yitso, ni wie akɛ: “Mɔ kome ji nyɛ Hiɛnyiɛlɔ, Kristo lɛ.”—Mateo 23:10, New World Translation
2. Mɛni hewɔ Yehowa Odasefoi yɔseɔ Kristo akɛ Kristofoi asafo lɛ Yitso lɛ, shi mɛɛ saji abaanyɛ abi?
2 Bɔfo Petro ye odase yɛ Pentekoste gbi lɛ nɔ akɛ: “David eyaaa ŋwɛi, shi lɛ nɔŋŋ ekɛɛ: ‘Yehowa kɛɛ mi-Nuŋtsɔ lɛ ekɛ: “Ta minine jurɔ nɔ, kɛyashi beyinɔ ni maŋɔ ohenyiɛlɔi lɛ mafee onajiashi maŋoo.’” No hewɔ lɛ ha ni Israel we lɛ fɛɛ ale krɛdɛɛ akɛ Nyɔŋmɔ eŋɔ nɛkɛ Yesu ni nyɛsɛŋ lɛ nɛɛ efee Nuŋtsɔ kɛ Kristo fɛɛ.” (Bɔfoi lɛ Asaji 2:34-36) Shi yɛ be mli ni wɔyɔseɔ akɛ afee Yesu Nuŋtsɔ kɛ asafo lɛ Yitso yɛ afi 33 Ŋ.B. lɛ, ani enɛ haa wɔsusuɔ ehe akɛ mɔ ni yata Yehowa ninejurɔ nɔ kɛkɛ, ni eemɛ be ni akɛ lɛ baata maŋtsɛsɛi nɔ yɛ 1914? Ani wɔle akɛ Kristo kɛ ekaa bɔi esafo lɛ hiɛnyiɛmɔ kɛjɛ shishijee nɔŋŋ?
Ŋwɛi Gbɛ Nɔ Ni Atsɔɔ Nɔ Ayeɔ Nɔ Yɛ Ekaa Naa
3. Mɛni Yesu wo shi ekɛ ebaatsu kɛba kaselɔi lɛ eŋɔɔ, ni te wɔfeɔ tɛŋŋ wɔleɔ akɛ jeee gbɔmɔ he ewieɔ lɛ?
3 Yesu kɛɛ ebɔfoi anɔkwafoi lɛ gbɛkɛ dani egbo lɛ akɛ: “Ehi ha nyɛ akɛ matee; ejaakɛ, kɛji miyaaa lɛ, yelikɛbualɔ lɛ baŋ nyɛŋɔɔ; shi kɛji mitee lɛ, matsu lɛ kɛaaba nyɛŋɔɔ.” (Yohane 16:7, NW) Jeee gbɔmɔ ebaatsu lɛ shi hewalɛ ko ni yɔɔ ekaa. Efee enɛ faŋŋ dani ekwɔ kɛtee ŋwɛi, ni ekɛɛ ekaselɔi ni amɛbua amɛhe naa lɛ akɛ: “Miitsu nɔ ni mi-Tsɛ wo shi lɛ kɛba nyɛŋɔɔ. No hewɔ lɛ nyɛhia shi yɛ Yerusalem maŋ lɛŋ kɛyashi beyinɔ ni aaajɛ ŋwɛi awo nyɛ hewalɛ.”—Luka 24:49, New World Translation
4. Mɛɛ gbɛ nɔ atsɔ akɛ mumɔ krɔŋkrɔŋ lɛ tsu nii kɛjɛ Pentenkoste kɛyaa?
4 Yesu kaselɔi anɔkwafoi lɛ hi Yerusalem kɛyashi Pentekoste. Nakai gbi lɛ nɔ lɛ “mumɔ krɔŋkrɔŋ bayimɔ amɛ fɛɛ amɛmli obɔbɔ,” taakɛ awo shi lɛ. Petro ye odase akɛ: “Agbɛnɛ akɛ nɔ ni awo [Yesu] enɔ kɛtee Nyɔŋmɔ ninejurɔ nɔ ni ena mumɔ krɔŋkrɔŋ lɛ he shiwoo lɛ kɛjɛ tsɛ lɛ dɛ hewɔ lɛ, efɔse nɔ ni nyɛnaa ni nyɛnua nɛɛ eshwie shi.” (Bɔfoi lɛ Asaji 2: 4, 33) Nɛkɛ gbɛ nɔ Yehowa tsɔ efɔ́ mra be mli Kristofoi nɛɛ akɛ emumɔŋ bii. (Galatabii 4:6) Agbɛnɛ, Yesu nine shɛ mumɔ lɛ nɔ kɛjɛ e-Tsɛ lɛ ŋɔɔ akɛ nɔ ni ebaatsɔ nɔ ni eye esafo ni yɔɔ shikpɔŋ nɔ lɛ nɔ kɛjɛ eŋwɛi gbɛhe yɛ Nyɔŋmɔ ninejurɔ nɔ lɛ nɔ yɛ ekaa naa.
