4 Mose

16 Ni Kora,+ ni ji Levi binuu+ Kohat binuu+ Izehar binuu+ lɛ te shi, lɛ kɛ Datan kɛ Abiram, ni ji Eliab bihii+ lɛ, kɛ On, Pelet binuu lɛ ní amɛjɛ Rubenbii+ lɛ ateŋ lɛ. 2 Amɛte shi amɛwo Mose, amɛ kɛ Israel hii 250 ni ji maŋ lɛ mli onukpai, mɛi ni ahala amɛ yɛ asafo lɛ mli, hiɛnaanɔbii. 3 No hewɔ lɛ, amɛfee ekome amɛwo+ Mose kɛ Aaron ni amɛkɛɛ amɛ akɛ: “Nyɛmiifee nɔ ko tsɔ! Asafo muu lɛ fɛɛ yɛ krɔŋkrɔŋ,+ amɛ fɛɛ, ni Yehowa yɛ amɛteŋ.+ Belɛ, mɛni hewɔ nyɛwóɔ nyɛhe nɔ yɛ Yehowa asafo lɛ nɔ lɛ?”

4 Be ni Mose nu enɛ lɛ, amrɔ nɔŋŋ lɛ ekɛ ehiɛ bu shi. 5 Kɛkɛ ni ekɛɛ Kora kɛ esɛɛfilɔi lɛ fɛɛ akɛ: “Wɔ́ leebi lɛ, Yehowa baahã ale mɔ ni ji enɔ+ kɛ mɔ ni yɔɔ krɔŋkrɔŋ kɛ mɔ ni sa akɛ ebɛŋkɛ lɛ,+ ni mɔ ni ebaahala lɛ,+ lɛ ebaahã ebɛŋkɛ lɛ. 6 Nyɛfea enɛ: Kora, bo kɛ osɛɛfilɔi lɛ fɛɛ,+ nyɛŋɔa lajeenii,+ 7 ni nyɛkɛ la awoa mli ni nyɛkɛ tsofa-kɛ-ŋma ashwiea nɔ kɛbaa Yehowa hiɛ wɔ́, ni nuu ni Yehowa baahala lɛ,+ lɛ ji mɔ krɔŋkrɔŋ. Nyɛ Levi bihii,+ nyɛtee shɔŋŋ tsɔ!”

8 Kɛkɛ ni Mose kɛɛ Kora akɛ: “Nyɛ Levi bihii, nyɛfainɛ, nyɛboa toi. 9 Ani nyɛsusuɔ akɛ eji nɔ ko bibioo akɛ Israel Nyɔŋmɔ lɛ tse nyɛ kɛje Israel maŋ lɛ he,+ ni eŋmɛ nyɛ gbɛ koni nyɛbɛŋkɛ lɛ ní nyɛsɔmɔ yɛ Yehowa sɔlemɔ buu lɛ mli, ní nyɛdamɔ maŋ muu lɛ fɛɛ hiɛ nyɛsɔmɔ amɛ,+ 10 ni akɛ, eŋɔ bo kɛ onyɛmimɛi lɛ fɛɛ, ni ji Levi bihii lɛ kɛba eŋɔɔ? Ani esa akɛ nyɛpele osɔfoyeli lɛ hu he?+ 11 Enɛ hewɔ lɛ, bo kɛ osɛɛfilɔi lɛ fɛɛ ni nyɛmiibua nyɛhe naa lɛ, nyɛmiite shi kɛmiiwo Yehowa. Shi Aaron lɛ, namɔ ji lɛ ni nyɛwieɔ huhuuhu nyɛshiɔ lɛ?”+

12 Sɛɛ mli lɛ, Mose tsu akɛ ayatsɛ Datan kɛ Abiram,+ Eliab bihii lɛ kɛba, shi amɛkɛɛ: “Wɔbaaa he ko he ko! 13 Ani eji nɔ ko bibioo akɛ ojie wɔ kɛje shikpɔŋ ni mliki kɛ wo hoɔ yɛ nɔ lɛ nɔ koni obagbe wɔ yɛ ŋa lɛ nɔ?+ Agbɛnɛ hu, ani ootao owó ohe nɔyelɔ yɛ wɔnɔ, mɔ ni kɛjɛ lɛ esɛɛ lɛ mɔ ko bɛ dɔŋŋ?* 14 Kɛbashi bianɛ lɛ, okɛ wɔ eyako shikpɔŋ ko ni mliki kɛ wo hoɔ yɛ nɔ lɛ nɔ,+ ni ohãko wɔ shikpɔŋ kɛ wain ŋmɔ ko hu akɛ gboshinii. Ani obaafamɔ hii nɛɛ ahiŋmɛii? Wɔbaaa he ko he ko!”

