1 Maŋtsɛmɛi

12 Rehoboam tee Shekem, ejaakɛ no mli lɛ, Israel fɛɛ eba Shekem+ koni amɛbawó lɛ maŋtsɛ.+ 2 Nebat binuu Yeroboam nu he, (no mli lɛ, eyɛ Ejipt lolo ejaakɛ ejo foi yɛ Maŋtsɛ Solomon hewɔ ni etee eyahi Ejipt),+ 3 ni amɛtsu ayatsɛ lɛ kɛba. No sɛɛ lɛ, Yeroboam kɛ Israel asafo muu lɛ fɛɛ ba Rehoboam ŋɔɔ amɛbakɛɛ: 4 “Opapa hã wɔkɔɔŋtso lɛ tsii.+ Shi kɛ́ ohã nitsumɔ ni wa ni opapa hã wɔtsu lɛ fee nɔ ni waaa kɛhã wɔ, ni ohã kɔɔŋtso ni tsii ni ekɛfɔ̃ wɔnɔ lɛ fee nɔ ni etsiii lɛ, wɔbaasɔmɔ bo.”

5 Kɛkɛ ni ekɛɛ amɛ akɛ: “Nyɛyaa dã; ni nyɛkua nyɛsɛɛ kɛbaa miŋɔɔ yɛ gbii etɛ sɛɛ.” No hewɔ lɛ, maŋbii lɛ tee.+ 6 Kɛkɛ ni Maŋtsɛ Rehoboam yabi ŋaawoo kɛjɛ hii onukpai ni sɔmɔ etsɛ Solomon akɛ eŋaawolɔi be ni eyɔɔ wala mli lɛ adɛŋ ekɛɛ: “Mɛɛ ŋaa nyɛbaawo mi yɛ bɔ ni esa akɛ mihã maŋbii nɛɛ hetoo mihã lɛ he?” 7 Amɛkɛɛ lɛ akɛ: “Kɛ́ ŋmɛnɛ gbi nɛɛ osɔmɔ maŋbii nɛɛ ni obo amɛ toi ni ohã amɛ hetoo ni sa lɛ, amɛ hu amɛbaasɔmɔ bo daa.”

8 Shi ekɛ ŋaa ni hii onukpai lɛ wo lɛ lɛ eyatsuuu nii, ni eyabi ŋaawoo kɛjɛ oblahii ni ekɛje nɔ ni amrɔ nɛɛ amɛsɔmɔɔ lɛ lɛ adɛŋ.+ 9 Ebi amɛ akɛ: “Mɛɛ ŋaa nyɛbaawo mi yɛ bɔ ni esa akɛ mihã maŋbii lɛ ni bakɛɛ mi akɛ, ‘Hã kɔɔŋtso ni opapa kɛfɔ̃ wɔnɔ lɛ afee nɔ ni etsiii lɛ’ hetoo lɛ he?” 10 Oblahii ni ekɛje nɔ lɛ kɛɛ lɛ akɛ: “Nɔ ni esa akɛ okɛɛ maŋbii nɛɛ ni bakɛɛ bo akɛ, ‘Opapa hã wɔkɔɔŋtso lɛ tsii, shi bo lɛ, hã efee nɔ ni etsiii kɛhã wɔ’ lɛ nɛ; kɛɛmɔ amɛ akɛ, ‘Miwaosɛɛkpelɔ po baati fe mipapa hɛ. 11 Mipapa kɛ kɔɔŋtso ni tsii fɔ̃ nyɛnɔ, shi mi lɛ, mahã nyɛkɔɔŋtso lɛ atsii fe no. Mipapa kɛ kpãi yi nyɛ, shi mi lɛ, mikɛ kpãi kɛ amɛhe ŋmei* baayi nyɛ.’”

