1 Samuel

14 Gbi ko lɛ, Saul binuu Yonatan+ kɛɛ esɔɔlɔ ni hiɛɔ etawuu nii lɛ akɛ: “Ba ni wɔfoŋ kɛya Filistibii lɛ asraafoi ni yɔɔ sɛɛ lɛ gbɛ lɛ aŋɔɔ.” Shi ekɛɛɛ etsɛ. 2 No mli lɛ, Saul yɛ Gibea+ klotia yɛ pomegranet tso ni yɔɔ Migron lɛ shishi, ni hii aaafee 600 fata ehe.+ 3 (No mli lɛ, Ahiya, ni ji Ahitub+ binuu lɛ ni woɔ efɔd+ lɛ. Ahitub nyɛmi nuu ji Ikabod,+ Finehas+ binuu lɛ, ni Finehas tsɛ ji Eli,+ mɔ ni no mli lɛ, eji Yehowa osɔfo yɛ Shilo+ lɛ.) No mli lɛ, asraafoi lɛ leee akɛ Yonatan etee. 4 Shi tsɔmɔhei ni Yonatan taoɔ atsɔ kɛfoŋ kɛya Filistibii lɛ asraafoi lɛ aŋɔɔ lɛ ateŋ lɛ, tɛsaa ni tamɔ nyanyɔŋ ma shi yɛ afã kome, ni tɛsaa ni tamɔ nyanyɔŋ ma shi yɛ afã kroko lɛ; atsɛɔ ekome Bozez, ni atsɛɔ ekroko lɛ hu Sene. 5 Tɛsaa lɛ ekome ma shi akɛ akulashiŋ yɛ kooyi yɛ Mikmash hiɛ, ni ekroko lɛ hu ma shi yɛ wuoyi yɛ Geba+ hiɛ.

6 No hewɔ lɛ, Yonatan kɛɛ mɔ ni hiɛɔ etawuu nii lɛ akɛ: “Ba ni wɔfoŋ kɛya hii ni afolɔko amɛ ketia+ nɛɛ asraafoi lɛ aŋɔɔ. Ekolɛ Yehowa baaye abua wɔ, ejaakɛ nɔ ko nɔ ko nyɛŋ atsĩ Yehowa naa akɛ ekɛ mɛi pii loo mɛi fioo ahere mɛi.”+ 7 Kɛkɛ ni mɔ ni hiɛɔ etawuu nii lɛ kɛɛ lɛ akɛ: “Feemɔ nɔ fɛɛ nɔ ni otsui tsirɛɔ bo akɛ ofee. Tsɔ he fɛɛ he ni osumɔɔ, ni manyiɛ osɛɛ kɛya he fɛɛ he ni otsui tsirɛɔ bo akɛ oya.” 8 Kɛkɛ ni Yonatan kɛɛ akɛ: “Wɔbaafoŋ kɛya nakai hii lɛ aŋɔɔ, ni wɔbaajie wɔhe kpo wɔtsɔɔ amɛ. 9 Kɛ́ amɛkɛɛ wɔ akɛ, ‘Nyɛdamɔa he ni nyɛyɔɔ lɛ kɛyashi wɔbaaba nyɛŋɔɔ!’ lɛ, no lɛ, wɔbaadamɔ he ni wɔyɔɔ lɛ ni wɔkwɔŋ kɛyaŋ amɛŋɔɔ. 10 Shi kɛ́ amɛkɛɛ, ‘Nyɛkwɔa kɛbaa ni nyɛkɛ wɔ abawua’ lɛ, no lɛ, wɔbaakwɔ kɛya, ejaakɛ Yehowa baajie amɛ ewo wɔdɛŋ. Enɛ baafee okadi kɛhã wɔ.”+

11 Kɛkɛ ni amɛyi enyɔ lɛ fɛɛ jie amɛhe kpo amɛtsɔɔ Filistibii lɛ asraafoi lɛ. Filistibii lɛ kɛɛ akɛ: “Naa! Hebribii lɛ miije kpo kɛmiijɛ bui ni amɛyateetee amɛhe yɛ mli lɛ amli.”+ 12 No hewɔ lɛ, asraafoi lɛ kɛɛ Yonatan kɛ mɔ ni hiɛɔ etawuu nii lɛ akɛ: “Nyɛkwɔa kɛbaa, ni wɔbaatsɔɔ nyɛ nɔ ko!”+ Amrɔ nɔŋŋ ni Yonatan kɛɛ mɔ ni hiɛɔ etawuu nii lɛ akɛ: “Nyiɛmɔ misɛɛ, ejaakɛ Yehowa baajie amɛ ewo Israel dɛŋ.”+ 13 Ni Yonatan kɛ eniji kɛ enaji kwɔ, ni mɔ ni hiɛɔ etawuu nii lɛ nyiɛ esɛɛ; ni Filistibii lɛ gbeegbee shi yɛ Yonatan hiɛ, ni mɔ ni hiɛɔ etawuu nii lɛ gbegbee amɛ yɛ esɛɛ. 14 Mɛi ni Yonatan kɛ mɔ ni hiɛɔ etawuu nii lɛ gbe klɛŋklɛŋ lɛ ayifalɛ aaafee hii 20 yɛ shikpɔŋ ni dalɛ aaafee hɛkta fã nɔ.*

