Nyɔŋmɔ Shiwoo Ni Kɔɔ E-Jeŋ Nɔyeli He Lɛ Ji Nɔni Anyɛɔ Akɛ He Fɔɔ Nɔ
“Bɔni Yehowa kɛɛ nɛ: Kɛji nyɛaaanyɛ mishwane he kpaŋmɔ kɛ minyɔɔŋ he kpaŋmɔ lɛ mli nyɛku, ni shwane kɛ nyɔɔŋ akaba yɛ amɛbe mli dɔŋŋ lɛ, no lɛ aaaku mikpaŋmɔ ni mikɛ mitsulɔ David ekpaŋ lɛ mli, ni enaŋ binuu ni aaata esɛŋ lɛ nɔ aye maŋtsɛ, kɛ nɔni mikɛ Levibii, osɔfoi ni ji misɔɔlɔi lɛ, ekpaŋ lɛ hu!”—Yer. 33:20, 21.
1. Mɛɛ gbɛ nɔ Maŋtse David maŋtsɛyeli weku lɛ bana yinɔsane ko ni nɔ bɛ lɛ?
1 Jeŋ nɛɛ enako ehenɔ dã! Mɛni ni? Weku kome mli maŋtsɛmɛi ni tsara nɔ ni ye nɔ kɛha afii 470 ni beni afo amɛnɔyeli lɛ mli afii 2,520 sɛɛ lɛ, amɛkɔ nɔyeli hewalɛ kpele ekoŋ. Weku ni ehe gbɛi ni eko tamɔɔɔlɛ nɛɛ ji Maŋtsɛ David ni jɛ Yerusalem, mɔni ji Yesu Kristo blematsɛ ni ehe gbɛi ni afɔle yɛ David diɛŋtsɛ fɔmɔhe ni ji Betlehem lɛ.
2. Yɛ afi 608 D.Ŋ.B. beni David shikpɔŋ nɔ wekukpaa lɛ naagbee maŋtsɛ lɛ yeɔ nɔ lɛ, nɛɛgbɛ Yeremia yɔɔ, ni namɔ pɛ ji mɔni abaanyɛ akɛtsu nii ni akɛtsɛ David wekukpaa nɔyelii lɛ hiɛ?
2 David maŋtsɛ ni eye yɛ ewebii anɔ lɛ je shishi kɛjɛ afi 1077 D.Ŋ.B. Shi beni gbalɔ Yeremia je enitsumɔ ni yɔɔ gbeyei lɛ shishi yɛ afi 647 D.Ŋ.B. lɛ, David maŋtsɛmɛi aweku ni yɔɔ shikpɔŋ lɛ nɔ lɛ bote enaagbee afii 40 lɛ mli yɛ Yerusalem. Yeremia ji mɔni kɛ hiɛdɔɔ fã Nyɔŋmɔ kpaŋmɔ he shiiwoo ni ekɛ David fee kɛha naanɔ maŋtsɛyeli lɛ he. Shi yɛ afi 608 D.Ŋ.B. mli lɛ, Yeremia yaje asraafoi akpabuu mli yɛ maŋtsɛyeli maŋtiase lɛ mli. Akɛlɛ wo Bulɔ lɛ Kpo ni tsa Maŋtsɛ Zedekia ni fata he feɔ 21 ni ye nɔ yɛ David weku lɛ mli kɛji akane kɛjɛ David diɛŋtsɛ nɔ lɛ maŋtsɛwe lɛ he lɛ mli. Zedekia maŋtsɛyeli ni Babilonbii lɛ babutu yɛ afi 607 D.Ŋ.B. lɛ kɛ David akutso lɛ maŋtsɛyeli yɛ Hebron kɛ shikpɔŋ nɔ Yerusalem nɔ afii 470 sɔŋŋ lɛ ba naagbee. Yesu Kristo, ni ji David seshinyo lɛ pɛ ji mɔni Nyɔŋmɔ kɛbaatsu nii koni etsiɛ David maŋtsɛyeli lɛ hiɛ ekoŋŋ yɛ Nyɔŋmɔ kpaŋmɔ ni ekɛlɛ fee kɛha maŋtsɛyeli ni hiɛ kpataaa lɛ mlibaa naa.
3. Beni Yeremia yɔɔ asraafoi akpabuu mli lɛ, namɔ Yeremia kɛna sanegbaa, ni te nakai sanegbaa lɛ ba nɔni ji shii enyɔ nɔ̃ tɛɛŋ?
