Esa Akɛ Ajaje Nyɔŋmɔ Kojomɔi Lɛ
“No hewɔ lɛ bo lɛ, miamɔ, ni ote shi okɛɛ amɛ nɔ fɛɛ nɔ ni mafao! Otsui akafa yɛ amɛhiɛ.”—YEREMIA 1:17.
1. Yehowa Odasefoi ha ‘amɛla lɛ kpɛ’ yɛ Nazi Germane yɛ mɛɛ gbɛ nɔ?
“YEHOWA Odasefoi ayiwaa yɛ Holocaust (Seshi Bulemɔ) Maŋtsɛyeli [Nazi Germane] lɛ eba mli yɛ amɛhaomɔ bei amli yɛ amɛyinɔsane mli.” (Holocaust Studies Annual, Volume II—The Churches’ Response to the Holocaust) South Africa Daily News ni aŋma yɛ July 15, 1989 lɛ hu wie enɛ yɛ Germane Odasefoi lɛ he: “Kristofoi hii kɛ yei akuu fioo ko nɛɛ tamɔ la ni gbooo, ni amɛdamɔ shi yɛ amɛhemɔkɛyeli mli shiŋŋ, amɛtamɔ fala loo pilamɔ yɛ Munich Maŋtsɛ lɛ [Adolf Hitler] shuɔ he, ni amɛji kaimɔ nii ni yɔɔ wala mli kɛha gbɔmɔ ni gboɔ ni eji.” Nɛkɛ wiemɔi nɛɛ kaiɔ wɔ akɛ Yesu kɛɛ esɛɛnyiɛlɔi lɛ akɛ amɛji “je lɛŋ la lɛ” ni esa akɛ amɛha amɛla lɛ akpɛ yɛ je lɛ hiɛ, ni nɔ ni enɛ kɛaaba amɛnɔ lɛ kɔɔɔ he eko.—Mateo 5:11, 12, 14-16.
2, 3. Mɛɛ ekaa shiɛmɔ ni gbeyeishemɔ bɛ mli he nɔkwɛmɔ nɔ tee nɔ yɛ Sri Lanka?
2 Amaniɛbɔɔ kroko ni jɛ Sri Lanka ni tawuu eja maŋ lɛ mli enyɔ lɛ gbaa Tamil Odasefonyo obalanyo ko ni atsɛɔ lɛ David Gunaratnam ni kɛ ekaa ni gbeyeishemɔ bɛ mli shiɛ etsɔɔ asraafoi onukpai lɛ tamɔ Yeremia diɛŋtsɛ lɛ he sane. Amɔ lɛ afata obalahii krokomɛi ahe koni abibii amɛ saji. Amaniɛbɔɔ lɛ jaje akɛ: “Asraafoi onukpai lɛ kɛ hii lɛ anaa kpɛ amɛhe yɛ obalanyo lɛ woloŋlee hewɔ, ni nɔ ni fe nakai lɛ, yɛ enɔkwayeli hewɔ, titri lɛ beni ekɛɛ akɛ, ‘Ni kɛji akɛ mikɛ mɛi ni akɛɛ atsɛɔ amɛ hegbeyeiwolɔi nɛɛ eko aaakpe lɛ, mashiɛ shiɛmɔ ni tamɔ nɛkɛ nɔŋŋ matsɔɔ amɛ’” lɛ.
3 Gbɔmɛi ahegbeyeiwolɔi nɛɛ eko mɔ lɛ nakai gbɛkɛ lɛ nɔŋŋ kɛjɛ eshia, ni amɛfolɔ enaa akɛ ekɛ asraafoi lɛ efee ekome. Ema nɔ mi akɛ ekɛ ehe wooo maŋsaji amli akɛ eeshiɛ Nyɔŋmɔ Maŋtsɛyeli lɛ he sanekpakpa lɛ pɛ. Ekɛɛ: “Miitsu Nyɔŋmɔ nitsumɔ lɛ ni maya nɔ matsu enɛ. Mishiɛɔ mihaa mɔ fɛɛ mɔ ni baabo toi ni mijieee mli.” Hegbeyeiwolɔi nɛɛ tswa Odasefonyo nɛɛ tu ni amɛgbe lɛ, ni amɛshi eŋa obalayoo fioo okulafo kɛ ebinuu fioo ni efɔ lɛ lɛ yɛ esɛɛ.—Okɛto Bɔfoi lɛ Asaji 7:51-60 he.
