Yeremia

32 Wiemɔ ni jɛ Yehowa ŋɔɔ ba Yeremia ŋɔɔ yɛ Yuda maŋtsɛ Zedekia nɔyeli afi ni ji 10 lɛ mli, ni ji Nebukadnezar* nɔyeli afi ni ji 18 lɛ mli lɛ nɛ.+ 2 Nakai beiaŋ lɛ, Babilon maŋtsɛ lɛ asraafoi lɛ ebawo Yerusalem he ka, ni asa gbalɔ Yeremia naa yɛ Bulɔi Akpo+ lɛ nɔ yɛ Yuda maŋtsɛ lɛ shĩa lɛ mli. 3 Ejaakɛ Yuda maŋtsɛ Zedekia sa Yeremia naa+ ekɛɛ, “Mɛni hewɔ ogbaa nɛkɛ gbalɛ? Okɛɔ akɛ, ‘Nɔ ni Yehowa kɛɛ nɛ: “Mikɛ maŋ nɛɛ baawo Babilon maŋtsɛ lɛ dɛŋ, ni ebaaye nɔ kunim,+ 4 ni Yuda maŋtsɛ Zedekia ejeŋ Kaldeabii lɛ adɛŋ, ejaakɛ bɔ fɛɛ bɔ ni fee lɛ, mikɛ lɛ baawo Babilon maŋtsɛ lɛ dɛŋ, ni ekɛ lɛ baawie hiɛ kɛ hiɛ ni ebaana lɛ kɛ ehiŋmɛii.”’+ 5 ‘Ekɛ Zedekia baaya Babilon, ni ebaahi jɛmɛ aahu kɛyashi magbala mijwɛŋmɔ kɛba enɔ,’ Yehowa kɛɛ. ‘Eyɛ mli akɛ nyɛkɛ Kaldeabii lɛ baawu aahu moŋ, shi nyɛyeŋ kunim.’”+

6 Yeremia kɛɛ akɛ: “Yehowa wiemɔ eba miŋɔɔ akɛ, 7 ‘Naa, Hanamel, ni ji otsɛkwɛ̃ Shalum* binuu lɛ baaba oŋɔɔ ni ebakɛɛ akɛ: “Okɛ shika ahé mishikpɔŋ ni yɔɔ Anatot+ lɛ, ejaakɛ bo oyɔɔ hegbɛ klɛŋklɛŋ akɛ okpɔ̃ɔ ni ohéɔ.”’”+

8 Hanamel, mitsɛkwɛ̃ lɛ binuu lɛ ba miŋɔɔ yɛ Bulɔi Akpo lɛ nɔ tamɔ bɔ ni Yehowa ewie lɛ, ni ekɛɛ mi akɛ: “Ofainɛ okɛ shika ahé mishikpɔŋ ni yɔɔ Anatot yɛ Benyamin shikpɔŋ lɛ nɔ lɛ, ejaakɛ bo oyɔɔ hegbɛ akɛ oŋɔɔ shikpɔŋ lɛ ni okpɔ̃ɔ. Hemɔ ohã ohe.” Kɛkɛ ni mina akɛ Yehowa wiemɔ lɛ naa eba lɛ nakai.

9 No hewɔ lɛ, mihé shikpɔŋ ni yɔɔ Anatot lɛ yɛ mitsɛkwɛ̃ binuu Hanamel dɛŋ. Miŋmɛ shika+ lɛ mihã lɛ, shika lɛ naa shiɔ shekeli* kpawo kɛ jwiɛtɛi kapɛji nyɔŋma. 10 Kɛkɛ ni miŋma miwo kpaŋmɔ wolo+ mli, ni misɔo naa, ni mitsɛ odasefoi ni amɛbaye he odase,+ ni miŋmɛ shika lɛ yɛ nsɛnii mli. 11 Kɛkɛ ni mikɔ shikpɔŋhemɔ he kpaŋmɔ wolo lɛ, nɔ ni asɔo naa yɛ bɔ ni kitã lɛ kɛ mla lɛ biɔ ni afee lɛ naa lɛ, kɛ nɔ ni asɔoko naa lɛ, 12 ni mikɛ shikpɔŋhemɔ he kpaŋmɔ wolo lɛ hã Baruk,+ Mahseia binuu Neria+ binuu lɛ yɛ mitsɛkwɛ̃ binuu Hanamel, kɛ odasefoi ni ŋmala shikpɔŋhemɔ he kpaŋmɔ wolo lɛ nɔ nii lɛ, kɛ Yudafoi fɛɛ ni tara shi yɛ Bulɔi Akpo+ lɛ nɔ lɛ ahiɛ.