3 Beni gbalɔ Yeremia yɔɔ esraafoi akpabuu lɛ mli lɛ, enyɛɛɛ ekɛ Babilonbii ni woɔ Yerusalem he ka yɛ nakai be mli lɛ ana sanegbaa shi enyɛ ekɛ e-Nyɔŋmɔ lɛ na sanegbaa tamɔ bɔni wɔkaneɔ lɛ akɛ: “Ni Yehowa wiemɔ saa ba Yeremia ŋɔɔ nɔni ji shii enyɔ, beni aŋã eyi yɛ bulɔi lɛ akpo lɛ nɔ lolo lɛ, akɛ: Bɔni Yehowa, mɔni feɔ lɛ, Yehowa, mɔni toɔ eyiŋ ni ehaa ebaa mli lɛ, mɔ gbɛi ni ji Yehowa lɛ, kɛɛ nɛ: Bolɔmɔ otsɛmi, ni mahereo nɔ, ni majaje nibii wuji matsɔɔo kɛ nii ni aŋɔtee ni oleee!”—Yer. 33:1-3.
4. Mɛni ji ‘nibii wuji ni aŋɔtee’ ni abaafee lɛ?
4 Mɛni nibii? No ji akɛ abaakumɔ Yerusalem maŋ ni yɔɔ gɔŋ nɔ lɛ ashwie shi, ni beni ekã shi amaŋfɔ afii 70 sɛɛ lɛ, abaaku sɛɛ ama ekoŋ. Agbɛnɛ hu ewebii ni aŋɔ amɛ kɛtee nom mli yɛ heni jɛkɛ fe shitooi 1,000 (kilomita 1,600) lɛ baaku sɛɛ abahi mli ekoŋŋ. Eyɛ mli akɛ akɛ David maŋtsɛyeli akutso lɛ mlibii lɛ taaa shikpɔŋ nɔ maŋtsɛsɛi lɛ nɔ ekoŋŋ moŋ, shi ebaakahe ehi shi afii 639 kɛbashi afi 38 Ŋ.B.; beni maŋtsɛsɛi lɛ naanɔ gboshiniyelɔ lɛ baapue ni eye maŋtsɛ kɛya naanɔ. Nakai gboshiniyelɔ lɛ bafee Yesu Kristo!—Kol. 1:13.
5. Mɛɛ shiwoo Yehowa Nyɔŋmɔ kɛha yɛ Yerusalem ni awo he ka yɛ nakai be mli lɛ he?
5 Nyɔŋmɔ, Mɔni bɔ shikpɔŋ lɛ, ni eji Mɔni kudɔɔ enitsumɔi lɛ ji mɔni na nakai nibii lɛ kɛtsɔ hiɛ ni ewo he shi. Efee nakai. Nohewɔ lɛ, eyɛ mli akɛ mɛi ni naa nibii ni yaa nɔ lɛ naŋ hiɛnɔkamɔ ko yɛ bɔni nibii baagbe naa aha kɛha David maŋtsɛwe lɛ he moŋ nɛ, shi Yehowa nɛɛ pɛ ji mɔni nyɛ ekɛ mumɔ tsirɛ Yeremia ni ekɛɛ akɛ:
“Ejaakɛ bɔni Yehowa, Israel Nyɔŋmɔ lɛ, kɛɛ yɛ maŋ nɛɛ shiai lɛ kɛ Yuda maŋtsɛmɛi lɛ ashiai lɛ ni akumɔ yɛ kpokui lɛ kɛ klante lɛ hewɔ lɛ ahe nɛ: Amɛmiiba ni amɛkɛ Kaldeabii hekawolɔi lɛ abawu, shi amɛkɛ gbɔmɛi ni migbe yɛ mimlifu kɛ mimlila mli, beni amɛnifɔjianii sɔŋŋ hewɔ miŋɔ mihiɛ mitee nɛkɛ maŋ nɛɛ lɛ, agbohii aaawo amɛ obɔ̃ tɔ. Naa mi nɔŋŋ mafi efala lɛ nɔ, ni matsa amɛ ni amɛhe aaata, ni mafã hejɔlɛ kɛ anɔkwale babaoo naa maha amɛ. Ni maha Yuda kɛ Israel nomii lɛ aku sɛɛ aba ekoŋ, ni mama amɛ tamɔ tsutsu lɛ. Ni matsuu amɛhe kɛaaajɛ amɛnishaianii fɛɛ ni amɛkɛfee esha amɛshi mi lɛ mli; ni maŋɔ amɛnishaianii fɛɛ ni amɛkɛfee esha amɛshi mi ni amɛkɛtɔ minɔ lɛ mafa amɛ. Ni [Yerusalem aaatsɔ] mlifilimɔ gbɛi eha mi, kɛ yijiemɔ kɛ anunyam yɛ shikpɔŋ lɛ nɔ jeŋmaji fɛɛ ni aaanu ejurɔ fɛɛ ni mifeɔ [nomii] lɛ he lɛ ahiɛ, ni amɛtsui aaafa ni amɛhe aaakpokpo yɛ ejurɔ fɛɛ kɛ hejɔlɛ fɛɛ ni maha [Yerusalem] lɛ hewɔ.”—Yer. 33:4-9.