15 No hewɔ lɛ, Mose mli fu waa ni ekɛɛ Yehowa akɛ: “Kaatsɔ ohe okwɛ amɛŋmaa afɔle lɛ. Miheko teji kome po yɛ amɛdɛŋ, ni miyeko amɛteŋ mɔ ko awui hu.”+

16 Ni Mose kɛɛ Kora akɛ: “Wɔ́ lɛ, bo kɛ osɛɛfilɔi lɛ fɛɛ aba Yehowa hiɛ, bo kɛ amɛ kɛ Aaron fɛɛ. 17 Mɔ fɛɛ mɔ aŋɔ elajeenii ni ekɛ tsofa-kɛ-ŋma ashwie nɔ, ni mɔ fɛɛ mɔ kɛ elajeenii aba Yehowa hiɛ, lajeenii 250, ni bo kɛ Aaron hu, nyɛteŋ mɔ fɛɛ mɔ kɛ elajeenii aba.” 18 No hewɔ lɛ, amɛteŋ mɔ fɛɛ mɔ ŋɔ elajeenii, ni amɛkɛ la kɛ tsofa-kɛ-ŋma shwie nɔ, ni amɛbadamɔ kpee buu lɛ shinaa lɛ naa, amɛ kɛ Mose kɛ Aaron. 19 Be ni Kora ebua esɛɛfilɔi lɛ anaa+ ewo amɛ yɛ kpee buu lɛ shinaa lɛ naa lɛ, Yehowa anunyam lɛ pue yɛ maŋ muu lɛ fɛɛ hiɛ.+

20 Agbɛnɛ, Yehowa kɛɛ Mose kɛ Aaron akɛ: 21 “Nyɛtsea nyɛhe kɛjea kuu nɛɛ he, koni makpãtã amɛhiɛ hiŋmɛitswaa.”+ 22 Kɛkɛ ni amɛkɛ amɛhiɛ bumɔ shi, ni amɛkɛɛ: “Ao Nyɔŋmɔ, gbɔmɛi fɛɛ amumɔ* Nyɔŋmɔ,+ ani gbɔmɔ kome he esha baahã omli awo la awo maŋ muu lɛ fɛɛ?”+

23 Ni Yehowa kɛɛ Mose akɛ: 24 “Okɛ maŋ lɛ awie ni okɛɛ amɛ akɛ, ‘Nyɛjea Kora kɛ Datan kɛ Abiram mama tsũi lɛ ahe!’”+

25 Kɛkɛ ni Mose te shi ni etee Datan kɛ Abiram ŋɔɔ, ni Israel onukpai+ lɛ kɛ lɛ tee. 26 Ekɛɛ maŋ lɛ akɛ: “Nyɛfainɛ, nyɛtsia nyɛhe kɛjea nɛkɛ hii fɔji nɛɛ amama tsũi lɛ ahe, ni nyɛkataa amɛ nɔ ko nɔ ko he, koni akabɛɛ nyɛ ashwie yɛ amɛhe eshai lɛ fɛɛ ahewɔ.” 27 Amrɔ nɔŋŋ lɛ, amɛtsi amɛhe kɛje Kora kɛ Datan kɛ Abiram mama tsũi lɛ ahe, amɛshi mama tsũi lɛ ahewɔ fɛɛ, ni Datan kɛ Abiram je kpo ni amɛbadamɔ amɛmama tsũi lɛ shinai lɛ anaa, amɛ kɛ amɛŋamɛi kɛ amɛbii kɛ amɛbii bibii lɛ.

28 Ni Mose kɛɛ akɛ: “Enɛ nyɛkɛbaale akɛ Yehowa ni tsu mi koni mibafee nibii nɛɛ fɛɛ, ni akɛ, jeee mi diɛŋtsɛ mito miyiŋ mifee: 29 Kɛji gbɔmɛi nɛɛ gboi tamɔ bɔ ni mɛi fɛɛ gboiɔ, ni amɛtoigbalamɔ lɛ tamɔ gbɔmɛi fɛɛ atoigbalamɔ lɛ, belɛ jeee Yehowa tsu mi.+ 30 Shi kɛji Yehowa fee amɛ nɔ ko srɔto ko, ni shikpɔŋ lɛ gbele enaa* ni emi amɛ kɛ nɔ fɛɛ nɔ ni amɛyɔɔ, ni amɛtee Gbonyobu* lɛ mli hiɛkãalɔi lɛ, nyɛbaaná nyɛle lɛɛlɛŋ akɛ gbɔmɛi nɛɛ kɛ amɛnifeemɔ tsɔɔ akɛ amɛbuuu Yehowa.”