13 Kɛkɛ ni mifã Baruk yɛ amɛhiɛ akɛ: 14 “Nɔ ni Yehowa, taiatsɛ lɛ, Israel Nyɔŋmɔ lɛ kɛɛ nɛ, ‘Hemɔ kpaŋmɔ woji nɛɛ, shikpɔŋhemɔ he kpaŋmɔ woji nɛɛ, nɔ ni asɔo naa lɛ kɛ nɔ ni asɔoko naa lɛ, ni okɛwo gbɛ́ mli koni amɛtsɛ.’ 15 Ejaakɛ nɔ ni Yehowa, taiatsɛ lɛ, Israel Nyɔŋmɔ lɛ kɛɛ nɛ, ‘Abaahé shĩai kɛ shikpɔji kɛ wain ŋmɔji ekoŋŋ yɛ shikpɔŋ nɛɛ nɔ.’”+

16 Ni be ni mikɛ shikpɔŋhemɔ he kpaŋmɔ wolo lɛ hã Baruk, Neria binuu lɛ sɛɛ lɛ, misɔle mihã Yehowa akɛ: 17 “Ao, Nuŋtsɔ Ofe Yehowa! Naa! Bo okɛ ohewalɛ kpele lɛ kɛ onine ni okpã mli lɛ fee ŋwɛi kɛ shikpɔŋ lɛ.+ Nɔ ko nɔ ko bɛ ni onyɛɛɛ ofee, 18 ojieɔ suɔmɔ ni tsakeee kpo otsɔɔ mɛi akpei abɔ, shi owoɔ tsɛmɛi atɔmɔ he nyɔmɔ kɛyashiɔ amɛbii ni baa yɛ amɛsɛɛ lɛ anɔ,*+ bo ji anɔkwa Nyɔŋmɔ lɛ, Nyɔŋmɔ kpeteŋkpele kɛ hewalɔ ni gbɛ́i ji Yehowa, taiatsɛ lɛ. 19 Oŋaawoo nɔ bɛ* ni onitsumɔi hu dara,+ bo mɔ ni ohiŋmɛii naa gbɔmɛi agbɛi fɛɛ,+ koni ohã mɔ fɛɛ mɔ nɔ ni sa egbɛi lɛ kɛ enifeemɔi lɛ.+ 20 Ofee okadii kɛ naakpɛɛ nii yɛ Ejipt shikpɔŋ lɛ nɔ, ni ale enɛ kɛbashi ŋmɛnɛ gbi nɛɛ, ni no hewɔ lɛ, ofee gbɛ́i ohã ohe yɛ Israel kɛ adesai ateŋ,+ tamɔ bɔ ni eji ŋmɛnɛ lɛ. 21 Ni okɛ okadii kɛ naakpɛɛ nii, kɛ nineshiwalɛ, kɛ nine ni akpã mli, kɛ nifeemɔi ni yɔɔ gbeyei jie omaŋ Israel kɛje Ejipt shikpɔŋ lɛ nɔ.+