6. Mɛɛ hewalɛ Yerusalem tsamɔ ni ena yɛ Yehowa mlifu kɛ mlila ni efɔse eshwie enɔ sɛɛ lɛ baana yɛ maji lɛ anɔ, ni mɛni hewɔ?
6 Kɛtsɔ Babilonbii aloo Kaldeabii ni yeɔ je lɛ nɔ kunim lɛ nɔ lɛ, Yehowa Nyɔŋmɔ miifɔse emlila kɛ mlifu lɛ fɛɛ eeshwie Yuda Maŋtsɛyeli maji lɛ anɔ. Eja gbɛ nakai, ejaakɛ Yudabii lɛ etɔ̃ emlai lɛ anɔ ni amɛfee esha amɛshi kpaŋmɔ ni ekɛ amɛtsɛmɛi lɛ fee lɛ. Nohewɔ lɛ, esani akpata Yerusalem hiɛ ni atswa mɛi ni je mli lɛ naneshi tu kɛya Babilon koni gbɔmɛi kɛ shia kolooi ashi shikpɔŋ lɛ amaŋfɔ. Yehowa duromɔ ni esaaa wɔ lɛ pɛ ji nɔni baanyɛ ekɛ Yerusalem tsamɔ lɛ aba ni ena hewalɛ ekoŋ akɛ maŋ ni aku sɛɛ ama, ni enyɛ efee nakai hu. Tsamɔ ni Yehowa baatsalɛ lɛ ji nɔko ni baati maji ni jeee Yudabii lɛ ashi trukaa ni amɛnuŋ shishi, ni amɛbaashe Nyɔŋmɔ ni fee nakai naakpɛɛnii lɛ gbeyei. Nɔni baajɛ enɛ mli abaha amɛ lɛ baaha maji nɛɛmɛi ajija.
7. Mɛni ji Israelbii daa shihilɛ mli nifeemɔi ni akɛbaama shi ekoŋŋ yɛ Yuda kɛ Benyamin kɛ Yerusalem shikpɔji ni ashi amaŋfɔ lɛ nɔ?
7 Eyɛ mli akɛ esani ashi Yerusalem amaŋfɔ kɛha afii 70 moŋ, shi jeee nibii ni nyɛɛɛ aba mli lɛ he Yeremia ni ji Nyɔŋmɔ ni feɔ naakpɛɛnii nɛɛ gbalɔ lɛ wieɔ beni egba nɔni abaakɛɛ yɛ ehekawoo lɛ mli efɔ shi lɛ akɛ:
“Bɔni Yehowa kɛɛ nɛ: Biɛnɛɛ ni nyɛkɛɔ akɛ ehiɛ ekpata ni gbɔmɔ loo koolo ehiŋ mli dɔŋŋ lɛ, kɛ Yuda maji kɛ Yerusalem blohui ni etsɔmɔ amaŋfɔi ni gbɔmɔ bɛ mli ni mɔko bɛ ni hiɔ mli ni koolo ko bɛ mli lɛ, aaanu mlifilimɔ kɛ nyamɔ gbee kɛ ayɛmforowu kɛ ayemforo gbee ekoŋŋ, mɛi ni kɛɔ akɛ: Nyɛdaa Yehowa Zebaot shi, ejaakɛ Yehowa hi; ejaakɛ naanɔ emɔbɔnalɛ hiɔ shi kɛyaa! lɛ agbee.”
“Kɛ mɛi ni kɛ shidaa afɔlei baa Yehowa we lɛ agbee. Ejaakɛ makpale shikpɔŋ lɛ nomŋɔɔ lɛ kɛaaaba ekoŋŋ, tamɔ tsutsu lɛ, Yehowa kɛɛ.” . . .
“Asaŋ gɔji lɛ anɔ maji lɛ amli kɛ naanɔ maji lɛ amli kɛ wuoyigbɛ maji lɛ amli kɛ Benyamin shikpɔŋ lɛ nɔ kɛ Yerusalem niiaŋ kɛ Yuda maji lɛ amli hu, toikui aaatsɔ kanelɔ niji ashishi kɛho ekoŋŋ, Yehowa kɛɛ.”—Yer. 33:10-13.
