Yeremia

7 Wiemɔ ni jɛ Yehowa ŋɔɔ ba Yeremia ŋɔɔ nɛ: 2 “Yaadamɔ Yehowa shĩa lɛ agbó lɛ mli ni oshiɛ sane nɛɛ akɛ, ‘Nyɛ Yudabii fɛɛ ni tsɔɔ agbói nɛɛ amli ni nyɛyakotoɔ Yehowa lɛ, nyɛboa Yehowa wiemɔ lɛ toi. 3 Nɔ ni Yehowa, taiatsɛ lɛ, Israel Nyɔŋmɔ lɛ kɛɛ nɛ: “Nyɛjajea nyɛgbɛi kɛ nyɛnifeemɔi koni mahã nyɛya nɔ nyɛhi biɛ.+ 4 Nyɛkɛ nyɛhiɛ akafɔ̃a amale wiemɔi anɔ nyɛkɛa akɛ, ‘Yehowa sɔlemɔ shĩa nɛ,* Yehowa sɔlemɔ shĩa, Yehowa sɔlemɔ shĩa!’+ 5 Ejaakɛ kɛ́ nyɛtsake nyɛgbɛi kɛ nyɛnifeemɔi lɛɛlɛŋ lɛ; kɛ́ nyɛkojo mɔ kɛ enyɛmi gbɔmɔ teŋ jogbaŋŋ lɛ;+ 6 kɛ́ nyɛwaaa gbɔi, kɛ awusãi,* kɛ yei okulafoi ayi lɛ;+ kɛ́ nyɛgbeee mɔ ko ni efeko efɔŋ yɛ biɛ lɛ; ni kɛ́ nyɛnyiɛɛɛ nyɔŋmɔi krokomɛi asɛɛ kɛyeee nyɛ diɛŋtsɛ nyɛhe awui lɛ;+ 7 no lɛ, mahã nyɛya nɔ nyɛhi biɛ, yɛ shikpɔŋ ni mikɛhã nyɛtsɛmɛi kɛmiiya naanɔ* lɛ nɔ.”’”

8 “Shi nyɛkɛ nyɛhiɛ fɔ̃ɔ amale wiemɔi anɔ+—ekɛ nyɛ shɛŋ he ko kwraa. 9 Ani nyɛbaaju,+ ni nyɛgbe gbɔmɔ, ni nyɛfite gbãla, ni nyɛkãmɔ amale kitãi,+ ni nyɛshã afɔlei nyɛhã Baal,+ ni nyɛnyiɛ nyɔŋmɔi ni nyɛleee amɛ lɛ asɛɛ, 10 ni nyɛbadamɔ mihiɛ yɛ shĩa nɛɛ ni migbɛ́i kã nɔ lɛ mli nyɛkɛɛ akɛ, ‘Abaahere wɔyiwala,’ be mli ni nyɛmiifee nyaŋemɔ nii nɛɛ fɛɛ lɛ? 11 Ani shĩa ni migbɛ́i kã nɔ lɛ etsɔ julɔi atɛkplo yɛ nyɛhiɛ?+ Naa, mi diɛŋtsɛ mina,” Yehowa kɛɛ.

12 “‘Shi agbɛnɛ, nyɛyaa mijamɔhe lɛ yɛ Shilo,+ he ni mihã migbɛ́i lɛ hi klɛŋklɛŋ lɛ,+ ni nyɛyakwɛa nɔ ni mifee jɛmɛ yɛ mimaŋ Israel efɔŋfeemɔ lɛ hewɔ.+ 13 Shi nyɛtee nɔ nyɛfee nibii nɛɛ fɛɛ,’ Yehowa kɛɛ, ‘ni eyɛ mli akɛ mikɛ nyɛ wie shii abɔ* moŋ, shi nyɛbooo toi.+ Mitee nɔ mitsɛ nyɛ, shi nyɛhereee mi nɔ.+ 14 No hewɔ lɛ, mafee shĩa nɛɛ ni migbɛ́i kã nɔ,+ ni nyɛkɛ nyɛhiɛ fɔ̃ɔ nɔ lɛ,+ kɛ he ni mikɛhã nyɛ kɛ nyɛtsɛmɛi lɛ, tamɔ mifee Shilo lɛ pɛpɛɛpɛ.+ 15 Majie nyɛ kɛje mihiɛ tamɔ bɔ ni mijie nyɛnyɛmimɛi lɛ fɛɛ, Efraim seshibii lɛ fɛɛ kɛje mihiɛ lɛ.’+

16 “Shi bo lɛ, kaasɔle ohã maŋ nɛɛ. Kaafó otsɛ mi, kaasɔle, ni kaakpa mi fai hu ohã amɛ,+ ejaakɛ miboŋ bo toi.+ 17 Ani onaaa nibii ni amɛfeɔ yɛ Yuda maji lɛ amli kɛ Yerusalem gbɛjegbɛi lɛ anɔ lɛ? 18 Bii* lɛ yabuaa tsei lɛ anaa, ni tsɛmɛi lɛ shɛreɔ la, ni ŋamɛi lɛ kpɔtɔɔ ashikishaŋ koni amɛkɛfee afɔleshaa keeki amɛhã Ŋwɛi Maŋnyɛ* lɛ,+ ni amɛfɔseɔ dãa afɔle amɛshwieɔ shi amɛhãa nyɔŋmɔi krokomɛi koni amɛkɛwo mimli la.+ 19 ‘Shi ani mi dɔlɛ nii amɛfeɔ lɛ?’* Yehowa kɛɛ. ‘Ani jeee amɛ diɛŋtsɛ amɛhe amɛfeɔ, koni amɛkɛwo amɛ diɛŋtsɛ amɛhe hiɛgbele?’+ 20 No hewɔ lɛ, nɔ ni Nuŋtsɔ Ofe Yehowa kɛɛ nɛ, ‘Naa! Abaafɔse mimlifu kɛ mimlila lɛ ashwie biɛ,+ ashwie gbɔmɔ kɛ kooloo nɔ, ashwie ŋa nɔ tsei kɛ shikpɔŋ lɛ nɔ nibaa nii lɛ anɔ; ebaashã ni agbeŋ.’+

