Yeremia

33 Yehowa kɛɛ Yeremia nɔ ni ji shii enyɔ nɔ be ni asa eyi yɛ Bulɔi Akpo+ lɛ nɔ lolo lɛ akɛ: 2 “Nɔ ni Yehowa, mɔ ni fee shikpɔŋ lɛ, Yehowa, mɔ ni shɔ̃ shikpɔŋ lɛ ni ekɛma shi shiŋŋ lɛ; mɔ ni gbɛ́i ji Yehowa lɛ, kɛɛ nɛ, 3 ‘Boo otsɛ mi, ni mahere bo nɔ, makɛɛ bo nibii wuji oya, nibii ni anyɛɛɛ shishi anu ni oleee.’”+

4 “Ejaakɛ nɔ ni Yehowa, Israel Nyɔŋmɔ lɛ kɛɔ yɛ shĩai ni yɔɔ maŋ nɛɛ mli kɛ Yuda maŋtsɛmɛi lɛ ashĩai lɛ ni akumɔ ashwie shi yɛ kpokui ni atswa kɛwo maŋ lɛ he ka kɛ klante lɛ hewɔ lɛ ahe nɛ,+ 5 kɛ agbɛnɛ hu, yɛ mɛi ni miiba ni amɛkɛ Kaldeabii lɛ abawu, ni amɛkɛ mɛi ni mitswa amɛ nɔ ni amɛgboi yɛ mimlifu kɛ mimlila lɛ mli lɛ agbohii lɛ ewo shĩai nɛɛ amli obɔ lɛ, mɛi ni amɛnɔfɔŋfeemɔ lɛ ehã mikɛ mihiɛ etee maŋ nɛɛ ahe lɛ nɛ: 6 ‘Naa, miiba ni mibatsa Yerusalem ni ehe awa lɛ,+ ni matsa amɛ ni magbele toiŋjɔlɛ kɛ anɔkwale babaoo naa mahã amɛ.+ 7 Ni mikɛ Yudabii ni aŋɔ amɛ nom lɛ kɛ Israelbii ni aŋɔ amɛ nom lɛ baaku sɛɛ kɛba,+ ni matswa amɛ mama shi tamɔ bɔ ni mifee tsutsu lɛ.+ 8 Ni mahã amɛhe atse kɛje eshai fɛɛ ni amɛfee amɛshi mi lɛ amli,+ ni mikɛ eshai fɛɛ ni amɛfee amɛshi mi kɛ tɔmɔi ni amɛtɔ̃ minɔ lɛ baake amɛ.+ 9 Ni Yerusalem baatsɔ mlifilimɔ gbɛ́i, kɛ yijiemɔ, kɛ anunyam ahã mi yɛ shikpɔŋ lɛ nɔ jeŋmaji fɛɛ ni baanu ekpakpa fɛɛ ni mafee amɛ lɛ he lɛ ahiɛ.+ Ni amɛbaashe gbeyei ni amɛhe baakpokpo+ yɛ ekpakpa fɛɛ ni mafee amɛ lɛ kɛ toiŋjɔlɛ ni mahã amɛná lɛ hewɔ.’”+

10 “Nɔ ni Yehowa kɛɛ nɛ: ‘Biɛ nɛɛ ni nyɛkɛɔ akɛ eji shikpɔŋ ni akɛfeee nɔ ko, ni gbɔmɛi kɛ kooloi bɛ nɔ, kɛ Yuda maji kɛ Yerusalem gbɛjegbɛi ni etsɔ amaŋfɔ, ni gbɔmɔ bɛ mli, ni mɛi ehiii mli, ni kooloi bɛ mli lɛ, abaasaa anu 11 mlifilimɔ gbee kɛ nyamɔ gbee,+ kɛ ayemforo wu gbee, kɛ ayemforo gbee, kɛ mɛi ni kɛɔ akɛ: “Nyɛdaa Yehowa, taiatsɛ lɛ, shi ejaakɛ Yehowa hi;*+ esuɔmɔ ni tsakeee lɛ hiɔ shi kɛyaa naanɔ!”+ lɛ agbee.’

“‘Amɛkɛ shidaa afɔlei baaba Yehowa shĩa lɛ mli,+ ejaakɛ mikɛ shikpɔŋ lɛ nɔ mɛi ni aŋɔ amɛ nom lɛ baaku sɛɛ kɛba tamɔ tsutsu lɛ,’ Yehowa kɛɛ.”