Awo Jeŋ Nɔyelɔ Ni Baa Lɛ Shi
8. Ani Yerusalem tsamɔ yɛ afi 537 D.Ŋ.B, Iɛ kɛ David maŋtsɛyeli lɛ ma shi ekoŋŋ, ni mɛni ji nɔni baaba wɔsɛɛ?
8 Yerusalem tsamɔ lɛ je shishi kɛjɛ afi 537 D.Ŋ.B., shi enaaa maŋtsɛ ni jɛ David maŋtsɛyeli akutso lɛ mli. Kpokpaa nɔ amralo ni jɛ David weku lɛ mli lɛ pɛ ji nɔni ena. Tsutsu lɛ, nɛkɛ amralo nɛɛ yɛ Mediabii kɛ Pershiabii amaŋtsɛyeli ni ye Babilon Jeŋ Hewalɛ lɛ nɔ kunim lɛ shishi. Belɛ mɛni akɛɔ yɛ Yehowa kpaŋmɔ ni ekɛ Maŋtsɛ David fee kɛha naanɔ maŋtsɛyeli yɛ David seshi mli lɛ he! Yɛ David maŋtsɛyeli akutso ni abalɛ shi be fioo ko yɛ nakai be mli lɛ po sɛɛ lɛ, Yehowa maŋtsɛyeli he kpaŋmɔ lɛ ma nɔ mi akɛ anunyam be ni fe fɛɛ yɛ kɛha David maŋtsɛyeli akutso lɛ wɔsɛɛ.
9, 10. Bɔni afee ni enɛ aba mli nakai lɛ, mɛni Yehowa wo shi akɛ ebaaha ejɛ David maŋtsɛyeli weku ni abalɛ shi lɛ mli?
9 Mɛɛ miishɛɛ wɔ mɛi ni wɔyɔɔ ŋmɛnɛ lɛ baanyɛ ana yɛ enɛ he nɛkɛ! Mɛni hewɔ? No ji akɛ, afo David nɔyeli wekutso lɛ, shi etsoku lɛ gboko. Nyɔŋmɔ Ofe lɛ baanyɛ eha ekwɛ̃ “tsonine” ni baafee maŋtsɛyeli ni awo he shi lɛ naanɔ gboshiniyelɔ. Nyɛhaa wɔboa enɛ toi:
10 Naa, gbii miiba, Yehowa kɛɛ, ni maha wiemɔ kpakpa ni miwie yɛ Israel we lɛ kɛ Yuda we [ni David jɛ mli] lɛ he lɛ aba mli. Nakai gbii lɛ amli kɛ nakai be lɛŋ lɛ maha jalɛ tsonine akwɛ̃ aha David, ni eeekojo ni eeeye jalɛsane yɛ shikpɔŋ lɛ nɔ. Nakai gbii lɛ amli lɛ aaahere Yuda [David akutso] yiwala, ni Yerusalem aaahi shi shweshweeshwe ni gbɛi ni akɛ aaatsɛlɛ ji: Yehowa wɔjalɛ lɛ!” Gbɛi nɛɛ nɔŋŋ ji gbɛi ni akɛbaatsɛ ewɔsɛɛ Maŋtsɛ lɛ.—Yer. 33:14-16; kɛto Yeremia 23:4-6 he.
11. Namɔ bafee “tsonine” ni awo he shi Iɛ, ni yɛ afi 1914 lɛ, te etsɔɔ ehe akɛ Yehowa “Tsonine” lɛ diɛŋtsɛ tɛɛŋ?
11 Ani nɛkɛ shiwoo ni kɔɔ jeŋ nɔyeli he lɛ bafee nɔko ni anyɛ akɛ he fɔ nɔ? Hɛɛ! Eyɛ mli akɛ afii ni fa fe 640 lɛ eho moŋ, shi David weku ni akpa yɛ sɛi nɔ, ni akpa eyiteŋ maŋtsɛfai, ni ahe maŋtsɛtso yɛ edɛ lɛ tsoku lɛ kwɛ̃ yɛ be ni Yehowa to lɛ mli pɛpɛɛpɛ. Enɛ bafee Yesu diɛŋtsɛ ni afɔlɛ yɛ David maŋ ni ji Betlehem lɛ mli; ni mɔni tsɔ ehiɛ ni ji Yohane Baptisilɔ lɛ baptisilɛ ni no sɛɛ nɔŋŋ lɛ akɛ Nyɔŋmɔ mumɔ lɛ fɔlɛ mu koni ebafee Maŋtsɛyeli kpaŋmɔ ni akɛ David fee lɛ naanɔ gboshiniyelɔ lɛ. (2 Sam. 7:14-16; Ezek. 21:26-32) Yɛ anɔkwale mli lɛ, lɛ ji mɔni bafee Nuŋtsɔ Maŋtsɛ Yehowa “Tsonine” lɛ, ejaakɛ yɛ “be kpawo” (afii 2,520) ni Jeŋmajiabii lɛ kɛye shikpɔŋ lɛ nɔ lɛ naagbee yɛ afi 1914 Ŋ.B. mli lɛ, atsɔ Yesu Kristo ni awo ehiɛ nyam lɛ nɔ atsĩɛ Yehowa maŋtsɛ ni eji yɛ shikpɔŋ lɛ nɔ yɛ Maŋtsɛyeli kpaŋmɔ lɛ mlibaa naa lɛ hiɛ.—Dan. 4:13-16; Zak. 6:12, 13.
