YERUSALEM GBEKƐBII LƐ ATEŊ NILELƆI FE FƐƐ

7, 8. Mɛni wɔbaanyɛ wɔkpa shi kɛjɛ Daniel 1:​3, 4, kɛ 6, yɛ shihilɛ ni Daniel kɛ enanemɛi etɛ lɛ jɛ mli lɛ mli?

⁷ Akɛ nɔ ni fe Yehowa we lɛ jwetrii ba Babilon. Sane lɛ kɛɔ akɛ: “Ni maŋtsɛ lɛ kɛɛ Ashpenaz, epiafoi lɛ anukpa lɛ, akɛ ejie gbekɛbii hii komɛi yɛ Israelbii ni ji maŋtsɛ seshibii kɛ abladei lɛ ateŋ, gbekɛbii ni kpa ko bɛ amɛhe, ni amɛhe yɔɔ fɛo ni amɛaanyɛ ŋaa-fɛɛ-ŋaa amɛkase, ni amɛle nii, ni amɛyɔɔ jwɛŋmɔ, ni amɛaanyɛ maŋtsɛ lɛ mɔ̃ɔ lɛŋ amɛdamɔ.”​—Daniel 1:​3, 4.

⁸ Namɛi ahala? Akɛɛ wɔ akɛ: “Ni amɛteŋ mɛi ni jɛ Yudabii lɛ ateŋ ji Daniel, Hanania, Mishael kɛ Azaria.” (Daniel 1:6) Enɛ haa anaa Daniel kɛ enanemɛi lɛ ahe sane ni kulɛ efee tamɔ nɔ ni anaaa mli jogbaŋŋ lɛ mli faŋŋ. Ákɛ nɔkwɛmɔnɔ lɛ, wɔkadiɔ akɛ amɛji “Yudabii,” maŋtsɛmɛi aweku lɛ mli bii. Kɛji akɛ amɛjɛ odehei awekukpaa mli loo jeee nakai hu lɛ, jwɛŋmɔ yɛ mli akɛ aaasusu akɛ kɛ hoo lɛ amɛjɛ wekui ni he hiaa ni yɔɔ hegbɛ lɛ amli. Yɛ jwɛŋmɔ kɛ gbɔmɔtso kpakpa ni amɛyɔɔ lɛ sɛɛ lɛ, amɛyɛ sane shishinumɔ, nilee, jwɛŋmɔ, kɛ sɛɛyoomɔ​—nakai amɛ fɛɛ amɛji beni amɛdarako kwraa ni aaanyɛ atsɛ amɛ “gbekɛbii,” ekolɛ ámɛye kɛjɛ afii nyɔŋma kɛ etɛ kɛyaa. Daniel kɛ enanemɛi lɛ baanyɛ afee gbɔmɛi ni ekaaa​—maŋhiŋmɛi —yɛ Yerusalem gbekɛbii lɛ ateŋ.

TAWUU KƐHA JWƐŊMƆ LƐ

10. Mɛni atsɔɔ Hebribii oblahii etɛ lɛ, ni mɛɛ yiŋtoo yɔɔ enɛ sɛɛ?

¹⁰ Amrɔ nɔŋŋ ni tawuu kɛha nomii nɛɛ ajwɛŋmɔ ni darako lɛ je shishi. Bɔni afee ni aná nɔmimaa akɛ abaatsɔse Hebri gbekɛbii ni eye afii nyɔŋma kɛ etɛ kɛyaa lɛ koni amɛtamɔ Babilonia gbɛjianɔtoo lɛ mli bii lɛ, Nebukadnezar wo akpɔ akɛ emaŋnukpai lɛ “atsɔɔ amɛ Kaldeamɛi awoloŋ kɛ wiemɔ.” (Daniel 1:4) Enɛ jeee tsɔsemɔ folo ko kɛkɛ. The International Standard Bible Encyclopedia lɛ tsɔɔ mli akɛ, “nɔ ni yɔɔ mli ji Sumeria, Akadia, Aramaik . . . , kɛ wiemɔi krokomɛi, kɛ agbɛnɛ woji babaoo ni aŋmala yɛ wiemɔi nɛɛ amli lɛ kasemɔ.” Nɔ ni yɔɔ “woji babaoo” lɛ amli ji yinɔsane, akɔntaabuu, ŋulamii ahe nilee, kɛ nibii krokomɛi. Shi kɛlɛ, “jamɔ mli niŋmaai, okadii kɛ ŋulamiiaŋkwɛmɔ . . . , tsu babaoo yɛ enɛ mli.”