5, 6. (a) Mɛni ji nɔ kroko ni ekɛha Kristo koni eye ebua lɛ ni eye esafo ni yɔɔ shikpɔŋ nɔ lɛ nɔ? (b) Okɛ nɔkwɛmɔ nii pɔtɛɛ komɛi aha ni tsɔɔ bɔ ni Yesu kɛ enɛ tsu ekaselɔi lɛ ahe nii ekɛfi shiɛmɔ nitsumɔ lɛ sɛɛ.
5 Agbɛnɛ hu, bɔfo Petro ŋma yɛ Yesu he akɛ: “Mɔ ni yɔɔ Nyɔŋmɔ ninejurɔ nɔ, akɛni etee ŋwɛi ni aŋɔ ŋwɛibɔfoi kɛ hegbɛi kɛ hewalɛi awo eshishi lɛ.” (1 Petro 3:22) Ŋwɛibɔfoi hu ji nɔ kroko ni Yehowa kɛwo Kristo shishi koni etsɔ amɛnɔ enyiɛ Kristofoi asafo lɛ hiɛ ekaa naa.
6 No hewɔ lɛ, kɛji akɛ wɔkane wolo ni ji Bɔfɔi lɛ Asaji lɛ akɛ “Yehowa” bɔfo aloo “Nyɔŋmɔ bɔfo” fi Kristofoi ashiɛmɔ nitsumɔ lɛ sɛɛ aloo amɛkɛ amɛhe wo saji amli amɛha Kristofoi asafo lɛ, wɔbaanyɛ wɔdamɔ nɔ wɔhe wɔye akɛ ŋwɛibɔfoi nɛɛ tsuɔ nii yɛ Kristo Yesu nɔkwɛmɔ shishi. (Bɔfoi lɛ Asaji 5:19; 8:26; 10:3-7,22; 12:7-11; 27:23, 24) Akɛ “bɔfonukpa Mikael lɛ,” Kristo yɛ ŋwɛibɔfoi ni efaa amɛ, ni ekɛ amɛ tsu nii yɛ ekaa naa kɛnyiɛ Kristofoi asafo lɛ hiɛ yɛ Ŋ.B. klɛŋklɛŋ afii oha lɛ mli.—Yuda 9; 1 Tesalonikabii 4:16.
Nɔyeli Kuu Ko Ni Anaa
7. Mɛni ji nɔ ni Kristo kɛtsu nii ni ekɛ gbɛtsɔɔmɔ ha esafo lɛ, ni mɛɛ ŋmalɛi wieɔ nɛkɛ “nɔkwɛmɔ nitsumɔ” nɛɛ he lɛ?
7 Ŋmalɛi lɛ tsɔɔ akɛ Yesu Kristo kɛ hii akuu ko tsu nii akɛ nɔyeli kuu koni amɛkɛ gbɛtsɔɔmɔ aha esafo ni yɔɔ shikpɔŋ nɔ lɛ. Yɛ shishijee mli lɛ, nɛkɛ nɔyeli kuu nɛɛ bafee tamɔ emli bii lɛ ji bɔfoi 11 lɛ pɛ. Yɛ be mli ni ataoɔ Yehowa suɔmɔnaa nii yɛ mɔ ni akɛ lɛ aato Yuda Iskariot najiaŋ lɛ, Petro tsɛ ŋmalɛ kɛjɛ Lala 109:8 ni ekaneɔ akɛ: “Ni enɔkwɛmɔ nitsumɔ lɛ ha mɔ kroko akɔ” lɛ. Kɛkɛ ni yɛ sɔlemɔ ni amɛkɛha Yehowa lɛ mli lɛ, Petro kɛ enanemɛi lɛ bi Nyɔŋmɔ koni etsɔɔ amɛ mɔ ni ehala “koni eŋɔ nɛkɛ sɔɔmɔ kɛ bɔfonitsumɔ ni Yuda eje mli ekɔ lɛ diɛŋtsɛ egbɛ lɛ.” Ahala Matias koni ekɛ “bɔfoi nyɔŋma kɛ ekome” lɛ asɔmɔ.—Bɔfoi lɛ Asaji 1: 20, 24-26.