15 Kɛkɛ ni ŋmiŋmi mɔmɔ mɛi ni yɔɔ nsara lɛ mli yɛ ŋa lɛ nɔ lɛ, kɛ agbɛnɛ hu asraafoi lɛ fɛɛ, ni ŋmiŋmi mɔmɔ asraafoi ni loɔ Israelbii lɛ anibii+ lɛ po. Shikpɔŋ lɛ bɔi hosomɔ, ni Nyɔŋmɔ hã ŋmiŋmi mɔmɔ amɛ. 16 Saul bulɔi ni yɔɔ Gibea+ yɛ Benyamin lɛ na akɛ, asraafoi lɛ ejijaa kɛmiiya kɛmiiba yɛ he fɛɛ he.+

17 Saul kɛɛ mɛi ni fata ehe lɛ akɛ: “Nyɛfainɛ, nyɛkanea asraafoi lɛ, ni nyɛkwɛa akɛ namɔ eje wɔteŋ.” Be ni amɛkane mɛi lɛ, amɛna akɛ Yonatan kɛ mɔ ni hiɛɔ etawuu nii lɛ bɛ amɛteŋ. 18 Agbɛnɛ Saul kɛɛ Ahiya+ akɛ: “Wó anɔkwa Nyɔŋmɔ lɛ Adeka lɛ kɛba biɛ!” (Ejaakɛ nakai beiaŋ lɛ,* anɔkwa Nyɔŋmɔ lɛ Adeka lɛ yɛ Israelbii lɛ aŋɔɔ.) 19 Ni be ni Saul kɛ osɔfo lɛ wieɔ lolo lɛ, bɔ ni asraafoi lɛ jijaa yɛ Filistibii lɛ nsara lɛ mli lɛ naa miiya nɔ eewa. Kɛkɛ ni Saul kɛɛ osɔfo lɛ akɛ: “Foo nɔ ni ofeɔ lɛ sɛɛ.”* 20 No hewɔ lɛ, Saul kɛ mɛi ni fata ehe lɛ fɛɛ bua amɛhe naa ni amɛtee ta lɛ naa, ni amɛyana akɛ Filistibii lɛ ateŋ mɔ fɛɛ mɔ edɔ eklante eto enaanyo nɔ, ni amɛyiŋ efutu diɛŋtsɛ. 21 Agbɛnɛ hu, Hebribii ni no mli lɛ amɛyafata Filistibii lɛ ahe, ni amɛfata amɛhe kɛkwɔ kɛba nsara lɛ mli lɛ, miishi kɛmiiya Israelbii lɛ aŋɔɔ koni amɛyaje Saul kɛ Yonatan shishi. 22 Israel hii fɛɛ ni yateetee amɛhe+ yɛ Efraim gɔji lɛ anɔ lɛ nu akɛ Filistibii lɛ ejo foi, ni amɛ hu amɛbafata he kɛtiu amɛ yɛ ta lɛ mli. 23 No hewɔ lɛ, Yehowa here Israel nakai gbi lɛ,+ ni awu ta lɛ aahu kɛyashi Bet-aven+ tɔ̃ɔ.

24 Shi Israel hii lɛ ahe fĩ amɛ waa yɛ nakai gbi lɛ nɔ, ejaakɛ Saul ekã mɛi lɛ kitã akɛ: “Mɔ fɛɛ mɔ ni baaye nii* dani je baana loo dani matɔ mihenyɛlɔi lɛ anɔ owele magbe naa lɛ, alomɔ lɛ!” No hewɔ lɛ, mɛi lɛ ateŋ mɔ ko mɔ ko yeee nii.+