12. (a) Te aye Yesu Kristo he odase akɛ eji “jalɛ tsonine” tɛɛŋ? (b) Namɔ “Nuntsɔ” ebafee, ni te aha “Yuda” kɛ “Yerusalem” na kpɔmɔ tɛɛŋ?
12 Yehowa tsɔɔ “Jalɛ Tsonine” ni enɛ baaji lɛ beni etee Yesu Kristo shi kɛjɛ lá odasefonyo gbele mli yɛ gbi ni ji etɛ lɛ nɔ ni ewó enɔ kɛtee Lɛ diɛŋtsɛ eninejurɔ nɔ yɛ ŋwɛi lɛ. Yɛ enɛ hewɔ lɛ, eyɛ mli akɛ Yesu Kristo ji “David bi” ni ehi shikpɔŋ nɔ pɛŋ moŋ, shi ebatsɔ David “Nuŋtsɔ.” (Lala 110:1-4; Mat. 22:41-45) Beni ekwɔ kɛtee eŋwɛi-Tsɛ lɛ ninejurɔ nɔ lɛ, ekɛ e-adesa afɔle ni yeɔ emuu lɛ jara lɛ tee. Yɛ enɛ feemɔ mli lɛ, enyɛ ekɛ kpɔ̃mɔ baha “Yuda” ni emaŋtiase ji “Yerusalem” lɛ. Nohewɔ lɛ, eji anɔkwale akɛ Yesu ha David we lɛ maŋtsɛyeli lɛ kwɛ̃ ekoŋŋ!—Kpoj. 22:16.
13. Mɛɛ Yerusalem yɔɔ shweshweeshwe shihilɛ mli ŋmɛnɛ? (b) Gbɛi “Yehowa wɔjalɛ lɛ” kɔɔ namɔ “jalɛ” he, ni mɛni hewɔ nakai gbɛi lɛ nɔŋŋ sa mɔni atsɛlɛ”Tsonine” lɛ?
13 Atsɛɔ Yesu Kristo akɛ “Jata lɛ ni jɛ Yuda akutso lɛ mli lɛ, mɔni ji David shishifã lɛ.” (Kpoj. 5:5) Akɛni shikpɔŋ nɔ Yerusalem lɛ kpoo “Jata lɛ ni jɛ Yuda akutso lɛ mli” lɛ ni amɛgbele hewɔ lɛ, ‘ehiii shi shweshweeshwe,’ shi akpata ehiɛ yɛ afi 70 Ŋ.B. mli. (Mat. 23:37, 38; Luka 21:24) Shi Yerusalem ni kwɔ felɛ ni ji “ŋwɛi Yerusalem” lɛ yɛ nakai shweshweeshwe shihilɛ lɛ mli ejaakɛ emumɔŋbii ni ji Yesu Kristo sɛɛnyiɛlɔi 144,000 ni afɔ amɛ mu lɛ yɛ shweshweeshwe yɛ Yehowa yibaamɔ shishi. (Heb. 12:22; Gal. 4:26-28) Nɛkɛ “ŋwɛi Yerusalem” nɛɛ diɛŋtsɛ ji asafo ni atsɛɔlɛ “Yehowa wɔjalɛ lɛ.” Akɛni akɛɛ “Wɔjalɛ lɛ,” shi jeee ‘Mijalɛ lɛ’ hewɔ lɛ, mɛi ahe ni awieɔ lɛ ji ŋwɛi Yerusalem lɛ mumɔŋbii 144,000 lɛ, ejaakɛ Yehowa Nyɔŋmɔ ebu mɛnɛɛmɛi bem aloo ebu amɛ jalɔi yɛ Kristo afɔleshaa lɛ jara hewɔ. Atsɛɔ Yesu Kristo gbɛi ni ji ‘“Tsonine” lɛ hu akɛ “Yehowa Wɔjalɛ lɛ,” ni lɛ ji esɛɛnyiɛlɔi ni afɔ amɛ mu lɛ anajiaŋdamɔlɔ.—Yer. 23:5, 6; kwɛmɔ 1 Korintobii 1:30, 31; Romabii 3:21, 22 hu.
