Klɛŋklɛŋ Wolo Ni Akɛmaje Korintobii Lɛ

8 Agbɛnɛ, yɛ niyenii ni akɛhã amagai lɛ gbɛfaŋ lɛ:+ Wɔle akɛ wɔ fɛɛ wɔyɛ nilee.+ Nilee hãa mɔ wóɔ ehe nɔ, shi suɔmɔ tswaa mɔ emaa shi.+ 2 Kɛ́ mɔ ko susuɔ akɛ ele nɔ ko lɛ, enáko ele nakai nii lɛ jogbaŋŋ bɔ ni sa akɛ ele. 3 Shi kɛ́ mɔ ko sumɔɔ Nyɔŋmɔ lɛ, mɔ nɛ ji mɔ ni ele lɛ.

4 Agbɛnɛ, yɛ niyenii ni akɛhã amagai ni mɔ baaye lɛ gbɛfaŋ lɛ, wɔle akɛ amaga jeee nɔ ko+ yɛ je lɛ mli, ni akɛ, Nyɔŋmɔ ko bɛ akɛ ja Nyɔŋmɔ kome lɛ pɛ.+ 5 Ejaakɛ eyɛ mli akɛ ayɛ nibii ni atsɛɔ amɛ nyɔŋmɔi moŋ, kɛji yɛ ŋwɛi jio, yɛ shikpɔŋ lɛ nɔ jio,+ tamɔ bɔ ni “nyɔŋmɔi” babaoo kɛ “nuŋtsɔmɛi” babaoo yɔɔ lɛ, 6 shi wɔ lɛ, wɔle yɛ anɔkwale mli akɛ, Nyɔŋmɔ kome pɛ yɔɔ,+ Tsɛ lɛ,+ mɔ mli ni nibii fɛɛ jɛ kɛba, ni wɔyɔɔ wɔhã lɛ lɛ;+ ni Nuŋtsɔ kome pɛ yɔɔ, Yesu Kristo, mɔ ni nibii fɛɛ tsɔ enɔ kɛba,+ ni wɔ hu wɔtsɔ enɔ kɛba lɛ.

7 Shi jeee mɛi fɛɛ yɔɔ nilee nɛɛ.+ Shi mɛi komɛi lɛ, akɛni be ko ni eho lɛ, amɛjá amagai hewɔ lɛ, kɛ́ amɛmiiye nii lɛ, amɛbuɔ niyenii lɛ akɛ afɔle ni akɛhã amagai,+ ni no haoɔ* amɛhenilee ni atsɔseko lɛ* lɛ.+ 8 Shi jeee niyenii ji nɔ ni hãa wɔbɛŋkɛɔ Nyɔŋmɔ jogbaŋŋ;+ kɛ́ wɔyeee nii lɛ, nɔ ko eŋmɛɛɛ wɔ, ni kɛ́ wɔye nii hu, no kɛ nɔ ko fataaa he ehãaa wɔ.+ 9 Shi nyɛhiɛ ahia nyɛhe nɔ be fɛɛ be, koni hegbɛ ni nyɛyɔɔ akɛ nyɛhalaa nɔ ni nyɛsumɔɔ lɛ akatsɔ nanetɔ̃tɔmɔnɔ yɛ gbɛ ko nɔ kɛhã mɛi ni he waaa lɛ.+ 10 Ejaakɛ kɛ́ mɔ ko na bo ni oyɔɔ nilee lɛ akɛ ota amagai atsũ mli ooye nii lɛ, ani jeee hewalɛ owoɔ mɔ ni he waaa lɛ henilee koni eyaye niyenii ni akɛhã amagai lɛ? 11 No hewɔ lɛ, onilee lɛ hewɔ lɛ, mɔ ni he waaa lɛ, onyɛmi ni Kristo gbo yɛ ehewɔ lɛ hiɛ miikpãtã.+ 12 Kɛ́ nyɛfee esha nyɛshi nyɛnyɛmimɛi lɛ yɛ nɛkɛ gbɛ nɔ, ni nyɛye amɛhenilee ni atsɔseko lɛ* lɛ awui lɛ,+ nyɛmiifee esha nyɛmiishi Kristo. 13 No hewɔ ni kɛ́ niyenii baahã minyɛmi nane atɔ̃tɔ lɛ, miyeŋ loo ko dɔŋŋ koni mikatɔ̃tɔ minyɛmi lɛ nane lɛ.+