12 Yeroboam kɛ maŋbii lɛ fɛɛ ba Rehoboam ŋɔɔ yɛ gbi ni ji etɛ lɛ nɔ, tamɔ bɔ ni maŋtsɛ lɛ kɛɛ akɛ: “Nyɛkua nyɛsɛɛ kɛbaa miŋɔɔ yɛ gbi ni ji etɛ lɛ nɔ” lɛ.+ 13 Shi maŋtsɛ lɛ kɛ ŋaa ni hii onukpai lɛ wo lɛ lɛ eyatsuuu nii ni ehã mɛi lɛ hetoo ni naa wa. 14 Ekɛ ŋaa ni oblahii lɛ wo lɛ lɛ moŋ tsu nii, ni ekɛɛ amɛ akɛ: “Mipapa kɛ kɔɔŋtso ni tsii fɔ̃ nyɛnɔ, shi mi lɛ, mahã nyɛkɔɔŋtso lɛ atsii fe no. Mipapa kɛ kpãi yi nyɛ, shi mi lɛ, mikɛ kpãi kɛ amɛhe ŋmei* baayi nyɛ.” 15 No hewɔ lɛ, maŋtsɛ lɛ booo maŋbii lɛ toi, ejaakɛ Yehowa ji mɔ ni hã eba lɛ nakai,+ bɔ ni afee ni Yehowa ahã nɔ ni etsɔ Ahiya,+ Shilonyo lɛ nɔ ekɛɛ Yeroboam, Nebat binuu lɛ aba mli.

16 Be ni Israel fɛɛ na akɛ maŋtsɛ lɛ booo amɛ toi lɛ, amɛkɛɛ maŋtsɛ lɛ akɛ: “Mɛɛ gbɛfaŋnɔ wɔyɔɔ yɛ David mli? Wɔbɛ gboshinii ko yɛ Yishai binuu lɛ mli. Israel ee, mɔ fɛɛ mɔ aya enyɔŋmɔi lɛ aŋɔɔ. Agbɛnɛ David, kwɛmɔ bo diɛŋtsɛ oshĩa nɔ!” Kɛkɛ ni Israelbii lɛ ku amɛsɛɛ kɛtee amɛshĩai.*+ 17 Shi Rehoboam tee nɔ eye Israelbii ni yɔɔ Yuda maji lɛ amli lɛ anɔ.+

18 Kɛkɛ ni Maŋtsɛ Rehoboam tsu Adoram,+ ni ji mɔ ni kwɛɔ mɛi ni anyɛɔ amɛnɔ kɛhã nitsumɔ lɛ anɔ lɛ, shi Israel fɛɛ tswia lɛ tɛi ni egbo. Maŋtsɛ Rehoboam he fee oya ni ebote eshwiili lɛ mli ni ejo foi kɛtee Yerusalem.+ 19 Shi Israelbii lɛ hiɛ David shĩa lɛ hiɛ atua ni amɛtse+ lɛ mli aahu kɛbashi ŋmɛnɛ.

20 Be ni Israel fɛɛ nu akɛ Yeroboam eku esɛɛ kɛba lɛ nɔŋŋ lɛ, amɛtsu ayatsɛ lɛ kɛba he ni amɛbua amɛhe naa yɛ lɛ ni amɛwó lɛ maŋtsɛ yɛ Israel fɛɛ nɔ.+ Mɛi lɛ ateŋ mɔ ko kwraa eyafĩii David shĩa lɛ sɛɛ ja Yuda weku lɛ pɛ.+

21 Be ni Rehoboam bashɛ Yerusalem lɛ, amrɔ nɔŋŋ ni ebua Yuda shĩa lɛ fɛɛ kɛ Benyamin weku lɛ naa koni amɛkɛ Israel ayawu koni amɛshɔ̃ maŋtsɛyeli lɛ amɛhã Solomon binuu Rehoboam ekoŋŋ.+ Ebua tawulɔi 180,000 ni atsɔse amɛ lɛ* anaa. 22 Kɛkɛ ni anɔkwa Nyɔŋmɔ lɛ kɛɛ Shemaia,+ anɔkwa Nyɔŋmɔ lɛ gbɔmɔ lɛ* akɛ: 23 “Kɛɛmɔ Solomon binuu Rehoboam, Yuda maŋtsɛ lɛ kɛ Yuda shĩa lɛ fɛɛ kɛ Benyamin weku lɛ kɛ mɛi ni eshwɛ lɛ fɛɛ akɛ, 24 ‘Nɔ ni Yehowa kɛɛ nɛ: “Nyɛkakwɔa kɛyaa; nyɛkɛ nyɛnyɛmimɛi Israelbii lɛ akayawua. Mɔ fɛɛ mɔ aku esɛɛ kɛya eshĩa, ejaakɛ miji mɔ ni hã enɛ ba.”’”+ No hewɔ lɛ, amɛbo Yehowa wiemɔ lɛ toi ni amɛku amɛsɛɛ kɛtee shĩa tamɔ bɔ ni Yehowa ekɛɛ amɛ lɛ.