4. Mɛɛ yiwaa ni osɔfoi kpɛlɛ nɔ ni akɛba Yehowa Odasefoi anɔ tee nɔ yɛ Amerika Wuoyigbɛ maŋ ko mli?
4 Amaniɛbɔɔ ko hu jɛ Amerika Wuoyigbɛ maŋ ko ni Katolek kɛ Presbyterian osɔfoi komɛi ekpɛlɛ koni awa Yehowa Odasefoi ayi yɛ jɛmɛ lɛ ba: “Yehowa Odasefoi enumɔ yɔɔ asraafoi ŋsara lɛŋ . . . Afɔɔ amɛ yii ni akɛ amɛ woɔ he ko banee ni ahaaa amɛ niyenii. Onukpa ni kwɛɔ maŋkwramɔŋ saji anɔ ni kwɛɔ koni atsɔ gbɔmɛi lɛ ayiŋ yɛ wɔkuu lɛ mli lɛ gbalaa amɛtoi ejaakɛ amɛshiɛɔ amɛhaa asraafoi krokomɛi lɛ. Ekɛɛ akɛ yɛ mɛi ni ekpɛlɛɛɛ yɛ jamɔ hewɔ lɛ fɛɛ mli lɛ, Yehowa Odasefoi ji mɛi ni amɛhe yɔɔ gbeyei fe fɛɛ.”
Kanyamɔ kɛ Nɔ ni Afee Yɛ He
5. Taakɛ eji yɛ Yeremia sane lɛ mli lɛ, yɛ be babaoo mli lɛ mɛni hɔ Odasefoi lɛ ayiwaa lɛ sɛɛ?
5 Hɛɛ, taakɛ bɔ ni jamɔŋ kɛ maŋkwramɔŋ nɔyelɔi lɛ wa Yeremia yi yɛ egbii lɛ amli lɛ, nakai nɔŋŋ hu Yehowa Odasefoi kɛ shitee-kɛ-woo kpeɔ yɛ jeŋ fɛɛ kɛjɛɔ kui sɔrɔtoi nɛɛ fɛɛ adɛŋ. Mɛni kanyaa nɛkɛ nifeemɔi nɛɛ? Eyɛ mli akɛ Odasefoi lɛ ji gbɔmɛi ni sumɔɔ toiŋjɔlɛ ni boɔ mla toi fe kuu fɛɛ kuu moŋ, shi amɛhenyɛlɔi lɛ buɔ Nyɔŋmɔ Wiemɔ lɛ akɛ eyɛ gbeyei ni oshara yɛ he, ejaakɛ amɛnyɛɔ ni amɛkpoo eshɛɛsane ni kɔɔ Nyɔŋmɔ Maŋtsɛyeli lɛ he lɛ. Amɛshiɛmɔ ni amɛŋmɛɛɛ he koni amɛkɛsaa kɛ shishitoo mlai ni amɛdiɔ sɛɛ lɛ kpaa maŋkwramɔŋ jarayeli mli kɛ jamɔ mli lumɛi ni yɔɔ Satan gbɛjianɔtoo nɛɛ mli lɛ pɛsɛmkunya kɛ amɛwiemɔi ni teɔ shi woɔ ehe lɛ he mama.—Yohane 15:18, 19; 1 Yohane 5:19.
6. Te Yehowa Odasefoi efee amɛnii yɛ yiwaa lɛ mli amɛha tɛŋŋ?
6 Shi yɛ tsuŋwoo, yii kɛ gbele po sɛɛ lɛ, Yehowa Odasefoi efee amɛnii tamɔ blema Yeremia fee lɛ yɛ jeŋ fɛɛ. Yɛ be mli ni amɛjieɔ suɔmɔ kɛ ŋaalee kpo lɛ, amɛyaa nɔ amɛshiɛɔ Nyɔŋmɔ kojomɔi ni asumɔɔɔ lɛ amɛtsɔɔ jeŋmaji lɛ. (2 Timoteo 2:23-26) Amɛle akɛ esa akɛ amɛbo Nyɔŋmɔ toi akɛ Nɔyelɔ fe gbɔmɛi. (Bɔfoi lɛ Asaji 4:19, 20; 5:29) Amɛhiɛ yɛ Paulo ŋaawoo ni ekɛha Hebri Kristofoi lɛ nɔ, akɛ, amɛŋmɛ amɛtsui shi ni amɛya nɔ yɛ Nyɔŋmɔ suɔmɔnaanifeemɔ mli. Kɛkɛ lɛ amɛnine baashɛ shiwoo lɛ nɔ, naanɔ wala. No hewɔ lɛ, esa akɛ wɔnyɛ wɔkɛɛ tamɔ Paulo kɛ Yeremia akɛ: “Shi wɔ lɛ, jeee mɛi ni kpaleɔ kɛyaa hiɛkpatamɔ mli lɛ ateŋ mɛi komɛi ji wɔ, shi moŋ wɔ ji mɛi ni kɛ hemɔkɛyeli naa amɛsusuma yiwalaheremɔ lɛ ateŋ mɛi komɛi.”—Hebribii 10:35-39.