31 Be ni ewie wiemɔi nɛɛ egbe naa nɔŋŋ pɛ lɛ, shikpɔŋ ni amɛdamɔ nɔ lɛ mli gbá.+ 32 Ni shikpɔŋ lɛ gbele enaa* ni emi amɛ, amɛ kɛ amɛshĩabii lɛ kɛ mɔ fɛɛ mɔ ni ji Kora+ nɔ, kɛ amɛnibii fɛɛ. 33 No hewɔ lɛ, amɛ kɛ mɛi fɛɛ ni ji amɛnii lɛ kpeleke shi kɛtee Gbonyobu* lɛ mli hiɛkãalɔi, ni shikpɔŋ lɛ ha amɛnɔ, ni amɛhiɛ kpãtã kɛje asafo lɛ teŋ.+ 34 Israelbii lɛ fɛɛ ni bɔle amɛ lɛ wó foi yɛ amɛbolɔmɔ lɛ hewɔ, ejaakɛ amɛkɛɛ: “Wɔmiishe gbeyei akɛ shikpɔŋ lɛ baami wɔ hu!” 35 Ni la jɛ Yehowa ŋɔɔ+ ebashã hii 250 ni kɛ tsofa-kɛ-ŋma lɛ ba lɛ wɛlɛŋŋ.+

36 Agbɛnɛ Yehowa kɛɛ Mose akɛ: 37 “Kɛɛmɔ Eleazar, osɔfo Aaron binuu lɛ akɛ, ejie lajeenii+ lɛ kɛje la lɛ mli, ejaakɛ amɛyɛ krɔŋkrɔŋ. Agbɛnɛ hu, kɛɛmɔ lɛ ni egbɛ la lɛ kɛya sɛɛ. 38 Hii ni fee esha ni hã amɛwala ŋmɛɛ amɛ* lɛ alajeenii lɛ, atswia lɛ fɛtɛfɛtɛ, ní akɛha afɔleshaa latɛ lɛ he,+ ejaakɛ amɛkɛba Yehowa hiɛ, ni ebatsɔ krɔŋkrɔŋ. Nibii nɛɛ atsɔ okadi ahã Israelbii lɛ.”+ 39 No hewɔ lɛ, osɔfo Eleazar ŋɔ akɔɔble lajeenii ni mɛi ni la lɛ shã amɛ lɛ kɛba lɛ, ni etswia kɛha afɔleshaa latɛ lɛ he, 40 tamɔ bɔ ni Yehowa tsɔ Mose nɔ ekɛɛ lɛ lɛ pɛpɛɛpɛ. Eji kaimɔ nɔ kɛhã Israelbii lɛ akɛ, mɔkpɔŋ ko* ni jeee Aaron seshinyo lɛ akatsi ebɛŋkɛ akɛ ebaashã tsofa-kɛ-ŋma yɛ Yehowa hiɛ,+ ni akɛ, mɔ ko mɔ ko akatsɔ tamɔ Kora kɛ esɛɛfilɔi lɛ.+

41 Enɔ jetsɛremɔ nɔŋŋ lɛ, Israel maŋ muu lɛ fɛɛ bɔi huhuuhu wiemɔ amɛshi Mose kɛ Aaron+ amɛkɛɛ: “Nyɛyi enyɔ nɛɛ, nyɛgbe Yehowa maŋ lɛ.” 42 Be ni maŋ lɛ bua amɛhe naa amɛwo Mose kɛ Aaron lɛ, amɛtsɔ amɛhiɛ amɛhã kpee buu lɛ, ni naa! atatu lɛ eha nɔ, ni Yehowa anunyam lɛ pue.+

43 Mose kɛ Aaron tee kpee buu lɛ hiɛ,+ 44 ni Yehowa kɛɛ Mose akɛ: 45 “Nyɛjea maŋbii nɛɛ ateŋ, koni makpãtã amɛhiɛ hiŋmɛitswaa.”+ Kɛkɛ ni amɛkɛ amɛhiɛ bumɔ shi.+ 46 Ni Mose kɛɛ Aaron akɛ: “Ŋɔɔ lajeenii lɛ, ni oje la yɛ afɔleshaa latɛ+ lɛ nɔ owo mli, ní okɛ tsofa-kɛ-ŋma ashwie nɔ, ní oya maŋbii lɛ ateŋ oya nɔŋŋ ní oyakpãtã ohã amɛ,+ ejaakɛ Yehowa mli ewo la. Amanehulu lɛ eje shishi!” 47 Amrɔ nɔŋŋ lɛ, Aaron ŋɔ lajeenii lɛ tamɔ bɔ ni Mose kɛɛ lɛ lɛ pɛpɛɛpɛ, ni ejo foi kɛtee asafo lɛ teŋ, ni naa! amanehulu lɛ eje shishi yɛ maŋbii lɛ ateŋ. No hewɔ lɛ, ekɛ tsofa-kɛ-ŋma lɛ shwie lajeenii lɛ nɔ, ni ebɔi kpatamɔ kɛ maŋbii lɛ hãmɔ. 48 Etee nɔ edamɔ mɛi ni egboi lɛ kɛ mɛi ni hiɛ kamɔ lɛ teŋ, ni naagbee lɛ amanehulu lɛ sɛɛ fo. 49 Mɛi ni gboi yɛ amanehulu lɛ hewɔ lɛ ayifalɛ ji mɛi 14,700, esoro mɛi ni gboi yɛ Kora sane lɛ hewɔ lɛ. 50 Naagbee lɛ, be ni Aaron ku esɛɛ kɛtee Mose ŋɔɔ yɛ kpee buu lɛ shinaa lɛ naa lɛ, no mli lɛ, amanehulu lɛ sɛɛ efo.