12 “Nɔ ni Yehowa, taiatsɛ lɛ, kɛɛ nɛ: ‘Yɛ shikpɔŋ ni akɛfeee nɔ ko nɛɛ nɔ lɛ, kɛ agbɛnɛ hu yɛ enɔ maji lɛ fɛɛ amli lɛ, abaaná lɛɛhei ekoŋŋ, he ko ni tookwɛlɔi kɛ amɛtookui baaya koni amɛyabumɔ shi yɛ.’+

13 “‘Yɛ maji ni yɔɔ gɔji lɛ anɔ lɛ amli lɛ, kɛ maji ni yɔɔ jɔi lɛ amli lɛ amli lɛ, kɛ wuoyigbɛ maji lɛ amli lɛ, kɛ Benyamin shikpɔŋ lɛ nɔ lɛ, kɛ hei ni bɔle Yerusalem lɛ,+ kɛ Yuda maji lɛ amli lɛ,+ tookui baatsɔ mɛi ni kaneɔ amɛ lɛ aniji ashishi ekoŋŋ,’ Yehowa kɛɛ.”

14 “‘Naa! Gbii miiba,’ Yehowa kɛɛ, ‘be ni mahã wiemɔ kpakpa ni miwie yɛ Israel shĩa lɛ kɛ Yuda shĩa lɛ he lɛ aba mli.+ 15 Nakai gbii lɛ amli, kɛ nakai be lɛ mli lɛ, mahã tso fɔ ko ni ja atsɛ̃ ahã David,*+ ni ebaaye jalɛ sane ni ebaafee nɔ ni ja yɛ shikpɔŋ lɛ nɔ.+ 16 Nakai gbii lɛ amli lɛ, abaahere Yuda,+ ni Yerusalem hu baahi shi shweshweeshwe.+ Ni gbɛ́i ni akɛbaatsɛ Yerusalem nɛ: Yehowa Ji Wɔjalɛ Nifeemɔ.’”+

17 “Ejaakɛ nɔ ni Yehowa kɛɛ nɛ: ‘Ebaŋ kɔkɔɔkɔ akɛ be ko baashɛ ni anáŋ David seshinyo ko ni baata Israel shĩa lɛ maŋtsɛ sɛi lɛ nɔ,+ 18 ni ebaŋ kɔkɔɔkɔ hu akɛ be ko baashɛ ni anáŋ Levi osɔfoi lɛ ateŋ mɔ ko ni baadamɔ mihiɛ koni eshã shãa afɔlei, kɛ ŋmaa* afɔlei, kɛ afɔlei krokomɛi.’”

19 Ni Yehowa kɛɛ Yeremia ekoŋŋ akɛ: 20 “Nɔ ni Yehowa kɛɛ nɛ, ‘Kɛ́ nyɛbaanyɛ nyɛku mikpaŋmɔ ni kɔɔ jetsɛremɔ he lɛ, kɛ mikpaŋmɔ ni kɔɔ jenamɔ he lɛ mli koni jetsɛremɔ kɛ jenamɔ akaba yɛ amɛbe naa dɔŋŋ lɛ,+ 21 no lɛ, abaanyɛ aku mikpaŋmɔ ni mikɛ mitsulɔ David ekpaŋ lɛ mli+ koni ekaná binuu ko ye maŋtsɛ yɛ emaŋtsɛ sɛi lɛ nɔ,+ ni nakai nɔŋŋ eji yɛ mikpaŋmɔ ni mikɛ Levi osɔfoi lɛ, misɔɔlɔi lɛ,+ ekpaŋ lɛ hu gbɛfaŋ. 22 Bɔ ni anyɛŋ akane ŋwɛi asraafoi lɛ ni anyɛŋ asusu ŋshɔnaa shia lɛ, nakai nɔŋŋ mahã mitsulɔ David seshi* lɛ kɛ Levibii lɛ ni sɔmɔɔ mi lɛ ayi afa.’”

23 Ni Yehowa kɛɛ Yeremia ekoŋŋ akɛ: 24 “Ani onuko nɔ ni maŋ nɛɛ kɛɔ akɛ, ‘Yehowa baakwa wekui enyɔ ni ehala’ lɛ? Amɛbuuu mi diɛŋtsɛ mimaŋ lɛ, ni amɛbuuu amɛ dɔŋŋ akɛ amɛji jeŋmaŋ.

25 “Nɔ ni Yehowa kɛɛ nɛ: ‘Bɔ ni mihã mikpaŋmɔ ni kɔɔ jetsɛremɔ kɛ jenamɔ he lɛ,+ kɛ ŋwɛi kɛ shikpɔŋ mlai lɛ ema shi shiŋŋ lɛ,+ 26 nakai nɔŋŋ mikwaŋ Yakob seshi* lɛ, kɛ mitsulɔ David seshi lɛ kɔkɔɔkɔ, koni mahã nɔyelɔi ajɛ eseshi* lɛ mli aye Abraham, kɛ Isak, kɛ Yakob seshibii* lɛ anɔ. Ejaakɛ mabua amɛseshibii ni aŋɔ amɛ nom lɛ anaa kɛku sɛɛ kɛba+ ni amɛnii baafee mi mɔbɔ.’”+