25 Ni mɛi* lɛ fɛɛ bashɛ koo lɛ mli, ni naa wo jwere shikpɔŋ lɛ. 26 Be ni mɛi lɛ bashɛ koo lɛ mli lɛ, amɛna wo ni miitsere kɛmiishwie shi, shi amɛteŋ mɔ ko mɔ ko kɛ enine eyaaa enaa, ejaakɛ amɛmiishe gbeyei yɛ kitã lɛ hewɔ. 27 Shi Yonatan nuuu akɛ etsɛ ekã mɛi lɛ kitã,+ no hewɔ lɛ ekpã edɛhiɛmɔtso lɛ mli ni ekɛ tso lɛ naabu tsɔ wo agbaku lɛ mli. Be ni ejie enine kɛtee enaa lɛ, ená hewalɛ ekoŋŋ.* 28 Kɛkɛ ni mɛi lɛ ateŋ mɔ kome kɛɛ akɛ: “Otsɛ ekã mɛi lɛ kitã dikadika akɛ, ‘Mɔ fɛɛ mɔ ni baaye nii ŋmɛnɛ lɛ, alomɔ lɛ!’+ No hewɔ ni etɔ mɛi lɛ bliboo nakai lɛ.” 29 Shi Yonatan kɛɛ akɛ: “Mitsɛ ehao mɛi lɛ waa.* Kwɛ bɔ ni miná hewalɛ ekoŋŋ* be ni mikɛ wo fioo nɛɛ sa minaa lɛ. 30 Eji ŋmɛnɛ lɛ, mɛi lɛ ye nii bɔ ni amɛsumɔɔ+ kɛjɛ nibii ni amɛha yɛ amɛhenyɛlɔi lɛ adɛŋ lɛ mli kulɛ, abaagbe Filistibii lɛ babaoo fe nɛkɛ po.”

31 Nakai gbi lɛ nɔ lɛ, amɛtee nɔ amɛgbegbee Filistibii lɛ kɛjɛ Mikmash kɛtee Ayalon,+ ni etɔ mɛi lɛ bliboo. 32 No hewɔ lɛ, mɛi lɛ dɔ amɛhiɛ amɛto ta mli nii lɛ anɔ gidigidi, ni amɛmɔmɔ gwantɛŋi kɛ tsinai kɛ tsinabii lɛ ni amɛgbegbee amɛ yɛ shikpɔŋ, ni amɛye loo lɛ kɛ lá lɛ fɛɛ.+ 33 No hewɔ lɛ, ayabɔ Saul amaniɛ akɛ: “Naa! Mɛi lɛ miifee esha amɛmiishi Yehowa, ejaakɛ amɛmiiye loo lɛ kɛ lá lɛ.”+ Kɛkɛ ni ekɛɛ akɛ: “Nyɛyeko anɔkwa kwraa. Nyɛkokloa tɛ agbo nyɛbahãa mi amrɔ nɔŋŋ.” 34 Kɛkɛ ni Saul kɛɛ akɛ: “Nyɛnyiɛa mɛi lɛ ateŋ ni nyɛkɛa amɛ akɛ, ‘Nyɛteŋ mɔ fɛɛ mɔ kɛ etsinanuu kɛ egwantɛŋ aba ni ebagbe lɛ yɛ biɛ ni eye. Nyɛkayea loo lɛ kɛ lá lɛ ni nyɛkɛfee esha nyɛshi Yehowa.’”+ No hewɔ lɛ, amɛteŋ mɔ fɛɛ mɔ kɛ etsinanuu ba nakai nyɔɔŋ lɛŋ ni ebagbe yɛ jɛmɛ. 35 Ni Saul ma afɔleshaa latɛ ehã Yehowa.+ Enɛ ji klɛŋklɛŋ afɔleshaa latɛ ni ema ehã Yehowa.

36 Sɛɛ mli lɛ, Saul kɛɛ akɛ: “Nyɛhãa wɔkpelekea shi kɛtiua Filistibii lɛ nyɔɔŋ ni wɔloo amɛnibii aahu kɛyashi hulu baaje. Wɔshiŋ hiɛkãalɔ kome po.” Kɛkɛ ni amɛkɛɛ lɛ akɛ: “Feemɔ nɔ fɛɛ nɔ ni sa ohiɛ.” Ni osɔfo lɛ kɛɛ akɛ: “Nyɛhãa wɔtsia wɔbɛŋkɛa anɔkwa Nyɔŋmɔ lɛ yɛ biɛ.”+ 37 Ni Saul bi Nyɔŋmɔ nii akɛ: “Mikpeleke shi kɛtiu Filistibii lɛ lo?+ Ani okɛ amɛ baawo Israel dɛŋ?” Shi Nyɔŋmɔ hãaa lɛ hetoo yɛ nakai gbi lɛ nɔ. 38 No hewɔ lɛ, Saul kɛɛ akɛ: “Nyɛbaa biɛ, nyɛ maŋ lɛŋ onukpai, ni wɔbatao naa wɔkwɛ akɛ, mɛɛ esha afee ŋmɛnɛ. 39 Ejaakɛ gbii abɔ ni Yehowa, mɔ ni kpɔ̃ Israel lɛ hiɛ kã nɛɛ, kɛ́ mibinuu Yonatan ni po lɛ, esa akɛ egbo.” Shi asraafoi lɛ ateŋ mɔ ko mɔ ko ejieee naa. 40 Kɛkɛ ni ekɛɛ Israel fɛɛ akɛ: “Nyɛdamɔa fã kome, ni mikɛ mibinuu Yonatan hu baadamɔ fã kroko.” Kɛkɛ ni amɛkɛɛ Saul akɛ: “Feemɔ nɔ fɛɛ nɔ ni sa ohiɛ.”