Ŋmɛnɛŋmɛnɛ Beaŋ Yeremia Kpaa Kristendom He Mama
7. Yɛ mɛɛ gbɛ nɔ Odasefoi ni yɔɔ afii ohai 20 nɛɛ mli lɛ enyiɛ nɔkwɛmɔ nɔ ni Yehowa gbalɔi anɔkwafoi ni atsu amɛ kɛtee Israel kɛ Yuda lɛ fee lɛ sɛɛ?
7 Taakɛ Yehowa tee nɔ etsu egbalɔi lɛ kɛtee Israel kɛ Yuda lɛ, nakai nɔŋŋ etsu edasefoi lɛ koni amɛma sane ni kɔɔ ekojomɔ ni baa lɛ nɔ mi. (Yeremia 7:25, 26; 25:4, 8, 9) Titri lɛ kɛjɛ mumɔŋ hewalɛwoo be ni ji afi 1919 mli kɛbaa nɛɛ Kristo nyɛmimɛi ni ji shwɛɛ nii ni afɔ amɛ mu lɛ kɛ ekaa ejaje Nyɔŋmɔ kojomɔi lɛ, shɛɛ wiemɔ ni mli wa ni kɔɔ amanehulu ni baa lɛ he lɛ amɛtsɔɔ Kristendom. (Okɛto Yeremia 11:9-13 he.) Nakai afi lɛ mli ni aje wolo tɛtrɛɛ ni ji The Golden Age lɛ ŋmaa shishi. Wolo nɛɛ ni egbɛi etsake kɛtsɔ afii lɛ amli, tamɔ Consolation (1937) kɛ Awake! (1946) lɛ, etee nɔ esɔmɔ akɛ nɔ ni kpaa Kristendom jamɔ mli amalei kɛ apasa Kristojamɔ lɛ he mama.
8, 9. (a) Mɛni hewɔ abu sɔlemɔi lɛ fɔ yɛ 1922 lɛ? (b) Mɛɛ amanehulu agba akɛ ebaaba amɛnɔ?
8 Akɛ nɔkwɛmɔ nɔ lɛ, October 11, 1922 Golden Age lɛ bu apasa jamɔ fɔ yɛ nɛkɛ wiemɔi nɛɛ amli: “Mɔdɛŋ ni sɔlemɔi sɔrɔtoi agbɛjianɔtoi lɛ fɛɛ, kɛ amɛ osɔfoi, hiɛnyiɛlɔi kɛ amɛhefatalɔi lɛ bɔɔ koni amɛhere nibii agbɛjianɔtoo ni yɔɔ shikpɔŋ nɛɛ nɔ lɛ yiwala ni amɛku sɛɛ amɛtswa amɛma shi ekoŋŋ . . . lɛ fɛɛ baafee efolo, ejaakɛ enɛ jeee Mesia lɛ maŋtsɛyeli lɛ fa. Nɔ ni tamɔɔɔ nakai lɛ, yɛ Jeŋ Ta [I] mli lɛ, nɛkɛ sɔlemɔi sɔrɔtoi nɛɛ amli osɔfoi lɛ yeee Nuŋtsɔ Yesu Kristo anɔkwale, shi moŋ amɛkɛ nitsumɔi wuji lɛ kɛ maŋkwralɔi ni amɛhe gbɛi lɛ fee ekome koni amɛha Jeŋ Ta lɛ ashwere.”