8. Mɛɛ mra be mli nɔkwɛmɔ nii enyɔ tsɔɔ bɔ ni Kristo kɛ enɔyeli kuu ni anaa lɛ mli bii tsu nii?
8 Klɛŋklɛŋ sane ni aŋma afɔ shi ni kɔɔ bɔ ni bɔfoi 12 lɛ tsuɔ amɛ “nɔkwɛmɔ nitsumɔ” nɛɛ he nii akɛ nɔyeli kuu lɛ ji be mli ni amɛhalaa hii ni he esa yɛ mumɔŋ akɛ amɛsɔmɔ amɛnyɛmimɛi ni yɔɔ mra be mli asafo lɛ mli lɛ. (Bɔfoi lɛ Asaji 6:1-6) Sane ni ji enyɔ lɛ ji be mli ni Filipo je shishi eshiɛ Kristo etsɔɔ Samariabii lɛ. Yɛ enɛ hewɔ lɛ, “bɔfoi lɛ ni yɔɔ Yerusalem lɛ . . . tsu Petro kɛ Yohane kɛtee amɛŋɔɔ.” Beni nɔyeli kuu lɛ mli bii lɛ anajiaŋdamɔlɔi nɛɛ kɛ emɛ nine shwie Samariabii lɛ anɔ lɛ pɛ kɛkɛ ni ‘amɛje shishi akɛ amɛnine aaashɛ mumɔ krɔŋkrɔŋ lɛ nɔ.—Bɔfoi lɛ Asaji 8:5, 14-17.
Kristo Diɛŋtsɛ Hiɛnyiɛmɔ
9. Ani Kristo tsɔɔ ŋwɛibɔfoi lɛ loo nɔyeli kuu lɛ nɔ etsuɔ nii yɛ be fɛɛ mli? Okɛ nɔkwɛmɔ nɔ aha.
9 No hewɔ lɛ, kɛjɛ Kristofoi asafo lɛ shishijee be mli tɔŋŋ lɛ, Kristo yɛ emumɔ krɔŋkrɔŋ lɛ, ŋwɛibɔfoi lɛ kɛ nɔyeli kuu ni anaa lɛ yɛ egbɛfaŋ koni enyɛ onyiɛ ekaselɔi ni yɔɔ shikpɔŋ nɔ lɛ ahiɛ yɛ ekaa naa. Be ko po shɛ ni lɛ diɛŋtsɛ etsu he nii. Akɛ nɔkwɛmɔ nɔ lɛ, Kristo diɛŋtsɛ tsake Saulo ni jɛ Tarso lɛ. (Bɔfoi lɛ Asaji 9:3-6) Gbii etɛ sɛɛ lɛ, Yesu diɛŋtsɛ wie etsɔɔ “kaselɔ ko” ni atsɛɔ lɛ Anania. Ní yɛ be mli ni ewieɔ nitsumɔi sɔrɔtoi etɛ ni yɔɔ ejwɛŋmɔ mli kɛha Saulo lɛ etsɔɔ lɛ lɛ, Yesu jaje akɛ: “Mɔ nɛɛ ji dɛŋdade ni ahala ahami, koni ehiɛ migbɛi lɛ kɛya jeŋmaji kɛ maŋtsɛmɛi lɛ Israelbii lɛ hu ahiɛ.” (Bɔfoi lɛ Asaji 9:10-15) Kristo tsɛ Saulo kɛha nitsumɔ pɔtɛɛ ko. No hewɔ lɛ Saulo batsɔ bɔfo, aloo mɔ ni atsu lɛ ni abale lɛ jogbaŋŋ akɛ bɔfo Paulo.