22 “Ni sɛɛ mli lɛ, okɛ shikpɔŋ nɛɛ ni okã kitã akɛ okɛbaahã amɛtsɛmɛi lɛ hã amɛ,+ shikpɔŋ ni mliki kɛ wo hoɔ yɛ nɔ lɛ.+ 23 Ni amɛba ni amɛbaŋɔ, shi amɛbooo ogbee toi, ni amɛnyiɛɛɛ yɛ omla lɛ mli hu. Nibii fɛɛ ni owo amɛ kitã akɛ amɛfee lɛ, amɛfeee ekome folo, no hewɔ ni ohã nɛkɛ saji fɔji nɛɛ fɛɛ ba amɛnɔ lɛ.+ 24 Naa! Hii kɛ nibii eba koni amɛbatswa kpokui amɛwo maŋ lɛ he koni amɛŋɔ maŋ lɛ,+ ni klante,+ kɛ hɔmɔ, kɛ tsɛŋemɔ hela ni gbeɔ mɔ+ hewɔ lɛ, bɔ fɛɛ bɔ ni fee lɛ, akɛ maŋ lɛ baawo Kaldeabii ni wuɔ amɛshiɔ maŋ lɛ adɛŋ; nɔ ni owie lɛ fɛɛ eba mli tamɔ bɔ ni onaa amrɔ nɛɛ. 25 Shi, Ao Nuŋtsɔ Ofe Yehowa, okɛɛ mi akɛ, ‘Okɛ shika ahé shikpɔŋ lɛ, ni otsɛ odasefoi ni amɛbaye he odase,’ tsɛbelɛ bɔ fɛɛ bɔ ni fee lɛ, akɛ maŋ lɛ baawo Kaldeabii lɛ adɛŋ.”

26 Kɛkɛ ni Yehowa kɛɛ Yeremia* akɛ: 27 “Naa, miji Yehowa, adesai* fɛɛ a-Nyɔŋmɔ lɛ. Ani nɔ ko yɛ ni minyɛŋ mafee? 28 No hewɔ lɛ, nɔ ni Yehowa kɛɛ nɛ, ‘Naa, mikɛ maŋ nɛɛ miiwo Kaldeabii lɛ kɛ Babilon maŋtsɛ Nebukadnezar* dɛŋ, ni ebaaŋɔ maŋ lɛ.+ 29 Ni Kaldeabii ni miiwu amɛmiishi maŋ nɛɛ baabote mli ni amɛbaawo maŋ nɛɛ mli la ni amɛbaashã maŋ lɛ+ kɛ shĩai ni maŋbii lɛ shãa afɔlei yɛ amɛyiteŋ amɛhãa Baal ni amɛfɔseɔ dãa afɔlei amɛshwieɔ shi amɛhãa nyɔŋmɔi krokomɛi koni amɛkɛwo mimli la lɛ.’+

30 “‘Ejaakɛ Israelbii lɛ kɛ Yudabii lɛ, efɔŋ sɔŋŋ kɛkɛ amɛfeɔ yɛ mihiɛ, kɛjɛ amɛgbekɛbiiashi tɔ̃ɔ;+ Israelbii lɛ yaa nɔ amɛkɛ amɛninenaa nitsumɔ woɔ mimli la,’ Yehowa kɛɛ. 31 ‘Ejaakɛ nɛkɛ maŋ nɛɛ, kɛjɛ gbi ni ato kɛbashi ŋmɛnɛ gbi nɛɛ, mlifu kɛ mlila sɔŋŋ kɛkɛ ewoɔ mi,+ no hewɔ lɛ, esa akɛ ajie lɛ kɛje mihiɛ,+ 32 yɛ efɔŋ fɛɛ ni Israelbii lɛ kɛ Yudabii lɛ efee koni amɛkɛwo mimli la lɛ hewɔ—amɛ, kɛ amɛmaŋtsɛmɛi lɛ,+ kɛ amɛlumɛi lɛ,+ kɛ amɛsɔfoi lɛ, kɛ amɛgbalɔi lɛ,+ kɛ Yuda hii lɛ, kɛ mɛi ni yɔɔ Yerusalem lɛ. 33 Amɛtee nɔ amɛtsɔ amɛsɛɛ amɛhã mi, jeee amɛhiɛ;+ eyɛ mli akɛ mibɔ mɔdɛŋ koni matsɔɔ amɛ nii daa kɛ daa* moŋ, shi amɛteŋ mɔ ko mɔ ko booo toi koni ená tsɔsemɔ.+ 34 Ni amɛkɛ amɛmagai ni yɔɔ nyaŋemɔ lɛ bamamɔ shĩa ni migbɛ́i kã nɔ lɛ mli koni amɛkɛbule lɛ.+ 35 Agbɛnɛ hu, amɛmamɔ Baal hei grɔŋŋi lɛ yɛ Hinom Binuu Lɛ Jɔɔ*+ lɛ mli koni amɛhã amɛbihii kɛ amɛbiyei atsɔ la mli amɛhã Molek,+ nɔ ko ni miwoko amɛ kitã yɛ he,+ ni ebako mitsui mli pɛŋ* akɛ mafee nyaŋemɔ nii ni tamɔ nɛkɛ, ni no hã Yuda fee esha.’