9 Fɔbuu wiemɔ lɛ tee nɔ akɛ: “Agbɛnɛ amɛkpoo Nuŋtsɔ lɛ kɛ emaŋtsɛyeli lɛ, ni amɛtsɔɔ akɛ amɛyeee anɔkwale kɛtsɔ bɔ ni amɛjɛ amɛsuɔmɔ mli amɛkɛ amɛhe kpɛtɛ Satan gbɛjianɔtoo lɛ he ni amɛkɛ ekaa jaje amɛtsɔɔ je lɛ akɛ Jeŋmaji Akpaŋmɔ lɛ ji Nyɔŋmɔ maŋtsɛyeli lɛ kpojiemɔ yɛ maŋkwramɔŋ yɛ shikpɔŋ nɔ lɛ.” Yɛ naagbee lɛ, “amanehulu” loo kojomɔ shɛɛ sane lɛ ba: “Nɔ ni ebɛŋkɛ ni miihe agbee shikpɔŋ lɛ nɔ jeŋmaji lɛ anɔ, taakɛ Kristo Yesu wiemɔ lɛ tsɔɔ lɛ ji ‘amanehulu kpeteŋkpele ni anako nɔ da kɛjɛ je lɛŋ shishijee mli kɛbashi ŋmɛnɛ, dabi, ni asaŋ anaŋ enɔ gbi ko gbi ko dɔŋŋ lɛ.’”
10. Mɛɛ fɔbuu kojomɔ ajaje yɛ 1926?
10 Akpa Yeremia nitsumɔ nɛɛ mli lolo kɛtsɔ woji krokomɛi ni akɛtsu nii tamɔ Buu-Mɔɔ woji tɛtrɛbii lɛ, woji bibii kɛ woji wuji anɔ. Akɛ nɔkwɛmɔ nɔ lɛ, yɛ afi 1926 mli lɛ, wolo ni ji Deliverance lɛ kɛ Kristendom he mamakpamɔ ko ni mli wa ni tsɔɔ bɔ ni etsɔɔmɔi lɛ shishiuɔ mɛi lɛ ha. Ejaje yɛ ebaafa 203 lɛ akɛ: “Aloo apasa tsɔɔmɔi awo [Kristendom hemɔkɛyeli kwalɔ] lɛ mli babaoo ni akɛ enɛɛmɛi moŋ to anɔkwale lɛ najiaŋ. Nɔ ni efata enɛɛmɛi ahe ji triniti, susumai fɛɛ ni gbooo, naanɔ piŋmɔ ni akɛbaa efɔŋfeelɔi anɔ, ŋwɛi hegbɛi ni osɔfoi lɛ yɔɔ kɛ ŋwɛi hegbɛi ni maŋtsɛmɛi yɔɔ akɛ amɛye nɔ he tsɔɔmɔi lɛ. Beni be shwieɔ mli lɛ, aha Maria ni ji abifao Yesu nyɛ lɛ batsɔ Nyɔŋmɔ ni abi ni gbɔmɛi lɛ aja lɛ akɛ Nyɔŋmɔ nyɛ.”
Abɔ Kristendom ni Mli Egbala lɛ Kɔkɔ
11, 12. (a) Yɛ mɛɛ gbɛ nɔ akpa osɔfoi lɛ ni kɛ amɛhe woɔ maŋsaji amli lɛ he mama yɛ? (b) Mɛɛ kɔkɔ Yeremia kuu lɛ bɔ?
11 Wolo lɛ nɔŋŋ kpa bɔ ni osɔfoi lɛ kɛ amɛhe wo tai amli lɛ he mama, akɛ: “Jamɔi sɔrɔtoi lɛ amli osɔfoi lɛ jɔɔ asraafoi ni jarayeli mli kɛ maŋkwramɔŋ lumɛi lɛ tsuɔ amɛ lɛ anɔ, ni amɛkpaa nɛkɛ jɔɔmɔi nɛɛ amli ni heni asraafoi nɛɛ wuɔ yɛ loo mɛi ni amɛwuɔ amɛhaa lɛ kɔɔɔ he eko. Osɔfoi lɛ kwaa amɛkɛɔ akɛ amɛmiisɔle amɛha Nyɔŋmɔ kome too lɛ nɔŋŋ koni ejɔɔ asraafoi akui enyɔ ni kɛ amɛhe wuɔ ta lɛ fɛɛ nɔ.” (Okɛto Yeremia 7:31 he.) Kɛkɛ ni akɛ kojomɔ ko ni baa tsu nii: “Aabua mɛnɛɛmɛi fɛɛ ni feɔ Satan gbɛjianɔtoo ni anaa lɛ fa lɛ anaa yɛ he kome kɛha Harmagedon tawuu kpeteŋkpele lɛ.”—Kpojiemɔ 16:14-16.
