Yoshua
1 Yehowa tsulɔ Mose gbele sɛɛ lɛ, Yehowa kɛɛ Yoshua,*+ Nun binuu lɛ, ni ji Mose sɔɔlɔ+ lɛ akɛ: 2 “Mitsulɔ Mose egbo.+ Agbɛnɛ tee shi, foo Yordan lɛ, bo kɛ maŋ nɛɛ fɛɛ, ni nyɛya shikpɔŋ ni mikɛhãa amɛ, ni ji Israelbii lɛ nɔ.+ 3 Mikɛ he fɛɛ he ni okɛ onane baama lɛ baahã bo, tamɔ bɔ ni miwo Mose shi lɛ.+ 4 Nyɛhusu lɛ baajɛ ŋa lɛ nɔ kɛyashi Lebanon, kɛ agbɛnɛ hu, kɛyashi faa wulu lɛ, ni ji Yufrate lɛ naa—Hitbii+ lɛ ashikpɔŋ lɛ fɛɛ—kɛ agbɛnɛ hu, kɛyashi Ŋshɔ Wulu* lɛ naa yɛ anaigbɛ.*+ 5 Mɔ ko mɔ ko nyɛŋ ohiɛ adamɔ owala gbii abɔ fɛɛ.+ Bɔ ni mikɛ Mose hi shi lɛ, nakai nɔŋŋ mikɛ bo hu baahi shi.+ Mishiŋ bo, ni mikwaŋ bo hu.+ 6 Feemɔ ekãa, ni owaje ohe,+ ejaakɛ bo ji mɔ ni baahã maŋ nɛɛ nine ashɛ shikpɔŋ ni mikã amɛtsɛmɛi lɛ kitã akɛ mikɛbaahã amɛ lɛ nɔ.+
7 “Feemɔ ekãa, ni owaje ohe waa kɛkɛ, ni oye Mla muu lɛ fɛɛ ni mitsulɔ Mose wo bo lɛ nɔ jogbaŋŋ. Kaaje he kɛmiiya ninejurɔ loo abɛku,+ koni ofee onii yɛ hiɛshikamɔ mli yɛ he fɛɛ he ni obaaya.+ 8 Mla wolo nɛɛ mli wiemɔi lɛ akakpa yɛ odaaŋ,+ jetsɛremɔ kɛ jenamɔ fɛɛ lɛ, kanemɔ ni ojwɛŋ nɔ,* bɔ ni afee ni oye nɔ fɛɛ nɔ ni aŋma yɛ mli lɛ nɔ jogbaŋŋ;+ ejaakɛ no baahã oye omanye yɛ ogbɛ nɔ, ni obaafee onii yɛ hiɛshikamɔ mli.+ 9 Ani jeee mi mifã bo? Feemɔ ekãa, ni owaje ohe. Otsui akafã, ni kaashe gbeyei hu, ejaakɛ he fɛɛ he ni oyaa lɛ, Yehowa, o-Nyɔŋmɔ lɛ, kɛ bo yɛ.”+
10 Ni Yoshua fã maŋ lɛ nɔkwɛlɔi lɛ akɛ: 11 “Nyɛkpaa nsara lɛ mli fɛɛ ni nyɛfãa maŋbii lɛ akɛ, ‘Nyɛtaoa niyenii nyɛtoa, ejaakɛ biɛ gbii etɛ lɛ, nyɛbaafo Yordan lɛ ní nyɛya nyɛyaŋɔ shikpɔŋ ni Yehowa, nyɛ-Nyɔŋmɔ lɛ, kɛhãa nyɛ akɛ nyɛnɔ lɛ.’”+
12 Ni Yoshua kɛɛ Rubenbii lɛ kɛ Gadbii lɛ kɛ Manase weku lɛ fã lɛ akɛ: 13 “Nyɛkaia famɔ ni Yehowa tsulɔ Mose fã nyɛ lɛ, akɛ:+ ‘Yehowa, nyɛ-Nyɔŋmɔ lɛ, baahã nyɛná hejɔlɛ, ni ekɛ shikpɔŋ nɛɛ ehã nyɛ. 14 Nyɛŋamɛi kɛ nyɛbii kɛ nyɛkooloi lɛ baahi shikpɔŋ ni Mose kɛhã nyɛ yɛ Yordan lɛ afã nɛɛ* nɔ,+ shi nyɛ mɛi fɛɛ ni nyɛji tawulɔi kãkãlɔi lɛ,+ nyɛbuaa nyɛhe naa kɛhã ta, ni nyɛnyiɛa nyɛnyɛmimɛi lɛ ahiɛ kɛfoa faa lɛ.+ Nyɛyea nyɛbuaa amɛ 15 kɛyashi Yehowa baahã nyɛnyɛmimɛi lɛ aná hejɔlɛ, tamɔ bɔ ni efee ehã nyɛ lɛ, ni amɛ hu amɛbaaŋɔ shikpɔŋ ni Yehowa, nyɛ-Nyɔŋmɔ lɛ, kɛhãa amɛ lɛ. No sɛɛ lɛ, nyɛkua nyɛsɛɛ kɛbaa shikpɔŋ ni akɛhã nyɛ akɛ nyɛhi nɔ lɛ nɔ, koni etsɔ nyɛnɔ, shikpɔŋ ni Yehowa tsulɔ Mose kɛhã nyɛ yɛ Yordan lɛ bokãgbɛ lɛ.’”+
16 Amɛhã Yoshua hetoo akɛ: “Wɔbaafee nɔ fɛɛ nɔ ni ofãa wɔ lɛ, ni he fɛɛ he ni obaatsu wɔ lɛ, wɔbaaya.+ 17 Bɔ ni wɔbo nɔ fɛɛ nɔ ni Mose kɛɛ lɛ toi lɛ, nakai nɔŋŋ wɔbaabo bo hu toi. Yehowa, o-Nyɔŋmɔ lɛ, kɛ bo ahi shi kɛkɛ, tamɔ bɔ ni ekɛ Mose hi shi lɛ.+ 18 Mɔ fɛɛ mɔ ni baatse ofamɔ hiɛ atua, ni ebooo famɔ fɛɛ famɔ ni okɛbaahã lɛ lɛ toi lɛ, abaagbe lɛ.+ Feemɔ ekãa ni owaje ohe kɛkɛ.”+