10. Yesu diɛŋtsɛ kwɛ shiɛmɔ nitsumɔ lɛ nɔ yɛ mɛɛ gbɛ nɔ?
10 Kristo diɛŋtsɛ kwɛ shiɛmɔ nitsumɔ lɛ nɔ. Etsɔ mumɔ krɔŋkrɔŋ ni enine shɛ nɔ kɛjɛ e-Tsɛ ni ji Yehowa ŋɔɔ lɛ nɔ eto Paulo maŋsɛɛ sanekpakpa shiɛmɔ gbɛfai lɛ agbɛjianɔ ni ena enɛɛmɛi ahe miishɛɛ, lɛ diɛŋtsɛ. Wɔkaneɔ akɛ: “Mumɔ krɔŋkrɔŋ lɛ kɛɛ: ‘Nyɛfaa Barnaba kɛ Saulo nyɛhãa mi kɛya nitsumɔ ni mitsɛ amɛ yɛ hewɔ lɛ.’ Agbɛnɛ mɛnɛɛmɛi lɛ, nɔ ni mumɔ krɔŋkrɔŋ lɛ etsu amɛ akɛ amɛya lɛ, amɛyiŋ amɛtee Seleukia, ni amɛbote lɛlɛ mli yɛ jɛi ni amɛfa kɛtee” kɛmiiya amɛ klɛŋklɛŋ maŋsɛɛ sanekpakpa shiɛmɔ lɛ nɔ. (Bɔfoi lɛ Asaji 13:2-4) Shi mumɔ krɔŋkrɔŋ lɛ ni ji Yehowa nitsumɔ hewalɛ lɛ, nyɛŋ ‘akɛɛ’ aloo ‘etsu mɔ ko’ lɛ diɛŋtsɛ. Eka shi faŋŋ akɛ mɔ ni kɛ mumɔ krɔŋkrɔŋ lɛ tsuɔ nii koni ekɛkudɔ saji lɛ ji Kristo, asafo lɛ Yitso lɛ.
11. Mɛni ba yɛ Paulo maŋsɛɛ sanekpakpashiɛmɔ gbɛfaa ni ji enyɔ lɛ mli, ni yɛ mɛɛ gbɛ nɔ enɛ tsɔɔ faŋŋ akɛ Yesu kɛ mumɔ lɛ tsu nii ekɛkudɔ shiɛmɔ nitsumɔ lɛ?
11 Bɔ ni Yesu kɛ mumɔ lɛ tsu nii ekɛnyiɛ mra be mli Kristofoi lɛ ahiɛ yɛ ekaa naa lɛ ji nɔ ko ni jeɔ kpo faŋŋ yɛ Paulo maŋsɛɛ sanekpakpa shiɛmɔ gbɛfaa ni ji enyɔ lɛ mli saji lɛ amli. Beni eyasara asafoi ni yɔɔ Laikaonia (Asia Bibioo lɛ niiaŋ) ni eto amɛ yɛ eklɛŋklɛŋ maŋsɛɛ sanekpakpashiɛmɔ gbɛfaa lɛ mli lɛ, ebafee faŋŋ akɛ Paulo kɛ enanemɛi gbɛfalɔi lɛ miisumɔ ni amɛya anaigbɛ kɛtsɔ Roma nɔyeli he ni yɔɔ Asia lɛ. Mɛni hewɔ amɛtsuuu nɔ ni amɛto amɛyiŋ yɛ he lɛ he nii? Ejaakɛ “Mumɔ krɔŋkrɔŋ lɛ etsi amɛ gbɛ akɛ amɛwie wiemɔ lɛ amɛtsɔɔ yɛ Asia.” (Bɔfoi lɛ Asaji 15:36, 40, 41; 16:1-6) Shi namɔ kɛ Yehowa mumɔ krɔŋkrɔŋ lɛ tsuɔ nii ni ekɛkudɔɔ ama lɛ? Kuku ni nyiɛ sɛɛ lɛ ha hetoo etsɔɔ akɛ beni amɛkɛ amɛhiɛ tsɔɔ kooyigbɛ, ni amɛmiitao ni amɛshiɛ yɛ Bitinia lɛ, Yesu mumɔ lɛ eŋmɛɛɛ amɛ gbɛ.” (Bɔfoi lɛ Asaji 16:7) Hɛɛ, Yesu Kristo kɛ mumɔ lɛ ni enine eshɛ nɔ kɛjɛ e-Tsɛ lɛ dɛŋ lɛ tsu nii koni ekɛkudɔ shiɛmɔ nitsumɔ lɛ yɛ ekaa naa. Lɛ kɛ e-Tsɛ ni ji Yehowa miisumɔ ni sanekpakpa lɛ agbɛ ashwa Europa, no hewɔ lɛ, Paulo nine shɛ ninaa ko nɔ yɛ enɛ hewɔ.—Bɔfoi lɛ Asaji 16: 9, 10.