12 Taakɛ bɔ ni yɛ Yeremia gbii lɛ amli lɛ, nɛkɛ hiɛnyiɛlɔi nɛɛ kɛɛ akɛ amɛyɛ shweshweeshwe ni toiŋjɔlɛ ka amɛkɛ Nyɔŋmɔ teŋ lɛ, “nakai nɔŋŋ nɛkɛ osɔfoi ni ji hiɛnyiɛlɔi nɛɛ kɛɔ amɛhe akɛ amɛyɛ shweshweeshwe, ni nɔ ni he hiaa pɛ ji ni akɛ Kristo gbɛi atsɛ amɛ, yɛ be mli ni amɛyaa nɔ amɛkɛ Abonsam la lɛ shwɛɔ lɛ. Amɛshwilaa amɛhiŋmɛi yɛ bɔ ni shihilɛ lɛ ji diɛŋtsɛ lɛ he kɛtsɔ shia ni amɛloɔ amɛwoɔ amɛ diɛŋtsɛ amɛhiŋmɛi mli kɛ agbɛnɛ mɛi ni nyiɛɔ amɛsɛɛ lɛ ahiŋmɛi amli lɛ nɔ.” (Deliverance, baafa 270) Biblia Kaselɔi ni yɔɔ ekaa ni ale amɛ akɛ Yehowa Odasefoi yɛ nakai be lɛ mli lɛ kpa nɛkɛ amɛ diɛŋtsɛ amɛhe ni amɛshishiuɔ nɛɛ he mama.—Mat. 7:21-23.
13. Mɛni ba yɛ 1931 ni mɛni hewɔ esa lɛ?
13 Beni be shwieɔ mli lɛ, abale Biblia Kaselɔi nɛɛ jogbaŋŋ ni akɛ amɛ to Yeremia he yɛ be mli ni yɛ 1931 lɛ, yɛ kpee ko ni afee yɛ Columbus, Ohio, U.S.A. lɛ shishi lɛ, atswa adafi akɛ esa akɛ Biblia mli gbɛi kɛha nɛkɛ Kristofoi akuu ni yɔɔ ekaa nɛɛ afee “Yehowa Odasefoi” lɛ. (Yesaia 43:10-12) Abale nakai gbɛi lɛ yɛ afi ohai kpaanyɔ D.Ŋ.B., beni Yehowa kɛto Israel he lɛ. No hewɔ lɛ, yɛ no sɛɛ afii oha lɛ, beni Yeremia sɔmɔ akɛ gbalɔ lɛ, ebafee odasefonyo hu kɛha Yehowa. (Yeremia 16:21) Nakai nɔŋŋ hu beni Yesu ba shikpɔŋ nɔ akɛ Yudanyo lɛ, no mli lɛ eji odasefonyo kɛha e-Tsɛ, Yehowa. (Yohane 17:25, 26; Kpojiemɔ 1:6; 3:14) No hewɔ lɛ, esa jogbaŋŋ akɛ yɛ Nyɔŋmɔ diɛŋtsɛ be mli lɛ, ewebii lɛ ahe asa kɛha ŋwɛi gbɛi ni ahala aha amɛ lɛ ni ji —“Yehowa Odasefoi.”—Yohane 17:6, 11, 12.
Ajie Kristendom Hiɛhaa Nɔ Lɛ
14. Akpa Kristendom he mama yɛ afii 70 ni eho lɛ amli yɛ mɛɛ gbɛ nɔ?
14 Nɔ ni fe afii nyɔŋmai kpawo ni eho nɛ, ni Yehowa Odasefoi egbɛ fɔbuu kojomɔ wiemɔi amɛshwa tamɔ nu yɛ Yehowa anunyam Maŋtsɛyeli ni baa lɛ he hiɛnɔkamɔ lɛ he amɛtsɔɔ. Amɛtsɔ woji ni damɔ Biblia lɛ nɔ ni amɛmli wiemɔi wa waa nɔ amɛkpa Kristendom he mama akɛ hewalɛ ni da waa yɛ jamɔ gbɛjianɔtoo ni ji “Babilon Kpeteŋkpele” ni abu lɛ fɔ yɛ Kpojiemɔ yitsei 17 kɛ 18 lɛ mli. (Kwɛmɔ “Babylon the Great Has Fallen!” God’s Kingdom Rules!, baafai 576-615, ni Watchtower Bible and Tract Society of New York, Inc. ŋma yɛ 1963 lɛ mli.)