14. Akɛni nakai gbɛi lɛ ka Kristo kɛ ehefatalɔi asafo lɛ nɔ hewɔ lɛ, mɛɛ nɔyeli Nyɔŋmɔ jeŋ nɔyeli ni baa lɛ baaji?
14 Yɛ gbɛi nɛɛ ni Nyɔŋmɔ kɛtsɛɔ Maŋtsɛ ni afɔlɛ mu kɛ ehefatalɔi asafo nɛɛ naa lɛ, belɛ mɛɛ nɔyeli po Nyɔŋmɔ jeŋnɔyeli ni baa lɛ baaji aha adesa weku lɛ fɛɛ”? Ebaafee jalɛ nɔyeli. Mɛɛ shidaa po wɔbaanyɛ wɔkɛha nɛkɛ yɛ enɛ hewɔ!
Nɔhewɔ Ni Abaanyɛ Akɛ Be Afɔ̃ Nyɔŋmɔ Shiwoo Lɛ Nɔ
15, 16. (a) Yɛ Yeremia 33:17, wiemɔ naa lɛ, mɛɛ gbɛnaa nitsulɔi Yehowa baahala kɛ? (b) Namɛi akɛbaawo nakai gbɛnaa nitsumɔhei lɛ, ni nɛɛgbɛ amɛbaasɔmɔ Yehowa yɛ?
15 Yehowa Nyɔŋmɔ kɛ osɔfoyeli ni ja lɛ hu baaha kɛfata Maŋtsɛyeli ni ewo he shi lɛ he. Ehaa wɔnaa hekɛnɔfɔɔ yɛ enɛ mli beni etsa nibii fɛɛ ni ewie kɛtsɔ hiɛ lɛ anɔ ekɛɛ: “Ejaakɛ bɔni Yehowa kɛɛ nɛ: Nuu ni aaata Israel we lɛ maŋtsɛsɛi lɛ nɔ ebɔŋ David. Asaŋ osɔfoi ni ji Levibii lɛ hu, nuu ni aaasha shaa-afɔlei, ni eeesha niyenii-afɔlei, ni eeegbe afɔlei gbi fɛɛ gbi yɛ mihiɛ ebɔŋ amɛ.”—Yer. 33:17, 18.
16 Belɛ ani eji hiɛdɔɔsane akɛ kɛjɛ beni akpata Yerusalem ni aku sɛɛ ama ekoŋŋ lɛ hiɛ yɛ afi 70 Ŋ.B mli lɛ sɔlemɔtsu diɛŋtsɛ ko bɛ shikpɔŋ nɔ kɛha Yehowa ni Levi akutso lɛ kɛ Mose nyɛminuu Aaron we lɛ mlinyo ni ale lɛ eko bɛ ni baasɔmɔ yɛ nakai sɔlemɔtsu lɛ mli? Dabida! Ejaakɛ amrɔ nɛɛ lɛ, Yehowa yɛ e-Sɔfonukpa kɛ osɔfoi bibii ni ji Yesu Kristo kɛ esɛɛnyiɛlɔi halamɔbii ni akɛ Nyɔŋmɔ mumɔ lɛ efɔ amɛ mu kɛha osɔfoyeli, mɛi ni akɛ blema Levi osɔfoi ni yɔɔ Israel lɛ fee amɛhe mfoniri lɛ. Ŋwɛi, heni Nyɔŋmɔ ta maŋtsɛsɛi nɔ yɛ lɛ ji mumɔŋ sɔlemɔtsu lɛ krɔŋkrɔŋ mli Hekrɔŋkrɔŋ, heni nɛkɛ osɔfoi nɛɛ sɔmɔ yɛ lɛ.—Heb. 9:24; 1 Pet. 2:9, 10.
17. Tamɔ bɔni wɔnyɛɛɛ wɔtsi shwane kɛ nyɔɔŋ naa lɛ, nakai nɔŋŋ wɔnyɛŋ wɔtsi Yehowa naa ni ekɛfee mɛni yɛ maŋtsɛyeli kɛ osɔfoyeli lɛ he?