21 “Nɔ ni Yehowa, taiatsɛ lɛ, Israel Nyɔŋmɔ lɛ kɛɛ nɛ, ‘Nyɛyaa nɔ, nyɛkɛ nyɛshãa afɔlei lɛ afataa nyɛfɔlei krokomɛi lɛ ahe, ni nyɛ diɛŋtsɛ nyɛyea loo lɛ.+ 22 Ejaakɛ gbi nɔ ni mijie nyɛtsɛmɛi lɛ kɛje Ejipt shikpɔŋ lɛ nɔ lɛ, mikɛ amɛ ewieee, ni miwooo amɛ kitã ko yɛ shãa afɔlei kɛ afɔlei krokomɛi ahe.+ 23 Shi miwo amɛ kitã nɛɛ akɛ: “Nyɛboa migbee toi, ni matsɔ nyɛ-Nyɔŋmɔ, ni nyɛbaatsɔ mimaŋ.+ Nyɛnyiɛa yɛ gbɛ ni mifã nyɛ akɛ nyɛnyiɛ nɔ lɛ fɛɛ mli, koni ehi ehã nyɛ.”’+ 24 Shi amɛbooo toi ni amɛbaaa amɛtoi shi hu;+ shi moŋ, amɛtee nɔ amɛnyiɛ amɛ diɛŋtsɛ amɛŋaatsɔi* lɛ amli, ni amɛnyiɛ amɛtsui fɔŋ lɛ sɛɛ,+ ni amɛtee sɛɛsɛɛ ni amɛyaaa amɛhiɛ, 25 kɛjɛ gbi nɔ ni nyɛtsɛmɛi lɛ je Ejipt shikpɔŋ lɛ nɔ kɛbashi ŋmɛnɛ.+ No hewɔ lɛ, mitee nɔ mitsu mitsuji gbalɔi lɛ fɛɛ, ni mitsuɔ amɛ daa gbi.*+ 26 Shi amɛbooo mi toi, ni amɛbaaa amɛtoi shi hu.+ Moŋ lɛ, amɛfee amɛhe kuɛŋtilɔi, ni amɛfee efɔŋ fe amɛtsɛmɛi lɛ po!

27 “Obaawie wiemɔi nɛɛ fɛɛ otsɔɔ amɛ,+ shi amɛboŋ bo toi; obaatsɛ amɛ, shi amɛhereŋ bo nɔ. 28 Ni obaakɛɛ amɛ akɛ, ‘Jeŋmaŋ ni booo Yehowa, amɛ-Nyɔŋmɔ lɛ, gbee toi ni amɛkpɛlɛɛɛ tsɔsemɔ nɛ. Anɔkwayeli elaaje ni atsĩiii tã po yɛ amɛteŋ.’*+

29 “Kuu oyitsɔi ni akuuu* lɛ oshwie, ni owo yaafo lala* yɛ gɔŋkpɔi kpatai lɛ anɔ, ejaakɛ Yehowa ekpoo ni ekwa yinɔ nɛɛ ni ewo emli la lɛ. 30 ‘Ejaakɛ Yudabii lɛ efee efɔŋ yɛ mihiɛ,’ Yehowa kɛɛ. ‘Amɛkɛ amɛmagai ni yɔɔ nyaŋemɔ lɛ ebama shĩa ni migbɛ́i kã nɔ lɛ mli koni amɛbule shĩa lɛ.+ 31 Amɛmamɔ Tofet ni yɔɔ Hinom* Binuu Lɛ Jɔɔ+ lɛ mli lɛ hei grɔŋŋi lɛ, koni amɛshã amɛbihii kɛ amɛbiyei yɛ la mli,+ nɔ ko ni miwoko he kitã ni ebako mitsui mli pɛŋ lɛ.’*+

32 “‘No hewɔ lɛ, naa! gbii miiba,’ Yehowa kɛɛ, ‘ni atsɛŋ jɛmɛ Tofet loo Hinom* Binuu Lɛ Jɔɔ dɔŋŋ, shi moŋ abaatsɛ lɛ Gbɔmɔgbee Jɔɔ. Amɛbaafu mɛi yɛ Tofet kɛyashi anáaa gbɛ dɔŋŋ.+ 33 Ni gbɔmɛi nɛɛ agbohii baatsɔ niyenii ahã ŋwɛi loofɔji kɛ shikpɔŋ lɛ nɔ kooloi, ni mɔ ko mɔ ko eshwieŋ amɛ.+ 34 Mahã miishɛɛ kɛ nyamɔ gbee, kɛ ayemforo wu gbee, kɛ ayemforo gbee sɛɛ afo,+ yɛ Yuda maji lɛ amli, kɛ Yerusalem gbɛjegbɛi lɛ anɔ, ejaakɛ abaakpãtã shikpɔŋ lɛ hiɛ.’”+