15. Akpa Kristendom he mama yɛ 1955 yɛ mɛɛ gbɛ nɔ?
15 Yɛ afi 1955 mli lɛ, Yehowa Odasefoi lɛ ja woji bibii, Christendom or Christianity—Which One Is “the Light of the World”? (Kristendom loo Kristojamɔ—Te Nɔ Ni Ji “Je lɛ La Lɛ”?) lɛ akpekpei abɔ amɛha. Akɛ akpekpei abɔ wo Kristendom osɔfoi lɛ adɛŋ tɛɛ. Mɛni nakai wolo bibioo lɛ kɛɔ amɛ? Taakɛ Yeremia fee pɛpɛɛpɛ lɛ, ejaje akɛ: “Yɛ esɛɛnamɔi ni eha etee hiɛ yɛ shika gbɛfaŋ, jwɛŋmɔŋ kɛ tawuu mli lɛ fɛɛ sɛɛ lɛ, Kristendom ejieko ehe kpo akɛ ‘je lɛ la lɛ.’ Mɛni hewɔ? . . . Eshiɛɛɛ ni asaŋ ediii [Biblia mli] Kristojamɔ lɛ sɛɛ.” Kɛkɛ ni etee sanebimɔ ko shi: “Ani apasa jamɔ he mama ni akpaa lɛ ji amɛsɛɛbii lɛ ayiwaa? Ani eji nii ni tsɔɔ mɔ he tsui ni anaaa ni jeee Kristofoi asu?”
16. Ani eji mɔ he tsui ni anaaa hewɔ ni Odasefoi lɛ kpa Kristendom he mama lɛ? Tsɔɔmɔ mli.
16 Hetoo lɛ ji: “Dabi; kɛ jeee nakai lɛ kulɛ Yesu Kristo hu baafee mɔ ni naaa mɔ he tsui ni waa Yudafoi lɛ ayi,. . . ni Yehowa blema gbalɔi lɛ fɛɛ [ni Yeremia fata he] ni hi shi dani Yesu ba lɛ baafee yiwalɔi kɛ mɛi ni naaa mɛi ahe tsui, ejaakɛ amɛ fɛɛ amɛkpa Yudafoi ni amɛkwa hemɔkɛyeli lɛ kɛ jeŋmaji wɔŋjalɔi lɛ apasa jamɔ lɛ he mama.” Eka shi faŋŋ akɛ, kɛji akɛ anɔkwale Kristofoi baafee “je lɛ la lɛ,” belɛ esa akɛ akpa mumɔŋ “duŋ kpii” lɛ he mama. (2 Korintobii 6:14-17) Enɛ etsɔɔɔ akɛ aaatutua aŋkroaŋkroi, shi moŋ gbɛjianɔtoo lɛ ni eŋɔ amɛ nom lɛ. No hewɔ lɛ, Yehowa fa Yeremia akɛ: “No hewɔ lɛ bo lɛ, miamɔ, ni ote shi ni okɛɛ amɛ nɔ fɛɛ nɔ ni mafao lɛ! Otsui akafa yɛ amɛhiɛ . . . Ni amɛkɛo aaawu, shi amɛnyɛŋo; ejaakɛ mikɛo yɛ, ni majieo, Yehowa kɛɛ.”—Yeremia 1:17, 19.
Yeremia Nitsumɔ lɛ Miiba Naagbee
17, 18. (a) Yehowa Odasefoi lɛ etee nɔ yɛ amɛ Yeremia nitsumɔ lɛ mli yɛ nyɛsɛɛ nɛɛ afii nɛɛ amli yɛ mɛɛ gbɛ nɔ? (b) Mɛɛ ŋaawoo akɛha mɛi ni yɔɔ tsuijurɔ lɛ?
17 Ani Yehowa Odasefoi eba Nyɔŋmɔ kojomɔ wiemɔi lɛ ashi? Eji anɔkwale akɛ yinɔ ni kɛ awie ashi jamɔ kroko lɛ akpɛlɛɛɛ nɔ kwraa mli wɔyɔɔ lɛ. Ni kɛlɛ, woji ni Yehowa Odasefoi feɔ lɛ miijaje nakai fɔbuu kojomɔi lɛ nɔŋŋ kɛmiishwie Kristendom nɔ yɛ be fɛɛ mli. Akɛ nɔkwɛmɔ nɔ lɛ, yɛ afii ejwɛ ni eho nɛɛ mli lɛ, Yehowa Odasefoi ekala wolo Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ lɛ ekomekomei akpekpei 32 yɛ wiemɔi 76 mli. Nɛkɛ wolo nɛɛ kɛ hetooi haa sanebimɔi pii ni abiɔ bianɛ tamɔ “Mɛni Baa yɛ Gbele Mli?” “Mɛni Hewɔ Nyɔŋmɔ Eŋmɛ Efɔŋfeemɔ Gbɛ?” kɛ “Anɔkwale Jamɔ lɛ Yɔsemɔ.” Shi ekɛ kɔkɔbɔɔ ni mli ka shi faŋŋ hu haa yɛ jeŋ apasa jamɔ maŋtsɛyeli lɛ he.