17 Nohewɔ lɛ yɛ enɛɛmɛi fɛɛ mli lɛ, eka shi faŋŋ akɛ abaanyɛ akɛ he afɔ Nyɔŋmɔ shiiwooi lɛ anɔ ni wɔ hu wɔbaanyɛ wɔkɛ wɔhe afɔ enɔ lolo. Nyɛboa toi: “Bɔni Yehowa kɛɛ nɛ: Kɛji nyɛaaanyɛ mishwane he kpaŋmɔ kɛ minyɔɔŋ he kpaŋmɔ lɛ mli nyɛku, ni shwane kɛ nyɔɔŋ akaba yɛ amɛbe mli dɔŋŋ lɛ, no lɛ aaaku mikpaŋmɔ ni mikɛ mitsulɔ David ekpaŋ lɛ mli, ni enaŋ binuu ni aaata esɛi lɛ nɔ aye maŋtsɛ, kɛ nɔni mikɛ Levibii, osɔfoi ni ji misɔɔlɔi lɛ, ekpaŋ lɛ hu! Bɔni anyɛŋ akane ŋwɛi asafo lɛ, loo asusu ŋshɔ naa shia lɛ, nakai maha mitsulɔ David seshi lɛ afa, kɛ Levibii ni ji misɔɔlɔi lɛ hu.”—Yer. 33:20-22.
18. Yɛ Yeremia gbii lɛ asɛɛ lɛ, Yehowa hiɛ ekpaŋmɔ ni kɔɔ osɔfoyeli he lɛ mli kɛyashi mɛɛ be, ni kɛyashi namɔ baa mli?
18 Kɛji hulu lɛ aaafɔ̃ɔ kpɛmɔ yɛ shikpɔŋ lɛ nɔ ni shikpɔŋ nɛɛ afɔ̃ɔ shibɔlemɔ yɛ emaahe lɛ, belɛ Yehowa baaku ekpaŋmɔi ni kɔɔ David kɛ Levibii ahe lɛ mli. Nyɔŋmɔ Ofe lɛ ha David “seshi” lɛ shwere yɛ afii 600 ni nyiɛ sɛɛ kɛ nɔni fe nakai lɛ mli kɛbashi beni Naanɔ Gboshiniyelɔ, Yesu Kristo ni awo he shi lɛ ba. Mɔnɛ bafee mɔni osɔfonukpa Aaron fee ehe mfoniri kɛtsɔ hiɛ lɛ, ni lɛ nɔŋŋ ebatsɔ osɔfo ni ta eŋwɛi maŋtsɛsɛi nɔ tamɔ Melkizedek. (Lala 110:1-4; 1 Mose 14:18-20; Zak. 6:13; Heb. 6:20–7:3) Nohewɔ lɛ Yehowa eku oshrai ni baa Yerusalem kɛ esɔlemɔwe lɛ nɔ lɛ naa ni eha eshiiwooi lɛ miitsu nii.
19. Mɛni nibii ni tsuɔ ni daa yɛ wɔshikpɔŋ Iɛ he kɛji amɛfɔ̃ɔ nitsumɔ lɛ belɛ Yehowa Nyɔŋmɔ baaku ekpaŋmɔ ni ekɛ David fee kɛha naanɔ maŋtsɛyeli lɛ mli?
19 Akɛ nɔkwɛmɔnɔ lɛ, beni Babilon asraafoi ni yɔɔ Maŋtsɛ Nebukadnezar shishi lɛ woɔ Yerusalem he ka nɔni ji shii enyɔ lɛ, aŋma wiemɔi ni baa nɛɛ afɔ shi: “Ni Yehowa wiemɔ ba Yeremia ŋɔɔ akɛ: Ani onako nɔni maŋ nɛɛ wieɔ akɛ: Wekui enyɔ lɛ, ni Yehowa hala lɛ, ekwa amɛ! kɛ bɔni amɛgbeɔ mimaŋ lɛ he guɔ, akɛ amɛjeee jeŋmaŋ dɔŋŋ yɛ amɛhiɛ lɛ lo? Bɔni Yehowa kɛɛ nɛ: Kɛji mishwane kɛ nyɔɔŋ he kpaŋmɔ lɛ emaaa shi ni mitoko gbɛnai mihako ŋwɛi kɛ shikpɔŋ lɛ, no lɛ makwa Yakob seshi lɛ, kɛ mitsulɔ David nɔ̃ lɛ hu, ni miŋɔŋ eseshibii lɛ ateŋ mɛi komɛi miwoŋ amɛ Abraham kɛ Isak kɛ Yakob seshibii Iɛ anɔyelɔi; ejaakɛ makpale amɛ nomŋɔɔ lɛ kɛaaaba, ni mimusuŋ aaatsɔ mi yɛ amɛhe!”—Yer. 33:23-26.
20. Mɛni ba yɛ Yeremia be lɛ mli ni fee tamɔ nɔni Yehowa maŋtsɛyeli ko yen shikpɔŋ lɛ nɔ dɔŋŋ aloo ejamɔ ehiŋ shi dɔŋŋ lɛ?