41 Kɛkɛ ni Saul kɛɛ Yehowa akɛ: “Ao Israel Nyɔŋmɔ, okɛ Tumim+ lɛ ahã hetoo!” Kɛkɛ ni eyagbee Yonatan kɛ Saul nɔ, ni asraafoi lɛ ye amɛhe. 42 Agbɛnɛ Saul kɛɛ akɛ: “Nyɛfɔ̃a mi kɛ mibinuu Yonatan nɔ oshiki.”*+ Ni egbee Yonatan nɔ. 43 Kɛkɛ ni Saul bi Yonatan akɛ: “Kɛɛmɔ mi, mɛni ofee?” No hewɔ lɛ, Yonatan kɛɛ lɛ akɛ: “Misa minaa wo fioo ko kɛkɛ yɛ midɛhiɛmɔtso lɛ naa.+ Naa mi! Abaanyɛ agbe mi!”

44 Kɛkɛ ni Saul kɛɛ akɛ: “Yonatan, kɛji mihãaa ogbo lɛ, no lɛ, Nyɔŋmɔ kɛ mi aye ni ekɛ mi aye ekoŋŋ.”+ 45 Shi asraafoi lɛ kɛɛ Saul akɛ: “Ani esa akɛ Yonatan, mɔ ni ye kunim* kpele+ nɛɛ ehã Israel lɛ, agbo? Ebaŋ lɛ nakai kɔkɔɔkɔ! Gbii abɔ ni Yehowa hiɛ kã nɛɛ, eyiteŋ tsɔi kome ganee po esaŋ shikpɔŋ, ejaakɛ Nyɔŋmɔ kɛ lɛ tsu nii ŋmɛnɛ gbi nɛɛ.”+ No hewɔ lɛ, mɛi lɛ here* Yonatan, ni egbooo.

46 No hewɔ lɛ, Saul kpa Filistibii lɛ tiumɔ, ni Filistibii lɛ tee amɛ diɛŋtsɛ amɛshikpɔŋ lɛ nɔ.

47 Saul nine shɛ Israel maŋtsɛyeli lɛ nɔ ni ekɛ ehenyɛlɔi lɛ wu yɛ he fɛɛ he, ewu eshi Moabbii+ lɛ, kɛ Amonbii+ lɛ, kɛ Edombii+ lɛ, kɛ Zoba+ maŋtsɛmɛi lɛ, kɛ Filistibii+ lɛ; ni he fɛɛ he ni eyaa lɛ, eyeɔ amɛnɔ kunim. 48 Ni ekɛ ekãa wu eshi Amalekbii+ lɛ, ni eye amɛnɔ kunim, ni ehere Israel kɛje mɛi ni loɔ amɛnibii lɛ adɛŋ.

49 Saul bihii ji Yonatan, Ishvi, kɛ Malki-shua.+ Ni eyɛ biyei enyɔ; atsɛɔ onukpa lɛ Merab,+ ni atsɛɔ gbekɛ lɛ Mikal.+ 50 Atsɛɔ Saul ŋa lɛ Ahinoam, ni eji Ahimaaz biyoo. Saul tatsɛ ji Ner binuu Abner,+ Saul tsɛkwɛ̃ lɛ. 51 Saul tsɛ ji Kish,+ ni Abner tsɛ ji Ner,+ ni Ner tsɛ ji Abiel.

52 Saul gbii lɛ amli fɛɛ lɛ, ekɛ Filistibii lɛ wu tai gbeyeigbeyei.+ Kɛ́ Saul na nuu ko ni he wa loo nuu kãkãlɔ ko lɛ, ekɛ lɛ fataa esraafoi lɛ ahe.+