Kristo Fi Nɔyelɔ Kuu Lɛ Mli Bii Lɛ Asɛɛ
12, 13. Beni Paulo yasara Yerusalem klɛŋklɛŋ kwraa akɛ Kristofonyo lɛ, mɛni ba ni tsɔɔ bɔ ni Kristo fiɔ yiŋkpɛi ni nyɛmimɛi ni hiɛ gbɛhei yɛ nakai maŋ lɛ mli lɛ feɔ lɛ sɛɛ?
12 Beni bɔfo Paulo bɔ mɔdɛŋ klɛŋklɛŋ kwraa ni ekɛ kaselɔi ni yɔɔ Yerusalem lɛ akpe lɛ, amɛmiii nɔ akɛ amɛkɛ lɛ aaakpe ni shishinumɔ hu yɛ enɛ he. “Shi Barnaba baye ebua lɛ ni enyiɛ ehiɛ kɛtee bɔfoi lɛ aŋɔɔ.” (Bɔfoi lɛ Asaji 9:26, 27, NW) Paulo kɛ bɔfo Petro hi shi gbii 15. Ekɛ Yesu nyɛ bi Yakobo, ni no mli lɛ eji Yerusalem asafo lɛ mli onukpai lɛ ateŋ mɔ kome lɛ kpe. (Galatabii 1:18, 19) Ŋmalɛi krokomɛi ni nyiɛ sɛɛ ni yɔɔ bɔfoi lɛ asaji lɛ tsɔɔ akɛ Yerusalem onukpai lɛ bafee mra be mli Kristofoi asafo lɛ nɔyeli kuu lɛ fa, kɛ bɔfoi 12 lɛ.—Bɔfoi lɛ Asaji 15:2; 21:18.
13 Paulo ye Yudafoi ni wieɔ Hela lɛ odase yɛ otsii enyɔ ni ekɛhi Yerusalem lɛ, “shi amɛ lɛ amɛtao lɛ amɛgbe.” Luka kɛfata he akɛ “shi beni nyɛmimɛi lɛ nu he lɛ, amɛyawa lɛ Kaisarea, ni amɛha etee Tarso.” (Bɔfoi lɛ Asaji 9:28-30) Shi namɔ hɔ nɛkɛ yiŋkpɛɛ ni nilee yɔɔ mli nɛɛ sɛɛ? Yɛ afii komɛi asɛɛ, beni egbaa sane nɛɛ nɔŋŋ etsɔɔ yɛ eshihilɛ mli lɛ, Paulo jaje akɛ Yesu jie ehe kpo etsɔɔ lɛ, ni efalɛ ni eshi Yerusalem oya. Beni Paulo taooo ni efee nakai lɛ, Yesu kɛfata he akɛ: “Yaa, ejaakɛ mibatsuo jeŋmaji lɛ ni yɔɔ shɔŋŋ lɛ aŋɔɔ.” (Bɔfoi lɛ Asaji 22:17-21) Kristo miikwɛ nɔ ni yaa nɔ lɛ pɛpɛɛpɛ kɛmiijɛ ŋwɛi shɔŋŋ, ni etsu nii kɛtsɔ nyɛmimɛi ni akɛ gbɛnaa nii ewo amɛdɛŋ yɛ Yerusalem lɛ kɛ wiemɔ ni ewieɔ etsɔɔ Paulo tɛɛ Iɛ nɔ.
14. Kɛ akɛ saji ni tee nɔ yɛ Bɔfoi lɛ Asaji kɛ Galatabii awoo lɛ mli lɛ to he lɛ, mɛni yɔɔ ni tsɔɔ akɛ Kristo diɛŋtsɛ kudɔ saji yɛ nɔyei kuu lɛ kpee ni tsu ketiafoo he sane lɛ he nii lɛ mli?
