Daniel
1 Yɛ Yuda maŋtsɛ Yehoiakim+ nɔyeli afi ni ji etɛ lɛ mli lɛ, Babilon maŋtsɛ Nebukadnezar ba Yerusalem ni ebawo he ka.+ 2 Be ko sɛɛ lɛ, Yehowa kɛ Yuda maŋtsɛ Yehoiakim kɛ anɔkwa Nyɔŋmɔ lɛ shĩa* lɛ nibii lɛ ekomɛi wo Nebukadnezar dɛŋ,+ ni ekɛ amɛ ba Shinear*+ shikpɔŋ lɛ nɔ kɛba enyɔŋmɔ lɛ shĩa* lɛ. Ekɛ nibii lɛ yawo enyɔŋmɔ lɛ jwetritoohe lɛ.+
3 Kɛkɛ ni maŋtsɛ lɛ fã Ashpenaz, emaŋtsɛ shĩa onukpai lɛ fɛɛ anɔ onukpa lɛ, koni ekɛ Israelbii lɛ ekomɛi kɛ amɛteŋ mɛi komɛi ni jɛ maŋtsɛmɛi aseshi kɛ abladei aseshi mli lɛ aba.+ 4 Ekɛ oblahii* ni kpa ko bɛ amɛhe, ni he yɔɔ fɛo, ni hiɛ kã shi, ni le nii, ni kɔɔ sane sɛɛ,+ ni baanyɛ asɔmɔ yɛ maŋtsɛ lɛ shĩa lɛ aba. Efã hu akɛ etsɔɔ amɛ Kaldeabii lɛ aniŋmaa kɛ amɛwiemɔ lɛ. 5 Agbɛnɛ hu, maŋtsɛ lɛ to akɛ daa gbi lɛ, ajɛ maŋtsɛ niyenii srɔtoi lɛ kɛ wain ni enuɔ lɛ mli ahã amɛ niyenii. Efã ni atsɔse* amɛ afii etɛ, koni yɛ nakai be lɛ naagbee lɛ akɛ amɛ aba ni amɛbasɔmɔ maŋtsɛ lɛ.
6 Ni mɛi ni ahala lɛ ateŋ mɛi komɛi jɛ Yuda weku lɛ mli,* amɛji: Daniel,*+ kɛ Hanania,* kɛ Mishael,* kɛ Azaria.*+ 7 Ni maŋtsɛ shĩa onukpa fe fɛɛ lɛ hã amɛ gbɛ́i;* ewo Daniel, Belteshazar,+ ni ewo Hanania, Shadrak, ni ewo Mishael, Meshak, ni ewo Azaria, Abednego.+
8 Shi Daniel kpɛ mli yɛ etsui mli akɛ ekɛ maŋtsɛ lɛ niyenii srɔtoi lɛ eko, loo wain ni enuɔ lɛ eko buleŋ ehe. No hewɔ lɛ, ekpa maŋtsɛ shĩa onukpa fe fɛɛ lɛ fai koni ekahã ebule ehe yɛ nakai gbɛ nɔ. 9 Ni anɔkwa Nyɔŋmɔ lɛ hã maŋtsɛ shĩa onukpa fe fɛɛ lɛ dro* Daniel ni ena lɛ mɔbɔ.+ 10 Shi maŋtsɛ shĩa onukpa fe fɛɛ lɛ kɛɛ Daniel akɛ: “Miishe minuŋtsɔ maŋtsɛ, mɔ ni to niyenii kɛ dãa ni ahã nyɛ lɛ gbeyei. Ejaakɛ kɛ́ ena akɛ nyɛhe efee taŋ fe nyɛtipɛŋfoi oblahii* krokomɛi lɛ, mɛni mafee? Nyɛbaahã mihe aba sane* yɛ maŋtsɛ lɛ hiɛ.” 11 Shi Daniel kɛɛ mɔ ni maŋtsɛ shĩa onukpa fe fɛɛ lɛ kɛ lɛ eto Daniel, kɛ Hanania, kɛ Mishael, kɛ Azaria nɔ ni ekwɛ amɛ lɛ akɛ: 12 “Ofainɛ, kaa otsuji okwɛ gbii nyɔŋma, ni ohã ahã wɔ yelibai* ni wɔye kɛ nu ni wɔnu; 13 koni no sɛɛ lɛ, okɛ wɔhefɛo lɛ ato oblahii* ni yeɔ maŋtsɛ lɛ niyenii srɔtoi lɛ ahefɛo lɛ he, ni okɛ wɔ aye yɛ bɔ ni obaana lɛ naa.”
14 No hewɔ lɛ, ekpɛlɛ amɛnibimɔ lɛ nɔ, ni eka amɛ ekwɛ gbii nyɔŋma. 15 Gbii nyɔŋma lɛ sɛɛ lɛ, amɛhe fee fɛo ni amɛná hewalɛ* kwraa fe oblahii* lɛ fɛɛ ni yeɔ maŋtsɛ lɛ niyenii srɔtoi lɛ. 16 No hewɔ lɛ, mɔ ni kwɛɔ amɛnɔ lɛ jieɔ amɛniyenii lɛ kɛ amɛwain lɛ ni ehãa amɛ yelibai.* 17 Ni anɔkwa Nyɔŋmɔ lɛ hã oblahii* ejwɛ nɛɛ nilee, kɛ sɛɛyoomɔ yɛ niŋmaa fɛɛ niŋmaa kɛ hiɛshikamɔ fɛɛ hiɛshikamɔ mli; ni ahã Daniel nu ninai kɛ lamɔi srɔtoi fɛɛ ashishi.+
18 Kɛkɛ ni be ni maŋtsɛ lɛ etsɔɔ akɛ akɛ amɛ aba lɛ shɛ,+ maŋtsɛ shĩa onukpa fe fɛɛ lɛ kɛ amɛ ba Nebukadnezar hiɛ. 19 Be ni maŋtsɛ lɛ kɛ amɛ wie lɛ, ena akɛ amɛteŋ mɔ ko mɔ ko bɛ ni tamɔ Daniel, kɛ Hanania, kɛ Mishael, kɛ Azaria;+ ni amɛtee nɔ amɛsɔmɔ yɛ maŋtsɛ lɛ hiɛ. 20 Sane fɛɛ sane ni biɔ hiɛshikamɔ kɛ niiashishinumɔ ni maŋtsɛ lɛ baabi amɛ mli lɛ, enaa akɛ amɛhi shii nyɔŋma kwraa fe majikfeelɔi lɛ kɛ okɔmfoi+ lɛ ni yɔɔ enɔyeli lɛ mli lɛ fɛɛ. 21 Ni Daniel hi jɛmɛ kɛyashi Maŋtsɛ Koresh nɔyeli afi ni ji klɛŋklɛŋ nɔ lɛ nɔ.+