18 Yɛ eyitso 25 ni ji “Oyɛ Kɛha Satan Je lɛ, Aloo Nyɔŋmɔ Gbɛjianɔtoo Hee Lɛ?” mli lɛ, ejaje akɛ: “Akɛ ‘Ajwamaŋ Kpeteŋkpele’ aloo ahoshwibɔlɔ ko ni egbɛi ji ‘Babilon Kpeteŋkpele’ lɛ damɔɔ shi kɛhaa apasa jamɔ yɛ Biblia lɛ mli. . . . Ni eji anɔkwale akɛ akɛ jamɔ futuɔ maŋkwramɔ yɛ yinɔsane be fɛɛ mli, ni amɛfɔɔ nɔ ni esa akɛ maŋtsɛyelii lɛ afee lɛ tsɔɔmɔ.” No hewɔ lɛ, mɛɛ nifeemɔ gbɛ wolo lɛ jieɔ yi? Ebiɔ akɛ: “Ani oosumɔ ni ofee Satan je lɛ fa? Aloo oyɛ kɛha Nyɔŋmɔ gbɛjianɔtoo hee lɛ? Kɛ oyɛ kɛha Nyɔŋmɔ gbɛjianɔtoo hee lɛ, belɛ obaatsi ohe kɛjɛ je lɛ he, kɛ epasa jamɔ lɛ hu he. Obaabo famɔ nɛɛ toi: “Nyɛjea emli [Babilon kpeteŋkpele lɛ] mimaŋ.’ (Kpojiemɔ 18:4) ”
19. Te ooofee tɛŋŋ otsɔɔ akɛ amuako ŋmɛnɛŋmɛnɛ beaŋ Yeremia kuu lɛ naa yɛ be ni ekpe sɛɛ tsɔ nɛɛ po mli?
19 Nɛkɛ shɛɛsane ni mli wa ni kɔɔ mligbalamɔ kɛ kojomɔ he lɛ jijeɔ faŋŋ yɛ wolo Worldwide Security Under the “Prince of Peace” lɛ ni afee yɛ 1986 (ni akala ekomekomei akpekpei ekpaa yɛ wiemɔi sɔrɔtoi 25 mli) lɛ mli. Ekpaa Kristendom osɔfoi ahe mama akɛni “amɛkɔne obalaŋtai ayiŋ kɛbote tawuu hei” yɛ Jeŋ Ta I be lɛ mli lɛ hewɔ. Etee nɔ akɛ: “Kristendom etee nɔ akɛ ŋwɛi flooflo Nyɔŋmɔ lɛ henyɛlɔ kɛbashi nɛkɛ be nɛɛ mli. Eka shi faŋŋ akɛ ebɛ ŋwɛi hebuu, ni yɛ yiŋtoo ni he hiaa nɛɛ hewɔ lɛ, eshihilɛ diɛŋtsɛ bɛ shweshweeshwe.” (Kwɛmɔ baafai 30-2.) Atsiko ŋmɛnɛŋmɛnɛ beaŋ Yeremia kuu lɛ gbee naa! Beni osɔfoi lɛ kɛ maŋkwralɔi bɔɔ mɔdɛŋ ni amɛtsi Nyɔŋmɔ kojomɔi lɛ ashiɛmɔ naa lɛ, Odasefoi anɔkwafoi lɛ kɛ ekaa yaa nɔ, ni amɛtswa amɛfai shi akɛ amɛbaagbe kɔkɔbɔɔ nitsumɔ lɛ naa.—Yeremia 18:18.