14 Nakai nɔŋŋ ŋmalɛi lɛ akanemɔ jogbaŋŋ tsɔɔ faŋŋ akɛ Kristo ji mɔ ni fiɔ nɔyeli kuu lɛ kpee ni he hiaa ni afee koni akɛha sane ni kɔɔ Jeŋmajiaŋbii ni ji Kristofoi lɛ ni esa akɛ afo amɛ ketia taakɛ Mose Mla lɛ tsɔɔ lɛ aloo esaaa akɛ afeɔ nakai lɛ sɛɛ. Bɔfɔi lɛ Asaji lɛ tsɔɔ mli akɛ beni sane lɛ te shi lɛ, ‘amɛto [ŋwanejee ko bɛ he akɛ onukpai ni hiɛ gbɛnaa yɛ Antiokia asafo lɛ mli lɛ] akɛ Paulo kɛ Barnaba kɛ amɛteŋ mɛi krokomɛi hu aya bɔfoi lɛ kɛ onukpai lɛ ni yɔɔ Yerusalem lɛ aŋɔɔ yɛ nɛkɛ sane nɛɛ hewɔ.” (Bɔfoi lɛ Asaji 15:1, 2) Shi beni Paulo gbaa shihilɛi komɛi ni ba ni ha etee Yerusalem koni ayana ketiafoo he sane lɛ naa lɛ, ewie akɛ: “Mitee yɛ kpojiemɔ ko naa.” (Galatabii 2:1-3; Okɛto 1:12 he.) Akɛ asafo lɛ Yitso ni yɔɔ ekaa lɛ, Kristo miisumɔ ni nɔyeli kuu muu lɛ fɛɛ ni anaa lɛ ana tsɔɔmɔ he sane ni he hiaa nɛɛ naa. No hewɔ lɛ, etsɔ mumɔ krɔŋkrɔŋ lɛ nɔ ekudɔ gbɔmɛi ni amɛtuu amɛhe amɛha nɛɛ ajwɛŋmɔ yɛ amɛyiŋkpɛi amli.—Bɔfoi lɛ Asaji 15:28, 29.
Yiŋkpɛɛ Ko Ni Ekaaa
15, 16. (a) Mɛni nɔyeli kuu lɛ bi ni Paulo afee beni eku esɛɛ eba kɛjɛ emaŋsɛɛ sanekpakpashiɛmɔ gbɛfaa ni ji etɛ lɛ mli lɛ? (b) Mɛni hewɔ nɛkɛ famɔ nɛɛ baafee nɔ ni ekaaa lɛ, ni mɛni hewɔ Paulo kpɛlɛ nɔ lɛ? (d) Mɛɛ sanebimɔi teɔ shi?
15 Nɔkwɛmɔ nɔ kroko ni yɔɔ miishɛɛ ni tsɔɔ bɔ ni Kristo kɛ ekaa kudɔɔ nibii kɛjɛɔ ŋwɛi lɛ ji nɔ ni ba yɛ maŋsɛɛ sanekpakpashiɛmɔ gbɛfaa ni ji etɛ lɛ sɛɛ lɛ. Luka jaje akɛ beni eku esɛɛ eba Yerusalem lɛ, Paulo gba nɔyeli kuu lɛ mli bii lɛ ni yɔɔ lɛ saji fɛɛ ni etee nɔ. Luka ŋma akɛ: “Paulo kɛwɔ tee Yakobo ŋɔɔ; ni onukpai lɛ fɛɛ hu yɛ jɛi. Ní beni ena amɛ lɛ, egba nibii ni Nyɔŋmɔ tsɔ esɔɔmɔ lɛ nɔ etsu yɛ jeŋmaji lɛ ateŋ lɛ ekomekome.” (Bɔfoi lɛ Asaji 21:17-19) Yɛ be mli ni amɛnu Paulo sane lɛ sɛɛ lɛ, nɔyeli kuu lɛ ni amɛbua amɛhe naa lɛ kɛ famɔ ni mli ka shi faŋŋ ha Paulo, amɛjaje akɛ: “Feemɔ nɔ ni wɔkɛɔ bo nɛɛ.” Amɛfa lɛ ni eya sɔlemɔwe lɛ ni eyatsɔɔ yɛ mɛi fɛɛ ahiɛaŋ akɛ sane ni atãa yɛ ehe akɛ: “otsɔɔ Yudafoi ni yɔɔ jeŋmaji lɛ ateŋ lɛ akɛ amɛkwa Mose, ni okɛɔ akɛ amɛkafolɔ amɛbii aketia, ni asaŋ amɛkanyiɛ amɛkusumii nii asɛɛ” lɛ bɛ mli.—Bɔfoi lɛ Asaji 21:20-24.
