Ezekiel
9 Kɛkɛ ni ebolɔ yɛ mitoiiaŋ kɛ gbee ni wa akɛ: “Nyɛtsɛa mɛi ni baagbala maŋ lɛ toi lɛ kɛbaa, amɛteŋ mɔ fɛɛ mɔ ahiɛ edade ni ekɛbaakpãtã nii ahiɛ lɛ yɛ edɛŋ!”
2 Mina hii ekpaa miijɛ ŋwɛigbɛ agbó+ ni hiɛ kwɛɔ kooyigbɛ lɛ naa gbɛ kɛmiiba, amɛteŋ mɔ fɛɛ mɔ hiɛ dade ni ekɛbaajwara nii yɛ edɛŋ; ni nuu kome fata amɛhe* ni wo klala atade, ni woloŋmalɔ iŋki tɔ* ŋmɔ ehɛ, ni amɛbote mli ni amɛbadamɔ akɔɔble afɔleshaa latɛ lɛ masɛi.+
3 Kɛkɛ ni Israel Nyɔŋmɔ lɛ anunyam+ lɛ wó ehe nɔ kɛje he ni eyɔɔ yɛ kerubim lɛ ayiteŋ ni etee shĩa lɛ shinaa lɛ shi,+ ni ebɔi mɔ ni wo klala atade ni woloŋmalɔ iŋki tɔ ŋmɔ ehɛ lɛ tsɛmɔ. 4 Yehowa kɛɛ lɛ akɛ: “Yaakpa maŋ lɛ mli, yaakpa Yerusalem, ni okadi hii ni miikɛ̃mɔ ni amɛmiiye ŋkɔmɔ+ yɛ nyaŋemɔ nibii fɛɛ ni afeɔ yɛ maŋ lɛ mli lɛ ahewɔ lɛ ahiɛnaa.”+
5 Shi mɛi krokomɛi lɛ, ekɛɛ amɛ yɛ mitoiiaŋ akɛ: “Nyɛnyiɛa esɛɛ kɛkpaa maŋ lɛ mli, ni nyɛtswiaa mɛi nii. Nyɛhiŋmɛi akanaa mɔbɔ, ni nyɛmusuŋ hu akashãa nyɛ.+ 6 Nyɛgbea amɛ butuu, nuumo jio, oblanyo jio, oblayoo fro jio, gbekɛ bibioo jio, yei jio.+ Shi mɔ fɛɛ mɔ* ni okadi lɛ yɔɔ ehiɛnaa lɛ, nyɛkabɛŋkɛa lɛ.+ Nyɛjea shishi kɛjɛa mijamɔhe lɛ.”+ No hewɔ lɛ, amɛje shishi kɛjɛ onukpai ni yɔɔ shĩa lɛ hiɛ lɛ anɔ.+ 7 Kɛkɛ ni ekɛɛ amɛ akɛ: “Nyɛbulea shĩa lɛ, ni nyɛkɛ mɛi ni agbe lɛ awoa kpoi lɛ anɔ obɔbɔ.+ Nyɛyaa!” No hewɔ lɛ, amɛje kpo ni amɛyatswia mɛi nii yɛ maŋ lɛ mli ni amɛgbe amɛ.
8 Be ni amɛtswiaa mɛi lɛ nii ni amɛgbeɔ amɛ lɛ, eshwɛ mikome too, ni mikɛ mihiɛ bu shi ni mibolɔ akɛ: “Ao Nuŋtsɔ Ofe Yehowa! Ani obaakpãtã Israelbii lɛ ateŋ mɛi ni eshwɛ lɛ fɛɛ ahiɛ be ni ofɔseɔ omlila lɛ oshwieɔ Yerusalem nɔ lɛ?”+
9 No hewɔ lɛ, ekɛɛ mi akɛ: “Esha ni Israel kɛ Yuda shĩa lɛ efee lɛ da waa diɛŋtsɛ.+ Lashishwiemɔ eyi shikpɔŋ lɛ nɔ obɔ,+ ni efɔŋ eyi maŋ lɛ mli obɔ.+ Ejaakɛ amɛkɛɔ akɛ, ‘Yehowa eshi shikpɔŋ lɛ, ni Yehowa enaaa.’+ 10 Shi mi lɛ, mihiŋmɛi enaŋ mɔbɔ; ni mimusuŋ hu eshãŋ mi.+ Mikɛ nɔ ni baajɛ amɛgbɛi lɛ amli kɛba lɛ baaba amɛ diɛŋtsɛ amɛnɔ.”*
11 Ni naa, nuu ni wo klala atade ni iŋki tɔ ŋmɔ ehɛ lɛ kɛ wiemɔ ku esɛɛ kɛba ebakɛɛ akɛ: “Mifee bɔ ni ofã mi lɛ pɛpɛɛpɛ.”