Wolo Ni Akɛmaje Kolosebii Lɛ
4 Nyɛ nuŋtsɔmɛi lɛ, nyɛkɛ nyɛnyɔji lɛ ayea yɛ gbɛ ni ja ni sa nɔ, ejaakɛ nyɛle akɛ nyɛ hu nyɛyɛ Nuŋtsɔ yɛ ŋwɛi.+
2 Nyɛhiɛa sɔlemɔ mli daa,+ ni nyɛhiɛ akakpaa nɔ,* ni nyɛsɔlea kɛ shidaa.+ 3 Yɛ nakai be lɛ mli nɔŋŋ lɛ, nyɛsɔlea nyɛhãa wɔ hu,+ koni Nyɔŋmɔ agbele shinaa ko ahã wiemɔ lɛ, ni wɔnyɛ wɔjaje Kristo lɛ he teemɔŋ sane krɔŋkrɔŋ lɛ, nɔ hewɔ hu ni awo mi tsein nɛɛ,+ 4 koni majaje lɛ faŋŋ bɔ ni sa akɛ mafee.
5 Nyɛyaa nɔ nyɛnyiɛa yɛ hiɛshikamɔ mli yɛ nyɛkɛ mɛi ni yɔɔ sɛɛ lɛ* ashãramɔ mli, ni nyɛkɛ nyɛbe atsu nii jogbaŋŋ.*+ 6 Nyɛhãa nyɛwiemɔ he abaa nyam daa, kɛ́ wɔɔkɛɛ lɛ, ŋoo ahi mli,+ koni nyɛle bɔ ni sa akɛ nyɛhã mɔ fɛɛ mɔ hetoo.+
7 Tihiko,+ minyɛmi nuu ni misumɔɔ kɛ sɔɔlɔ anɔkwafo, kɛ minaanyo nyɔŋ yɛ Nuŋtsɔ lɛ mli lɛ baagba nyɛ mihe saji lɛ fɛɛ. 8 Miitsu lɛ nyɛŋɔɔ koni nyɛle bɔ ni wɔyɔɔ, ni eshɛje nyɛmii. 9 Onesimo,+ minyɛmi nuu anɔkwafo ni misumɔɔ lɛ ni jɛ nyɛteŋ lɛ baafata ehe kɛba; amɛbaagba nyɛ nibii fɛɛ ni yaa nɔ yɛ biɛ lɛ.
10 Aristarko,+ mɔ ni awo lɛ tsuŋ afata mihe lɛ, miiŋa nyɛ, ni Marko,+ Barnaba wekunyo lɛ* (mɔ ni nyɛnine shɛ gbɛtsɔɔmɔi anɔ akɛ kɛ́ eba nyɛŋɔɔ lɛ, nyɛhere lɛ atuu lɛ),+ 11 kɛ Yesu ni atsɛɔ lɛ Yusto lɛ, mɛi ni jɛ mɛi ni afolɔ amɛ ketia lɛ ateŋ lɛ, hu miiŋa nyɛ. Mɛnɛɛmɛi pɛ ji minanemɛi nitsulɔi yɛ Nyɔŋmɔ Maŋtsɛyeli lɛ gbɛfaŋ, ni amɛbatsɔmɔ mɛi ni shɛjeɔ mimii babaoo.* 12 Epafra+ ni jɛ nyɛteŋ ni eji Kristo Yesu nyɔŋ lɛ miiŋa nyɛ. Ekɛ hiɛdɔɔ sɔleɔ ehãa nyɛ be fɛɛ be, koni yɛ naagbee lɛ, nyɛdamɔ shi shiŋŋ akɛ mɛi ni edara* ni nyɛná nɔmimaa kwraa yɛ Nyɔŋmɔ suɔmɔnaa nii lɛ fɛɛ he. 13 Ejaakɛ miiye ehe odase akɛ ebɔɔ mɔdɛŋ waa yɛ nyɛ kɛ mɛi ni yɔɔ Laodikea kɛ mɛi ni yɔɔ Hierapoli lɛ ahe.
14 Luka,+ datrɛfonyo ni asumɔɔ lɛ lɛ miiŋa nyɛ, ni Dema hu miiŋa nyɛ.+ 15 Nyɛŋaa nyɛmimɛi ni yɔɔ Laodikea lɛ kɛ nyɛmiyoo Nimfa kɛ asafo ni yɔɔ eshĩa lɛ nyɛhãa mi.+ 16 Ni kɛ́ akane wolo nɛɛ yɛ nyɛteŋ atã lɛ, nyɛtoa gbɛjianɔ koni akane+ yɛ Laodikeabii lɛ asafo lɛ mli hu, ni nyɛ hu nyɛkane nɔ ni jɛ Laodikea lɛ. 17 Agbɛnɛ hu, nyɛkɛa Arkipo+ akɛ: “Ohiɛ ahi sɔɔmɔ ni omɔ mli yɛ Nuŋtsɔ lɛ mli lɛ nɔ, bɔ ni afee ni otsu kɛmɔ shi.”
18 Mi Paulo, mi diɛŋtsɛ mininenaa ŋamɔ nɛ.+ Nyɛhãa tsein ni awo mi+ lɛ ahia nyɛjwɛŋmɔ mli daa. Dromɔ lɛ kɛ nyɛ ahia shi.