16 Mɔ ko baabi sane yɛ nilee ni yɔɔ nɛkɛ famɔ nɛɛ sɛɛ lɛ he. Taakɛ wɔtsɔ hiɛ wɔna lɛ, afii pii dani enɛ aaaba lɛ, Yakobo kɛ onukpai krokomɛi ni kpe lɛ eha Paulo eshi Yerusalem ejaakɛ “Yudafoi ni wieɔ Hela” lɛ miitao lɛ amɛgbe. (Bɔfoi lɛ Asaji 9:29, NW) Yɛ enɛɛmɛi fɛɛ sɛɛ lɛ, Paulo kpɛlɛ famɔ lɛ nɔ koni ekɛ nɔ ni ewie momo yɛ 1 Korintobii 9:20 lɛ akpa gbee. Shi awoɔ nɔ ni mɔ ko feɔ lɛ nɔŋŋ he nyɔmɔ yɛ nakai gbɛ nɔ nɔŋŋ. “Yudafoi ni jɛ Asia [Roma nɔyeli he] lɛ ha gidigidifeemɔ ba ma lɛŋ ni amɛbɔ mɔdɛŋ ni amɛgbe Paulo. Shi Roma asraafoi lɛ anifeemɔ yɛ oyaiyeli mli here lɛ kɛjɛ gbe ni asafo babaoo lɛ aaagbe lɛ lɛ mli.” (Bɔfoi lɛ Asaji 21:26-32) Akɛni Kristo ji asafo lɛ Yitso ni yɔɔ ekaa hewɔ lɛ, mɛni hewɔ ni eha nɔyeli kuu lɛ fa Paulo akɛ eya sɔlemɔwe lɛ?
17. Yɛ mɛɛ gbɛ nɔ nɛkɛ yiŋkpɛɛ ni ekaaa nɛɛ bafee nɔ ko ni jɛ ŋwɛi diɛŋtsɛ, ni mɛni ji nɔ ni enɛ tsɔɔ?
17 Hetoo lɛ bajeɔ kpo faŋŋ yɛ nɔ ni ba yɛ gbɛkɛ ni ji gbii enyɔ sɛɛ beni amɔ Paulo lɛ. Eye gbɔmɛi asafo babaoo ni taoɔ lɛ agbe lɛ odase fɛfɛo, ni efee nakai nɔŋŋ yɛ akuashɔŋ lɛ hiɛ. (Bɔfoi lɛ Asaji 22:1-21; 23:1-6) Shii enyɔ nɛ ni shwɛ sharao kulɛ asafo babaoo gbe lɛ. Shi Yesu jie ehe shi etsɔɔ lɛ nakai gbɛkɛ lɛ ni ekɛɛ: “Paulo ha otsui anyɔ omli, ejaakɛ bɔ ni oye mihe odase yɛ Yerusalem nɛɛ ja oyaye nakai nɔŋŋ yɛ Roma hu.” (Bɔfoi lɛ Asaji 23:11) Kaimɔ nitsumɔi sɔrɔtoi etɛ ni Kristo tsɔ hiɛ egba fɔ shi eha Paulo lɛ. (Bɔfoi lɛ Asaji 9:15) Paulo ye Kristo gbɛi lɛ he odase etsɔɔ “jeŋmaji lɛ” kɛ “Israelbii lɛ,” shi agbɛnɛ be eshɛ kɛha lɛ ni ebaaye odase “yɛ maŋtsɛmɛi ahiɛ.” Yɛ nakai nɔyeli kuu lɛ yiŋkpɛɛ hewɔ lɛ, Paulo nyɛ eye odase etsɔɔ Roma amralofoi Felike Festo, kɛ Maŋtsɛ Herode Agripa II kɛ agbɛnɛ yɛ naagbee lɛ Roma Maŋtsɛ Nero. (Bɔfoi lɛ Asaji, yitsei 24-26; 27:24) Namɔ baanyɛ aje ŋwane akɛ jeee Kristo ji mɔ ni hɔ enɛɛmɛi fɛɛ sɛɛ?