20 Yɛ afi ni nyiɛ nakai gbalɛ lɛ sɛɛ mli lɛ, akumɔ Yerusalem abote mli ni akpata ehiɛ. Aŋɔ Yudafoi ni je mli lɛ nom ni atswa amɛteŋ mɛi babaoo naneshi tu kɛtee Babilon. Etamɔ nɔni Yehowa eshi “wekui enyɔ” ni ehala pɛŋ lɛ lɛɛlɛŋ. Shihilɛ lɛ bafee tamɔ nɔni hiɛnɔkamɔ ko bɛ he kɛha David maŋtsɛyeli seshibii aweku lɛ kɛ osɔfoi aweku ni jɛ Aaron, klɛŋklɛŋ Israel osɔfonukpa lɛ mli lɛ. Yɛ nɔni kɛ ŋwɛi kɛ shikpɔŋ Bɔlɔ lɛ wiemɔ ni ewie lɛ kpaaa gbee naa lɛ, etamɔ nɔni Yehowa eku ekpaŋmɔi ni kɔɔ maŋtsɛmɛi aweku kɛ osɔfoi aweku he lɛ mli. Nɔni he eba sane ji akɛ aleee kɛji Yehowa maŋtsɛyeli ko baaye shikpɔŋ lɛ nɔ ekoŋŋ aloo abaatsĩɛ enɔkwajamɔ lɛ hiɛ yɛ shikpɔŋ lɛ nɔ ekoŋŋ!
21. Te Yehowa tsɔɔ akɛ eyeɔ ekpaŋmɔi anɔ pɛpɛɛpɛ ni ehe ba sɛɛnamɔ eha Israelbii tɛɛŋ?
21 Shi kɛjɛ beni nakai eshara lɛ ba maŋ muu lɛ nɔ lɛ, shwane kɛ nyɔɔŋ kɛ ŋwɛi kɛ shikpɔŋ he akpɔi lɛ efɔ̃ko nitsumɔ. Nohewɔ lɛ, anyɛŋ akwɛ Bɔlɔ lɛ ni ekuko ekpɔi ni kɔɔ nakai jeŋ nibii ni wala bɛ amɛmli ahe lɛ gbɛ akɛ eku ekpaŋmɔi ni ekɛ ebɔɔnii ni yɔɔ jwɛŋmɔ lɛ fee kɛha emaŋtsɛyeli kɛ ejamɔ krɔŋŋ lɛ mli. Efeko nakai hu! Emusuŋ tsɔlɛ yɛ Abraham, Isak kɛ Yakob seshibii lɛ ahe. Yɛ amɛnomŋɔɔ afii 70 lɛ sɛɛ lɛ, abua amɛnaa ekoŋŋ kɛtee amɛjaku shikpɔŋ ni Nyɔŋmɔ eha amɛ lɛ nɔ.
22. Te Nyɔŋmɔ ye ekpaŋmɔ ni kɔɔ “jalɛ tsonine” lɛ he Iɛ nɔ eha ewebii ni akpɛlɛ amɛ kɛba lɛ tɛɛŋ, ni mɛni enɛ tsɔɔ yɛ Nyɔŋmɔ shiwoo he?
22 Mɛi ni akpale kɛba ekoŋŋ nɛɛ ji mɛi aŋɔɔ ni “jalɛ tsonine” ni ji Yesu Kristo lɛ ba afii ohai 19 ni eho nɛ. E-lá Odasefonyo gbele ni egbo yɛ afi 33 Ŋ.B. lɛ fiteko Nyɔŋmɔ kpaŋmɔ lɛ ejaakɛ Nyɔŋmɔ wo ehiɛ nyam yɛ ŋwɛi. Ekɛɛ yɛ jɛmɛ akɛ, “Mihiɛ kã kɛmiiya naanɔi anaanɔ.” (Kpoj. 1:18) Eje gbele mli ni eyɛ wala mli kɛbashi beni Yehowa wolɛ maŋtsɛ yɛ jeŋ nɔyeli ni awo he shi lɛ mli. Nyɔŋmɔ shi ni ewo yɛ enɛ he lɛ efee nɔni anyɛɔ akɛ he fɔɔ nɔ! a
[Shishigbɛ niŋmai]
a Ajie kɛjɛ December 1, 1979 Blɔfo Buu-Mɔɔ lɛ mli
[Mfoniri ni yɔɔ baafa 13]
Bɔni hulu teɔ shi daagbi Iɛ nakai pɛpɛɛpɛ Nyɔŋmɔ baaye eshiiwoo lɛ nɔ