25 Kɛkɛ ni Yeroboam tswa Shekem*+ ekoŋŋ yɛ Efraim gɔji lɛ anɔ, ni ehi jɛmɛ. Ejɛ jɛmɛ ni eyatswa Penuel hu*+ ekoŋŋ. 26 Yeroboam kɛɛ yɛ etsui mli akɛ: “Kɛ́ mikwɛɛɛ ni ahi lɛ, maŋtsɛyeli lɛ baaku sɛɛ aya David shĩa+ lɛ ekoŋŋ. 27 Kɛji maŋbii nɛɛ baaya nɔ akwɔ kɛya Yehowa shĩa lɛ yɛ Yerusalem ni amɛyashã afɔlei lɛ,+ amɛtsui baadɔ kɛya amɛnuŋtsɔ Rehoboam, Yuda maŋtsɛ lɛ ŋɔɔ ekoŋŋ. Ni amɛbaagbe mi, ni amɛbaaku amɛsɛɛ kɛya Rehoboam, Yuda maŋtsɛ lɛ ŋɔɔ ekoŋŋ.” 28 Be ni maŋtsɛ lɛ yabi ŋaawoo sɛɛ lɛ, efee shika tsuru tsinabii amagai enyɔ+ ni ekɛɛ mɛi lɛ akɛ: “Kɛ́ nyɛbaaya nɔ nyɛkwɔ kɛya Yerusalem lɛ, ebaatɔ nyɛ tsɔ. Israel, o-Nyɔŋmɔ lɛ ni wó bo kɛje Ejipt shikpɔŋ lɛ nɔ lɛ nɛ.”+ 29 Kɛkɛ ni ekɛ ekome ma Betel,+ ni ekɛ ekroko lɛ hu ma Dan.+ 30 Ni enɛ hã amɛfee esha,+ ni maŋbii lɛ yaa Dan tɔ̃ɔ amɛyajaa nɔ ni yɔɔ jɛmɛ lɛ.

31 Ni emamɔ jamɔhei yɛ hei grɔŋŋi lɛ ni ehole osɔfoi kɛjɛ maŋbii lɛ ateŋ, mɛi ni jeee Levibii.+ 32 Agbɛnɛ hu, Yeroboam to gbi jurɔ ko shishi yɛ nyɔɔŋ ni ji kpaanyɔ lɛ nɔ gbi ni ji 15 lɛ nɔ, tamɔ gbi jurɔ ni ayeɔ yɛ Yuda lɛ.+ Eshã afɔlei ehã tsinabii amagai ni efee lɛ yɛ afɔleshaa latɛ ni ema yɛ Betel+ lɛ nɔ, ni ehã osɔfoi ni ehole kɛhã hei grɔŋŋi lɛ sɔmɔ yɛ Betel. 33 Kɛkɛ ni gbi ni ji 15 lɛ nɔ yɛ nyɔɔŋ ni ji kpaanyɔ lɛ, ni ji nyɔɔŋ ni lɛ diɛŋtsɛ ehala lɛ nɔ lɛ, ebɔi afɔlei shãa yɛ afɔleshaa latɛ ni efee yɛ Betel lɛ nɔ; ni eto gbi jurɔ ko ehã Israelbii lɛ, ni ekwɔ afɔleshaa latɛ lɛ ni eshã afɔlei kɛ lasu afɔlei yɛ nɔ.