Kristo Ka He Ekɛ Ekaa Nyiɛ Esafo Lɛ Hiɛ
18. Mɛni ji nɔ ni Yesu Kristo jaje dani ekwɔ kɛtee ŋwɛi?
18 Dani eeeshi ekaselɔi lɛ ni eeekwɔ kɛaaya e-Tsɛ lɛ ninejurɔ nɔ lɛ, Yesu Kristo jaje akɛ: “Aŋɔ hegbɛ fɛɛ aha mi yɛ ŋwɛi kɛ shikpɔŋ nɔ. No hewɔ lɛ nyɛyaa ni nyɛyafea jeŋmaji fɛɛ mikaselɔi, nyɛbaptisia amɛ nyɛwoa Tsɛ lɛ kɛ Bi lɛ kɛ mumɔ krɔŋkrɔŋ lɛ gbɛi amli, ni nyɛtsɔɔ amɛ ni amɛyɛ nii fiaa ni miikɛɛnyɛ lɛ nɔ. Ní naa, mi lɛ mikɛnyɛ yɛ daa kɛyashi jeŋ naagbee lɛ.”—Mateo 28:18-20.
19. Kristo kɛ hegbɛ ni jɛ Nyɔŋmɔ ŋɔɔ lɛ tsu nii yɛ klɛŋklɛŋ afii oha lɛ mli yɛ mɛɛ gbɛ nɔ, ni mɛni abaasusu yɛ nikasemɔ ni nyiɛ sɛɛ lɛ mli?
19 Bɔfoi lɛ Asaji awolo lɛ ni gbaa mra be mli Kristojamɔ shishijee afii lɛ amli sane lɛ tsɔɔ ni ŋwanejee ko bɛ he akɛ Kristo kɛ hegbɛ ni eyɔɔ lɛ tsu nii yɛ ekaa naa ni ekɛnyiɛ esafo ni yɔɔ shikpɔŋ nɔ lɛ hiɛ. Efee enɛ kɛtsɔ mumɔ krɔŋkrɔŋ lɛ, ŋwɛibɔfoi lɛ kɛ nɔyeli kuu lɛ ni bɔfoi 12 lɛ kɛ Yerusalem asafo lɛ mli onukpai lɛ yɔɔ mli lɛ nɔ. Yesu tsɔɔ akɛ ekɛ ekaselɔi lɛ baahi shi kɛyashi nibii agbɛjianɔtoo lɛ naagbee, ni ji he ni wɔshɛ bianɛ lɛ. Wɔbaana bɔ ni eka he eji Kristofoi asafo lɛ Yitso kɛ bɔ ni enyiɛɔ ‘etooi’ lɛ ehiɛ ŋmɛnɛ yɛ ekaa naa lɛ yɛ nikasemɔ ni nyiɛ sɛɛ nɛɛ mli.
[Shishigbɛ niŋmai]
Ajie kɛjɛ August 1, 1987 Watchtower lɛ mli.
Saji Otii Ni Esa Akɛ Akai
◻ Mɛni hewɔ Yehowa Odasefoi yɔseee mɔ ko akɛ hiɛnyiɛlɔ lɛ?
◻ Kristo kɛ mumɔ krɔŋkrɔŋ lɛ tsu nii ekɛnyiɛ Biblia mli Kristofoi asafo lɛ hiɛ yɛ mɛɛ gbɛ nɔ?
◻ Kristo kɛ ŋwɛibɔfoi tsu nii ekɛnyiɛ klɛŋklɛŋ afii oha lɛ mli ◻ Kristofoi lɛ ahiɛ yɛ mɛɛ gbɛ nɔ?
◻ Kristo kɛ nɔyeli kuu ko ni anaa tsu nii ni ekɛkudɔ esafo lɛ ni yɔɔ shikpɔŋ nɔ lɛ yɛ mɛɛ gbɛ nɔ?
◻ Te Kristo diɛŋtsɛ kudɔ saji yɛ bei komɛi amli eha tɛŋŋ?
[Shikpɔŋ he mfonirii babaoo ni yɔɔ baafa 11]
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)
Paulo Maŋsɛɛ Sanekpakpashiɛmɔ Gbɛfaa Ni Ji Enyɔ
Antiokia
Seleukia
KILIKIA
Tarso
Derbe
KAPADOKIA
PAMFILIA
GALATIA
Listra
Ikonium
Antiokia
LIKIA
ASIA
BITINIA KƐ PONTO
Troas
MAKEDONIA
Filipi
Tesalonika
[Mfoniri ni yɔɔ baafa 9]
Kristo nyiɛ esafo lɛ hiɛ kɛtsɔ nɔyeli kuu ni anaa nɔ