20. Mɛni hewɔ Yehowa Odasefoi baaya nɔ ni amɛjaje Yehowa kojomɔi lɛ amɛtsɔɔ jeŋmaji lɛ?
20 Ni mɛni hewɔ esa akɛ agbe nɛkɛ nitsumɔ nɛɛ naa lɛ? Ejaakɛ Yehowa, Jeŋ Muu Fɛɛ Nuŋtsɔ ni yɔɔ wala mli lɛ kɛ jeŋmaji lɛ kɛ amɛjamɔi lɛ ena ni ekɛ amɛ miikojo. Taakɛ bɔ ni Yehowa bi Yuda kɛ Yerusalem shishiulɔ lɛ, nakai nɔŋŋ hu sanebimɔ lɛ kɔɔ Kristendom he ŋmɛnɛ: “Aso mikawo enɛɛmɛi ahe nyɔmɔ lo? Yehowa kɛɛ; aloo misusuma akatɔ ehe owele yɛ jeŋmaŋ ni tamɔ nɛkɛ nɛɛ nɔ?” No hewɔ lɛ, Yehowa Odasefoi baaya nɔ ni amɛkɛ shɛɛsane ni tsurɔɔ gbɔmɛi lɛ ateŋ mɛi ni falɛ aya jeŋmaji lɛ amli bii lɛ aŋɔɔ akɛ kojomɔ wiemɔi ni eŋɔŋ, shi kɛlɛ eji miishɛɛ sanekpakpa—Nyɔŋmɔ Maŋtsɛyeli lɛ he sanekpakpa lɛ kɛha mɛi fioo ko.—Yeremia 5:9, 29; 9:9; Bɔfoi lɛ Asaji 8:4, 12.
21. Yɛ amanehulu ni agba afɔ shi lɛ fɛɛ sɛɛ lɛ, mɛɛ hiɛnɔkamɔ kpakpa ka mɛi ni boɔ Yeremia nitsumɔ lɛ toi lɛ ahiɛ? (Lala 37:9, 11, 18, 19, 28, 29)
21 Yɛ be mli ni atsɛ Yeremia shii abɔ akɛ amanehulu aloo efɔŋ shiɛlɔ lɛ, eji anɔkwale hu akɛ eshɛɛsane lɛ kɛ hiɛnɔkamɔ ko ha Yudafoi lɛ. (Yeremia 23:5, 6; 31:16, 17) Nakai nɔŋŋ hu yɛ be mli ni Yehowa Odasefoi shiɛɔ “amanehulu Kpeteŋkpele” ni baa lɛ he sane lɛ, kɛ Harmagedon kojomɔi lɛ, amɛmiijaje jɔɔmɔi ni “ŋwɛi hee kɛ shikpɔŋ hee” ni kɛ jalɛ kɛ Paradeiso baaba shikpɔŋ nɛɛ fɛɛ kɛ naanɔ wala hu lɛ he sane. (Mateo 24:21, 22; Kpojiemɔ 16:16; 21:1-4) No hewɔ lɛ, be ni esa akɛ akɛbo Yehowa kojomɔ wiemɔi lɛ atoi nɛ koni afi Yeremia nitsumɔ kpeteŋkpele lɛ naagbee lɛ sɛɛ.—Okɛto Yeremia 38:7-13 he.a
[Shishigbɛ niŋmai]
a Ajie kɛjɛ April 1, 1988 Watchtower lɛ mli.
Ani Okaiɔ?
◻ Aawa Yehowa Odasefoi ayi tamɔ Yeremia yɛ mɛɛ gbɛ nɔ?
◻ Mɛni hewɔ Odasefoi lɛ yaa nɔ yɛ shiɛmɔ Iɛ mli Iɛ?
◻ Agbele Yeremia nitsumɔ lɛ mli yɛ mɛɛ gbɛ nɔ?
◻ Mɛɛ nɔkwɛmɔ nii ni ba nyɛsɛɛ nɛɛ tsɔɔ akɛ fɔbuu kojomɔi Iɛ tsakeko?
◻ Yɛ amanehulu he sane ni ashiɛɔ Iɛ fɛɛ sɛɛ Iɛ, mɛɛ hiɛnɔkamɔ hu akɛhaa?
[Mfoniri ni yɔɔ baafa 21]
Yɛ be ni sa mli Iɛ, aha Maria tsɔ Nyɔŋmɔ ni abi ni gbɔmɛi Iɛ kɛ woo aha Iɛ akɛ “Nyɔŋmɔ Nyɛ”
[Mfoniri ni yɔɔ baafa 22]
Biblia Kaselɔi lɛ kpɛlɛ gbɛi “Yehowa Odasefoi” lɛ nɔ yɛ Columbus, Ohio kpee Iɛ shishi yɛ afi 1931
[Mfoniri ni yɔɔ baafa 23]
Yehowa Odasefoi miinyiɛ Yeremia nɔkwɛmɔ nɔ lɛ sɛɛ yɛ jeŋ