36 “No hewɔ lɛ, nɔ ni Yehowa, Israel Nyɔŋmɔ lɛ kɛɔ yɛ maŋ nɛɛ ni nyɛkɛɔ akɛ abaatsɔ klante, kɛ hɔmɔ, kɛ tsɛŋemɔ hela ni gbeɔ mɔ nɔ akɛwo Babilon maŋtsɛ lɛ dɛŋ lɛ he nɛ, 37 ‘Naa, mabua amɛnaa kɛjɛ shikpɔji fɛɛ ni mishwie amɛ kɛtee nɔ yɛ mimlifu, kɛ mimlila, kɛ migirimɔ lɛ mli lɛ anɔ,+ ni mikɛ amɛ baaku sɛɛ kɛba biɛ, ni mahã amɛhi shi ni sane fɔŋ ko baaa amɛnɔ.+ 38 Ni amɛbaatsɔ mimaŋ, ni mi hu matsɔ amɛ-Nyɔŋmɔ.+ 39 Ni mahã amɛ tsui kome+ kɛ gbɛ kome koni amɛshe mi gbeyei be fɛɛ be koni ahi ahã amɛ ni ahi ahã amɛbii hu ni baaba yɛ amɛsɛɛ lɛ.+ 40 Ni mikɛ amɛ baakpaŋ naanɔ kpaŋmɔ,+ ni mikpaŋ amɛ ekpakpafeemɔ;+ ni mikɛ mihe gbeyeishemɔ baawo amɛtsuii amli koni amɛkakpa misɛɛnyiɛmɔ.+ 41 Manya amɛhe koni mafee amɛ ekpakpa,+ ni mikɛ mitsui fɛɛ kɛ misusuma* fɛɛ baadu amɛ koni amɛmɔ shi yɛ shikpɔŋ nɛɛ nɔ.’”+

42 “Ejaakɛ nɔ ni Yehowa kɛɛ nɛ, ‘Bɔ ni mikɛ saji fɔji kpelei nɛɛ eba maŋ nɛɛ nɔ lɛ, nakai nɔŋŋ mikɛ ekpakpa* fɛɛ ni miiwo amɛ shi yɛ he lɛ baaba amɛnɔ.+ 43 Eyɛ mli akɛ nyɛkɛɔ akɛ: “Eji shikpɔŋ ni akɛfeee nɔ ko ni gbɔmɛi kɛ kooloi bɛ nɔ, ni akɛwo Kaldeabii lɛ adɛŋ” moŋ, shi abaahé shikpɔji yɛ shikpɔŋ nɛɛ nɔ ekoŋŋ.’+

44 “‘Akɛ shika baahé shikpɔji, abaafee shikpɔŋhemɔ he kpaŋmɔ woji ni abaasɔo naa, ni abaatsɛ odasefoi ni amɛbaye he odase yɛ Benyamin shikpɔŋ lɛ nɔ,+ yɛ hei ni bɔle Yerusalem lɛ, yɛ Yuda maji lɛ amli,+ yɛ maji ni yɔɔ gɔji lɛ anɔ lɛ amli, yɛ maji ni yɔɔ jɔi lɛ amli lɛ amli,+ kɛ wuoyigbɛ maji lɛ amli, ejaakɛ mikɛ mɛi ni aŋɔ amɛ nom lɛ baaku sɛɛ aba,’+ Yehowa kɛɛ.”